Jamita : PSALMEN 146 : 1 – 10 “MANONGTONG MAMUJI DEBATA”

 

Minggu XV DUNG TRINITATIS

25 SEPTEMBER 2022

No	Partangiangan Keluarga	Partangiangan Sektor / Wijk / Lunggu
1	Marende BE. No. 10 : 1 – 2 “Hupuji Hupasangap Ho”
2	Tangiang Pamuhai	Votum : A.XV.A.19 – D.XIII.50
3	Manjaha Turpuk : 1 Timotius 6:6-9
4	Marende BE. No. 361: 1-2  “Na denggan situtu do”

Jamita : PSALMEN 146 : 1 – 10     

“MANONGTONG MAMUJI DEBATA”

Hamu angka dongan sahaporseaon!

Molo uju masa angka parungkilon, sahit dohot ragam ni angka sitaonon, sai pintor tinggil do sipareonta laho mambege didia na boi mangalehon pangurupion. Sipata naso siulaon pe taula do asal ma boi hita malua  sian masalah na taadopi i. Nangpe naung lobi 160 taon hakristenonta jala masuk hita tu hamajuon ni zaman, alai adong dope na porsea tu sumangot ni ompu, adong dope na porsea tu hagogoon ni datu, jala adong dope na sai porsea tu angka ramalan-ramalan (horoskop). Angkup ni i nunga torop jolma nuaeng on namardebatahon hepeng, huaso dohot jabatan. Sai dirimpu do molo nunga adong hepeng/huaso/jabatan, nunga singkop be saluhutna, ndang diboto parsatongkinan do saluhutna i, jala dang dapot jolma pangurupion anggo tung sian portibion. Ondo nanaeng patuduhunonon ni Parpsalmen diturpuk jamitaon, paboa holan Debata do sipujion jala sisombaon, ai Ibana do pangurupi na tutu na satia marmudumudu ngolunta saleleng mangolu hita di hasiangan on.  Adonga ma manang piga na boi taida sian turpuk jamita on :

1.    Manontong mamuji Debata saleleng mangolu

Torang do dipatuduhon Parpsalm komitmenna laho mamuji dohot pasangap Debata pola didok ibana “Pujionku ma Jahowa saleleng ahu mangolu, sai endehononku do Debatangku saleleng adong dope ahu”. Pandohan saleleng ahu mangolu dohot saleleng adong dope ahupatuduhon panandaon na tangkas tu Debata, jala posniroha di pandonganion ni Debata na hot ro di salelenglelengna. Ima patuduhon sada komitmen na tangkas paboa saleleng mangolu ingkon mamuji Debata. Tung sura pe adong angka tawaran sian portibion ndang olo be tarela, tung hira na boi pe idaon angka na di portibion patupahon angka tanda halongangan ndang olo ibana tarela manghaporseai i, ai sipata molo adong na marmabarita adong disan pangubati ndang datu ibana alai pangubati do ai dijaha do hata ni Debata lao mangubati, sipata pintor mura do hita tarela jala munggil rohanta, hatop do hita mandok “roha ma pinarroha” nang Tuhanta i pe didokdo “marbisuk ma hamu songon ulok, marroha songon darapati” hape so hea didok Tuhan Jesus songon i (jaha: Mat 10:16). Boasa boi songon i ala sanga talehon rohanta tusi, ndang bulus rohanta songon nanidok ni parpsalm on Pujiongku do Jahowa saleleng ahu mangolu.

2.    Unang ma marhaposan tu angka na diportibion

Tutu adong do arta, huaso dohot hasangapon di portibion, jala diloas Debata do sahat tu jolma termasuk tu angka na porsea, alai na dipaingot ima unang ma marhaposan manang marpangunsandean tusi ai “Ia ruar sogot  tondina i, mulak ma ibana tu tanona, di ari na sasada i pesan ma sude angka sangkapsangkapna i. lapatanna parsatongkinan do sude na diportibion, jala ndang adong na hot muba-uba do sude. Ido umbahen didok di Psalm 118:8-9 “Dengganan marhaporusan tu Jahowa, asa marhaposan tu jolma. Dengganan marhaporusan tu Jahowa, asa marhaposan tu angka raja.Molo marhaposan jolma tuportibion sega do ngoluna, ai tudos tu sada halak na mangunsande tu hau na ranggason, na molo dipangunsande gabe laos rumpak ma i jala ditipa ma ibana sandiri. Alai molo marhaposan tu Jahowa malua ma jolma “Alai angka na marhaposan tu Jahowa maruli hagogoon mardapotdapot, gabe marhabong ni  lali laho manaek. Marlojongi nasida ndang olo loja, mardalani nasida ndang olo mandate.(Jes 40:31).  

3.    Tanda ma pambahenan ni Debata

Ndada asal didok Parpsalm on komitmenna mamuji Debata, alai naung tangkas do jumolo ibana mananda angka pambahenan ni Debata. Ibana do manompa portibion rap dohot nasa isina, ndada holan ditompa alai huhut do disarihon aha na ringkot dingolu na tinompana i. Diondihon do angka na korban ala ni ketidak adilan, diondihon do angka natading maetek, na mabalu dohot anka na susa, dibahen do marnida ngka na mapitung jala mardalan angka na pakpang. Asa tung halongangan bolon do pambahenan ni Debata di portibion. Naso boi diula jolma ido dipatupa Debata, didok Paulus “Na so dung niida ni mata, na so dung binege ni pinggol, na so dung hehe di bagasan roha ni jolma, i do diparade Debata di angka na mangkaholongi Ibana."(1 Kor 2:9). Jala ndang adong na so manjadi (naso marguna) nasa napinatupa ni Debata. Ai Ibana do Raja namanongtong na so marpansohotan do husaona, ibana do Alpha dohot Omega, ndang adong na boi pasohothon Ibana. Ndang olat i, dung haheheon ni Tuhan Jesus torang do didok Ibana “Nunga sahat tu huaso na dibanu ginjang dohot na dibanua tonga on”. Memang boi do ndang apala tangkas tahilala huaso dohot pambahenan ni Debata di ngoluon uju masa angka hamaolon, ala sai dihirim rohanta do alus na hatop (instan) sian Debata. Hape ganup tingki do Debata patuduhon husoNa di ngolunta on, alai jolma i do na so boi marnida/manghilala pambahenan ni Debata di ngoluna ala sai pingkiran ni jolmai do dipangasahon.

Antong hamu angka dongan, manongtong ma hita mamuji Debata, ai holan ibana do Raja na marhuaso jala na gabe pangurupi di ragam ni angka na masa di ngolunta on. Holan Ibana do na boi magantusi hadirionta, jala rade manjalo hagaleonta. Alani marhaposan tu Jahowa ma hita sian nasa rohanta jala unang marpangunsandean hita tu pingkiranta sandiri. Pasahat ma dalanmu tu Jahowa jala haposi Ibana asa Ibana paturehon. Pos ma rohanta mandok “Halleluya! Ale tondingku, puji ma Jahowa! Pujionku ma Jahowa saleleng ahu mangolu, sai endehononku do Debatangku saleleng adong dope ahu. Amen

Bahan Diskusi:

1. Boasa maol manang bangkol jolma mamuji Debata (isarana malas marminggu dohot martangiang)?

2.   Songon dia ma hita mananda pambahenan ni Debata di ngolunta?

5	Marende BE. No. 570:1-2 “O Jesus Tuhanhi Hupuji Ho”
6	Tangiang Sian Natoras	Tangiang Sian Ruas Na Ro
7	Marende BE. No. 15:8-9  “Aut na saribu hali ganda”
8	Tangiang Sian Anggota Keluarga		Tangiang Sian Na Manjabui
9	Marende BE. No. 467:1--- “Asi Ni Roham Hupuji” (P.Pelean)
10	Panutup Tangiang Ale Amanami Amen (3x) HKBP	Panutup Tangiang Pelean – Tangiang Ale Amanami Pasupasu – Amen (3x) HKBP

Panurat : Pdt. Janti Dantes Nababan

Pandita HKBP Resort Desa Gajah

JAMITA EPISTEL LUKAS 16:1-13 TU MINGGU 18 SEPTEMBER 2022

 

Minggu XIV DUNG TRINITATIS

18 SEPTEMBER 2022

No	Partangiangan Keluarga	Partangiangan Sektor / Wijk / Lunggu
1	Marende BE. No. 2 : 1- 3       “Naeng Pujionhu Ho Jahowa”
2	Tangiang Pamuhai	Votum : A.XV.A.18 – D.XIII.49
3	Manjaha Turpuk : PSALMEN 113 : 1 – 9
4	Marende BE. No. 178 : 2 – 3  “Ro ma Tu Jesus”

Jamita : LUKAS 16 : 1 – 13    

“DIPATIMBUL DEBATA DO ANGKA NA DANGOL”

Hamu angka dongan sahaporseaon!

Sian saluhut umpama na niajarho ni Tuhan Jesus, umpama taringot juara bagas na geduk i, ima umpama na godang mambahen sungkunsungkun di hita na manjaha. Umpama on taringot sahalak na mamora na marjuara bagas dohot na marsingir tu nasida. Siala dang diboto tangkas songon dia taringot parsingiran di tingki i, gabe torop halak na bingung jala hurang mangantusi aha lapatan ni umpama i.Boasa juara bagas na geduk i gabe dipuji tuan na nang pe dipaturun  singir ni parsingir i? Naung margabus do juara bagas i tu tuanna? Boasa diajarhon tu hita asa maraleale dohot mammon? Gabe adong pandohan na salah mandok, “diajari Tuhan Jesus do hita asa molo ditingki adong permasalahan boi ma ulaonta na jat na so dihalomohon Tuhan Debata asal ma malua hita sian parmarahan i (etika situasional).

Ayat 1- 9, Nunga hal na biasa molo sada halak na mamora marjuara bagas, i ma na lao magurus i parhepenghon nasida. Sada tingki na mamorai curiga dipansuasaehon juara bagasi artana, jala dijao ma  juara bagas i asa dipatorang sude angka karejona (manang mambaen laporan na). Jala diboto juara bagas i do hahurangan na, memang na korupsi do ibana jala gabe bingung ma ibana mangalusi tuanna ndang boi di pertanggungjawabaonna karejo na, n pasudahon arta ni tuanna. Mabiar ibana di pecat tuanna. Tubu ma tu pikiranna naeng mamangkur manang manehenehe, alai dang adong pilitonna sian nadua alana na, sada dang adong gogona jala na sada nai maila ibana. Dirajumi ibana ndang boi ibana karejo na borat ala naung biasa ibana karejo na tabo. Jala dang olo ibana bage manehenehe ala gabe paleahon dirina ibana, naung biasa ibana diparsangapi jolma. Mabiar ibana gabe pogos dohot karejo na borat alai dang mabiar ibana mangulahon gabus dohot hajahaton.

Asa malua ibana dibahen ibana ma sada cara na geduk, i ma manjou angka parsingir ni tuan nai na marsingir tu ibana. Parsingir na parjolo na marrsingir 100 gunsi minyak gabe diorui utangna 50% totalna gabe 50 gunsi, na paduhaon tu parsingir 100 tuhunan eme gabe diorui ma singgirnna 20%  gabe 80 tuhunan eme, alai syaratna parsingir i manbahen surat na asing. Las maroha ni parsingiri mambahen surat na ala moru utangnga satonga (Namun hal ini sama sekali tidak merugikan sang-bendahara, sebab yang dia perlukan adalah surat bukti hutangnya, yang nantinya akan dilaporkan kepada tuannya, yang dikurangi hanyalah keuntungan bendahara itu karena selama ini dia menaikkan bunga dari yang semestinya). Na pe di puji tuanna ibana ala hagedukonnai alai tong do salah na binahennai.  Jadi dihita gabe juara bagas (bendaharawan = penatalayan) do hita maradophon silehonlehon i. Ala ni i, unang ma porso, unang pogo, alai pangke mai bahen sangap di Debata di bagasan Jesus Kristus. Tompa ma dirinta gabe juara bagas na burju.

Ayat 10-13, Ai diida Tuhan Jesus do parngoluon ni angka parngoluan ganup jolma; na deba denggan parngoluonna, jala na deba mangolu di bagasan hapogoson. Hinorhon ni I, sian na dua horong i, tongtong tujuan ni ngoluna laho manambai hamoraonna dohot mangalului arta, sinamot dope di ngoluna. Jala unang ma ala naung marlobi lobi manang naung godang tajalo manang naung dapot paruntungan nang parlabaan hita asa mandok mauliate. Na otik pe tong do tadok mauliate. Asa haposan di na otik haposan nang di na godang (Luk.16: 10a “Ia haposan halak di na otik, haposan ma ibana nang di na godang”).

Unang adong be halak Kristen na mardua roha manomba Debata dohot manomba mammon (Mamon yang berasal dari bahasa Aramaic berarti “something confided or deposited” (sesuatu yang dipercayai atau disimpan), yang sering dikonotasikan dengan kekayaan. Kekayaan memang sering mendatangkan godaan besar untuk berbuat dosa, namun kekayaan sendiri adalah sesuatu yang netral, karena dapat dipergunakan untuk sesuatu yang baik, walaupun sering dipergunakan untuk sesuatu yang buruk). Martangiang do tu Debata alai huhut mangido tua sian sumangot dohot sahala ni ompuna manang huhut marhaposan tu dirina sandiri, mardebatahon mammon dohot artana, nunga godang be angka ruas nuaeng on namambahen harta diatas segalagalanya ( Materialisme) namambahen hagiot  ni dagingna na tumimbo sian sasude. Asa unang adong sian halak Kristen na mamakke goar ni Debata laho manolon ( Bersumpah palsu, Rekayasa ) holan laho pasintonghon dirina manang kelompok tertentu, margabus, ( Isarani  hata pandohan “ sai di ripashon Debata”  Debata ma mardabudabu dna ) Debata parasiroha do Debatanta i. Ndang siulaon ni halak Kristen na mengutuk alai manangiangkon do (nunga ragat di tingki na parpudion halak mardemonstrasi laho mengutuk sada sada halak  manang bangso). Unang be masa angka panangkoon , Ilegal Loging, pembakaran hutan, Ilegal Fishing dna.  Angka barita di Mas media masa do pamunuon tu natoras holan alani arta, warisan. ( Mansai jahat situtu rohani jolma alani artai )

·         Hahonaan

1.    Unang ma hita songon juara bagas na geduk i na holan mambuat keuntungan tu dirina sandiri tanpa menghalolongi danganna alai taargahon ma ngolu ni donganta marhite, hatanta nang pambahenanta sude hata na haruar sian pamanganta naenma mambahen hasonganan tu angka donganta, unang gabe mambahen hansit ni rohana na boi mambahen ibana gabe marsahit. Unang mangalatei dohot manghosomi donganna, taparhaseang ma tingki laho mangulahon lomo ni roha ni Tuhanta .Tahaholongi ma Jahowa, sian nasa rohanta, ateate, hosa nang rohanta, jala tahaholongi ma dongantai doshon dirinta

2.    Molo naeng sumurung jala na parjolo (lebih utama), pillit ma cara na tingkos jala sintong. Ndada marhite na mangarajai (menguasai) dongan, ndada gabe sihobasan (dilayani), ndada marhite gabus dohot manipulasi alai marhite na gabe pangoloi dohot naposo/parhobas di dongan.

3.    Tantangan manang musu ni jolma i laho mangoloi Jahowa di pardalanan ni ngoluna di hasiangan on holan on do: olo ganggu, mabiar rohana jala losok laho mangulahon Hata ni Tuhan i di ngoluna. Ndang boi manaluhon hagiot manang hisap-hisap ni roha dohot pamatangna. Hape jotjot tahatindangkon na porsea do hita di Jahowa na tongtong manjagai, marmuduhon ngolunta sian ari naung salpu, sadari on, ro di salelenglelengna. Alai gabe jotjot taparsoada i holan alani i angka ragam hamaolon, tantangan na taadopi di ngolunta, tarlumobi ma dina hurangan hita di arta, sinamot i (hamoraon). Roha na holsoan boi do gabe roha na ringgas, namamuji-muji huhut mandok mauliate tu Tuhan i, molo gomos tapeop jala tahangoluhon Hata ni Tuhanta Jesus na mandok, “Antong, unang ma holsohon hamu ari marsogot, ai sarihonon ni ari marsogot do na ringkot disi. Sai do, molo masiporsan hasusaanna be angka ari.” (ay.34). Dumenggan do ari marsogot molo tongtong satia hita mangalului Harajaon ni Jahowa, ima marhite na manghangoluhon na hinalomohon ni roha-Na i di nasa gulmit ni parngoluonta siganup ari. Unang be ganggu, mabiar jala holsoan hita molo ndang adong di hita arta, sinamot di tano on ai disarihon Jahowa do ngolunta siganup ari asal ma tapasahat ngolunta mangalului Harajaon dohot Hatigoran-Na i. Alani i, papungu ma arta dohot sinamotmu di Banua Ginjang. Amen!

Bahan Diskusi:

1.    Apa yang dapat kita pelajari dari kehidupan sang bendahara dalam perumpamaan ini bagi kehidupan kita?

2.    Mengapa Tuhan Yesus memuji bendahara yang kelihatannya tidak jujur ini dalam perumpamaanNya? Mengapa ia dikatakan telah melakukan sesuatu yang baik? Apakah ini berarti Yesus setuju dengan tindakan menipu? Apakah Yesus berpihak kepada ketidak jujuran? Seperti yang di katakan ayat Lukas 16:8-9.

5	Marende BE. No. 476 : 2 -3 “ Ndada Au Guru Di Au”
6	Tangiang Sian Natoras	Tangiang Sian Ruas Na Ro
7	Marende BE. No. 492 : 1 “ Na Mora Tutu”
8	Tangiang Sian Anggota Keluarga		Tangiang Sian Na Manjabui
9	Marende BE. No. 512 :1--- “Didalani Jesus Tano”  (P.Pelean)
10	Panutup Tangiang Ale Amanami Amen (3x) HKBP	Panutup Tangiang Pelean – Tangiang Ale Amanami Pasupasu – Amen (3x) HKBP

Panurat : Gr. Tohap Tambunan

Guru Huria HKBP Huta Padang Resort PTPN III Buntu Pane

Jamita Epistel Minggu 11 September 2022

 

Minggu XIII DUNG TRINITATIS

11 SEPTEMBER 2022

No	Partangiangan Keluarga	Partangiangan Sektor / Wijk / Lunggu
1	Marende BE. No.  467: 1 + 3 “Asi ni RohaM Hupuji”
2	Tangiang Pamuhai	Votum : A.XV.A.17 – D.XIII.48
3	Manjaha Turpuk : LUKAS 15: 1 - 10
4	Marende BE. No. 516: 1 – 2 “Bege Jou Jou Ni Jesus”

Jamita : PSALMEN 51 : 1 – 10     

“DIHALOMOHON DEBATA DO HAMUBAON NI ROHA”

Hamu angka dongan sahaporseaon!

Tangiang mangido hasesaan ni dosa do turpuk on ima na dipasahat raja Daud tu Debata, dung ro panurirang Natan paingothon ibana. Tung mansai koras do panurirang Natan mangungkap dosa na buni na binaen ni Raja Daud, ala na dijehehon ibana si Uria asa boi diatur ibana pangolionna tu Batseba (ripe ni si Uria) sian dalan na denggan diida mata (hombar tu adat dohot uhum na tarida), jala ditipahon Panurirang Natan uhum na mansai borat tu raja Daud dohot tu  parripena. Ala ni pinsangpinsang na koras i, gabe mananda do Raja Daud  di dosa/ hasalaanna. “Nunga mardosa ahu dompak Jahowa!, ninna raja Daud di adopan ni si Natan.

Martangiang ma raja Daud, mangido hasesaan ni dosa tu Debata, Asi ma roham di ahu, ale Debata, hombar tu denggan ni basam, sai sesa ma angka pangalaosingku hombar tu godang ni asi ni roham (Ay. 3). Di ayat 3 – 7 dihatahon raja Daud angka garis besar ni dosana. Parjolo didok ibana: (a) angka pangalaosionku; (b) hajahatonku; (c) dosaku; (d) na jat naniulahonna; (e) hajahaton binoanna sian hatutubuna/sian inangna pangintubuna. Dosa pangalaosion, i ma dosa ala dilaosi patik/parenta ni TUHAN. Di na marroharoha si Daud tu si Batsebea, dilaosi ibana do patik na mandok: Unang ho mangalangkup; ndang jadi haliangan ni roham ... jolma ni donganmu. Hajahaton ni si Daud tingki i, ala diatur ibana pangolionna tu si Batseba mansai cocok tu aturan parbaluon ni sada ina, tangkas dialap ibana si Batseba hombar tu adat Israel; hape dibalik ni i, naung adong hian do tahitahi na roa asa boi bahenon ni si Daud si Batseba gabe ripena.

Dielek si Daud TUHAN i, asa olo marasi ni roha tu ibana : Ias situtu ma ahu buri sian hajahatonku, jala paias ma ahu sian dosangku (ay.4). Hajahaton songon taktak do sai lokkot di hulinghuling, ndang mampan be mambahen  ias hajahaton na songon i sian dirina sandiri. Holan mudar ni Jesus Kristus do jala holan alani asi ni roha ni Debata do na talup paiashon jolma i sian dosa. Ai nunga huboto angka pangalaosingku, jala sai tong do sonson di jolongku dosangku (Ay. 5). Martua do jolma naung mamboto pangalaosionna. Panurirang Natan malo do mambongkar pangalaosion ni raja Daud. Jujur do si Daud taringot tu sude dosana i, di pamangan dohot di roha parbagasan (batin)-na. Diboto ibana, hajujuron manang hasintongon ni roha parbagasan na songon i do dihalomohon Jahowa. Ala ni i do umbahen na so adong ditabunihon ibana nanggo sada sian dosana i. Diboto do, nang pe adong ditabunihon dosana i, tong do diboto Jahowa aha na ditabunihon i. Jadi memang ndang marguna manabunihon dosa/pangalaosion di adopan ni Jahowa. Tumagon do sintong dohonon saluhut dosa i tu Jahowa, asa sintong disesa. Marlaba do na manopoti dosa, na sintong, na jujur mangongkuhon dosa tu Jahowa (Yesus Kristus).

       Mauliate ma di Tuhan i, na sai olo mangalehon hasesaan ni dosa tu angka na ro tu bagasjoroNa martangiang manopoti dosa dohot mangido hasesaan ni dosana be. Molo sai tong tasakkui dosanta ndang olo hita mangido hasesaan ni dosa, gabe sai sonson ma dosa i di jolonta. Rade do TUHAN i manangihon tangiang panopotion di dosa dohot tangiang mangido hasesaan ni dosa, jala sesaonNa dosa i.  Ala ni i do boi tadok: Molo martangiang mangido hasesaan ni dosa, oloan ni TUHAN Jahowa do tangiang i, jala sesaonNa do dosa i. Ala ni i gabe malum ma nasa sahit ni partondion, hisar ma holiholi mangula angka ulaon, ndang be sai diolati “halinu” ni dosa i be naung disesa dosana, ai mulai sian i mulak denggan ma parsaoranna tu Jahowa dohot tu donganna jolma. Mulak ma ibana gabe jolma na tarpasupasu, ai bura ala dosa na hea tarlanjur diulahon i, nunga diumpat jala dibolokkon. Martua ma na olo mulak tu Jahowa, dohot na ro mangido hangoluan dohot hasesaan ni dosa sian Jesus Kristus, Tuhan i. Amen.

Bahan Diskusi:

1.    Boasa bangkol roha ni jolma paingothon dosa/hajahaton na niulahon ni donganna jolma gabe jumpang prinsip “Paula so binoto ma”?

2.    Ditangihon jala disesa Debata do dosa ni angka na mangido hasesaan ni dosa, antong tadatdati ma mardosa? Dungi tapangido ma muse hasesaan ni dosa i? Boha do sasintongna?

5	Marende BE. No. 171: 1 - 2 “Tandai Ma Au”
6	Tangiang Sian Natoras	Tangiang Sian Ruas Na Ro
7	Marende BE. No. 178: 1 - 2 “Ro Ma Tu Jesus”
8	Tangiang Sian Anggota Keluarga		Tangiang Sian Na Manjabui
9	Marende BE. No. 183: 1... “Na Jumpang Au Na Asi Roha” (P.Pelean)
10	Panutup Tangiang Ale Amanami Amen (3x) HKBP	Panutup Tangiang Pelean – Tangiang Ale Amanami Pasupasu – Amen (3x) HKBP

Panurat : Pdt. Natalina Nababan, S.Si

Pandita HKBP Resort Air Batu