Jamita Epistel tu Miinggu Septuagesima 05 Pebruarii 2023

 

MINGGU SEPTUAGESIMA

        05 PEBRUARI 2023

01. Marende BE No.17: 1+3 “Raja Na Tummbul” 02.Votum:A.V/A.2 – D.V/17

03.   Manjaha Epistel: Jakobus 1: 22 - 25

     04.  Marende BE No.25: 1 – 2 “HataMi Ale Tuhanhu” 05.Jamita : Jesaya 58: 1-9a

GABE SIULAHON HATA I

(HIDUP BENAR SESUAI DENGAN HUKUM TUHAN)

Huria hinaholongan ni Tuhanta Jesus Kristus!

Di parngoluan si nuaeng, lumobi di era kemajuan teknologi on. Torop do jolma namian di dunia simulakra (simulakra adalah sebuah ungkapan latin untuk menjelaskan suatu kondisi realitas yang semu atau palsu, penuh kepura-puraan dan kebohongan demi mencitrakan bahwa sesuatu itu baik, indah,cantik atau tampan dan tidak bercacat, padahal tidak demikian kenyataannya). Molo taparrohahon di media sosial, mansai uli do dipatuduhon angka foto ni torop jolma, muba sian nasasintongna ai nunga diedit laho pamagohon angka nahurang sian tampilan aslina. Ingkon manat do hita asa unang holan mamereng tampilan parduruna sambing. Dibahen i di dunia simulakra nuaeng on pembuktian do na rumingkot, lobi sian gombaran manang barita naung dipatuduhon.

Isarana, adong dua bengkel jala hita naeng manservis kareta manang motorta di bengkel on. Bengkel nasada ias jala rapi. Saluhut proses perbengkelan didesain marhite sistem komputerisasi na canggih. Ruang tungguna pe ias jala lambok jala tontu sahali arga bayaranna. Hape bengkel nasadanari ndang haru ias jala rundut idaon. Proses perbengkelanna pe ndang canggih, alai sistem manual dope. Ruang tungguna pe sompit jala mohop. Alai dung kaluar mobil sian bengkel na parjolo, pintor mangulahi ma muse sega motorta on, ai ndang denggan hape hasilna. Hape dung dijama bengkel na paduahon, gabe denggan jala ndang jumpa hita be na sega dimotorta on. Bengkel nadia ma natapillit? Gombaran on naeng patuduhon, ndada tampilan parduru napatuduhon kualitas ni bengkel, alai kondisi ni motor dung kaluar sian bengkel i.

Tudos tu si ma nang ngolu parsombaonta, ndada ditontuhon situasi ni hagirgironta mandohoti parmingguon, partangiangan, dohot ragam ni ulaon ni

huria. Naringkot do tutu saluhutna i, alai ndang narumingkot. Ai dao do umpatar kualitas ni parsombaonta dung sidung parmingguon manang partangiangan, ima di parngoluonta siganup ari. Apa yang kita ikuti di gereja adalah ibadah. Namun ibadah yang lebih sejati sesungguhnya terjadi di dalam kehidupan sehari-hari. On ma na digoari ibadah keseharian. Ingkon sarombang do pangalaho siganup ari tu haringgason di ngolu parsombaon

 

Huria hinaholongan ni Tuhanta Jesus Kristus!

Di ombas ni turpuk on, dibereng Debata do adong realitas na ironis di tongatonga ni ngolu parsombaon ni bangso Israel. Na girgir do nian bangso i di ngolu parsombaon jala ringgas do nasida marpuasa, ariari do dilului nasida Debata, dihalomohon nasida do nang parbinotoan di angka dalan ni Debata jala dipangido nasida do nang uhum hatigoran sian Debata. Alai ndang marhadomuan tu si anggo pangalaho nasida siganup ari. Didok nasida do siihuthon Tuhan nasida hape roha nasida mansai dao do sian Tuhan i. Sai girgir do nasida manggulahon nasa ritual parsombaon alai ndang dapot nasida anggo unok ni parsombaon i. Girgir do nasida martangiang, marpuasa jala mamestahon sabbat huhut mamboan peleanna alai sai tongtong mian di angka ulaon hajahaton. Dihobasi nasida do Debata alai dihobasi do nang hinagiot ni rohana dohot portibi on. Paula dihalomohon nasida do sondang sian Debata alai dipillit nasida do mian di hagolapon.

Alai ndada namuba rohana, laos manungkun dope bangso i tu Debata “Boasa tung marpuasa hami hape ndang diida Ho, hupasipal hami dagingnami hape ndang dipardulihon rohaM?” Dirimpu roha nasida molo nunga marpuasa nasida, gabe ingkon sai tangihonon ni Debata ma nasida. Hape ndada siida ruhut parduru Debata, ruhut parbagasan do. Dihagigiihon Debata do angka parsombaon na so marparbue di ngolu siganup ari. Tangkas do diboto Debata na so marparbue ngolu parsombaon nasida i. Dibahen i do ditongos Debata naposona si Jesaya laho pangiarhon soarana pabotohon tu bangso hinaroa ni pambahenannasida i.

Dipatolhas panurirang Jesaya do ia parpuasaan nahinalomohon ni Debata ima: mangharhari angka ihotihot ni hajahaton dohot palua angka tali ni auga, mamonggoli roti tu halak namale, manogihon tu jabu halak nadangol dohot panangkarnangkar, mangabiti halak namasaemara, jala patuduhon diri laho mangurupi sibukniba (saudara). Laos dijanjihon Debata do binsar ma hatiuron songon buha siang ari tu angka namangulahon angka ulaon holong dohot parasinirohaon jala alusan ni Debata ma molo joujou nasida.

Dibahen i molo naeng mangulahon parsombaon angka na porsea i, tangkas ma nian diboto na ingkon marujung ngolu parsombaon i tu angka pangalaho na denggan di parngoluan siganup ari. Ndang sae ulaon parsombaon tu Debata holan di bagasan ibadah parmingguon manang angka partangiangan, na diulahon hurang lobi dua jom. Na ingkon marpangontak do i tu rumang ni parngoluanta siganup ari. Hata ni Debata naung taparsaorhon ditongatonga ni parmingguon taboan ma i mulak bahen bohalta mangula angka na denggan di jabu di tongatonga ni keluarga, di angka parsaoran dohot dongan sahuria, hombar jabu, dongan saulaon, dohot sude tahe na humaliang hita, tarlumobi maradophon angka halak na pogos, gale jala namangharingkothon pangurupion. Amin.

Sungkunsungkun :

1.        Songon dia do parsitutuonta saleleng on mandohoti parsombaon tu Debata marhite parmingguon, partangiangan, dohot parsaoran na asing di tongatonga ni huria i?

2.        Songon dia ma pangontak ni parsombaonta i lumobi di na marpangalaho di ngolu siganup ari?

 

06.   Marende BE No.678: 1 + 3 “Pauba Roham Tu Jahowa”

07.   Tangiang Sian Na Ro

08.   Marende BE 677: 4 “Mansai Lambok”

09.   Tangiang Sian Na Manjabui

10.   Marende BE No. 470: 1.... “Jesus Ho Nampuna Au”

11.   Tangiang Panutup

 

Pdt.Winner Sitorus, MMin Praeses HKBP Distrik XIII Asahan Labuhan Batu

 

Rapat Resort Kisaran

Rapat Resort https://drive.google.com/drive/my-drive

RAPAT RESORT HKBP RESORT KISARAN

 

https://drive.google.com/file/d/1GbhmTygHbwFOhtlaFzuD8EMGfbEwwCFG/view?usp=sharing

 https://drive.google.com/file/d/1GbhmTygHbwFOhtlaFzuD8EMGfbEwwCFG/view?usp=sharing

Jamita Epistel Partangiangan Psalmen 121:1-8

 

JAHOWA MANGURUPI , JALA MANJAGA

                                                           Psalmen 121:1-8

                    Dongan sahaporseaon Digoari do turpukon Ende hanangkok, manang di hata Indonesia didok nyanyian ziarah, ima sada  ende na niendehon halak Jahudi di na laho nangkok tu Jerusalem namarisihon saluhut panghatindanghonon dohot pangurupion ni Jahowa di ngoluna. Molo tasungkun dirinta mandok porlu do pangurupion? sude do hita mandok mansai porlu situtu, alani aha? tarajumi mansai gale do hita songon jolma namangolu. Umbahen na adong pandohan di Hata Batak na mandok “ Ndang tartuhuk sada halak pandingdingan”  Masiurupan pasidung ulaon, lapatanna marsiurupan di angka hagaleon, nuaeng tatangkasi ma Pangurupion ni Jahowa di turpuk on

 

       JAHOWA PANGURUPI

“sai mangaranapi do matangku dompak angka dolok”  Pandohanon ima gombaran na manghalungunhon sada gogo na boi mangurupi ngoluna. Songoni do nang pergumulan ni par-Psalmen di turpuk on. Mangaranap ibana dao tu jolo di dalan sidalananna. Diranap nang dolok dohot rura. Gok mara dalan sibolusonna i. Hape ingkon bolusanna do i. Tubu ma sungkunsungkun huhut mardongan biar: Sian dia do ulaning ro pangurupion tu ahu? Pangalaho na umum do i di hajolmaon molo tubu biar, gabe adong do roha mangalului parondingondingan na tau mangaramoti diri. Alai molo so adong be biar ni jolma taringot tu na naeng masa di ngoluna, naung dirina nama dipangasahon i, olo mai mansoadahon Tuhanna. Hape talpe do ganup jolma tu parmaraan nang tu hamatean di ganup tingki dohot di sude inganan.

                   Huria ni Tuhanta suang songon parpsalmeni songoni dong nang parngoluonta, mangaranap dompak angka dolok huhut mandok Sian di do ro pangurupion tu ahu, Alai ro ma alus sian ginjang mandok: “Sian Jahowa Sitompa langit dohot tano on sambing ro pangurupion ianggo tu ahu” Pandohan on patuduhon, na tung mansai bagas do panandaon ni parpsalmen on tu Jahowa nahinaporseaanna. Naboi mangurupi ibana ima Jahowa, Lapatanna, ndang sian jolma ro pangurupion i, alai sian Debata do. Tung sura songon halongonan humaliang hita, jala hira na so adong na tau mangurupi, alai anggo Debata sai tongtong do mian di sude inganan. Lam dipagomos do pandonganionNa asa tung pos rohanta borhat mandalani ngolu on.

      “Ndang tagamon loasonna tarsulandit patmu” . Tudos tu na mardalan do jolma di portibi on mangalangkahon ngoluna. Dalan ni ngolu na didalani i ndang dosdos, alai adong do i na marbuntulbuntul, na landit, margambo; molo dosdos pe dalan i songon dalan tol, tong do ingkon manat (hatihati) jolma i asa unang tarsulandit ibana di dalan na dosdos i ( tol i). Manat unang tartuktuk jamot unang tarrobung, Pat na tarsulandit ima sada kondisi ragu-ragu manang sala mangalangka alani ojahan na nidalanannai landit jala ndang hot na boi manghorhon sahat tu na madabu, Jahowa pahothon langka ni naporseai di dalan sidalananna asa denggan ibana mardalan “Hatami do sulusulu ni pathu jala hatiuron di dalanku. (Psalm 119:105) Molo didok Jahowa  “Ndang tagamon loasonna tarsulandit patmu” marlapatan do i, mangurupi jolma i asa unang tinggang di pardalanan ni ngoluna.

 

     “JAHOWA MANJAGA”

Ndang tagamon nok mata ni Sijaga ho. Ndada songon panjagaon ni sada harajaon na adong partingkian nok mata ni panjaga harbangan ni harajaon jala boi masuk angka musu na naeng manegai harajaon i. dison ma patar dihatahon ianggo parhal (penjaga kota) adong do batas ni gogo dohot ketahananna laho marhal (manjaga) huta manang harajaon. Alai ianggo Jahowa, Ibana do na nampuna saluhut partingkian arian nang botari, jala na so hea Ibana loja laho parorot dohot parmudumuduhon angka hasianNa. Sai jagaonNa do jala na so jadi nok ianggo Jahowa marhal hasianNa.  Sada sifat ni parjaga na so muba sian na jolo sahat ro di nuaeng, i ma: Ndang jadi nok. ingkon torang roha dohot pingkiran na arian manang borngin pe. ndang hea Jahowa “maradian” sian najolo sahat tu nuaeng. Tung na burju situtu do Tuhan i molo didok ndang olo modom ianggo Sijaga Israel, patuduhon bangso na pinillit ni Jahowa do i. Jadi ndang holan marsasahalak na dijaga Jahowa alai tung hibul do sabangso. Songon i do nang angka Huria nang bangso nang suluhutna hita sude do i diramoti, Aut nok mata ni parjaga, masuk ma panakko manursari ugasan ni tuanna.  Asa parjaga ingkon tongtong do dungo. Songon i ma Tuhanta i, ndang olo nok manjagahon langkanta unang marmara hita. Alani i do umbahen pos roha ni si Daud mandok: Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu tungkotmu dohot batahim mangapuli ahu.

     Jahowa do Sijaga ho, Jahowa do parlinggomanmu di lambung ni tanganmu siamun. asa diboto portibion Jahowa gabe parlinggoman ni bangso/HuriaNa. Ditiop Jahowa do tangan siamun ni naporsea i, asa unang humordit di na masa panindangion hasintongan Nndang tagamon doiton ni mata ni ari di arian, manang bulan di bornginna i” martudutudu do i di angka musu manang angka gogo na naeng manosak manang na naeng mambunu ibana di arian manang borngina i. molo pangantusion di tingki na masa di turpuk on (zaman Israel uju i) molo halak naung hona sondang ni bulan boi do i mambahen marsahit tondi ni jolma i (uju i diantusi do na marsinondang do bulan, ndang songon pangantusio sisaonari na mandok ndang na marsinondang bulan i) ndang itaboto arian manang bodari ro pangunjungan manang ro sibolis i laho pamagohon hita. Alai molo nunga rap hita dohot Jahowa ndang sihabiaranta be i saluhutna.

 

                  Sai jagaon ni Jahowa do ho sian nasa parmaraan, sai jagaonna do tondim. Dalan ni Jahowa do i lao manjaga jolma asa unang marmara di daging nang di tondi pe. ima panjagaon ni Jahowa di nasa parmaraan. Di ngolunta on tung na so boi do hita malua sian ragam parmaraan di pardagingon na mambahen dagingta gale manang manghilalahon hansit. Alai nang pe songon i na itaadopi unang ma nian gabe dohot partondionta marmara. Ai ido mansai tangkas didok parpsalmen imarhite endena on, “sai jagaonNa do tondim”. Molo nunga margogo tondi jala pir tondi, margogo ma daging on mangulahon angka ulaon laos diuduti ma pasupasu na naeng sijaloonta.

Sai jagaon ni Jahowa do ho laho ruar dohot laho bongot, olat ni on ro di salelenglelengna.  On ma nidokna: Aturhonon ni Jahowa do jolma naporsea i denggan mamulai, denggan mangujungi, manang aha pe taho na masa di bagasan ngoluna manang sadihari pe manang didia pe jala manang aha pe na masa di ngolunta sahat tu na mate hita manadinghon portibi on, sai na ramotan ni Jahowa do tondinta. Ndang loasonNa hita punjung manaon angka na masa di hasiangon on. Sai tongtong do Ibana adong mandongani hita  Ndang hea tarpodom Jahowa laho manjagahon hita, tongtong do hita di ramoti di ganup partingkian , di huta, di balian nang di pardalanan sai tongtong do di jagai hita taingot ma hata ni Endenta di 806 na mandok aha pe masa di ngolumon Tuhan Manjaga ho Amen

 

Bahan Diskusi

1.      Hea do diparhatopot roham  pangurupion ni Jahowa di bagasan ngolum?, jala songon dia ma sipatupaonmu laho mangurupi donganmu?

2.      Boha do hita manjagahon Tondinta?, nang tondi ni angka na mian di bagasta?

 

 

Panurat : Pdt Budianto Sianturi

Pandita HKBP Resort Kisaran

 

PARTANGIANGAN KELUARGA DOHOT MARULAON NA BADIA

 

Partangiangan Keluarga dohot Marulaon na badia

Ny. Manurung/br. Sitorus (Op. Yesika Boru)

Jl. Diponegoro No. 122

Sabtu, 31 Desember 2022

=========================================================

1.      MARENDE B.E. No. 9 : 1 + 3 “Hupuji Holong Ni”

Ø  Hupuji holong ni rohamu, o Tuhan Jesus Rajangki.

Tu Ho hulehon ma tondingku, ai i do pinangidoMi.

Huhalupahon ma diringku, mamingkir holong ni rohaMu.

Ø  Huhilala ingkon marTuhan, ingkon mangolu au di Ho.

Ndang jumpang au be hangoluan, aut unang dipatupa Ho.

Sai Ho do paradiananku, sai gok di Ho nama langkangku.

2.      VOTUM – INTROITUS (U = Uluan, H = Huria)

U    :  Marhitehite goar ni Debata Ama, dohot goar ni AnakNa Tuhan Jesus Kristus, dohot goar ni Tondi Porbadia, na tumompa langit dohot tano on. Amen! Olophon ma Jahowa ale sandok tano on.

H    :  Bongoti hamu ma angka bahalna marhitehite hamauliateon, angka alamannya marhitehite pujipujian, mauliate ma rohamuna di Ibana, puji hamu ma goarNa.

U    :  Jahowa do Debata, Ibana jumadihon hita, jala Ibana nampuna hita, bahen bangsoNa dohot biru-biru pinarmahanNa.

H    :  Ai Pardenggan basa do Jahowa, ro di saleleng ni lelengna do asi ni rohana, jala marsundut-sundut do hasintonganna.

U    :  Haleluya. Martangiang ma hita : Ale Debata Jahowa pujipujian di rohanami na husombahon hami tu Ho siala asi dohot halong ni rohaM dihami umbahen tarbahen hami mamulusi pardalanan ni ngolunami. So habilangan jala so hasuhatan sude angka naung binahenMu dingolunami. Gok asi ni roha do Ho Ale Tuhan. Pujipujian hasangapon ma di goarMu disaluhutna Ale Tuhan. Huhalashon hami do pambahenanMu di hami be tarlumobi di keluarganami on. Dilehon Ho do roha marsitangiangan jala marsiurupan ditonga ni keluarga. Jala dipatupa keluarga do marulaon na badia tu natoras nasida ny. Ny. Manurung/br. Sitorus (Op. Yesika Boru) songon tanda hapantunan tu natumua jala marhadaulton tu Ho. Marmulia marsangap ma Ho Tuhan disaluhut naung hujalo hami jala panindangionnami on. Ala ni AnakMu Tuhan Jesus Kristus martangiang hami tu Ho. Amen

3.      MARENDE BE No. 361 : 7 - 8 “Na Denggan Situtu”

Ø  Martumbur do partigor, tudoshon bagot i. Martunas do nasida, songon hau ares i. Nasida na sinuan, di bagas joro i. Do na marbunga bunga, di alamanna i.

Ø  Sai tubu pinomparna, di na ubanon i. Margogo do nasida, di na matua i. Girgir dibaritahon, na tigor Tuhan i. Na so marhageduhon, pambaenNa sasude.

4.      MANJAHA TURPUK : PSALM 23 : 1 – 6

U    :  Jahowa do Siparmahan ahu, ndang tagamon hurangan ahu.

H    : Dipatongon do ahu tu jampalan angka na lomak, ditogutogu do ahu di lambung aek hasonangan.

U    : Dipasabam do rohangku, ditogu do ahu di dalan hatigoran, ala ni goarNa i.

H    : Ai nang pe mardalan ahu di rura linggoman ni hamatean, ndang huhabiari parmaraan, ai Ho do mandongani ahu, tungkotMu dohot batahiM mangapuli ahu.

U    : Ho do manutup meja di jolongku maradophon angka musungku, dimiahi Ho do ulungku, suksuk do panginumanku.

H    : Tongon tahe denggan basa dohot asi ni roha mangihutihut ahu saleleng ahu mangolu, jala dung mulak ahu, masuhanku ma bagas ni Jahowa salelenglelengna.

U    : I do sahatna, martua do angka na tumangihon hata ni Debata jala na umpeopsa.

5.      MARENDE BE No. 15 : 1 “Aut Na Saribu Hali Ganda”

Ø  Aut na saribu hali ganda saringar ni soarangki. Naeng nasa gogo bahenonku, mamuji Debatanta i. Paboa las ni rohangki, hinorhon ni pambaenNa i.

6.      SIPAHUSORHUSORON

U    : Denggan na i do pambahenan Jahowa di angka na marhaposan di Ibana. Dipasupasu jala diramoti Debata do hita dingolunta. Tung so hasuhatan do saluhutna i naung tajalo dingolunta.

H    : Pujipujian hangapon ma di Ho Tuhan marhite mauliate ni rohanami.

U    : Di partangiangan keluarga on, naeng do patubehononta panindangion na mangolu di nasa parsaoran na tangkas dohot Debata. Ai na bongotonta do parsaoran rap dohot Debata di bagasan hadaulatonNa.

H    : Sai tangihon ma, ale Jahowa, jala asi roham mida ahu! Sai Ho ma Sipartumpak di ahu ale Jahowa!

U    : Tahalashon do pambahenan di Debata Jahowa di hita nang di keluarga. Dibagasan las ni roha dohot hasadaon ni roha tarbahen hita nang keluarga pasangap natoras marhite angka ulaon na denggan.

H    : On do pujipujian na di hami: Dihatindangkon panggora ni rohanami do, naung huparangehon hami, di adopan ni portibi on, lumobi situtu ma di adopanmuna, habadiaon dohot hapolinon na sian Debata ndada habisuhon hian, tung asi ni roha ni Debata do.

U    : Pujipujian hasangapon ma di Debata.

U+H : Amen.

7.      MARENDE BE No. 754:1 “GOK LAS NI ROHA DO AU”

Ø  Gok las ni roha do au di ngolungkon. Di ngolungkon di ngolungkon gok las ni roha. Do au di ngolungkon tongtong di rohangkon

Mauliate gok las ni roha maringan. HolongMi Tuhan di au. Mauliate gok las ni roha maringan. HolongMi Tuhan di au.

8.      TANGIANG PANGONDIANON

9.      MARENDE BE No. 25:1 “HATAMI ALE TUHANKU”

Ø  HataMi ale Tuhanku, arta na ummarga i. Sai paian di rohangku, unang so hutiop i. Molo so be sitiopan, hata na badia i. Aha nama haojahan Ni haporseaon i?

10.  JAMITA

11.  MARENDE BE No. 504 : 1 “Ditogu Tuhan Jesus Au”

Ø  Ditogu Tuhan Jesus au, i do na mangapuli au. Di ganup dalan na tung maol, tanganNa do tongtong huhaol. Ditogutogu Jesus au, tanganNa sai maniop au. Tongtong ma siseanNa au, paima boi tu surgo lao.

12.  ULAON NA BADIA

(MARENDE BE No. 449 : 1 – 2 “Sai Solhot Tu SilangMi”)

Ø  Sai solhot tu silangMi, Jesus ingananku. Mual na mabaor disi, i ma inumonku. SilangMi, Tuhanku, i ma pujionku. Paima sogot sahat au, i endehononku.

Ø  Lao ma au tu silangMi, i ma tioponku. Sai asi ma rohaMi, unang tulak ahu. SilangMi, Tuhanku, i ma pujionku. Paima sogot sahat au, i endehononku.

(MARENDE BE No. 9:1 “HUPUJI HOLONG NI”)

Ø  Hupuji holong ni rohaMu O Tuhan Jesus rajangki. Tu Ho hulehon ma tondingku Ai i do pinangidoMi. Huhalupahon ma diringku Mamingkir holong ni rohaMu

13.  MARENDE BE No. 466 : 1… “Nunga Ro Au”

(Papungu Pelean)

Ø  Nunga ro au o Tuhanku tu hau pinorsilangMi. Hupelehon ma diringku, upa halojaonMi. Hatuaon i, las ni rohangki. Ai hibul do hupelehon nasa diringki.

Ø  Ndang adong naeng tioponku, saluhut tu tanganMi. Maradian do tondingku di bagasan lomoMi. Hatuaon i, las ni rohangki. Ai hibul do hupelehon nasa diringki.

Ø  Sai sahaphon tu tondingku Tondi Porbadia i. JoroMi ma baen rohangku, sai ingani diringki. Hatuaon i, las ni rohangki. Ai hibul do hupelehon nasa diringki.

14.  TANGIANG PELEAN – ALE AMANAMI – PASUPASU

Amen… Amen… Amen…