Ujung Taon Parhuriaon, Parningotan Di Angka Naung Monding (Daniel 7:9-14) Topik : “RO DI SALELENGLELENGNA DO PAMARENTAON DOHOT HARAJAON NI DEBATA” (KEKUASAAN DAN KERAJAAN ALLAH TIDAK AKAN LENYAP)

 

Ujung Taon Parhuriaon, Parningotan Di Angka Naung Monding (Daniel 7:9-14)

Topik : “RO DI SALELENGLELENGNA DO PAMARENTAON DOHOT HARAJAON NI DEBATA”

(KEKUASAAN DAN KERAJAAN ALLAH TIDAK AKAN LENYAP)

I.                        PATUJOLO

Tardok songon sada panindangion ni haporseaon do buku Daniel on na tau gabe tiruan ni sandok angka na manghaposi Debata. Tarlumobi molo tapamanat pangidoan ni Raja Nebukadnezar marhite angka naposona asa dohot ma nang ale-ale ni si Daniel natolu i (Sadrak, Mesakh dohot Abednego) asa marsomba tuganaganaan sere na tinopa ni raja i disi mangkuling soara ni sarune, tulila, hasapi, arbab, sordam, gondang ro di sandok ragamragam ni parhinaloan. Alai ndang tarbahen nasida i ala parsihohoton nasida tu Debata, di na sai tongtong manghajongjonghon pandonganion ni Debata na so marholang nanggo sangombas pe. Holan sasadasa Debata do na tau sipujion dohot sisombaon jala holan sasadasa Ibana do na tuk mangalehon haluaon. Ndang munggil haporseaon nasida jala marangkup bahenon nasida Debata molo pe ndang pintor dialusi Debata angka pangidoan nasida (Pat. Daniel 3:17-18). Baliksa, marsihohot do nasida mamuji jala pasangap Debata huhut tongtong manghaposi na patupaon ni Debata do na dumenggan di ngolu ni angka namarhaposan tu Ibana. Nang pe ingkon didabu nasida tu liang pamurunan (Lubang singa), Debata do haposan nasida jala marhuaso do Debata paluahon nasida sian mara bolon i.

2. HATORANGAN NI TURPUK

Tardok Pangungkapon do ia turpuk Jamita on. Debata patuduhon tu si Daniel angka na naeng sisurathononna. Ragam ni angka na ungkap dipatuduhon Debata tu si Daniel di atas podoman na, asa tung tangkas do i dipanotnoti jala disurathon. Diida ibana do pangungkapon i di taon parjolo di harajaon ni si Beltsasar, raja sian Babel ima singa, gompul, babiat dohot binatang na martanduk sampulu apala na bolon, na mansai jorbut, na songkal jala na gogo sahali, marngingi bosi dohot mangaropropi, mangaluntak angka na teba dohot patna. Angka tanduk i marmata, jala marpamangan, na manghatahon angka hata na jungkat (7:1– 8).

1. Ibana, na so suda ariNa (Ayat 7 – 9).

 Ia bagian on, udut ni pangungkapon na sahat tu si Daniel, namanggombarhon sai hira na so adong be tudosan ni binatang partanduk sampulu, na marngingi bosi i. Hape sai dipanotnoti si Daniel adong do habangsa na dipajongjong di pangungkapon i, jala ibana na so suda ariNa, hundul tu habangsa i. Ise do ibana naso suda ari Nai? Ia paheanNa na saksak songon itak jala obuk niuluna songon hapas na binusur. (ay.9-10). Angka na pinajojor ondeng manggombarhon ibana na so suda arina do parmonang ni pangungkapon. Nang di ujung na pe, ibana do na hot na monang ro di salelenglelengna, ndada parhuaso na holan sangombas, namasa di Babilonia nang di angka luat na asing di partingkian nama ngilas on. Alai ujui, ala panggosaon ni harajaon Babilonia na pamatehon adat, budaya, lumobi haporseaon ni halak Jehuda, dilehon Debata ma pangungkapon on asa sai marsihohot nasida dihaporseaon nang pe sai digogo do nasida asa manadingkon Debata. Asa martudutudu tu Debata Jahowa do na nidokna “Ibana na so suda ariNa i”. Jala ndang adong na gumogo sian Ibana nang pe sai hira na gumogo do singa, babiat, gompul dohot binatang partanduk sampulu na ginoaran ondeng.

2.                   Sahalak songon Anak ni Jolma ro marhite ombun di langit tu jolo ni Ibana na so suda arina (7:11-12; 13- 14).

Bagian on manguduti angka na ungkap tu si Daniel, ai sai marhata na jungkat do pamangan na di tanduk i. Bangko na ma tutu, sai hajungkaton dohot pangalaho na roa do sai dipaulaula angka parrumang na jorbut. Boi do ra gombarhonon ta songon dia jorbut ni binatang na martanduk sampulu i. Sai hira i nama na gumogo 180 hape angka na paima tingki do hape asa suda, pidom pamatangna jala dipasahat asa purunon tu api na marnalanala. Asa marujungne do saluhut na, hombar tu parhusoran ni tingki. Ndang adong namanontong jala ingkon marujung do sude, ai nunga dibuhul tingki dohot jom ni ajalnasida. Jala dung salpu ajalna i, ro ma ajal na manongtong i, i ma ajal na niradotan dohot na niramotan ni Debata. Udut tu si, ro sahalak marhite ombun di langit i, sahalak songon anak ni jolma, na manaluhon saluhut binantang na jungkati. Anak ni jolma na ro marhite ombun do sada, isi na rumingkot dipangungkapon on. Ai lam tandi do hagogoona manaluhon na opat binantang i, ai jumpang do huaso na so hatudosan di ibana. Aindang marsitatapan huaso ni na so suda ariNa i maradophon angka naung dibuhul tingki dohot ari na.

Udut tusi, dibasabasahon do nang tu Ibana pamarentaon dohot hamuliaon dohot harajaon. Saluhut houm, bangso dohot halak parpangkuling marragamragam marsomba tu Ibana. Pamarentaon na salelenglelengna i ndang tupa munsat sian Ibana. Asa padirion ni Debata na di surgo i sada harajaon ro di salelenglelengna, gomgoman na pe ndang pasahatonna tu bangso na asing. Asa tu si do astuan ni turpuk on, asa sai holan tu na so suda ariNa i saluhut angka jolma di sisik ni tano on marhaposan.

 

III.       SIPAHUSORHUSORON

Goar ni Minggunta i ma minggu Ujung Taon Parhuriaon laos dipaumbuk tu Parningotan ni angka na monding di bagasan sadataon parhuriaon. Turpuk on pasunggulhon jala manogihon hita asa lam tu gomosna manghaporseai Ibana na so suda ariNa, jala mangihuthon Anak ni Jolma na marhamuliaon di atas ni saluhut bangso. Harajaon ni Debata na manontong i do ujung nipardalanan ni angka na porsea. Siala ni i ma tutu gabe ingkon jaga jala jamothonon ni angka na porsea ma dirina, asa tongtong monang maradophon angka hamaolon na mambahen ragam rupa ni habiaran di tano on. Ibana do na monang manaluhon huaso na adong di hasiangan on, jala Ibana do na manaluhon hamatean. Antong taihuthon ma Debata na manontong I dibagasan ngolunta. Amen.

Jamita tu Minggu, 17 November 2024 Ev. Mateus 24:9-14, Na Manahan ro di ujung ido paluaonna

 

Jamita tu Minggu, 17 November 2024

Ev. Mateus 24:9-14                                                                                       Ep. 1 Samuel 2:1-10

Topik : Na Manahan Ro Di Ujung, I Do PaluaonNa

 

I. Pamuhai

Jamita ni Jesus di dolok Jetun on marhadomuan do tu ajal ni hasiangan ima haroro ni Kristus na paduahalihon. Parousia do digoari di bagasan hata Yunani, lapatanna otoritas ni Jesus laho manguhumi angka na mardosa. Asa boi antusan turpuk on ingkon jahaonta ma sian ayat 1-8, ai dipatarida di si tangkas dialog ni Jesus dohot siseanNa. Ay.1-2 Dilumbahon Jesus do hasesega ni joro ni Jerusalem. Marhite lumbalumba on gabe masa do sungkunsungkun ni angka sisean, marhite tanda na songon dia do boi botoon nasida Lumbalumba hasesega ni Jerusalem dohot haroro ni Mesias na paduahalihon. Ay. 3-8 Dialusi Jesus do sungkun-sungkun ni sisean taringot songon dia do hataridaan haroro ni Kristus na paduahon. Ringkot do antusanta ay.9-14 patuduhon angka on do tanda haroro ni Mesias. Nang marhite on do dohonon nunga sada bangko molo ingkon adopan ni jolma haporsuhon. Jala hombar tu turpuk on boi do dohonon nunga bagian ni jolma be hape naginoaran di bagasan turpuk on, dibahen ido, boha do jolma manisia patuduhon proses na tama asa boi manahan sahat tu namanjalo hangoluan na so ra suda.

I.        II. Hatorangan Ni Turpuk

Ala ramun do pangarupaon ni ujung ni hasiangan on pola do dipaboa Jesus angka pangarupaon ni nanaeng masa. Mago do holong hinorhon ni siula uhum na so tigor, on ma karakteristik na umbolon manggombarhon ujung ni hasiangan on.  Alai tangkas do didok Tondi i: Adong ma di angka ari sogot deba na marbalik sian haporseaon i; oloan ni i ma angka tondi sipaototo dohot podapoda ni angka sibolis (1 Timoteus 4:1) Asa unang mago angka sisean i, tangkas do dibohali Jesus nasida asa jaga nasida jala asa unang dililuhon halak nasida. Haporsuhon do taonon ni jolma na sai manenganengahon angka na binahenna, na so marlomo ni roha diangka na denggan na binahen ni donganna, na so mendukung di haimbaruon na ingkon sipatupaon, dohot lan angka na asing. Ujungna, gabe adong ma na so marlomo ni roha, ndang mardongan be jala masa ma parbolatbolaton, holan alani angka na pinatupana. Tubu ma disi ngolu na; masihosoman, masipusaan, marporang, dohot lan na asing na mambahen gabe torop angka na targasip jala masijehean. Lam torop situtu martumbur parjahat, hape jolma na burju lam moru bilanganna, ai lam jorbut na masa na marragam di jolma i gabe ngali situtu holong i. Ndang holong i be na mangihot dingolu ni jolma, alai angka na nieahan i nama, ima; hasangapon na dirajumi boi pauliulihon ngoluna. Porsuk situtu do ngoluni angka na so mian dibagasan holong, jala na mangarotaki holong i dalan mangeahi haulion (tamatama berengon). Molo nunga mago haporseaon ni jolma tu hasintongan ni kristus, lam mura ma masuk hata ni angka panurirang pargapgap. Narumoa sian i dope gabe masa do sahira ketidak-bermaknaan peribadahan. Sai ro do tu punguan hakristenon alai di bagasna mago pangajaron hasintongan ni Hata ni Debata.

Na marsiadu do hita dihaporseaonta i, jala ingkon dibagasan pos ni roha do hita manghirim nang pe mangadopi ngolu na porsuk situtu alai benget ma hita manaon diparsiaduonta i. Marroha na sintong ma hita dibagasan haporseaon mangulahon na denggan na niajarhon ni Tuhan i, ai angka i do na hinalomohon ni Debata. Momos ma tatiop panghirimon na taparhatopot i, ai haposan do na marbagabagahonsa, lehononNa ma upa tu angka na manjalahi Ibana (Heb. 11:6 “alai anggo so marhaporseaon, ndang tarbahen halomoan; ai halak na mandapothon Debata ingkon dihaporseai: adong Debata; laos Ibana do silehon upa tu angka na manjalahi Ibana”).

Margogo do na porsea di na benget mangkirim di haporseaonna. Molo boi dipaihutihut naporsea i haporseaonna sian saonari sahat tu ujungna, paluaonNa do nasida. (ay.13). “Barita Nauli taringot tu harajaon” pandohan on sarupa tingki di mulana marbarita si Johannes Pandidi, Jesus dohot angka siseanNa. Di ujungna pe ingkon barita nauli taringot tu harajaon i do muse sibaritahononhon. Tona ni barita i paujunghon angka harajaon namamusa bangso ni Debata, ima songon na didok ni Jesus hasesega ni Jerusalem (Lukas 21:24) ingkon salpu do harajaon i dung di tingkina. Hombar tu buku Pangungkapon 14, parsidohot do surusuruan martongatonga langit mambaritahon barita harajaon i. Mamboan tona “Habiari hamu ma Debata jala pasangap Ibana, ai nunga dapot tingki ni panguhumonna! Somba hamu ma Ibana, sitompa langit dohot tano dohot laut ro di angka mual aek!” (ay.14).

 III. Sipahusorhusoron

Nasa na sinurirangkon ni Jesus i, sintong do masa; ndang na di portibi on tujuan ni angka na porsea, ai laho salpu do sudena i. Antong marlas ni roha ma hita paimahon haroroNa i; unang pola mabiar hita mangadopi angka hamaolon na sian portibi on. Rap Tondi Parbadia i ma hita mangadopi angka hamaolon i, asa tarbahen hita monang sahat ro di haroro ni Tuhan i songon joujou ni topik ni turpuk on, Na Manahan ro di ujung, i do PaluaonNa. Dipangido Jesus sian siseanNa nang hita saluhutna asa manahan ro di ujung angka na mangihuthon Ibana. Ndang holan na jolo masa parungkilon di na mamaritahon HataNa i, nuaeng pe marungkil do na porsea i laho manghatindanghon Kristus. Sandok tung sadihari pe jouon ni Tuhan i, sadihari pe ro Tuhan i rade do hita didapot. Amen.

Jamita 1 Rajaraja 17: 7-16, MANGALEHON NANG PE HURANGAN

 

BAHAN SERMON MINGGU XXIV DUNG TRINITATIS, 10 Nopember 2024

MANGALEHON NANG PE HURANGAN

1 Rajaraja 17: 7-16

 

1. Di tingki Raja Ahab bangkit gabe raja manggomgomi Israel, marsomba do ibana tu debata Baal, jala pola do mansai rarat parsombaaon tu Baal marhite si Izebel (Permasuri ni si Ahab). Ditogu do bangso Israel marsomba tu sada parsombaonan tu debata Baal. Marnida namasai borhatdo si Elia paingothon si Ahab marhite napasahathon pinsangpinsang ni Debata. Pamasaon ni Debata ma uhumanNa, mandok naso jadi ro nambur dohot udan tolu satonga taon lelengna di sandok bangso i. Hinorhon ni rimas ni Debata dompak nasida gabe didabu ma uhuman tu nasida, marhite napamasa laleon potir, na so jadi ro udan tolu satonga taon lelengna. Maol situtuma tubu suansuanan, gariadama tangamon malos, marurus jala mate angka suansuanan na tubu. Angka pahanpahananpe gabe merung/marniang ala so adong sipanganonna. Situasi nasoadong udan/haleon potir i marpanghorhon do tuhahipason ni pamatang ni bangso i. Masama haraparon bolon, hapogoson namarujung parsahiton, sitiaonon, haporsuhon dohot hamatean.

 

2. Dipamasa Debata do haleon potir namarpanghorhon tu ngolu ni bangso i. Alai baiiksa tongtong do dipatuduhon Debata do namarhuaso do Ibana marmudumudu naposoNa na pinillit Na i. Disuru Debata do si Elia borhat tu batang aek Kerit, asa sian i ibana taruli siinumon siganup ari. Jala pola do di suru Debata pidong sigak manarui sagusagu dohot juhut ganup manogot dohot botari. Sian on tabotoma namarhuaso do Debata mangarajai, mangula di sude partingkian laho mangaramoti naposoNa. Dang dipasombu Debata naposoNa patturaparon jala mate, alai manongtong do Debata Inanarihon.

 

3. Hatongtongon pangaramotion ni Debata lam tangkas tarida dung marsik batang aek Kerit. Disuru Debata ma si Elia borhat tu huta Sarpat mardapothon sada ina namabalu rap dohot ianakhonna. Nungga ditodo jala dipillit Debata ina namabalui laho manarihon naposoNa si Elia. Ragam do cara ni Debata manarihon ngolu ni naposoNa. Marsik pe batang aek, ndang marsik holong ni roha ni Debata tu naposoNa. Gabe barita nauli do turpuk on di hita saluhutna, napaposhon rohanta natongtong do Debata paradehon na ringkot dohot manarihon ngolu ni naposoNa.

 

4. Dung pajumpang si Elia dohot ina narnabalui, pintor dipangidodo aek santahu laho inumonna dohot santopik sagusagu sipanganonna. Ndang manjua ina namabalu i dipangidoanna, alai laos dipatorang ibana do hapogosonna jala marhahurangan. Holan sipanganon sahali mangan nama na adong di ibana. Alai dipapos si Elia do ina namabalu i, asa pos rohana patupahon parsuruon ni si Elia laho patupahon sagusagu. Sian unduk dohot bulus ni roha dipatupado sipanganon hombar tu parsuruon ni si Elia.

 

5. Dang mabiar ina namabalui hurangan jala rapar, ala pos do rohana dinamarsuru ibana ima si Elia naposo ni Debata. Parompuan na basar jala parasiroha do ibana. Masa do halongangan ala olo ina namabalui, jumolo manarihon ni si Elia. Memang molo tajaha sambolus, sai holan namarihon dirina do si Elia, nungga diboto sampohul nama itak, alai dipangido asa dipatupa sipanganon di ibana. Hape ido dalan ni Debata laho manarihon ngolu ni ina namabalui dohot ianakhonna. HuasoNa do paganda itak dohot miak na so ra suda. Ditogutogu turpuk on do hita asa taongkuhon Ibana do Debata na mangolu na mangaturlion saluhut ngolu nasa na tinompaNa, lumobi pardalanan ni ngolu ni napinillitna di bagasan Jesus Kristus. Ndada gabe mate rapar hita molo tatopikkon santopik sian na adong di hita tu ulaon parasinirohaon, manang moio talehon tu angka na mangharingkothon panngurupionta. Asal ma taungkap rohanta manjanghon hataNa dohot lomo ni rohaNa.

 

6. Marsiajar ma hita sian pengalaman ni si Elia, tarlumobi ndung pajumpang ibana dohot ina namabalui. Dison taida parbue ni haporseaon. Banyak persoalan hidup yang tidak mungkin dapat diselesaikan dengan akal dan pikiran manusia. Tetapi lewat iman akan terbuka jalan bagi kita untuk melihat sebuah kenyataan bahwa dibalik kekurangan yang ada, di balik kelemahan-kelemahan kita, di balik segala keterbatasan kita ada kuasa Tuhan yang mampu memulihkan bahkan memberkati kehidunan kita Amen

Ev.: Markus 12:28-34, Manghaholongi Tuhan Debata Dohot Dongan Jolma / Mengasihi Tuhan Allah Dan Sesama Manusia

 

Manghaholongi Tuhan Debata Dohot Dongan Jolma / Mengasihi Tuhan Allah Dan Sesama Manusia

Ev.: Markus 12:28-34

 

1. Patujolo

Molo sian hatorangan di jolo ni turpuk on ima taringot tu hubungan ni sesama jolma di haheheon sogot. Tingkos do alus ni Jesus i mangihuthon pangantusion ni halak Parise, na mangokui taringot tu hangoluan sogot i. Alani, mangihuthon Mateus manigor hehe ma golongan Parise manungkunhon sisingkunonnasida muse. Songon na taboto adong do angka ahli Taurat na gabe Parise. Sahalak sian nasida ma na tampil mangajuhon sungkunsungkun. Ala taringot tu uhum (hukum), tontu sian ahli hukum na manungkunhon.

 

2. Hatorangan ni Turpuk

Ayat 28: Dia do patik na umangat sian patik i sudena? (Hukum mana yang paling utama?) Tardok asing (aneh) do do sungkunsungkun i, ala tubu sian sahalak ahli hukum. Tagamon ala na so diboto nasida be na paling ringkot sian angka na ringkot i? Jadi partanda na so denggan do i, ndang diboto na rumingkot sian na niulana sandiri. Manang na holan mangido penguatan do ibana di naung binotona? Memang hatiha i, ninna angka ahli, terjadi do perdebatan keras di kalangan Jahudi taringot tu uhum/patik. Adong na mambagi hukum yang besar dohot ringan. Adong muse na mambagi hukum/perintah keagamaan dohot kesusilaan. Alai na pasti, ninna K. Riedel, ahli Perjanjian Baru, “mereka itu tiada mempunyai suatu hukum yang utama, yang melingkupi segenap hukum-hukum yang lain itu”

 

Ayat 29-31: Patik na umangat: “Tangihon ma, ale Israel, Tuhan sasadasa (esa) do Tuhan Debatanta i. Jala haholonganmu do Tuhan Debatam sian nasa ateatem, sian nasa hosam, sian nasa roham dohot sian nasa gogom”. Ayat on sasintongna bagian ni 5 Musa 6.4-9 do on i ma na digoar shema (Ibrani) na ingkon disoarahon dua hali sadari di halak Jahudi na daulat. Alai tutu ditambahon Jesus do pandohan “sian nasa hosam” dohot pandohan patik na umangat. Dungkon ni i, didok paiduana, alai na saihot do “Haholonganmu do

donganmi songon dirim!” On pe pandohan naung leleng do ditanda halak Jahudi. Alus ni Tuhan Jesus on, i ma penggabungan ni aspek keagamaan dohot kesusilaan, jala na mencakup sude hukum na asing i. Holong na tu dongan jolma (termasuk susila) na so terpisahkan sian holong tu Debata. Alani ingkon tangkas do na holan sada do Debata asa boi i mardalan.

 

Ayat 32-33: Tangkas jala tingkos do dibege taringot hasintongan naung leleng tinandana umbahen didok ibana “Tingkos didok Ho, Guru...” Sada do Tuhan jala ingkon haholongan laos huhut manghaholongi dongan. Pangongkuon dohot pangulahonon di son do na umangat sian sude angka pambahenan, nang rumang angka pelean situtungon pe. Molo niongkuhon holan Sasada Tuhan i do Debata, tontu nda nunga sintong i laos nunga parsidohot ibana marjanji mangalo angka ilah-ilah lain.

 

Ayat 34: Ala pantas (bijaksananya) ni alus ni sibotosurat i, didok Jesus ma tu ibana “Ndang sadia dao ho sian harajaon ni Debata.” Alai nang pe ndang sadia dao ibana sian Harajaon ni Debata, tong do ndang sahat dope ibana. Ndang sadia dao ninna ala memang jonok do ibana tu Jesus hatiha i. Hape Jesus do Raja ni Harajaon i.

“Jikalau ia menyerahkan hatinya kepada Yesus, niscaya ia akan dapat mengasihi Allah dan sesamanya manusia juga. Dengan jalan yang demikianlah orang menjadi anak dari pada Kerajaan Allah itu”, ninna K. Riedel patorangkon turpuk on.

 

3. Renungan

Hinorhon ni godang ni angka ruhutruhut binahen ni Jahudi, gabe so diboto be dia do na rumingkot, jala gabe bahan perdebatan di tongatonga ni nasida. Nda gombaran na mansai nalnal do angka na songon i di jaman on na muramura ruar angka peraturan, keputusan so binoto haporluanna. Jala di ujungna boi do gabe sahat songon

halak Jahudi, ndang diboto dia do na rumingkot. Mansai jonok, jala ndang tarsirang, hubungan ni angka Patik/ hukum na rumingkot i sian panandaon dohot pengakuan di Tuhan na holan sada. Di tingki ni halak Israel di masa ni buku 5 Musa mangadopi angka ilah-ilah na mansai godang di humaliangnasida. Alani i mansai ringkot ondol mandok holan sada do Tuhan. Tontu di zaman na patubuhon godang ilah nuaeng pe, bahkan na cenderung adong na sai melahirkan ilah tontu do lam tangkas, holan sada do Debata, i ma Tuhan i. Ala holong do sentralna dohot hataridaanna, tontu do ndang holan di hata i, alai di tindakan nyata do. Amen.

JOB 42 : 1 - 6 “GURU DOK NI DEBATA DO SALUHUTNA” MINGGU XII DUNG TRINITATIS 27 OKTOBER 2024

 

MINGGU XII DUNG TRINITATIS 27 OKTOBER 2024

JOB 42 : 1 - 6

“GURU DOK NI DEBATA DO SALUHUTNA”

 

I. Patujolo

Si Job, sahalak na bonar, sahalak na mabiar tu Jahowa, jala sai paholang dirina sian hajahaton. Ala haburjuonna, patut do nian ibana dao sian hapariron, hape baliksa do na masa tu si Job, diloas Jahowa ibana marungkil laho patuduhon tu sibolis i, na tongtong do burju si Job tu Debata nang pe diae na hansit.

Buku Job 42 : 1 - 6 boi dohonon “klimaks” manang nunga tahe songon na di puncak peristiwa ni si Job, alai dibagasan turpukta on pe ima tarsongon na gabe titik balik krusial, disiala si Job na ditegur Debata do alai huhut do manjalo habisuhon na sian Debata, alani i ma gabe lam dihaposi si Job ma Debata di parjumpanganna songon na di buku Job 42 : 1 - 6 on.

 

II. Hatorangan ni Turpuk (Ayat per Ayat)

l  Ayat 1 - 2

Patuduhon awal na sian dialog antar ni si Job dohot Debata, alai jumolo ma tahe ingkon botoonta do konteks dialogis ni si Job dohot Debata sebelum dohot sesudah na sian turpukta on (ay. 1). di ayat 2 boi ma taida bahwasanya dihaposi si Job do Debata taringot tu huasoNa, taringot tu na boi dohonon songon pengakuan ni si Job tu Debata, ima songon na menandakan titik balik dibagasan sada hubungan si Job dohot Debata dohot na mengandung pesan moral, pesan moral ima songon na didok bahwasanya Debata do na boi patupahon saguru di lomoNa di saluhut partingkian.

 

l  Ayat 3 - 4

Dihantindangkon si Job paboa na holan habisuhon ni Debata sambing do di ginjang ni saluhut angka habisuhon ni jolma na di hasingan on: “Tongon tahe, nunga huhatahon tutu na so huantusi; halongangan do angka i, salpu sian rohangku jala naso huboto.” na diadopan ni si Job manopa panandaion diri na bagas paboa haboionna ndang apala sadia i maradophon hagogoon dohot haboion ni Debata.

Alani i, di ayat 4 pe adong do sungkunsungkun ni si Job, sungkunsungkun ni si Job on songon sungkunsungkun na retoris do on, jala on ma alasan na mandok bahwasanya parbinotoan ni sahalak jolma terbatas do jala ndang apala tuk boi menjangkau sude na taringot tu aspek kebijaksanaan ni Debata, jala si Job pe dang boi mamboto taringot tu aha do gombaran ni sangkap ni Debata tu ibana.

 

l  Ayat 5 - 6

Tarsongon sada pernyataan ni si Job taringot haporseaon na tu Debata, jala dihaposi ibana do Debata marhite sian pengalaman pribadi ni ibana tu Debata marhagogoon ma tu haporseaon ni si Job (ay. 5).

di ayat 6 pe songon sada pernyataan ni si Job do, pataridahon na di solsoli ibana do laho manukkun tu Debata hape tanpa disadari si Job do ndang apala tuk dope parbinotoan na taringot tu aha na naeng si patupahon ni Debata, alai panolsolion ni si Job on songon dipataridahon ibana do carana dibahen songon tulus ni roha ibana laho manghatahon i.

 

 

III. Hahonaan ni Turpuk

1. Tongtong Ma Tahaposi Debata

Jotjot do tubu sungkungsungkun di roha taringot tu songon dia Debata laho patupahon manang pasingkophon na masa ditongatonga parngoluanta on. Ganup hita angka jolma on marhite keterbatasan, holan na boi do hita mampu marnida sebagian kecil taringot tu realitas, nian terikat do hita sian sada pengalaman na masa di ngolunta alai holan gombaran sekilas do i, jala alani ma ro sipata sungkunsungkun di rohanta taringot songon dia do cara ni Debata bekerja.

 

2. Haserepon Ni Roha

Haserepon ni roha ndada na berarti pasif manang na mengabaikan rasa ingin tahu, alai gabe sada ojahan do di hita asa tarbukka dalan tu parsiajaron dohot pertumbuhan, alani ma marhite haserepon ni rohanta on ma boi hita manjalo angka parsiajaron na sian Debata.

Dipataridahon si Job do haserepon ni rohana marhite na manolsoli ibana di angka hata na manang sungkunsungkun na tu Debata, jala si Job pe diakkui ibana do dang marlapatan ianggo ibana maradophon Tuhan i (ay. 5), sikap na songon on pe gabe sada penyerahan diri luhutna tu Debata asa boi manjalo di angka na dipatupa Debata manang kehendakNya.

 

IV. Panutup

Marhite buku si Job 42 : 1 - 6  adong do na gabe panutup,ima:

1. Ganup jolma adong be do keterbatasan taringot tu pemahaman angka na naeng patupahon ni Debata, jala ingkon boi do hita tongtong marserep ni roha.

2. Haserepon ni roha dohot panolsolion ima songon sada kunci tu pemulihan, jala rade do Debata tongtong laho mengampuni dohot na memulihkan.

3. Debata boi do mangulahon saluhutna, di Ibana do hagogoon dohot huaso naso terbatas jala boanon na do hita tu angka sangkapNa na sun denggan i.

 

JAMITA Minggu Dung Ari Natal, 29 Desember 2024 Mandok Mauliate siala asi ni roha ni Debata (Mengucap Syukur atas Kasih Karunia Tuhan) 1 Timoteus 1:12–17

 

JAMITA Minggu Dung Ari Natal, 29 Desember 2024

Mandok Mauliate siala asi ni roha ni Debata

(Mengucap Syukur atas Kasih Karunia Tuhan)

1 Timoteus 1:12–17

I. Patujolo

Mansai bajar dope si Timotius gabe uluan ni huria, poso nang huria na niuluhonna. Dihabajaron ni si Timoteus dohot di haposoon ni huria na niuluhonna godang parungkilon na manosak huria i,parungkilon ala pangaleleon dohot ala podana mangaliluhon haporseaon ni huria i. Alani panosak ni parungkilon i boi do gabe gale siTimoteus.Alani ma dipasahat si Paulus surat on paingothon si Timoteus asa marsihohot di haporseaonna mangadopi parungkilon i. Parsihohotan ni haporseaon i naeng tarida marhite haburjuon dohot habuluson lao mangula ulaonna, asa unang songon parpoda haliluon i holan malo mandok ala dang diulahon. Ingkonpadot do  naposo ni Tuhan i mangula, ingkon masiurupan jala rade kerjasama dohot dongan na asing. Marhite suratna on diajari si Paulus do si Timoteus asa manghobasi ulaonna dibagasan lomo ni roha ni Tuhan i. Naeng ma polin    si Timoteus mangahatahon hata ni Tuhan i, daulat parangena, padot mangula uloanna, unang marroha hepeng.

 

II. Hatoranganni turpuk

Mandok mauliate tu Debata ima songon responta di sude denggan basa ni Tuhan i di ngolunta. Sude denggan basa ni Tuhan i ingkon tahamauliatehon marhite roha na ias. Apotel Paulus marhite ayat 12 on taida ibana mandok mauliate tu Tuhani ala adong sada pengalaman ni ngolu namansai arga na binolusna.Disude angkapanghobasion ni ibana ditingki marlas ni roha, arsak ni roha, hipas nang di tingki marsahit, dihilala ibana do pangurupion dohot pandonganion ni Tuhan i. Roha mauliate nisi Paulus ima nang mangonjar rohanta asa sai tongtong mandok mauliate tu Tuhani. Ai boi pe hita mamolus sude partingkian ni ngolutaon, tarlumobi boi hita bongot tu ujung ni taon 2024 on ala ni asi ni roha ni Tuhan ido. Ap. Paulus menyadari adong  masa lalu na holom nahea nibolusna. Di ayat 13 diongkuhon ibana :”panginsahi do au najolo jala pangalele jala  siulahon gogo” Diparhatopot Ap Paulus do alani masa lalu nai dang talup be nian ibana lao marhobas, gabe ula ‑ ulani. Tuhan. Ai pangalele,panginsahi,siulahon gogo tuhalak siihuthon Kristus do ibana. Alai asi ni rohani  Tuhani gabe talup ibana marhobas diadopan ni Tuhani. Tung diparhatopot Ap Paulus do anggo soala asini rohani Tuhan i di ngoluna dang marlaba ibana, marisuang do ngoluna. 

Ayat 15 digoari Ap Paulus do dirina pardosa."Nunga ro Kristus Jesus tu portibion,paluahon angka  pardosa,sian angka ido naparjolo"Alai nang pe pardosa Ap Paulus dipalua do ibana ala asini roha ni Tuhani. Loason ma nang barita lasniroha dihita saluhutna, haru Ap Paulus na manggoari dirina pardosa, diasi i, dipalua Tuhan i ibana, nang hita pe asi do rohani Tuhani tu hita molo olo hita mulak tu ibana, molo taparhatopot sude dosanta i tu Ibana. Ayat 16 gabe sada kepastian di hita, sada sipaingot tu hita,molo Ap Paulus dijangkon jala disesa Tuhan i dosana, nang hita pe dijangkon jala disesa Tuhan do dosanta molo ro hita tu Ibana (Rom6:1-2).Ala asini rohani Tuhani do gabe margogo Ap Paulus mangadopi ragam ni parungkilon, dileai, ditangkup jala sahat tu na dihurungkon ibana, hot do ibana dihaporseaonna, satia do ibana tu Tuhan i marhite panghobasionna. Songoni ma nian hataridaan ni ngolu ganup na porsea tuTuhani,ima mangarga honpanghophopon Tuhan Jesusi marhite na satia mangulahon angka ulaon na denggan di ngolu si ganup ari, songon parbue ni hamauliateon ni rohanta tu Tuhan. Dang cukup hita holan mandok "au porsea, manang holan mandok mauliate Tuhan"alai ingkon tarida ma nian parbue ni haporseaonta dohot hamauliateon ni rohanta imarhite ngolunta, sikap, uloanta si ganup ari. Ai malua hita dang alani angka uloan na denggan na taula, dang alani angka parangenta, alai sileheon lehon ni Debata sambing do i tu hita.

III. Panimpuli                                                                                          

Halongangan do asini rohani Debata di ngoluntaon.Asini rohani Debata ima na gabe tema ni panghobasion ni Ap Paulus di ngoluna. John Newton mansai uli pasahathon i marhite na manurat sada ende na mansai tarbarita sahat tu sadarion : Amazing Grace, Kidung Jemaat No.40 – Ajaib benar anugerahMu. Ditingki marumur 54 taon ma ibana menciptakan lagu i, dung 15 taon ibana gabe Pandita,diojakhon ibana gabe Pandita tingki marumur 39 taon. andorang so Pandita ibana uloanna ima pedagang budak. Ende na ciptahon ni John Newton patoranghon hamubaon ni rohana sian ngolu na leleng tu ngolu na imbaru di bagasan Tuhan i. Muba ibana sian pedagang budak gabe sahalak na berjuang mangalo perbudakan. Na niae ni si John Newton hampir sarupa dohot pengalaman ni ngolu ni Ap Paulus. On ma nang na mangonjar rohanta mamparhatopothon ia ngolunta on gok asi ni roha ni Tuhan. Sai taparhatopot ma i di ngolu si ganup ari. Tarimangi ma satongkin, boha adong parasingan ni ngolunta andorang so tajangkon Kristus di ngolunta jala boha do ngolunta dung tajangkon Tuhan i ni ngolunta? Manang mardosdos do tahilala ngolunta on? Tung ise ma hitaon di adopanni Tuhani?barani dohita mandok molo boi hita patupa hon uloan nadenggan, boi hita manghobasi ulaon ni Tuhani dohonon tadoi alani habadionta, hamaloonta, haburjuonta? Dipillit Debata hita ndada marhite angka halobianta, haburjuonta, habadiaonta, alai sian lomo ni rohaNa sandiri jala sian sangkap ni rohaNa sandiri.Alani tama ma sai tarida roha mauliate di ngolunta. Sai gabe tiruan ma parangenta tu halak na asing, asa marhite ngoluta halak naasing pe gabe manghilalahon denggan basa ni Tuhan i, halonganan asi ni roha ni Tuhan i, taargahon ma i marhite na mamelehon ngolunta hibul tu Debata. Amen.

Jamita Tu Pesta Paduahon Hatutubu ni Tuhan Jesus (Kamis, 26 Des.2024) Ev. Psalmen 98 : 1 --- 9 Ep. Titus 3 : 4 --- 7 Topik : “Nunga dipabotohon Jahowa haluaon tu hita”

 

Jamita Tu Pesta Paduahon Hatutubu ni Tuhan Jesus (Kamis, 26 Des.2024)

Ev. Psalmen 98 : 1 --- 9 Ep. Titus 3 : 4 --- 7

Topik : “Nunga dipabotohon Jahowa haluaon tu hita”

1. Patujolo :

Psalmen 98 on ndang tarsirang hita on sian Kumpulan Mazmur na mangondolhon taringot tu huaso ni Debata na gabe Raja(Bindu 95-99). Pandohan Debata gabe Raja di ay.6 dohot Panguhum ari parpudi, na pahombarhon Psalmen on dohot angka Psalmen andorang so bindu 98 on. Parniahapan ni bangso Israel na ditindos bangso na asing jala haluaon na pinatupa ni Debata, mamboan nasida tu haluaon, i do na mangonjar roha ni parPsalmen laho mandok mauliate huhut ala asi ni roha ni Debata di bagasan haluaon i. Hamauliateon ni parPsalmen on huhut do mangarahon saluhut bangso laho patimbulhon dohot pasangaphon Debata di bagasan roha na las. Mansai bidang do hinangkamna, mamungka ma sian ruas na di Bagas Joro(ay.1-3), udut ma muse tu sandok jolma di tano on(ay.4-6), nang sahat ro di na tinompa(ay.7-8).

2.                  Hatorangan ni turpuk :

Ayat 1 – 3, molo taida pardalanan ni bangso Israel, adong dua na mansai balga na niadopan ni bangso i i ma : hamumulak nasida sian parhatobanan Misir dohot mulak sian habuangan. Na dua on ma ulaon na pinatupa ni Debata songon dalan haluaon ni bangso i. Nunga dipatupa Debata angka ulaon na mansai balga, marhamonangan di parporangan huhut mangalehon haluaon nasida. Saluhutna on, dipatupa marhite janji ni Debata taringot tu hatigoranNa maradophon angka bangso jala marningot holong ni rohaNa maradophon bangso Israel. On ma na gabe ojahan ni las ni roha ni ganup bangso lumobi ma angka bangsoNa, ai nunga ditaluhon Ibana hajahaton ni portibion. Pandohan Ende naimbaru,i ma pandohan ni ngolu naimbaru, ngolu na mandok mauliate, jala holan manghaporseai pambahenan ni Debata.

Ayat 4 – 6, tu sandok bangso dohot jolma do haluaon i, pola sahat ro di ujung ni potibion. On do barita las ni roha na mansai balga. Marsurak-surak ma ho ale sandok tano on mangolophon Jahowa, pangiar ma soaram marolopolop, jala marende ma hamu. Ingkon saluhut na tinompa do patupahon olopolop na songon on.

Ayat 7 – 9, ende olopolop nang saluhut soara ni sarune dohot soara ni sangka, ndada holan i nanaeng mamuji holong hasatiaon nang angka halongangan na binahen ni Jahowa i ma gabe Raja nang Sitompa saluhut. Ringkot do nang pangisi ni portibion laho mangolophonsa. Ala Jahowa do na marhuaso di atas ni saluhut, ala Ibana do na manompa, nampunasa sandok parhusoran ni na masa. Alani tama pujipujian tu Jahowa na so marmula jala na so marpansohotan.

3.                  Pangujungi :

Di Psalmen on nunga diparade hian panggonopion taringot tu haluaon na pinatupa ni Debata marhite Jesus Kristus. Holan di bagasan Jesus Kristus do hasisingkop ni habalgaon ni Debata dohot bidang ni haluaon na sian Debata. Jala nunga singkop haluaon i marhite Jesus Kristus. Huhut holan marhite Jesus Kristus do hita talup laho mamuji Debata huhut parsidohot dipamujion tu Debata na manongtong. Naeng ma tahaporseai, ia Jesus Kritus i ma na ro laho manguhumi tano on, laho pajongjong hatigoran dohot hasintonganNa. Nunga dipatupa angka tanda halongangan, sahat ro di tingki on jala manongtong do i. Molo nunga tajangkon Jesus Kristus gabe Tuhan dohot Sipalua, tardok ma hita bagian ni angka bangso dohot ujung ni portibion naung marnida haluaon na sian Debata. Nian mansai godang sian na masa dingolunta na gabe dasor asa tongtong mamuji Debata. Boi mangolu, boi marhosa, malua sian angka boban ni ngolu na mansai dokdok, boi mulamulaon, boi manghobasi angka dongan, dapotan haluaon, saluhutnai holan alani asi ni roha ni Debata sambing do, ndada alani hatauonta. Antong tapuji ma Debata, ai nunga dipabotohon tu hita haluaon. Ibana ma na marhuaso di sandok portibion marhite hasintongan nang hatigoran na manongtong. Ndada hurang be ra angka pambahenan ni Debata. Marhite turpuk on, tama ma pujipujian di bagasan las ni roha pasahatonta tongtong. Parsidohot ma hita di bagasan parendeon laho marsomba dohot mamuji ala pambahenanNa i. Amen.