ACARA : PABORHATHON St SAHALA SIANTURI MAMONGOTI MASA PANGSIUN Di HKBP PANDAN II Ressort Tigalingga, Minggu 06 Maret 2016

ACARA :

PABORHATHON St SAHALA SIANTURI

MAMONGOTI  MASA PANGSIUN

Di HKBP PANDAN II Ressort Tigalingga, Minggu 06 Maret 2016

============================================================================================

DUNG SIMPUL PAPUNGU PELEAN II

I.            PABORHATHON SINTUA MAMONGOTI MASA PANGSIUN:

01.   Marende No. 15 : 1         “Aut na saribu hali ganda”           (ro ma na pensiun tu jolo rap dohot keluarga)

Ø  Aut na saribu hali ganda saringar ni soarangki, naeng nasa gogo bahenonku mamuji Debatantai. Paboa las ni rohangki hinorhon ni pambaenNa i.

Pdt: Hamu dongan sahuria na pungu di bagas joro on, nuaeng jongjong do ditongatonganta ima Amanta  St. Sahala Sianturi. Nunga digohi tingki pangulaon nasida di hurianta. Na mansohot ma nasida nuaeng sian haparhaladoon di huria i. Alani i tama do pasahatonta hamauliateon ni rohanta tu Tuhanta na mandongani jala  margogoihon, huhut napatauhon nasida salelengon mangulahon haparhaladoon i. Angkup ni une do pasahatonta mauliate nang tu nasida naung manghalojahon, jala mangharonsothon mangulahon ulaon di hurianta. Alani i paborhatonta ma nasida nuaeng laho pensiun.

         Hamu dongan nami St. Sahala Sianturi.  hombar tu Aturan dohot Peraturan ni HKBP, nunga digohi hamu panjouon na sahat tu hamu marhobas di huria i. Na mandok mauliate do huria on tu Tuhanta na patauhon hamu marhobas hombar tu tohonan na sahat tu hamu. Nunga digohi hamu pangoloionmuna marhite panghobasion tohonan Sintua. Dipasahat hamu do napinangido ni hata ni Tuhanta na mandok:”Saat ula Tohonanmi”.

         Na tama do hamauliatehonon ni hurianta siala  pangulaonmuna na saleleng on di Tuhanta, anggiat parbue ni na hinobasanmuna na saleleng on di jolo ni Tuhanta gabe pelean na hushus jala mamboan pasu-pasu tu hagaganda ni na porsea dohot hatotogu ni haporseaon di angka  na hinobasanmuna .

         Alani i; jongjong ma hita sahuriaon martangiang tu Tuhanta (Jongjong ruas): Ale Debatanami, na gok asi dohot holong ni roha, ro do hami tu adopanMu laho pasahathon hamauliateon ni rohanami siala pangurupionMu di naposoM on saleleng diparar Ho manghobasi huriaM. Nunga sahat diula ulaon ha-Sintuaon na pinasahatMi: Sai baen ma ramos parbue ni panghobasion nasida di  ruas ni HuriaM tu hangoluan salelengna. Nang naposoM pe sai asi ma rohaM ramoti ma nasida, lam ramoti ma nasida dung mamungka pensiun sian panghobasionna songon sahalak Sintua. Molo tung dijalo pensiun sian ha-Sintuaon, sai ramoti jala patogu ma pos ni rohanasida  tu Ho. Palas  ma roha nasida tongtong, pahipas ma pamatangna laho mandai hinauli ni tingki pensiun songon jolma na marpanghilalaan, marroha jala na martondi hombar  tu lomo ni rohaM.  Togutogu jala ramoti ma nasida di angka  ariari ni hatuatuaonna asa tongtong manaili tu Ho, ai sian Ho do haroroan ni hadameon, las dohot sonang  ni roha di bagasan Tondi Parbadia. Pasupasu ma nang keluarga dohot sisolhot nasida,  asa rap mangolophon jala manghamauliatehon pasupasu najinalo  nasida sian Ho. Angkup ni i marpamuati ma rohaM di nasa hagaleon dohot hahurangan ni dongannami on di nasa pangulaon dohot panghobasionna na sailaon, sesai ma i ala ni  holong ni rohaM. Pinuji ma Ho  ale  Tuhan Jesus  ro  di saleleng ni lelengna. Amen.

02.Manjaha SK Praeses Distrik VI Dairii Taringot tu  Sintua Pensiun   (Parhalado Ressort)

03.Paborhathon na pensiun (dijalang Pdt ma Sintua na pensiun):

               Ale naposo ni Debata, St. St. Sahala Sianturi., mardongan pos ni roha di Debata Ama dohot AnakNa Tuhan Jesus Kristus dohot Tondi Porbadia, hupaborhat hami ma hamu laho pensiun sian Sintua.

               Dipasu pasu Tuhanta Jesus Raja Ni Huria ima panghobasionmuna na saleleng on, jala diramoti ma hamu di angka ari-ari di ngolumuna jala diparrohai hamu mandai hinauli ni tingki pensiun di angka ariari sidalananmuna dope tu tingki na ro on. Amen.

04.Mandok Hata:

                                                   1. Na Pangsiun/Keluarga

                                                   2. Sian ruas

                                                   3. Parhalado Huria & Ressort

05.Pasahat Cinderamata           1. Sian Huria

                                                   2. Sian Ressort

06.Marende BE. No. 190 : 3      “Las rohangku situtu”                    (laos jongjong ma saluhutna)

Ø      Las rohangku situtu, ai parjambar au tutu. Di na denggan sasudena, pinarbaga ni Debata. Di sude na burju i mangihuthon Jesus i.

07.Tangiang Pelean – Ale Amanami – Panutup/Pasupasu

08.Amen – Amen – Amen

EV: Pilippi 3:17-4:1 MARSIHOHOT DIBAGASAN TUHAN I

BAHAN SERMON  PANGULA NA GOK TINGKI  HKBP DISTRIK VI DAIRI

TU MINGGU REMINISCERE

21 FEBRUARI 2016

EV: Pilippi 3:17-4:1

MARSIHOHOT DIBAGASAN TUHAN I

I.                   Patujolo

Huria pilippi i ma huria na tung mansai dihaholongi Apostel Paulus sian sude huria nahinobasan na. Ala adong halobianna, Halobian i ma  ala tung diparsitutuhon nasida do mangalehon rohana mangurupi Apostel Paulus, na marpardomuan tu angka na ringkot di si Paulus, dohot sangkap asa tulus ulaon pamaritahonon di barita nauli (1:3-5,4:10-20).

Ditongos Apostel Paulus do suratna na tu huria Pilippi on sian hurungan (1:7). Tarhurung ibana, ala didok mambahen hagaoron marhitehite barita nauli napinasahatna, gabe diuhumi panggomgomi ni harajaon Rom. Nang pe tarhurung Apostel Paulus, ndada na gabe mansohot anggo ulaon panghobasionna di Ulaon pamaritahonon di Barita Na Uli i. Lumobi ma muse ala huria Pilipi huria na tung di halomohon roha na. Tung dilehon ibana do ianggo rohana  laho paihut ihut angka haimbaruon namasa di huria i. Marhite si Epaproditus, ima sahalak na porsea na gabe parhitean ni huria Pilippi lao pasahatton tongosan nasida tu Apostel Paulus. Tontu laos sahat do nang informasi angka barita na masa di huria i tu ibana`  Alani di tongos Apostel Paulus surat on laho patoguhon haporseaon nasida asa marsihohot dibagasan Kristus, gabe tiruan na denggan di angka dongan, martoruk ni roha maniru Tuhan i

1.      Apostel Paulus dohot Huria Pilippi

Marragam do angka masalah naniadopan ni huria Pilippi, lumobi ma muse dung na so rap be nasida dohot Apsotel i, dung ditangkup jala tarhurung si Paulus. Deba sian masalah na di parungkilhon nasida ima ala poda ni angka panurirang pargapgap 1:17. Adong muse ogaoga (ancaman) sian pihak panggomgomi (1:27-28), elaela sian horong ni sundut na geduk jala na marbalik sian barita nauli (2:15) asa mulak songon jolma sipelebegu, jala masa do nang parungkilon di nasida ala pangantusion na sala taringot tu pangulahonon di ruhut parsunaton songon naung hinasomalhon ni halak Jahudi (3:1-21). Tontu panghorhon ni saluhut masalah na niadopan ni Huria i, dihilala Apostel i do hinaringkot ni pangapoion tu nasida, asa anggiat manahan nasida jala hot dibagasan Tuhan i. Songon Apostel i na hot tongtong dibagasan Tuhan i, nang dibagasan namangadopi parungkilon ibana. Hasatiaon ni Apostel Paulus tangkas doi marhite pandohan “Ai Kristus do hangoluan di ahu jala laba nang hamatean” ( Pil 1:21. Sada hal na luar biasa do panindangion i. Molo tauji mandodo habaranionna i tu ganup halak kristen di partingkianta si saonari tung ambal situtu do tahe sian gogo ni panindangionta. Alai na gabe tiruan do i dihita , asa naeng songon ibana na tongtong martoruk ni roha maniru Tuhanta i (2:1-11). Tangkas do taboto Apostel Paulus pargogo hian laho mamusa halak kristen ,alai gabe pargale dung di bagasan Tuhan i, jala na sangap hian alai gabe lea diroha ni jolma ,ai pola ibana tarhurung alani barita na uli i.

2.      Gabe Tiruan di Halak na Porsea, Jala Marsihohot dibagasan Tuhan i

Diturpuk Jamita (Pilippi 3:17-4:1) on, taida do disi songon parbue ni hagogoon ni panindangion ni Apostel Paulus. I ma paboa naung dibagasan Kristus i ngoluna.Hata pandohan ni Apostel i mandok; ”Rap sitiru ahu ma hamu ale angka dongan,(17).Ido songon bukti paboa na hot ibana dibagasan Tuhan i.

Pandohan i, i ma sada hata panindangion na luar biasa, ai ndang dung adong dapot hita bentuk pernyataan na songon i sian angka panurirang di Padan na Robi, nang sian angka sisean ni Tuhan Jesus sandiri .Tuhan Jesus na parjolo sahali na manghatingdakon pandohan i,i ma di nanidok-Na;’’Ihuthon hamu ma Ahu’’,(Mat 4:19),dohot di Joh 10:11;Parmahan na denggan do ahu. Hasadaon ni Tuhan Jesus maradophon Debata, i do na gabe sorminan di hasadaon ni Apostel Paulus di bagasan Tuhan i. Gabe mampu ibana mandok’’Rap sitiru ahu ma hamu’’, jala laos margogo ibana marpanindangion dinanidokna;’’Saluhut do tarpatupa ahu dibagasan Ibana namargogoihon ahu (Pil 4:13).

Hata pangidoan do i na martujuan asa naeng marhasadahon huria i, ai hasadaon i do na gabe songon sada mual ni gogo di nasida laho mangadopi parungkilon ni adopan nasida. Asa songon Apostel Paulus na sada dohot Jesus i ,naeng gabe songon i nasida sada dohot Apostel i marhite paniruonna. Molo olo nasida maniru Apostel i,mampu ma muse nasida laho pamanathon huhut mamillit angka namarparangehon na denggan na gabe sitiruon nasida. Ditongatonga ni parungkilon Apostel Paulus manosohon parsihohoton manghaposi Kristus, nang pe dipalelele jala dihurungkon , parsihohoton manghaposi Kristus ido nanidokna “Rap sitiru ahu ma hamu” Ikutilah teladanku” ndanda holan manjamitahon ibana alai diparangehon do Jamitanai.

3.      Dibanua ginjang do sambulon ta

“Alai anggo holan di tano on do hita manghirim di Kristus i, jolma na dumangol do hita sian saluhutna” 1 Kor 15:19. Torop halak na sai mamingkiri portibion ido umbahen na didok si Paulus ”Torop do marpangalaho gabe musu ni silang ni Kristus, hamagoan do ujung nasida , butuha nasida do di pardebata, sihailahononna dihasangaphon, angka na di tano on do di parrohahon.  Digoari Paulus do nasida parjambar dihamagoan, ala na so Kristus be marsangap dingolu nasida. Dilehon ma penegasan asa ndada namanongtong ngolu di tano on alai banuaginjang do sambulon ni Tondinta , sian i do tapaimaima Sipangolu hita ima Tuhan Jesus Kristus. Paubaon na do dagingta na lea on gabe doshon dagingna na sangap i, hombar tu hagogoon nai, ai tarpatunduksa do saluhutna tu Ibana

II.                Aplikasi

1.      Minggu Reminiscere Marlapatan “Sai ingot ma Ale Jahowa angka denggan ni basaM, asi ni roha ni Debata do na marmuduhon hita alani Halak na porsea ingkon tongtong do marhaposan jala marsigantung tu asi dohot holong ni roha ni Debata

2.      Gabe tiruan na denggan ma hita tu ganup na humaliang hita, dihuta, dibalian nang di Huria

3.      Unang ma na di tano on sai taharingkoti, jala taparrohahon ai banua ginjang do sambulo ni tondinta

4.      Marsihohot ma hita tongtong dibagasan Tuhan i, Manang aha pe na masa arsak las ni roha pe, ai dihaholongi Debata do ganup naporsea di Ibana  Amen

Pdt Budianto Sianturi

HKBP Ressort Tigalingga

SERAH TERIMA PENDETA HKBP RESORT TIGALINGGA

PANGOJAKHONON PANDITA HKBP RESORT TIGALINGGA DISTRIK VI DAIRI

Pangojakhonon dohot Paborhathon Pandita HKBP Resort Tiga Linga Minggu 22 November 2015

Dari Pdt Sathion P Hutahaen kepada Pdt Budianto Sianturii yang dipimpin Oleh Bapak Pareses Distrik VI Dairi ; Pdt Sunggul P Sirait, S.Th MM. Hadir juga dalam Acara Tersebut Bupati KDH TK II Dairi Jhonny Sitohang Adinegoro , Robert Silalahi Direktur Akper Sidikalang, Direktur SMA Negeri 1 Sidikalang , St JP Sianturi Op Bintang, Rombongan dari HKBP Wahidin Baru, Mannnen Koor Immanuel , Koor Gabungan Maranatha, Koor Sektor IV, Guru Sekolah Minggu HKBP Wahidin Baru dan Utusan dari NHKBP. Dan Semua Jemaat HKBP Tigalingga Resort Tigalingga , Distrik VI Dairi , Acara berlangsung dengan Lancar Penuh Hikmat , Khotbah di layankan Pdt Sunggul P Sirait STh MM , Dan dilanjutkan dengan Acara Ramah Tamah 

Praeses  Pdt Sunggul P Sirait STh MM Mangojakhon Pdt Budianto Sianturi 

Serah Terima Dari Pdt Sathin P Hutahaen Kepada Pdt Budianto Sianturi

Naskah Serah Terima Dibacakan Oleh St SR Gurning

Bupati Dairi ; Ikut Melantunkan Lagu Pujian Bersama Jemaat HKBP Tigalingga 

 Pdt Budianto Sianturi dan Inang Trina Melati Banjarnahor di Ojakhon Praeses 

 Praeses , Kabid Koinoni Pdt Andi Lumban Gaol dan Pdt Ridon Siagian 

 Suasana Acara Gereja , Jemaat , Parhalado dan Bupati Dairi 

 NHKBP Tigalingga

 Tulang Purba dan Mertua Pdt B Sianturi   Marbun Mangupahon Dekke 

  Acara Ramah Tamah dan Makan Bersama , Hadir Robert Silalahi Direktur Akper Sidikalang 

 Keluarga Pdt B Sianturi

 Mannen Koor Immanuel HKBP Wahidin Baru Medan 

Menyampaikan Berkat 

Pembacaan naskah serah Terima

TAHUN PEREMPUAN HKBP WAHIDIN BARU

Pesta Puncak Taon Parompuan HKBP Wahidin Baru Minggu 24 Mei 2015

Panitia Taon Parompuan Mamuhai Gondang dalam Pesta Puncak Taon Parompuan HKBP Wahidin Baru Minggu 24 Mei 2015

Pdt DR Darwin Lumbantobing Melayankan Firman Tuhan dalam Pesta Puncak Taon Parompuan

Pdt Budianto Sianturi , Sebagai Liturgis ( Agenda )

Pdt DR Darwin Lumbantobing Mangulosi Pdt Gerhard Sihombing MTh

Kontingen Paduan Suara Sektor I HKBP Wahidin Baru ,Conductor Linda Mora Purba

Kontingen Paduan Suara Sektor II HKBP Wahidin Baru, Cond : Ny Saragi Br Manullang

Kontingen Paduan Suara Sektor III HKBP Wahidin Baru Cond : Rusmida Sagala SPd

Kontingen Paduan Suara Sektor IV HKBP Wahidin Baru, Cond St M Br Sinaga S.Pd

Doa Berkat Oleh Pdt DR Daewin Lumbantobing & Pdt Budianto Sianturi

Ina Pararikamis Mamboan Silua

Remaja NHKBP Pasahathon Silua

Sektor Sektor Pasahat Silua

Pdt Leonardo Sinambela STh MPDk manortor Bersama Pdt Budiianto Sianturi dan Ruas

Ny Pdt Leonardo Sinambela/Br Hutahaean, Ny Pdt GP Sihombing Br Tarihoran dan Ny Pdt B Sianturi Br Banjarnahor

Ketua : Ratna Siburian S.PD, Tinar Manihuruk dan Pdt B Sianturi Memberikan Pengarahan

Ny Pdt Dr Darwin /Manta Br Siahaan & Ny Pdt B Sianturi/Trina Melati Banjarnahor AMk

 

Pemenang Festival Paduan Suara Taon Parompuan HKBP Wahidin Baru 

Juara I : No Undi 4 Sektor II

Juara II : No Undi 1 Sektor III

Juara III : No Undi 2 Sektor I

Juara IV : No Undi 3 Sektor IV 

Conductor Terbaik : Rusmida Sagala S.Pd No Undi 1 Sektor III

Kontingen Tervavorit : No Undi 2 Sektor I 

Dewan Juri 

Pdt TPL Rajagukguk 

Biv Tiur P Siagian 

Gr Marjejer Aritonang

r

Panitia dan Parhalado Manortor

Ndang Marpansohotan Asi ni roha ni Debata Andung 3:22-33

Jamita Minggu, 28 Juni 2015: Andung  3 : 22 - 33

Oleh : Venpri Lumban Gaol

Ndang marpansohotan asi ni roha ni Debata

Patujolo

Aha do holong? Aha do umbahen na tadok i holong? Godang do sian hita mambahen pangantusion ni holong, molo na denggan na hujalo sian halak (manang sian ise pe), ido holong, manang angka pangalaho na so mambahen jut ni roha, ido holong na sian dongan. Molo hata sipaingot, pinsang-pinsang, nang songoni uhum, ndang tadok i holong, boi sajo doi gabe tadok: Hajungkaton…Umbahen i do ndang piga halak na rade dipaingot jala paingothon (di kritik atau mengkritik), ndang piga halak na rade dipinsang, apalagi ndang piga halak na rade manjalo muruk ni dongan ala ni hahurangan ni parange niba. Suang songoni do nang hita (jolma) maradophon Tuhan i. Jotjot do hita menilai holong ni roha ni Debata, molo saut na tapngido, saut na taparsitta, jala tung so hurangan hita dingolunta on. Alai molo ro arsak, na hurang singkop di rohanta, sai tadok doi hajungkaton manang uhum na sala sian Debata. Antong, holong ni roha ni Debata sasintongna ima: molo olo dope Debata “MANGANTOI” hita, ditingki na lehet manang na so lehet, ditingki arsak nang las ni roha. Pangantoion dia ma I? Saluhut na ma i, ndang mardia imbar. Saluhut na pinamasa ni Debata, holan asa paulihon hita doi, tu na dumenggan, ai manumpal tu na denggan do saluhut pambahenan ni Debata. Ndang lomo roha ni Debata mate jolma i dibagasan hadosaonna, umbahen sai dipaingot Tuhan i marhite angka na masa dingolunta. Suang songoni ma na masa tu bangso Israel (Juda), ala ni dosa ni nasida, di uhum Debata, asa mananda nasida di dosana, diboto nasida pangalahona naung sala, jala asa mulak tu Debata. Hita pe, taboto ma dalan ni ngolunta manang naung sala manang na dang. Molo tung nunga sala mangalangka hita, jala sanga di uhum Debata ala ni dosanta, mulak ma hita tu Debata, ai didok: SALELENG LELENGNA DO ASI NI ROHA NI DEBATA, JALA SAI MULAK RATA DOI GANUP SOGOT….

Hatorangan

Ende Andung sian Panurirang Jeremia; na sinurat ni Panurirang Jeremia (586 – 585 sM). Saluhut isi ni bukku on, naeng patanakhon tu saluhut bangso Israel, nang jolma si saonari dohot na naeng ro, mandok:”hasusaan i maruju doi, hasusaan saonari dohot panghirimon di ari na mangihut. Bukku on jotjot do di jaha on ditingki ari pasiahon bulan Ab (parsitongaan ni bulan Juli: goar ni bulan, dimulai sian bulan tolu: Nisan {Neh. 2:1; Est. 3:7}, Iyar, Siwan {Est. 8:9}, Tamus, Ab, Elul {Neh. 6:15}, Tisyri, Markhesywan, Kislew (Za. 7:1; Neh. 1:1}, Tebet (Est. 2:16}, Syebat {Za. 1:7}, Adar {Ezra 6:15; Est. 3:7}= bulan dung Habuangan Babel), ditingki bangso Israel mambahen parningotan ari hasesego (kehancuran) Jerusalem. Nahundul do panurirang i huhut tumatangis marnida Jerusalem, ai nunga tung tangkas diida ibana manang na songon dia ni gogo jala hinabalga ni uhum na jinalo ni bangso i, gabe pola songoni rimas ni Debata maradophon bangsoNa sandiri. Saluhutna i ndang ala ni na so lomo roha ni Debata di bangsoNa i, ndang na so holong rohaNa, alai uhum na binahen ni Debata, saluhut na masa i ala ni dosa ni angla raja nang bangso i sandiri. Jala nunga lam jonok partingkian mandabu uhum i, uhum na tung mansai balga. Alai nang pe songoni uhum na nanaeng masa i, ianggo panurirang Jeremia hot do parnidaanna taringot tu Debata. Hot do Debata na sintong, adil jala gok asi ni roha di sandok pambahenanNa tu saluhut halak angka na olo marhamubaon ni roha. Jadi pandok ni bukku Andung on, sai dilehon Debata pe tingki di nasida laho mulak tu dalan ni Debata, jala manghirim nasida di asi ni roha nang haluan na sasintongna na pinarade ni Debata. Unang gabe tubu hasoraton (putus asa), ai uhum i pe dibahen Debata, holan asa mangajari jala paingothon bangso i doi, alai ditingkina sai na muba do i gabe parolopolopon bolon.

Nian molo di ida panurirang i pangalaho nang pambahenan ni bangsoNa i maradophon Debata, tung so adong be ni jumpang di nasida asi ni roha, ai manang na marpiga hali sai dilehon partingkian i, alai na maol  situtu do bangso i marhamubaon ni roha (Andung 2). Ndang marna di olio nasida pandok ni angka panurirang, alai lam dijugulhon do rohana mardosa. Umbahen ido, sai didosak panurirang Jeremia saluhut nasida, asa diingot nasida muse Debata, asa diingot parasiroha do Debata, jala lambat tarrimas, gok holong jala hasetiaon, jala burju do Ibana tu sandok jolma na mangasahon hadirion ni Debata. Taida ma na tarsurat i: Ndang marpansohotan asi ni rohana i, mulak rata do i tahe ganup sogot, godang ma tutu habonaronmu. Aha do lapatanna?

1.        Rimas ni Debata, sangombas doi, alai holong dohot asi ni rohaNa ndang mamparsohotan. Ndang hea ditolak Debata Juda, ai nasida do bangso na pinarbaga i (bangsa perjanjian), jala tung godang situtu dope sangkap ni Debata nanaeng sipasautonNa tu nasida jala marhite nasida.

2.        Na basa do Tuhan (Tuhan itu baik), jala parasiroha godang tu angka na sai paimahon Ibana dibagasan torup ni roha jala panolsolion na tutu

3.        Tuhan patuduhon asi ni rohaNa dung jumolo saut uhum na ingkon honahononNa tu bangso i

Siboanon tu jamita

Antong, unang holan uhum ni Debata na taida, alai taida ma manang na songon dia do holong manang haburjuon ni Debata tu hita jolma – Psalm 103 : 3 – 8

1.        Disesa Tuhan i do dosanta (ay. 3)

2.        Dipamalum do sahitta (ay. 3)

3.        Ditobus Tuhan i do hita sian hamagoanta (ay. 4)

4.        Parjambar dibahen Debata hita, ima tumpal denggan basa dohot asi ni roha

5.        Dipamahap do hita disandok parngoluanta jala dipargogoi

6.        Dipatupa Debata do hatigoran tu hita, jala tingkos do uhum na sian Ibana

7.        Dipabotohon do tu hita angka dalanna asa unang lilu hita (ay. 7)

8.        Parasiroha jala pardenggan basa do Jahowa, lambat tarrimas jala parasiroha godang.

Sian saluhut na sinurathon di bukku on, saotik do pe on na boi taida sian Tuhan, ala tung masnai godang dope na boi taida denggan basa ni Debata. Jala na rumingkot siingotonta, sai dipaimbaru do asi ni rohaNa ganup manogot i, antong: jumolo parade dirim manjalo asi ni roha ni Debata di manogot i. ASa taingot, godang do hita na so patut manjalo i, ala ni i jumolo patau dirim manjalo asi ni roha ni Tuhan, dungi lehononnama di ho. Jala ganup manogot, ingkon ingotonmu mandok mauliate, jala sai pasunggulhon ganup tingki tu bagasan roham, pardenggan basa do Jahowa jala gok asi ni roha do Ibana. Patuduhon ma dibagasan pangalaho, parange tanda na tahaposi do Debata jala taboto, sian Ibana do saluhutna.

Antong, molo pe tung sai songon na mandao Debata di rohanta, taingot ma: ndang hea dao Debata sian hita, rohanta do na mandao. Ndang hea ditadinghon Tuhan i hita, hita do na manadingkon Ibana. Manang aha na masa, dohot na tajalo sian Debata, ingkon tadok mauliate…ndang adong na sala pambahenan ni Debata, sintong do dalan ni Tuhan i. Uhum na sain Ibana, holong doi, asa unang tarlalap hita, hamoraon dohot hapogoson, dalan doi asa tatanda Debata, sangap holong doi asa serep marroha hita, hagabeon ang na so gabe, holong doi asa tahaposi Ibana, jala di Ibana do huaso nang ngolunta. Amen!

JAMITA TU MINGGU 31 MEI 2015 JESAYA 6:1-8

 

 

JAMITA MINGGU TRINITATIS, 31 Mei  2015 Jesaya 6 : 1 – 8

  Oleh :Pdt SRP Aritonang S.Si

Patujolo :

Masa do angka halumlamon di tongatonga ni bangso Israel tarlumobi ma di ngolu haporseaon uju di ngolu ni Panurirang Jesaya hatiha i. Di situasi na masa songoni, disuriranghon si Jesaya do taringot tu HABADIAON NI DEBATA, tu angka bangso Israel nang panggomgomina pe.  Adong tolu rumang ni na disoroti ni Panurirang Jesaya di parngoluon ni bangso i, :

Na parjolo ; taringot tu ngolu parugamaon na ingkon satia holan tu Debata Jahowa sambing. Na paduahon ; taringot tu ngolu sekuler na marhadomuan tu ngolu sosial dohot ekonomi naeng ma ingkon marojahan tu dalan hatigoran ni Debata. Na patoluhon ; taringot tu ngolu politik naeng ma nian manghajongjonghon paboa Debata Jahowa do Raja ni sude angka raja na di portibi on. Na tolu bidang parngoluon na ginoaran di ginjang nunga dilanggar jala dilecehkan angka panggomgomi hatiha i. Asa ido umbahen disoarahon si Jesaya asa ganup ma mangaradoti habadiaon ni JAHOWA.

Hatorangan :

Turpuk on ima panjouon ni Debata tu si Jesaya gabe sada Panurirang. Nalnal do dipapatar Debata HabadiaonNa dibagasan panjouonNa i.

Ayat 1 :

Di tingki taon panjouon ni Jesaya gabe panurirang, marujung ngolu do raja Usia. Pandohan di ayat 1 on na mandok ; “Hundul Tuhan i diatas ni habangsa na marmulia”, naeng mangondolhon ia sude huaso ni jolma di portibi on ingkon marhaunduhon do i diadopan ni Debata. Debata do na mangatasi angka panguaso na di portibi on.

Ayat 2 :

Sada gombaran taringot tu hajongjongan ni angka surusuruan seraphim dison naeng papatarhon habadiaon ni Debata do, jala naeng pabotohon na so adong talup jala Manahan jongjong di adopan ni Debata, holan sada do na boi tarpatupa ima marsomba dohot mamuji habadiaon ni Debata.

Ayat 3 :

Ayat on ima sada panindangion dohot pujian ni angka seraphim siala habadiaonNa, hamuliaonNa nang hausoNa pe. Tama do Ibana sipujion, ala ndada holan tu bangso Israel marsinondang habadiaon dohot hamuliaonNa i, alai tung saluhut liat ni portibi on do.

Ayat 4 – 5 :

Didok dison “ Humuntal ma angka ojahan “ , na marlapatan do i songon sada boaboa taringot tu haroro ni Debata di panjouon ni si Jesaya asa gabe sada panurirang. Angka hitir do dihilala si Jesaya anggo dimulana taringot tu panjouonNa i. Ai dirajumi ibana do paboa jolma na gale jala parbibir na ramun do anggo ibana. Boi dohonon mian do roha biar di si Jesaya laho manurirangi di tonga tonga ni bangso i siala nunga tung mansai lumlam dihilala ibana parngoluon ni bangso i hatiha i.

Ayat 6 – 7 :

Na binahen ni angka surusuruan di ayat 6 – 7, na mambuat gara jala na manjama pamangan ni si Jesaya, laho patubuhon keberanian do i di si Jesaya, asa tung tarjalo ibana hapanurirangon i. Asa tangkas diboto si Jesaya paboa Jahowa do na marsuru ibana. Alani, na so pasombuon ni Jahowa ibana di na manurirangi bangso i, jala na ingkon Debata do na mangalehon hagoon tu ibana laho manghatahon jala manghatindanghon habadiaon ni Jahowa.

Ayat 8 :

Dung tangkas dipatupa angka surusuruan i tu si Jesaya songon patubu keberanian di ibana songon na tarsurat di ayat 6 – 7 na diginjang, tarbege ibana ma soara ni Tuhan i na manjouhon asa ise do suruonNa gabe sada panurirang di tonga tonga ni bangso i, manigor hatop do dialusi si Jesaya marhite hata : “ dison do ahu, suru ma ahu “. Boi taida dison, nunga tubu be habaranion i di si Jesaya laho dipabangkit gabe sada panurirangNa. Ala pos ni rohana tu Debata, olo ibana tarjou manghatindanghon habadiaon ni Debata di tonga tonga ni bangso Israel.

Panimpuli :

-          Na mangolu do hita nuaeng ditonga tonga ni partingkian dohot situasi na so pola dao marasing sian situasi na masa di bangso Israel hatiha di turpuk on di ngolu ni panurirang Jesaya. Halumlamon na masa nuaeng ndada holan masa di ngolu ni haportibion alai ngolu di parhuriaon pe nunga be mulai disosopi.

-          Ndada holan si Jesaya dison na tarjou mamaritahon habadiaon ni JAHOWA, alai tarjou do nang hita songon halak na porsea dohot HuriaNa laho marnida jala manghatindanghon hamuliaon dohot habadiaon ni Tuhanta.

-          Minggu Trinitatis na mansoarahon hasitolusadaon ni Debata Ama, Anak dohot Tondi Parbadia, manjou ganup hita asa jumpang pangokuon, panolsolion, dohot hamubaon ni roha laho papatarhon habadiaon ni Debata Ama dibagasan pangoloion di Tuhan Jesus Kristus  marhite pamintorion dohot gogo na ro sian Tondi Parbadia.

-          Taradoti ma panjouon di ngolu habadiaon i, di angka parsaoranta, keluarga, huta, dohot angka ulaonta na marragam i. Amen.