(Jeremia 23: 1-6) "JAHOWA MARMAHANI BANGSONA" ("TUHAN MENGGEMBALAKAN UMAT-NYA")

 

(Jeremia 23: 1-6)

"JAHOWA MARMAHANI BANGSONA"

("TUHAN MENGGEMBALAKAN UMAT-NYA")

1. PATUJOLO

Sian bindu 1: 1, ia panurirang Jeremia, anak ni malim Hilkia sian huta Anatot di luat Benjamin. Hombar tu informasi ni bindu 11: 21, angka halak na jahat do pangisi ni huta Anatot, pola ditahi roha nasida naeng manodos panurirang Jeremia. Bindu 1: 10, mansai tangkas jala borat do ulaon panurirangon di pasahat Debata tu si Jeremia, "ida ma, hupabangkit do ho sadarion mangaranapi angka bangso dohot angka harajaon, laho mangurati dohot maniaphon, mangago dohot mangaloha, paulihon dohot manuan". Di ulaon na pinasahat ni Debata tu si Jeremia, di alami ibana do godang angka tangtangan dohot parsorion, i ma na ro sin angka baoa dongan sahutana na di Anatot, sian angka panungganei, pengusaha, lumobi sian angka "panurirang pargapgap" (si Hanania). Uju hamamasa reformasi Josia (taon 622 sM), di na jumpang naposo ni raja i buku Patik i dibagas joro (2 Raj 22:8), tung mansai las do roha ni si Jeremi, jala pangurupi na tangkas do ibana di reformasi i, ai didok: "tangihon ma angka hata ni patik on, jala hatahon tu halak Juda dohot tu isi ni Jerusalem" (Jer 7: 1-20). Nang pe songoni, masuk tu horong na manurirangi do Jeremia tu haroro ni Mesias Sipalua i, songon na jumpang di Jer23:5-6; Jes 7: 12-25; 2 Sam 7: 1-16. Secara khusus turpuk on, manaringoti panurirang na jahat roha (secara umum bindu 23: 1-40 manaringoti panurirang pargapgap/nabi palsu).

2.                  HATORANGAN

Dua bagian hatorangan perikop ni bindu 23:1-6 on, parjolo: lumba-lumba dompak panurirang na jahat (ay 1-4). Paduahon, lumba-lumba tu pamilliton ni raja David, manguluhon bangso ni Debata (ay 5-8) jala pangarimpunan na ima"pangarajaion dohot pangajarion na salah dompak bangso ni Debata". Di bagian na parjolo, mansai torang do paraloan ni panurirang Jeremia maradophon panurirang pargapgap. Mardomu tu informasi di buku Jeremia sandiri, sobu jala rokking do paraloan i dompak panurirang pargapgap i, sahat ro di na mandate ibana. Siala parsorion i, pola di sahapi roha na naeng laho manadingkon hata ni Debata (Jer 20: 7-10). Di ujungna monang do si Jeremia, ala ibana do na sinuru ni Debata songon panurirang na sintong.

Ay 1-4: Parmahan na jahat dohot parmahan na denggan.

Dipungka do perikop on marhite hata mandok "marjea ma" (ay 1). Mansai tegas do hata ni si Jeremia dison, mandok marjea angka parmahan na paserakhon dohot mangago birubiru na pinarmahan ni Debata. Parmahan na paserakhon huhut mangago birubiru ni Debata! Mardomu tu situasi ni panurirangon on, secara formal/resmi do angka parmahan na ginorahon ni turpuk on marhobas ditongatonga ni masyarakat lumobi di bagasjoro (28:1).Mansai menarik situtu do panghataion ni angka parmahan i (panggomgomi) dohot parjamitaon ni panurirang na jahat (malim pargapgap i). Mansai uli do pamangkulingon na dohot panggulmit nasida be (lumobi na marmahan di bagas joro), hape angka hata gapgap do dihatahon nasida, tung so adong do hata ni Debata sintong dihatahon, sude pamangkulingon na holan marojahan tu pikiran nang tu surasura ni roha na (mangonggop sinamot di bagas joro i). Mansai las do roha ni natorop tumangihon panghataion i tu panghilalaan ni na tumangihonsa.

Di pihak na asing, walau seorang raja memiliki kekuasaan yang sangat besar, penanganan terhadap urusanurusan kecil biasanya diberikan kepada bawahannya. Pada kejujuran dan ketekunan, atau pada keculasan dan kemalasan para bawahanlah tergantung kesejahteraan dan kesengsaraan (mata pencaharian) warga/umat. Dibuktikan oleh pengalaman nats ini, bahwa baik penguasa/raja maupun bawahan selalu memiliki kecenderungan untuk menyalahgunakan jabatan mereka. Praktek penggembalaan yang buruklah yang mengakibatkan Allah marah, dan la bertekad akan mengumpulkan sekumpulan umat/warga yang tercerai berai, sekaligus berupaya mencari gembala yang baik bagi mereka, yakni sebagaimana yang telah dijanjikan Allah (masa Jesaya) yakni munculnya pemerintahan baru yang bukan hanya "seorang raja akan memerintah dengan kebenaran" tetapi " pemimpin yang akan memimpin menurut keadilan, dan masing-masing mereka akan seperti tempat perteduhan terhadap angin...seperti aliran-aliran air di tempat yang kering". Ay 5-6: Parmahan na tigor roha.

"Patindangonhu ma sada tumbur na tigor" (ay 5). Janji Mesianis yakni "tunas yang adil" (tumbur na tigor) dari dinasti Daud yang sedang dalam proses kepunahan. Sifat-sifatnya, ditandai dengan prilaku pemerintahan yang bijaksana (ay 5; bnd. Yes 52: 13), yang memperkenalkan nilai penebusan hamba bagi umatNya. Penggenapanay 5 on, tangkas tarida di ay 6-8, "dapotan tua ma Juda, marsonangsonang di inganan na...du"ala parmahanion ni parmahan na denggan roha i.

3.                  HAHONAAN TU JAMITA

a.                   Haparmahanon manang hapanurirangon, tanggungjawab manang keadaan na ingkon torus mardalan jala adong di portibi on saleleng nilelengna (saleleng adong jolma di portibi on). Jabatan parmahanion dohot panurirangon, lohot doon nuaeng so holan di diri angka malim, alai lumobi di diri ni angka panggomgomi songon parmahan tu torop halak. Molo dipinsang angka na sala huhut ditegor angka penyelewengan, sada tudutudu do keadaaon on paboa sintongsintong dope mardalan panurirangon nang parmahanion 1. Alai manang ise na so perduli tu angka na sala, ima tudutudu na so mardalan be fungsi ni haparmahanion/panurirangon i. Nyatanya, mansai torop jolma manghasiphon huhut mabiar (pasombuhon) angka na sala dohot penyelewengan, jala justru mambanggahon pambahenan na sala niulahonna.

b.                  Mabiar do nuaeng jolma maminsang angka na sala nang pe tardok jaman on jaman reformasi (tranformasi). Ala soboi uhum mardalan denggan, gabe lomo ni angka parhuaso ma manontuhon hasintongan, huria pe di tingki on secara lembaga mauhom (sip) mardina angka penyelewengan na masa di humaliangsa. Semangat, motivasi, konsistensi huhut habaranion ni si Jeremia do na gabe tiruan tu hita di partingkian sisongon on. Marsorminan tu hamonangan ni si Jeremia, naeng ma sude halak Kristen marnampuna di habaranion, komitmen, semangat laho mansoarahon hasintongan. Ndada hagogoon portibi pangkeonta tuson, alai Debata do na mangondingi hita manoarahon hasintongan i.

c.                   Pangalaho sipatuduhonon laho manghangoluhon turpuk on ima, pehembangkon nilaini hatigoran, gabe dang be halomohononton angka penyelewengan, penipuan, korupsi dohot lan angka uloan hajahataon na asing. Marhite napatuduhon mituha ni pangalaho on ma hita boi marmahani huhut manurirangi tu humaliang, lumobi na patindang uhum songon ojahan ni parsaoran sosial di humaliang hita. Amen

Markus 6: 14-29 Topik : HIRAS NI ROHA MANGHATAHON HASINTONGAN

 

Markus 6: 14-29

Topik : 

HIRAS NI ROHA MANGHATAHON HASINTONGAN

I.                        Patujolo

Turpuk on manaringoti hamamate ni si Johannes Pandidi, intina mangondolhon konflik antara ni si Johannes Pandidi dohot Herodes. Songon na tangkas taboto na jongjong do si Johannes Pandidi mansoarahon hamubaon ni roha paboa naung jonok harajaon ni Debata. Songoni ma hiras ni rohana manghatahon na sintong i, dipaingot ibana do si Herodes di hasalaanna. Ima Raja Herodes Antipas, Anak ni Herodes Agung, na mangalap Phasaelis, Putri Areta IV Philopatris sian Nabatea (kerajaan bangsa Arab Kuno). Ala disiranghon si Herodes ripena i jala mangalangkup tu si Herodias, ripe ni Filipus (Herodes Filipus 1). Ido alana dipaingot si Johanes Pandidi ibana. "Tidak halal engkau mengambil istri saudaramu!" (17-18). (Herodias adalah Putri Yahudi dari Dinasti Herodes, yang juga keponakan dari Herodes Antipas).

2. Hatorangan ni Turpuk

Marragam angka pandapot ni halak hatiha i taringot tu Jesus Kristus (ay 15). Angka dongan sahutana ndang porsea tu angka halongangan na pinatupa ni Jesus, ala nunga ditanda nasida ise natoras ni Jesus dohot angka hahaanggiNa (ay. 1-6). Angka na asing adong na porsea taringot tu pambahenanNa dohot halongangan alai taringot tu hasintongan paboa Anak ni Debata do Ibana, Mesias na pinarbagai, ndang porsea nasida. Si Elia panurirang di Padan Narobi i do Ibana didok naung hehe sian hamatean. Nunga sar barita taringot tu goarNi Jesus jala sahat do barita i tu raja Herodes. Gabe didok ma si Johanes naung digotaphon uluna (ay. 14). Jala naung hehe sian na mate. Ido dipingkiran ni si Herodes.

Sasintongna mansai sangap do si Johannes di bahen si Herodes. Sahat tu na mandok di angka parjamitaonna pe tongtong ditangihon si Herodes jala mabiar do ibana, pola dirajumi ia si Johannes halak na tigor roha jala na bontor, jadi sai diondihon si Herodes do ibana. Si Johannes pe tongtong paingothon si Herodes asa unang mangalangkup laho mambuat pardihuta ni Filipus hahana i. “Tidak halal engkau mengambil isteri saudaramu!" (Walaupun menyinggung Herodes itu berbahaya, terlebih lagi Herodias, namun Yohanes memilih menempuh bahaya daripada melalaikan tugasnya untuk menyatakan kebenaran).

Ala ni sipasingot ni si Johannes on do umbahen adong sogo ni roha ni si Herodias (pardihuta ni si Pillipus). Jala hosom nang rohana naeng ma nian bunuon ni si Herodes di rohana si Johannes i (ay. 19). Di tingki patupa Pesta ulang tahun ni si Herodes ima mambahen panganan ujuan di angka na sangap, di angka induk ro di sude angka raja di Galilea. Asa lam tu riburna disi ma boruni si Herodias patupahon tortor dijolo ni angka na sangap. Ala solo roha ni raja i gabe didok ma; manang aha pe na pinangido ni siboru i sai na lehonon na do (sekalipun setengah dari kerajaan dan Janji ini diikat dengan sumpah, supaya tidak ada dalih yang bisa dipakai untuk mengingkarinya).

Sada kesempatan do di roha ni si Herodias taringot tusi asa anggiat nian saut na dirohana ima hamamate ni si Johannes. Nunga diajari si Herodias boruna i mangido ulu ni si Johannes di talam. (dan permintaan itu tidak boleh ditunda-tunda lagi, jangan ada waktu yang terbuang, dia harus mendapatkannya sekarang juga). Taida ma si Herodes na pasauthon pangidoan ni boru ni si Herodias i, atik pe marsak situtu rohana, alai nunga jumolo dijanjihon ibana dijolo ni angka raja jala maruari ibana taringot tusi.

3. Sipahusorhusoron

Molo tung madabu pe jolma i tu bagasan dosa. Sai tongtong do dipaingot Debata marhite hataNa nang marhite angka naposoÑa. Dipangke Tuhan Debata do angka naposoNa laho paingothon di angka dosa hahurangan asa anggiat adong nian ngolu na marhaimbaruon. Poda 27:5 "Tagonan do pinsangpinsang na andar sian roha haholongon na marsibuni". Dendam (hosom-sogoni roha) ndang na laho paulihon di angka hamaolon lumobi nang angka masalah. Alai justru mambahen hita lam lonong tubagasan dosa songon si Herodias na mansai sogo hian rohana marnida si Johannes ala ni paminsangonna. Ia goarni Minggu ima Minggu VII dung Trinitatis dohot topik ni Minggu Hiras ni roha manghatahon hasintongan. Alani tajalo ma hiras ni roha na sian Tuhan Jesus marhitehite Tondi Parbadia asa margogo jala dipatau hita marpanindangi tu saluhut jolma laho mambaritahon hasintongan. Tu ulaon na umbidang do hape hita disuru, i ma marpanindangi tu angka na so mananda Kristus. Torop do halak Kristen na mabiar mamaritahon Kristus di ngoluna. Nda didok do: Asa na olo maila ala ni Ahu dohot ala ni angka hatangki, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i (Luk.9:26). Asa marhite turpuk jamita on naeng tubu ma di rohanta dohot di haporseaonta laho manghatahon hasintongan i songon si Johannes Pandidi. Asa ganup na porsea i manghatindanghon hasintongan ni Debata, tarlumobi ma maminsang angka na mangulahon dosa na maralo tu patik ni Debata. Amen.

Ev. Psalmen 48: 1-15 "Debata do Partanobatoanta / Allah Benteng Bagi Kita"

 

Minggu VI Dung Trinitatis, 07 Juli 2024

Ev. Psalmen 48: 1-15

"Debata do Partanobatoanta / Allah Benteng Bagi Kita"

 

I. Patujolo

Partanobatoan (perlindungan) ima sada na tung ringkot di angka na tongon mangadopi parmaraan na jotjot mambahen gabe gale pamatang nang gale partondion/haporseaon. Angka na sisongon on boi tardok songon musu do di hita, ai ndang adong sian hita na olo marhagaleon mandalani pardalanan ni ngoluna siganup ari tarlumobi ma marhagaleon di haporseaon. Haroro ni sibolis na naeng mangela hita asa dao sian Debata Jahowa na tahaporseai mangalehon hagogoon di hita pe tardok songon musu do i. Tama ma nian adong ojahan nang sitioponta asa unang gale hita mangadopi musu i. Aha ma i? Molo Debata na tapatujoo jala Ibana na gabe partanobatoan di ngolunta. Manongtong do asi ni rohaNa, jala sai na monang do hita maradophon musu i molo nunga Debata Jahowa na gabe partanobatoanta. On ma na naeng diondolhon tu hita marhite turpuk jamita Psalmen 48 on.

II. Hatorangan Ni Turpuk

Mangihuthon 1 Kronika 6:22, si Korah ima sada sian pomparan ni marga Lepi (suku lewi). Raphon si Datan & Abiram do ibana mangalo/menggugat kepemimpinan si Musa dohot si Aron di bangso Israel (4 Musa 16:1-3) hape dalan ni si Korah di laho mangalo Jahowa. Laos on ma na mambahen si Korah dohot 250 halak hona uhuman ni Debata marhite na dipangan api dohot na dibondut tano si Korah rodi jabunasida (4 Musa 16:33). Alai tung pe songon i, patar dope holong roha ni Debata tu angka ank ni si Kora na so diloas mate (4 Musa 26:11). Ala pomparan ni marga Lepi, hot do ulaon nasida ima di bagas joro hombar tu bagian ni tugas na dipasahat tu halak Lepi. Jala turpuk on ma ende ni angka anak ni si Korah na mangendehon ende puji-pujian di bagas joro. Sian latar belakang on, boi idaonta, tung pe diuhum Debata amana na naung mangalo sangkap ni Jahowa di gugatan ni si Korah taringot tu kepemimpinan ni si Musa dohot si Aron, alai ianggo angka ianakhonna, tongtong do manghatindanghon hinatimbul dohot hagogoon ni Debata Jahowa na marhuaso di sandok portibi on. Sude na i ala na tutu situtu do huaso ni Debata Jahowa i. Boha ma digombarhon par psalmen hinatimbul di huaso ni Debata i?

Ayat 1-2 (Hinatimbul dohot Hinauli Huaso Ni Jahowa Patar Marhite Parsaoran Dohot Debata)

Dibuhai do turpuk on marhite hata "Timbul do Jahowa", marhite hata timbul (Besar/Gadol) mangondolhon hinatimbul huaso ni Tuhan di saluhut, jala marhite i ma tama pujion situtu Ibana. Molo taida songon na masa tu si Kora, tanda do na marhuaso Debata Jahowa di nasa adong di portibi on (Zebaot). Molo tapaihutihut sian Psalmen 42 dihatindanghon angka anak ni si Kora on hinabalga jala hinagogo huaso ni Debata Jahowa na manggomgomi ngoluna di tingki na naung salpu dohot tu tingki na naeng ro. Digombarhon do hinatimbulNa i sian hinauli ni "huta ni Debata" (mengarah tu Jerusalem, hajongjongan di bagas joros ni Debata) songon simbol hagogoon dohot haulion ni Debata Jahowa na patubuhon silas ni roha (kegirangan/mesos). Huta Jerusalem ima huta na mansai uli jala disi do bagas joro ni Debata. Haulion na niida na dison ndada ala hinauli partanobatoan/menara, alai ala adong do hahonaan ni tu inganan parsombaon tu Debata. Boi ma idaonta haulion na digombarhon dison ndada holan sian ukuran ni haportibion alai sian partondion/spiritualitas. Jala digombarhon do muse marhite Dolok Sion (simbol kehadiran & kekuasaan Allah) lam dipabagas marhite hata "suhi tu tungkan utara" (Terj.LAI TB 2 seperti puncak gunung Zafon/tsafon). Di mitologi budaya Timur, Zafon dihaporseai inganan ni dewa Baal/debata na marhuaso hatiha i. Parpsalmen mamangke istilah “tsafon" laho mandok hamuliaon ni Debata Jahowa i tumimbo sian debata na asing.

Ayat 3-4 (Debata Jahowa Partanobatoan Na Tung Mansai Uli)

Di ayat 3 didok "Tau Partanobatoan do Debata". Panghatindanghon on borhat sian. inisiatif ni Debata na jumolo patandahon hadirion dohot hamuliaonNa. Patar ma on marhite hinauli na nidokna marhite huta ni Debata (Yerusalem) na tongtong maringan Debata disi, songon na naung jumolo dihatindanghon di Psalmen 46:5 "Debata di tongatongana, ndang tagamon humordit, andostorang dope, nunga diurupi Debata ibana". On ma na gabe silas ni roha di bangso i. Partanobatoan na digombarhon ni turpuk on tung mansai uli do. Borhat sian parniaan tu angka “bagas - puripuri (LAI) – armenoteha istana" (ay.4) dipaingot do tung pe uli huta i, badia, sangap jala marhagogoon situtu binahen hinauli dohot hagogoon ni nasa adong di huta i alai ianggo hadameon na manongtong i dapot hita holan sian Debata Jahowa Zebaot termasuk ma hinauli na adong di huta i, ala na Debata do na manongtong maringan di huta i. Ditogihon ma asa unang lalap jolma i tu hamoraon, hagogoon ni haportibion na boi manjaga nasida, asa unang laos dihalupahon nasida paboa Jahowa do partonabatoan. Holong ni rohani Debata do i ala ni hamuliaon Na na patar ma marhite nasa na nilehon na hita, tongtong ma hita mandok mauliate asa marhite i patar paboa Tuhan i do na tongtong gabe partanobatoan di ngolunta

Ayat 4-8 (Angka Na Mangalo Hagogoon ni Debata Mangae Na Hansit) "Debata na gabe partanobatoan" ndada holan sada syair manang teori sambing, alai marhite psalmen on dibaritahon do adong angka raja na marpungu laho mandapothon i. Hata "marpungu/no'adu" patuduhon adong ancaman terkoordinasi/terstrukstur/masif. Jala sada huta na sai jotjot mangadopi ragam ni angka parmaraan ima Jerusalem. Alai tung mansai timbul do huaso ni Jahowa digombarhon

 

tangkas diida na dialo Debata do angka na mangasahon gogo ni haportibion, ginjang roha jala mangasahon huasona sandiri. Di ay 12 didok hata "PanguhumMu" ala dihatindanghon do paboa sude pambahenan ni Debata i angka nauli, na bonar jala na tigor situtu. Ala Ibana do Panguhum na tigor. Di ay 13 didok "haliangi hamu Sion i jala liati hamu" laho mandok huta i nunga tung mansai gogo situtu ala Debata na gabe partanobatoanna. Didok muse asa "dibilangi" angka partanobatoan na naung jongjong disi. Di ay.14 didok muse "tangkasi hamu....sigati hamu" asa marhite tindakan aktif i boi idaon sifat/karakter ni Debata na gabe partanobatoan na andul gumogo sian partanobatoan na pinajongjong ni jolma. Laos didok muse asa "tarpajojor tu pinomparmu sogot" na marlapatan adong keberlanjutan ni panghatindanghonon on. Gabe lam tangkas ma na manongtong do Ibana di liat ni huta nauli i songon na naung diondolhon di Psalmen 46:6 i. Marhite turpuk on tandaonta ma tangkas hadirion ni Debata Jahowa na gabe partanobatoanta. Ibana do gabe Debatanta jala na manogu-nogu hita ro di hamatean sogot pe Jesaya 25:9: "Jadi dohonon ni halak ma di ari na sasada i: Ida ma on do Debatanta, na itahaposi, na mangurupi hita, dison do Jahowa na itakaposi. Marolopolop ma hita jala marlas ni roha mida hatuaonna i". Tongtong ma hita marlas ni molo Debata Sitolusada i do na gabe Partanobatoanta.

III. Panimpuli

Molo Debata Jahowa do na gabe partanobatoanta, tongtong ma hita marparsaoran dohot Ibana. Tung mansai uli do sude pambahenanNa i. Molo gale hita, pahotonNa, paluaonNa jala patoguhononNa do hita mangadopi ragam ni na mambahen hita gabe gale, asa monang hita. Songon epistelta 2 Korint 12: 9: Gabe didok Ibana tu ahu “Tuk ma asi ni rohangku di ho; ai di hagaleon do sun timbul hagogoon. Asa tagonan ma hupapujipuji diringku di bagasan angka hagaleonku, asa songgop tu ahu hagogoon ni Kristus". Sai na monang do na porsea di Debata Jahowa agbe partanobatoan di ngoluna. Gabe marlas ni roha ma hita jala tama ma hita mandok mauliate tu Ibana. Marsangap ma goarni Debata Ama, Anak dohot Tondi Parbadia! Amen.

Psalmen 107: 23-32 Joujou Tu Jahowa di Hagogotan (Berseru Kepada Tuhan Dalam Kesesakan)

 

Minggu 23 Juni 2024 IV Dung Trinitatis /

Psalmen 107: 23-32

Joujou Tu Jahowa di Hagogotan (Berseru Kepada Tuhan Dalam Kesesakan)

 

I. Patujolo

Psalmen 107 on marisihon ende na patuduhon roha mauliate ala manjalo haluaon sian Debata. Haluaon na nidokna di son, ima ala di tingki masa hagogotan, joujou do angka na porsea i tu Tuhan Debata. Ditangihon Debata do joujou nasida i. Dung i ro ma Debata paluahon nasida sian angka hagogotan nasida. Mandok mauliate ma nasida tu Debata ala ni asi dohot holong ni rohaNa i tu bangsoNa, dohot tu halak na porsea jala marsigantung holan tu Ibana. Dipalua ma nasida sian hagogotan nasida i. Dison ma patar, hasatiaon ni Debata tu angka nahinaholonganna i, ai jotjot do ndang hapingkiran jolma i dalan ni Debata di ngoluna. Lobi sian na dipingkiri manang na hinirim ni jolma i, boi do tarpatupa Debata. Dilehon Debata do kesempatan tu jolma i asa mananda asi dohot holong ni rohaNa naung mangurupi nasida tagan masa hagogotan. Mulai sian i ma naeng ma lam tangkas nian ditanda bangsoNa i Debata, parasiroha jala pardengganbasa na sumurung.

II. Hatorangan ni Turpuk

Dipaboa do di turpuk on adong jolma na markapal mamolus laut, manuju labuan. Alai ala dao do labuan i, di tongan dalan, ditonga ni laut i, masa ma alogo jala ro ma tutu galumbang naeng mangharomhon kapal i. Ala ni galumbang na balga i, dohot alogo na gogo na so mansohot dope, mabiar ma nasida sude na di kapal i. Tumatangis ma nasida, mangangguhi tu Debata Jahoba mangido haluaon sian galumbang i. Nunga pola naeng lonong kapal nasida i, alai dibagasan parsitutuon dohot haporseaon na mangołu, joujou do nasida tu Debata Jahowa, mangido pangurupion, asa dipal ua nasida sian parmaraan bolon i, asa boi nasida tolhas tu labuan na tinjuju ni roha nasida. Ditangihon Debata do joujou nasida na mangido pangurupion i asa malua, ai asi do roha ni Debata Jahowa di nasida. Dipalua ma nasida sian parmaraan i. Mansohot ma alogo i, menak jala demak ma muse laut i. Ditorushon nasida do na markapal i majuju labuan, jala tutu do sahat nasida tu inganan (labuan) na tinuju ni roha nasida i. Asi ni roha ni Jahowa sambing do na mangurupi nasida umbahen so mago nasida di tonga laut i. Halongangan do na binahen ni Debata tu nasida, naung paluahon nasida sian galumbang laut i. Sahat nasida manuju labuan i di bagasan hahipason jala sonang so hariboriboan. Dung i dipasahat nasida ma panmujion tu Debata di bagasan roha mauliate. Mamuji Debata ala ni habalgaonNa i dohot ala ni holong ni rohaNa tu nasida, Debata na rade paluahon nasida di tingki masa hagogotan i.

III. Sipahusorhusoron

 

Sada na diondolhon di turpuk on i ma mandok mauiate tu Debata di panandaon ni hita angka na porsea i di balga ni asi dohot holong ni roha ni Debata na marmudu jala mangaramoti hita di pardalanan ni ngoluntabe, sahat ro di na sadari on. Mandok mauliate tu Debata ala parasiroha jala pardenggan basa do Ibana. Patar do asi dohot holong n iroha ni Debata di pardalanan ni ngolu ni hita sude, ndang holan dipalua hita sian ragam ni parmaraan, dipamalum sian angka parsahiton, jala diurupi di tingki hagogotan. Alai na lumobi sian i, ala dilehon do asi ni rohaNa i tu hita jolma di portibi on, di naung ro Tuhan Jesus Kristus tu portibi on. Ibana do na paluahon hita sian gomgoman ni dosa, sibolis dohot hamatean, jala dibasabasahon tu hita hangoluan na saleleng-ni lelengna. Di pardalanan ni ngolunta songon halak Kristen manang angka na porsea i, ringkot do pabotohononta pambahenan ni Debata di ngolunta on, tu angka donganta, nang tu ianakhon manang pinomparta. Ai molo tabaritahon taringot tu Debata, na marasi roha jala marholong ni roha, pardengganbasa na sumurung; tamba ma pos ni roha ni nasidabe, di na mamolus manang mardalan nasida di ngoluna di portibi on. Tung sura pe sipata tarsosak nasida, alai marningot angka naung tamemehon tu nasida asi doihot holong ni roha ni Debata tu hitabe; tahirim do gabe angka jolma nas tongtong nasida mangalualu tu Debata di ganup hagogotan nasidabe. Psalmen 50:15 na mandok: "Jala jou ma Ahu jumpa di ari hagogotan, asa hupalua ho, asa dipuji ho Ahu." On ma nian naeng gabe singoton nasida jalasiulahononna di panggulmiton ni ngolu i. Asa gabe halak na tongtong marlas n iroha, nandok mauliate tu Debata di sude asi ni roha dohot denggan ni basaNa di ngolunta on. Amen.

 

Jamita Minggu V Dung Trinitatis, 30 Juni 2024 Ev : 2 Korint 3:2-6 "HAMU DO SURAT NI KRISTUS"

 

Jamita Minggu V Dung Trinitatis, 30 Juni 2024

Ev : 2 Korint 3:2-6

"HAMU DO SURAT NI KRISTUS"

 

PATUJOLO

Disuru Debata do angka naposoNa mamaritahon Barita Nauli asa torop halak na porsea tu Tuhan Jesus. Di Matius 28 :18-20 tangkas do taida parsuruon ni Tuhan Jesus tu angka siseanNa laho mamaritahon Barita nauli tu angka bangso, i ma barita haluaon, barita holong ni roha ni Debata tu jolma manisia. "Laho ma hamu" Ulaon na borat do parsuruon i alai ala Jesus do na marsuru nasida ndang di pasombu Debata angka naposoNa mandele, laos panjouon i do na sahat tu angka Apostel na asing suang songoni ma nang di tonga tonga ni HuriaNa.

Jongjong do huria Korintus sian hasil penginjilan di na saleleng maringanan Apostel Paulus disi, niurupan ni keluarga Friskila dohot Akwila (Ul 18) Alai ndung di tadingkon ibana Huria i masa ma angka persoalan. Di na sahat i tu pinggolna disurathon Paulus ma surat na parjolo sian Efesus jalo ro ma ibana manopot huria i, alai ndang pola tabo panghilalaanna di harorona i dungi ditadingkon, disurathon ma surat na paduahon on sian Makedonia Sada masalah ni adopanna disi ima sai adong do ruas ni huria Korintus na manyerang pribadina. Didok do ndang sah haopostelon ni si Paulus ala ndang termasuk ibana di si 12 Murid/Sisean ni Jesus. Na deba mandok holan na mambuat paruntungan dohot popularitas do ibana ala melayani tu Korintus, jala didok na torop i dang malo si Paulus laho Marjamita.

HATORANGAN

Asa unang marisuang pamaritahonon ni apostel Paulus di Barita Nauli dohot di tingki sinuaeng on dipangido Ap. Paulus ma tu huria i unang holan na managihon alai ingkon tarsurat di bagasan roha nasida. I do umbahen didok ibana "Hamu do surat nami, naung sinurathon tu bagasan roha nami, na tinanda jala na jinaha ni saluhut jolma” Hataridaan ni Barita Nauli asa unang marisuang panjangkonon nasida di Barita Nauli i. Tanda ma i dibagasan ngolu siganup ari, manang aha pe ulaon nasida siganup ari naeng ma mangula Hata ni Debata naung ginuruhon nasida.

Ai tanda do hamu surat ni Kristus na hupature hami sinurat so dohot tinta, marhite sian Tondi ni Debata na mangolu, i do ndada tu panuratan batu, alai dipanuratan daging ima ate ate, asa molo tu dia pe nasida mangalangka toktong ma nasida gabe surat ni Kristus marhite na manghatindanghon haporseaon na sintong di adopan ni saluhut halak, i ma na ni dok na surat ni Kristus. Pos ni roha tu Debata na mamasumasu ulaon, manang boha pe usaha dohot gogo ni parbarita nauli mangulahon parsuruon i, molo so mamasumasu do Debata ndang bopi marparbue i.

I do na nidok ni Ap. Paulus "Pos do rohanami taringot tu si, tu Debata marhitehite Kristus". Alani di bagasan tangiang do Ap. Paulus pasahathon panghobasion di Huria Korintus di pangido Ap. Paulus ma asa dohot nasida marhaporseaon di bagasan Jesus. Asa Unang olo nasida sumomba ganaganaan dohot angka patung dohot parsombaon na adong di hatihai. Molo taida di parhuriaon si nuaeng on godang dope sian angka ruas ni huria na mangulahon hasipelebeguon.

Alai ala panghobasion ni Ap Paulus gabe adong ma perubahan di bagasan ngolu ni halak Kristen na di Korintus. Mereka telah berubah total yang dulunya sangat di pengaruhi hidup metropolitan yang penuh dengan dosa dan kenikmatan dunia, perubahan yang terjadi pada jemaat di Jerusalem yang mengalami kelaparan. Hamu do surat ni Kristus na boi jahaon ni sude jolma, ndang holan tu Huria Korintus hata i alai dohot do tu hita, marhite hita ma boi jahaon ni jolma ise jala songon dia Tuhanta Jesus Kristus i. Tarida mai marhite parange, panghataion, parsaoran, ulaon nang aktivitas dohot hidup keseharianta be di parkarejoan di lingkungan sekitar dohot di sude inganan. Ndang sude halak na olo gabe parbarita Nauli, ala di etong maol jala dokdok do ulaon i songon pandohan ni Ap. Paulus "Ndada tau hami anggo tung mamingkiri agia aha sian diri nami sandok sian Debata do hatuaonnami.

Alani marhite turpuk on tangkas ma hita di paingot asa tung tajagahon be ma dirinta jala sian nasa gogo ma tausahahon mambangun dirinta, sandok ngolunta siganup ari asa boi gabe surat na uli taringot tu Kristus, na boi jahaon ni sude halak. Manat ma hita, hidup kita adalah surat terbuka yang bisa di baca orang tentang Kristus. Berilah dirimu di kuasai Roh Kudus, beri kesempatan sebebas bebasnya menulis sifat Allah dalam hidupmu. Ingkon dohononta ma songon na ni dok ni Ap. Paulus di ayat 4-6, paboa tung holan ulaon ni Debata do, ndada ala ni kemampuanta sandiri. Sian dirinta tung so sanggup do hita mamingkiri agia aha pe. Tung so tolap hita sian dirinta mambahen halak gabe terpesona marnida Jesus marhite pangalahonta, holan Debata sambing do na mangalehon kemampuan, hanya Tuhan yang menyanggupkan kita menjadi surat Kristus.

SIPAHUSORHUSORON

Ingkon boi do hita mangalapati ngolu ni halak Kristen na gabe surat ni Kristus, ala Kristus do namanurathon, antong na ringkot sian hita ima haradeon ni rohanta asa tongtong pasahathon dirinta tu Ibana asa nasa sinurathonNa di bagasan rohannta boi marparbue jala tarjaha ni angka na humaliangta, ndang adong na boi tapagasahon sian hadirionta ia so holan tu Ibana do hasangapon i.

Tondi ni Debata do na mian di ngolu ni halak na porsea ima Tondi na pangoluhon. Alani parrohaon ni halak Kristen i pe roha na manghalomohon Parsuruon ni Debata, ndada tu hamagoan. Di Minggu V Dung Trinitatis on nuaeng tongon hita manghalashon Jubileum 125 taon Zending HKBP tu angka jolma na mangolu di inganan na terpencil. Turpuk jamita on gabe refleksi dohot evaluasi panghobasion naung tapatupa saleleng 125 taon parpudi. Alai sadarion tung tajalo ma Tondi Parbadia mangolu di rohanta manurathon angka parbue ni Tondi parbadia mangula di rohanta. Manurathon angka parbue ni Tondi di ngolunta ima gabe surat na uli sijahaon ni halak taringot tu Kristus sian hita. I ma na mangarahon gabe ro angka halak na asing manjalo Jesus Kristus. Tapature ma dirinta gabe surat ni Kristus. Amen

Jamita: 2 Korint 5: 6-10 Topik: "Mangolu Di Bagasan Haporseaon, Ndada Di Bagasan Na Marnida"

 

Jamita: 2 Korint 5: 6-10

Topik: "Mangolu Di Bagasan Haporseaon, Ndada Di Bagasan Na Marnida"

 

I.          Patujolo

Maol situtu do nuaeng jolma porsea molo so diida. Logika nama na dipangasahon, alani i sai dilului jolma do bukti lao mangalului hasintongan na tutu adong (membuktikan kebenaran/keberadaan). Tarlumobi ma molo mandele di angka sitaonon dohot angka parungkilon, maol ma manghaporseai taringot tu surgo hasonangan naung pinarade ni Debata. Nian boi dapot roha do i, molo nunga apala hita dibagasan posisi na dibagasan parungkilon jotjot do gumogo parungkilon i mamboan hita tu pandelean. Apostel Paulus songon naposo ni Debata na mamaritahon Barita Nauli ni Kristus, godang do di alami ibana angka penderitaan. Ndada holan penderitaan fisik (loja, mangkar, male, hurangan, sahit,) dohot do penderitaan psikis, berupa teror mental, isarani isu-isu na pinararat ni angka halak na so manghalomohon ibana, marhite na mansoadahon haapostelonna dohot angka poda nang ajaranna pe. Alai digodang ni parsorion i tangkas do ibana mandapot asiasi, gogo dohot pangapulon sian Debata (2 Korint 1: 4, 5), huhut laos diangkat ibana ma pengalaman hidupna i di surat 2 Korint on bahen jamita apulapul dohot patoguhon roha ni ruas dohot parhalado ni huria tingki mangadopi parungkilon haporseaon di portibi on. Hata apulapul i do nang na tangkas tarida di turpuk 2 Korint 5: 6 - 10 on i ma na manogihon tu panghirimon ni halak Kristen asa unang mandele uju mangadopi sitanonon ala adong do inganan hasonangan naung diparade Tuhan i di angka na porsea tu Ibana.

II. Hatorangan ni Turpuk

Marpos ni roha dibagasan Haporseaon "Ayat 6-8” Apostel Paulus manosoi halak Kristen asa marpos ni roha diganup situasi dohot kondisi, manang na didia pe maringanan dohot mulaulaon. Aha do umbahen ingkon marpos ni roha? Ala naung dibagasan Kristus Jesus do. Ndang adong ganggu ni roha ni si Paulus nanggo saotik pe taringot tu inganan sihirimon i, alai pos situtu do rohana mameop i atik pe maringanan dibagasan daging dohot mian di hasiangan on dope nuaeng na holang/dao sian inganan ni Tuhan i (surgo). Panghirimon na pasti na songon i do pinarbuehon ni haporseaon i di diri ni angka naporsea, songon na nidokna di ayat 7 i: “ai dibagasan haporseaon do hami, ndada dope di bagasan na marnida". Hombar do on tu natarsurat di Heber 11: 1 "Alai anggo haporseaon i pos ni roha do i di angka sihirimon, jala pamotoan na tontu taringot tu na so niida". Jadi memang, ndang diida mata dope surgo i alai tangkas do i diida rohanta, diida mata ni haporseaonta na adong do inganan i jala bongotanta do i muse di tingki halehetanna marguru tu lomo ni roha ni Debata. Molo tung pe digugat jolma haporseaonta I, ibana ma na sari disi. Ianggo hita pos do rohanta na tutu adong do ari sogot, disi ma hita rap maringanan dohot Tuhan Jesus, disi ma jumpang hita ngolu na marhasonangan, na so adong hamatean nang angguhangguk na hansit (Pangungkapon 21:4). Alani i molo tung marsak pe nuaeng, jala hansitan alani ragam ni parsorion, ingkon so jadi moleng haporseaonta, ndang jadi mandele, ala parsatongkinan do saluhutnai. Ndang adong na hot di tano on, termasuk arsak dohot parsorionta i. Urupan ni Debata do halak naporsea di Ibana mangadopi hamaolon i jala lehononna do gogo laho manghamonanghon i.

Ringkot Naeng Halomoan ni roha ni Debata "Ayat 9-10" Ingkon marparange dohot mangulahon na denggan do na dimaksudna dison. Saurdot cita-cita dohot pambahenan; unang roha sai naeng tu surgo alai pangalaho sai holan haportibion (duniawi). Marparange nabadia i do sada apala na rumingkot parangehononta ala nabadia do Debata. Habadiaon porlu situtu jamothononta justru ala tongon di pardalanan dope hita nuaeng, mangolu di bagasan daging di portibi on, na tontu mansai godang na boi mangela rohanta asa manimbil sian lomo ni roha ni Debata. Dung i, di pangulaon si ganup ari pe tong ma ingkon marsitutu hita mangulahon na tau lomo ni roha ni Debata. Sude na taulahon dibagasan pardagingon di papatar do muse di adopan paruhuman ni Kristus(ayat 10), on ndada gabe ancaman alai padan do i. Nasa na taula di portibion ingkon pertanggungjawabhononta do I sogot di ari haroro ni Kristus. Molo na roa do taula, nda uhum do jambar ni? Alai molo na denggan na dihalomohon Debata na taula, ingkon porsea jala pos do rohanta boanon na ma hita tubagas na mian si salelengleleng nai. III. 

III. PANIMPULI

Ditogihon turpuk on do hita manghaporseai surgo hasonangan i jala asa manghirim hita tusi nang pe ndang taida dope. Alani I tung mansai ringkot do hita porsea Tu Jesus jala tabahen ma Ibana sipangasahononta di bagasan ganup ngoluta. Asi ni rohaNa I suksuk do dilehon tu hita na boi margogoihon hita laho pasonanghon roha ni Debata di ganup keadaan. Jadi dinalao mandalani ari ari ni ngoluta pe hita unang be hita mabiar. Ganup ma hita porsea di pandonganion ni Debata jala manghirimon disurgo hasonangan i ma margogoihon hita tongtong mangula lomo ni rohaNa. Taula ma manang aha na mambahen las roha ni Debata dibagasan Tuhan Jesus Kristus. Amen

1 Samuel 8:4-11 "Dipargogoi Jahowa do NaposoNa"

 

1 Samuel 8:4-11

"Dipargogoi Jahowa do NaposoNa"

I. Patujolo

Adong do pandohan naung jotjot mungkin tabege ima napinasahat ni Abraham Lincoln ima Presiden Amerika Serikat na pa-16 hon namandok "Molo naeng mamereng tabiat asli ni sasahalak jolma lehon ma tu ibana huaso manang jabatan, marhite i gabe tarida ma pangalahona na sasintongna. Hombar tusi do namasa molo taida diturpukon pangalaho ni 2 halak anak ni si Samuel namargoar si Abia dohot si Yoel. Ditingki dung lam matua si Samuel, dipabangkit ibana ma anakna si Joel dohot si Abia laho manguluhon dohot gabe panguhum di Israel. Alai dung dipasahat ulaon i tu nasida ternyata andul marasing do pangalaho ni anakna na dua i sian si Samuel, impolan di perak do nasida, na girgir manjalo sisip jala papeol uhum. Alani angka pangalaho ni nasida i gabe madabu ma bangso i tu hagunturon jala gabe ima alasan dipangke angka natuatua ni Israel laho mandapothon si Samuel jala marpangidoan asa dipabangkit nian di nasida sahalak raja naasing. Laos ido na boi taparrohahon gabe sibonsiri ni turpuk-on.

II. Hatorangan ni Turpuk

Ayat 4-6 Pangidoan Raja na asing. Marpungu do angka natuatua ni Israel, laho menanggapi na masa hatiha i, ima na so tarjalo nasida pangalaho ni angka ianakhon ni si Samuel na uasan di angka parlabaan. Gabe sahata do nasida mangido asa dipangkit si Samuel raja na asing di nasida. Jala di sisi na asing, dang tarjalo nasida sikap ni si Samuel na pabangkit anakna gabe panguhum di nasida, ala dang uli pangalahona. Dipatupa ibana do politik dinasti na so hea masa di luat na asing, na di rajumi ingkon dipabangkit raja na asing di nasida. Sihol do roha ni natuatua ingkon boi si Samuel patupa politik na stabil di bangso, jala menghindari pewarisan harajaon na so ture. Molo taida sikap ni Samuel manangihon pangidoan ni natuatua Israel, maol do tarjalo ibana, ala dang apala dihalomohon ibana sasintongna kepemimpinan ni ianakhon nai. Manjanghon sisongoni, dipataridahon ibana do sikapna songon naposo ni Debata, na sai tongtong sihol rohana di sangkap ni Debata laho manjadihon jolma i tudos tu rupa ni Debata.

Ayat 7-11 Tangiang ni si Samuel tu Debata. Mangadopi na ronson na masa di bangso Israel na niadopan ni ibana, martangiang do ibana tu Debata, na patandahon halak na sai tongtong marhaposan tu Debata. Jala dang tagam ibana di alus ni Debata na mandok: Tangihon ma soara ni bangso i, ai ndada ho, ahu do na binolongkon nasida, asa unang be Au Raja Nasida". Molo taida ayat on, naeng tangkas diondolhon, asa harajaon Israel ima na bersifat teokrasi (Debata na manguluhon Bangso i manang gabe Raja). Teokrasi na digambarhonna ima Debata pabangkit raja nasida marhite na dimiahi. Alai pangidaoan ni bangso Israel ima monarkhi, naeng ma naek jabatan sude angka raja ni Israel ala ni keturunan, ndada na pinillit ni Debata. Maol do nian ulahonon ni si Samuel pangidoan ni bangso Israel i, alai parbue ni tangiang ni ibana ima di alus ni Debata na pabotohon uhum ni raja na gumonggom nasida sogot. Laos ido hagogoon di Samuel, ima manghatahon tona taringot tu uhum sijaloon nasida, buatonna do angka anakmu jala bahenonna mangiringiring huretana dohot hodana (ay. 11). Lapatanna adong do resiko siadopan ni nasida sian angka pangidoannai. Angka na ringkot tu raja i naingkon do, tuhukon nasida, jala angka nasida ingkon rade gabe parhobas ni raja i. Hagogoon ni si Samuel ima molo hot ibana dibagasan tona ni Debata, jala disi do tarida parsitutuanna mangadopi angka hamaolon di ganup parngoluanna.

III. Sipahusorhusoron

a. Godang do na taadopi dibagasan persoalan ni ngolunta sinuaeng on, boi do i taida di angka ragam ni namasa di tongatonga ni ngolunta. Boi do ro persoalan i sian tongatonga ni dirinta dohot sian luar ni dirinta be. Alai gumodang do persoalan dohot beban i ro alani angka hagiot dohot keinginan diri sendiri. Ai godang angka na masa dingolu on dang sadalan dohot na dibagasan pingkiranta, gabe tabaen do i gabe beban dibagasan ngolunta. Turpuk on mamboan hita, boha do mangantusi na masa di ngolu on songon sada proses perjalanan dibagasan ngolunta. Molo pe dang pas angka na masa dingolu on tu na dibagasan pingkiranta, alai boha do bahenonta pahothon rohanta laos ima dalanta marpos ni roha di sangkap ni Debata. Antong ingkon tubu ma pos ni roha asa sangkap ni Debata ma na tulus.

b. Di partingkian nuaeng on nunga godang na lomos hita di angka pangidoanta tu Debata, ala jotjot do mamaksahon kehendakta hita di angka pangidoan. Tapangido do nian sipangidoanta tu Debata, alai jumolo do hita mansurasura alus ni Debata, gabe boi hita kecewa di angka pangidoanta molo sahira nasohombar tu natapangidoi. Marhite turpuk on lam mananda ma nian kita dihuaso dohot gogo ni Debata mangaturhon saluhut na tapangido tu Ibana.

c. Naposo ni Debata naeng hot dibagasan pamiliton ni Debata. Asa unang tubu ganggu ni roha di pamilliton ni Debata di angka naposoNa. Modal dohot hagogoon ni Naposo ni Debata ima hata ni Debata. Jala ido tona na nilehon ni Debata di ganup angka naposo naung dimiahi Debata. Jala ingkon tubu ma pos ni roha, ai dipargogoi Debata do angka naposoNa laho mangulahon ulaon panghobasion, molo dibagasan parsitutuon tu Debata.

d. Jesus do panguhum na naeng ro, laho manguhumi jolma. Antong boha do hita manghaporseai panguhum i. Antong Jesus na sinuru ni Debata, naeng ma tahaporsea i dibagasan ngolunta, jala Panguhum na Badia do Ibana.

e. Disogo roha ni si Samuel dipangidoan ni natuatua ni Israel i dang keputusanna sandiri na dipake alai marhite mangalualuhon tu Tuhan i marhite tangiang.

f. Sude pilihan na tapillit ditonga-tonga ni parngoluonta adong do konsekuensina, songon pangidoan ni natuatua ni Israel di pangidoanna mangido raja, ingkon jaloonna nasida konsekuensina, molo gabe Raja na ingkon gabe tuan nasida na ingkon rade do sian tonga-tonga nasida gabe parhobasna, mangalehonon angka Ianakhon, arta dohot angka naasing na ringkot di raja nasida i. Asa manat ma laho mamillit angka sipilliton dohot mamingkiri resiko sian angka na tapillit i. Amen.

EVANGELIUM TU MINGGU I DUNG TRINITATIS 2 KORINT 4:5-12 "DEBATA DO NAMPUNA HAGOGOON (KEKUATAN BESAR DARI ALLAH)"

 

EVANGELIUM TU MINGGU I DUNG TRINITATIS

2 KORINT 4:5-12

"DEBATA DO NAMPUNA HAGOGOON (KEKUATAN BESAR DARI ALLAH)"

 

1. Patujolo

Adong do pandohan na mandok "fitnah, tindakan yang kejam", na marlapatan hata na so tutu boi do patubu acit ni roha. Hata na so tutu mambahen goar ni halak gabe marlaok (tercemar), jala on ma na ni dokna pembunuhan karakter (character assassination). Molo dung sanga sar barita naso tutu i, gabe godang ma na porsea tu hata na so tutu i. Jala halak na mambahen hata na so tutu i, godangan na marlate ni roha tu musuna, asa unang porsea halak tu musuna i. Songoni ma na ni adopan ni Apostel Paulus di huria Korint, na adong mandok ia ibana ima Apostel na so tingkos (palsu). Gabe marlea ma Apostel Paulus di angka halak na di Korint di hatia i. Nang pe dibahen halak songon i tu Apostel Paulus, ndang gabe sumurut ibana laho mamaritahon Barita na Uli tu angka na so porsea di Jesus Kristus. Pos ni rohana tu Debata dibagasan parungkilon i, pola didok ibana "nunga putus hosanami ditimbangi rohanami; asa unang dirinami huhaposi hami, tung Debata do na manungguli angka naung mate. Saut do hami dipalua, laos paluaonNa do sian hamatean na sai jorbut i. Tu Ibana do manghirim rohanami, paluahonNa do tu joloan on."(2 Kor. 1: 9-10).

 

2. Hatorangan Ni Turpuk

Adong halak marjamita na gabe patuduhon halobian dirina, gabe lupa ibana na ingkon Tuhan i do na jamitahononna. Ido di ayat 5 di dok Apostel Paulus, ia barita na binaritahonna ndang dirina alai Kristus Jesus do. Hadirion ni Kristus Jesus na Tuhan do binaritahonna, ala godang dope di tingki i na so porsea ia Jesus ima Tuhan Anak ni Debata. Jala di posisihon Apostel Paulus do dirina gabe naposo (Gorik, Doulos) ni Tuhan, lapatanna ndang lobi umsangap ibana sian Debata. Lapatan ni doulos di hata gorik ima hatoban, pangula na ulaonna di gaji na rendah. Jadi ndang gabe umbaritaan ibana sian Debata, di angka jamita na binaritahonna. Hatiuron (terang) ringkot tu angka na dibagasan haholomon ala asa boi mardalan tudia na tinujuna. Songon na tarsurat di Jesaya 9:2 “Bangsona mardalani dibagasan haholomon marnida sada panondang na bolon. Binsar do sada panondang di angka na mangingani tano linggoman nihamatena". Panondang dison ima patuduhon Jesus Kristus na manondangi roha ni halak na dibagasan haholomon. Apostel Paulus ndang halak na mura mandele mangadopi angka parungkilon na niadopanna, nang pe hamatean gabe ancamanna. Ido didok ibana di ayat 7 Debata nampuna hagogoon, lapatanna Debata do namargogoihon ibana laho mamaritahon Barita na Uli. Dihilala ibana do hagogoon ni Debata ima di tingki marhaporsuhon alai ndang hapusohan; tarsosak alai ndada tarhapit; tarlele alai nda tung pinasombu. Pengalaman na sisongon on ma na mambahen Apostel Paulus ndang mura mandele, sai na adong do solusi molo ro angka parungkilon di ngoluna. Jala hamamate ni Jesus do na gabe hangogoluni ibana. Na marlapatan marhite hamamate ni Tuhan Jesus dapot ibana hagogoon laho manghatindangkon na adong haluaon sian Debata. Ai nunga dibagasan pamatangna do Tuhan Jesus jala nunga dipardanginghon ibana Hata ni Tuhan i na gabe hangoluan di ibana.

Molo nunga di lehon Debata tu hita sada Tohonan na laho gabe parjamita di tongatonga ni huriana, ingkon ta radoti, ta jamothon, mangulahon dohot manghangoluhon hata ni Tuhan i. Apostel Paulus mandok dang dirina na di jamitahon, dang dirina na di paburnangburnang, ndang tu ibana di tait ibana jolma i, alai tu Jesus Kristus do ala Ibana do Tuhan. Molo nungga gabe parjamita hita di pillit Tuhan i ingkon boi do ngolunta i gabe si tiruon dohot pasupasu tu humaliangta. Boi do hita marsiajar sian pardalanan ni ngolu ni Apostel Paulus natongtong hot di tiop ibana hagogoon ni Debata. Ndang mura mandele ibana alani parungkilon na ni adopan ni ibana. Margogo do Debata mangurupi jala mangalehon dalan haruar angka na masa di ngolu ni jolma na porsea tu ibana songon topik ta "Debata do nampuna hagogoon". Pos ni roha tu Debata i do na gabe sitioponta jala i do sibaritahonnonta tu sude halak, tapangasahon ma gogo na sian Debata i di sude angka pardalanan ni ngolunta. Songon pandok ni par Psalmen "Pasahat ma dalanmu tu Jahowa jala haposi Ibana, asa ibana paturehon (Psalm 37:5)".

 

3. Sipahusorhusoron

Godang do halak na mura mandele ala parungkilon na ro tu ibana isarana parsahiton, parhepengon, parkarejoan, parsaoran, dohot naasing. Jala ala ndang manahan ibana di parungkilon i gabe dilului hagogoon ni portibi na boi marbalik sian Debata. Isara ni halak namarsahit, alani posi ni parsahiton gabe laho mangalului pangobation tuhadatuon ala dibaritahon boi pamalumhon sahit na niaena. Manang alani persoalan perhepengon, rumah tangga gabe diputushon parsirangon. Manang ala soadong hepengna gabe diulahon manangko na boi di penjara. Sudena i naso sabar do jolma i mangadopi angka parungkilon i, jala hurang haporseaonna na margogo do Debata na boi mangurupi ibana mangadopi parungkilon i. Amen.