Jamita: Psalmen 30 : 1 – 13 Satia manghaholongi dohot mangihuthon Jesus

 

Misericordias Domini

Minggu, 4 Mei 2025

 

1.      Marende BE. No. 10:1+5

2.      Votum            : A.X.B2 – D.VII.28

3.      Epistel : Johannes 21 : 15 – 19

4.      Marende BE. No. 460:2

5.      Jamita: Psalmen 30 : 1 – 13

 

Satia manghaholongi dohot mangihuthon Jesus

 

Di hita saluhutna nahinaholongan ni Tuhan Jesus! ra, sude do hita nunga hea mamolus parsahiton, hamaolon, nang ragam ni angka na masa na mambahen hita gabe marsak. Nang pe tutu marasing be do angka na masa. Boi do sipata umborat di iba, numeang di dongan. Lumeleng sitaonon i masa di iba, di dongan boi do apala satongkin, jala boi di sabalikna.

 

Alai di saluhutna i songon halak na porsea hita, ingkon hot do hita marroha mauliate tu Debata. Boasa? Alan i i do, na naeng sipamanatonta marhite turpuk on, aha do sialana umbahen na mandok mauliate sasahalak (apa orientasi mengucap syukur)?. Ala ni pasupasu naung jinalona do manang situasi parngoluon sinuaeng. Molo tongon taadopi ragam hamaolon, na mambahen marsak roha, tarsosak di ngolu on, olo do hita mandok mauliate? Aha ma sialana umbahen na ingkon mandok mauliate hita?.

 

Taida ma ngolu ni parpsalmen i, di ragam ni angka na masa: hamaolon, musu na sonson, na godang angka na masa mambahen marsak jala margudompong rohana. Nangpe songon i na masa, anggo pamujionna  tu Debata hot do ruar sian roha parbagasanna. Hati pemazmur selalu dipenuhi dengan rasa syukur, dan mengucap syukur menjadi gaya hidup baginya. Patar do pamujionna di ay. 2, didok: patimbulonku ma Ho, ale Jahowa, diuduti muse di ay.3 Jala diarahon ibana do nang na asing laho mamji Debata  (Ay.5), didok: Puji ma Jahowa hamu ale angka na niasianNa, jala endehon hamu ma barita ni habadiaonNa.

 

Hamu angka dongan! Boasa mandok mauliate si Daud, hape tongon do ibana mangadopi ragam ni hamaolon?:

-          Naparjolo: Ala diparhatopot ibana satia do Debata tu nasa na hinaholonganna. Di ragam ni hamaolon na niadopanna hot do pandonganion ni Debata dingoluna (Tuhan selalu ada), tangan ni Debata na gogo i do na sai manungkol ibana umbahen na margogo mangadopi angka hamaolon i.  

Deba sian hata (lirik) ni ende pop rohani “Jangan pernah menyerah” (Edward Chen) : Tuhan tak pernah janji langit selalu biru, tapi Dia t’lah berjanji selalu menyertai. Tuhan tak pernah janji jalan selalu rata, tetapi Dia berjanji berikan kekuatan. Sian parbue ni haporseaon do pandohan i diuhal laos diendehon laho patuduhon hasatiaon ni Tuhan i di ngolu ni angka na tongtong satia jala manghaholongi Ibana nangpe ingkon mamolus ragam ni hamaolon saleleng mangolu. Ai dihirim do sian ngolu ni angka na porsea i hasatiaon dohot holong hataridaan ni parsitutuonna marhaporseaon asa tun marhamonangan di ujungna jala manjalo upa na mansai arga sian Tuhan i.

-          Napaduahon: Nangpe muruk Debata jala marro ni rimas Ibana ndatung manongtong muruk dohot rimasNa i, alai anggo holong dohot asi ni rohana hot do ro di salelenglelengna. I do dihatindanghon parpsalmen di ay. 6 : “Ai tongkin do panombo ni rimasna, alai saleleng mangolu do ianggo asi ni rohana”.

 

Antong, Sadihari do ingkon pujion jala dohonon mauliate tu Tuhan i? Ndang hea dope ra tarbege hita pasahat hamualiateon sasahalak tu Tuhan i marhite Huria ala tongon mamolus hamaolon, parungkilon, rugi marboniaga. Najumotjot tabege: Ala malua sian parmaraan, ala dapot naniluluan, simpul pajongjong bagas sibaganding tua, ala manggotil, ala nunga gabe Sarjana, dln.

 

Hamu amanami/inanami! Asing do ia parpsalmen on. Uju na mamolus hamaolon, parungkilon i, disi do ibana sai mamuji Debata jala mandok mauliate. Ala ni aha? Siala pos ni roha dohot haporseaonna, ai diboto ibana tangkas satia do Debata, jala manongtong do asi dohot holong ni rohaNa. Nang pe marro ni rimas Debata tu ibana, diparhatopot ibana ala ni dosana do i, ala ni i mandok mauliate ibana tu Debata, ai mansai arga do “haroro ni rimas ni Tuhan i di ngoluna, ala ni i do dihatindanghon ibana di ayat 12 i: “Nunga dihosing Ho andunghu gabe endengku, nunga ditanggal Ho horingku, dung i di hohoshon Ho do tu ahu las ni roha.

 

Uju ro angka hamaolon i, boi do patudosonta ngolu on hira “sada gerbong” na tongon naeng mamolus dalan na mansai holom isarana “terowongan” (gua/batu lobang) ala ni ragam ni hamaolon na tongon taadopi. Alai songon halak na porsea hita, ingkon parhatopotonta do di udut ni dalan i tontu adong do na tiur (situasi yang baru dan lebih baik) jala panghirimonta ingkon sahat do hita tusi. Nda tung lalap di dalan na holom i hita, asal olo hita manguduti pardalanan i, jala dibagasan pos ni roha dipangurupion ni Debata sai na lehononna do gogo, tungkolanna do hita (Allah yang menopang) asa tung tuk gogonta manguduti pardalanan i.

Pos ma rohanta tu Tuhan i, satia do Ibana, jala manongtong do asi ni rohaNa Sai na lehonon ni Debata do holong ni rohana tu halak na satia tu Ibana jala tongtong marpos ni roha di huaso dohot holong ni rohaNa. hombar tu goar ni Minggu: Missericordias Domini “Gok asi ni roha ni Jahowa do tano on, Psalmen 33:5b. Antong tapuji ma Debata na sai tongtong satia mandongani hita jala unang tung halupahon denggan ni basaNa sudena. Amen

 

Bahan Diskusi:

1)      Aha ma na masa di ngolunta uju ndang satia jala ndang tahaholongi Jesus i?

2)      Boha do hita patuduhon hasatiaon dohot holong ni rohanta tu Jesus songon pinangido ni topik ni minggunta on?

 

6.      Marende BE. No. 697:1-2

7.      Tangiang sian sahalak na ro

8.      Marende BE. No. 211:1-2

9.      Tangiang sian Na manjabui

10.Papungu Pelean huhut marende BE. No. 718:1+3

11.  Tangiang panutup

Jamita : Pangungkapon 1 : 4 - 8 TANGIHON HAMU MA ASA MANGOLU TONDIMUNA

 

minggu QUASIMODOGENITI

27 april 2025

1.      Marende  BE. No. 577:1+3  Puji Tuhan Debata

2.      Votum : AXB1 – D.VII.27

3.      Epistel : Jesaya 55 : 1 - 5

4.      Marende  BE. No. 216: 1-2  Gargar Dolok Tapor Batu

5.      Jamita : Pangungkapon 1 : 4 - 8

 

TANGIHON HAMU MA ASA MANGOLU TONDIMUNA

 

Turpuk on Ima surat ni si Johannes tu 7 huria na di Asia (Huria Epesus, Smirna,Pergamos, Tiatira, Sardes, Piladelpia dohot Laodikea) na di surathon si Johannes jaladitongos tu 7 huria i. Ditingki i tarbuang do si Johannes di Pulo na margoar Patmos.Laos disi dilehon Jesus do tu ibana Pangungkapon taringot tu angka na naeng masasogot. Marhite na di bege si Johannes dipudina soara na gogo na suman tu suara nisarune. Laos on ma soara na di bege si Johannes "Surathon ma na niidam tu sada bukujala tongos ma i tu na 7 huria i. Ima tujuan ni surat Pangungkapon on asa adongsipeopon na patoguhon roha dohot haporseaon di Kristus Jesus. Ai Ibana na doSiparngolu; naung mate do Ibana na jolo, gabe mangolu antong ro di saleleng nilelengna; di Ibana do anak hinsu ni hametean dohot banua toru(Pangungkapon 1:18)

Di tongos surat on tu 7 huria i laho patoguhon roha dohot haporseaon nasida diKristus Jesus. Nang pe marungkil, dipasiaksiak jala deba dibunu ala marhaporseaon diJesus Kristus. Dibona i do surat on marhite hata "Asi ni roha ma dihamu dohot damesian Debata na mangolu i, naung mangolu hian jala na naeng ro". Tung mansaipatoguhon roha do hata on. Boi taida sian kalimat on Ima sada kepastian"Keselamatan" tu angka na porsea. Ibana do Debata na Alpa dohot Omega, namengontrol sude pardalanan ni ngolunta. Alani martua ma na satia mangulahon hata niDebata nang pe mangadopi parungkilon. (band. Pangungkapon 1:3)

Nunga tangkas di paandar si Johannes di pangungkaponNa i hadirion ni Debataasa unang mabiar manang tahutan huria i (lih. Pangungkapon 1 :13-18). Ibana doTuhan ni angka na mangolu dohot angka na mate. Jala naung hehe manaluhonhamatean i. Jala Ibana do na paheheon hita na porsea tu Ibana. Alani molo tung pemarungkil hita dibahen portibi on ala ni goarNa asa ndang be mabiar hita. Ala di paradeTuhan i do di hita hangoluan na manontong. Ibana do sigomgom saluhutna. Alani ni diayat 7 disurathon do "Ida ma, na ro ma Ibana di bagasan ombun. Idaon ni nasa mata do

ibana "nang angka naung manullang Ibana, gabe mangangguhi be ma saluhut bangso nitano on mida Ibana. Ima tutu. Amen". Sian ayat on boi taida hata ''Ro ma Ibanadibagasan ombun'' Ima sada simbol ni hamuliaon ( lih. Mat. 17 : 5) Ima na ro sude nasana marhosa marsomba tu Ibana. Laos hata "ombun''" on jotjot do di pangke simbol nipanguhuman (band. Psalm 97 : 2; Sepania 1:15). Ima na ro ma Jesus laho manguhumhombar tu angka na niulana.

Alani 7 huria na diturpuk on gambaran ni huria di partingkian on (sepanjang zaman). Ima na sai adong do na pasiaksiak angka na porsea di Tuhan i, na mambahen marungkil,dilele bahkan dibunu ala marhaporseaon tu Jesus. Alani surat on ma na patoguhon rohanang haporseaonta. Asa satia manomba Ibana. Ai ibana do na hot ro di saleleng nilelengna. Ibana do bonaNa jala ujungNa. Ibana do gabe hakim. Ibana do paradehangoluan saleleng ni lelengna. Ibana do sigomgom saluhut na. Martua ma na manjaharo di angka na umbage hata panurirangon on, angka siradoti na tarsurat dison; ai jonokdo ari i. Amen.

Bahan Diskusi :

1.      Nunga jotjot tajaha jala tabege hata ni Debata “Jesus do nampuna hangoluan jala Ibana do sumber kepastian “Keselamatan”. Alai boasa jolma lalap rohana tu hagiot ni portibi on”. Aha do na mambahen i?

2.      Tauji ma jolo mambahen aha na ingkon taulahon asa hot satia tu Tuhan i nang pe mangadopi tantangan sian portibi on:

6.        Marende BE. No. 793 : 1- 2  Pos Ma Roham

7.        Tangiang sian sahalak na ro

8.        Marende BE. No.  757 : 1 + 3  Ise do Nanaeng Martua

9.        Tangiang sian Na manjabui

10.  P. Pelean huhut marende BE. No. 321 : 1---- Marujung Do Sadarion

11.    Tangiang panutup

 

Jamita : Psalmen 115 : 9 – 18 INGKON HEHE IBANA SIAN NA MATE

 

minggu PASKAH I

20 april 2025

1.      Marende  BE. No. 91:1-2   Hatuan Do  

2.      Votum : A.IX.B-D.VII.26

3.      Epistel : Johannes 20 : 1 - 10

4.      Marende  BE. No. 95:1+3   Haleluya Taendehon

5.      Jamita : Psalmen 115 : 9 – 18

 

INGKON HEHE IBANA SIAN NA MATE

 

Psalmen 115 on ima bagian ni Psalmen na somalna di endehon halak Israel andorang so tingki ni raja David dope, ai mangendehon Psalmen, ido sada bagian seni budaya na bersifat partondion di halak Israel. Parsombaon tu debata Baal pe nunga godang andorang so bangkit raja si David. Asa tujuan na utama sian Psalmen 115 0n, ima tegoran tu halak Israel asa unang marsomba tu debata Baal, laos sosososo asa marsoma nasida tu Debata Jahowa naung mamboan nasida haruar sian Mesir, tano parhatobanan tu tano Kanan. Ai harugian do jala lam maoto do nasida molo manomba debata Baal. Loja pikkiran nasida paulaula manomba debata Baal na so marniula, na marpamangan alai dang boi manghatai, marmata alai ndang marnida, marpinggol alai ndang boi marbinege ( Psalm 115 : 5-6) ai ula ula na tinungkangan ni jolma do debata Baal i. Lam maoto nasida manomba debata Baal i, ai soboi patupa manang aha Baal i. Hape Debata Jahowa na marhuaso mamasumasu, na mangurupi nasida disude gulmit ni ngoluna ndang disomba nasida. Ido marhite Psalmen 115 on dijouhon Israel asa unang be marsomba tu Baal alai mamolin ma tu Debata Jahowa, boasa?

1.      Ala holan Debata Jahowa do na boi mangurupi dohot lombulombu nasida. Debata jahowa sitompa saluhutna. Debata naso pinauli ni tangan. Debata Jahowa na marmudu Israel diparhorsihan so alani na sinari, dohot na niula ni nasida. Mangan Manna, Lote, dohot mata mual diparhorishan. Daluhut diparade Debata Jahowa. Debata Jahowa lombulombu nasida umbahen malua sian parmaraan diparhorsihan. Ndada songon debata Baal na mangalojai pikkiran dohot mambahen maoto nasida. debata na so marniula, namate, ndang boi mangurupi jolma. Ido alana ndang sisombaon debata baal.

2.      Debata marningot jala manghaholongi jolma ( ayat 12), ala diingot Debata jolma laos dihaholongi.molo sian godang ni tantangan na niadopan ni halak Israel, tarbahen mogap jala mago ma nasida, alai alani pangaramotion ni Debata boi nasida dirgak jala hot jongjong. Ido asa diokui parPsalmen on “Nunga diingot Jahowa hita” , dihaholongi laos dipalua.

3.      Holan Debata Jahowa do na boi mamasumasu. Pola 4 hali didok “ Ibana mamasumasu” pomparan ni Israel, pomparan si si Aron, angka namanghabiari Jahowa, angka na metmet dohot angka na magodang (ayat 12-13). Lapatanna, dipasupasu Debata Jahowa do angka na marposni roha tu Ibana, na manomba Ibana jala na pasiding parsombaon tu debata Baal huhut manghabiari jala unduk tu Debata Jahowa Ala holan Debata Jahowa do na boi mamasumasu. Molope didok jolma gabe pasupasu tu nahumaliangna, astuanna parhitean ni Debata do jolmai gabe pasupasu tu humaliangna. Dang na jolmai gabe mamasumasu.

4.      Holan Debata Jahowa do na boi patorophon pinompar  (ayat 14 “ sai ambaambaan ni Jahowa ”), dihata na asing “May the Lord give you children”. Lapatanna, sai tambaan ni Debata Jahowa do pinompar ni Israel dohot di sude pinompar ni angka na marhaposan tu Ibana. Di sude budaya dohot suku do di portibion manghalomohon pinompar. Jala haroroan ni pinompar ima Debata Jahowa, Ibana do namanompa saluhut jala Ibana do na talup mambuha bortian ni jolma asa boi marpinompar.

 

 Ia Psalmen i, angka ende naung membudaya di halak Israel naso olo nasida lupa di si. Sai tong do dirataratai nasida nang pe ndang pola menarik tu halak naasing. Ai tung apala dihasiholi nasida do ende psalmen on, ala ginurithon sian pengalaman haporseaon tu Debata dohot marisihon panindangion ni haporseon nasida. laos turpuk on ima sada sian angka ende Psalmen i na mangarahon asa manomba Debata Jahowa. Unang be mulak tu haporseaon na jolo na so tumanda Debata Jahowa, na manomba angka gana-ganaan na pinauli ni tangan ni portibi on.

Nean ianggo dipartingkian saonari on, dang apala adong be idaon na manomba angka gana-ganaan songon ditingki zaman primitif. Jala boi dohonon dang adong be na manomba debata Baal. Hape secara praktek, lobi sian na manomba debata Baal jumpang di partingkian sinuaeng.  Ima angka na “ mendewakan materi/hepeng”, na mardebatahon hepeng/arta,marhaposan tu hepeng. Holan alani hepeng boi do lupa jolmai tu Debata. Hape Debata do mula jala mual ni saluhut. Debata do na umpasupasuhon ragam ni pasupasu pardagingon dohot partondion dibagasan Kristus ( Band Ef 1:3). Debata Jahowa do namambahen mamora, marhagabeon dohot marhasangapon. Alai noi do alani pasupasu naung jinalona sian Debata gabe lupa jolmai. Isarani, ditingki soadong roda 4, na ringgasan marminggu dohot tu partangiangan, alai dung adong roda 4, jumpang ari minggu gabe jumotjot laho mardalani. Ido gabe diarahon turpuk on asa mulak ma manomba Debata Jahowa, marhabiaran/unduk tu Jahowa jala marhaposan tu Jahowa. Unnag marpangunsandean tu sinadongan dohot pingkiranta.

Debata Jahowa do nampuna langit jala nunga dipasahat tano i tu jolma natinompana i. Manongtong jala hot rodi salelengleleng na ma hita manomba Debata Jahowajala marposni roha, di tingki masa lasni roha dohot arsak ni roha. Tapasiding ma angka hasipelebeguon sian ngolunta. Sai marhaposan tu Debata Jahowa ma hita asa lam mangerbang ngolunta, lam marbisuk hita di sude parngoluonta. Debata Jahowa ma sisombaonta di sude kondisi parngoluonta, hot rodi salelengni lelengna. Haleluya. Amen.

5.     Marende            BE. No. 635:1 : Ro ma Tuhan Jesus

6.     Tangiang Sian Na ro

7.     Marende            BE. No. 450:4 Tung Na Tarapul Do

8.     Tangiang Sian Na Manjabui

9.     P. Pelean huhut marende BE. No. 633:5-6  Nunga Hehe Kristus i

10.Tangiang panutup

 

Jamita : Sakaria 9 : 11 – 17 MALUA BINAHEN NI MUDAR PARPADANAN

 

ARI HAMAMATE NI TUHAN JESUS

18 April 2025

 

1. Marende BE. No. 81 : 1-2  Jesus Mual Ni Ngolungku

2. Votum  : A.VIII.A1-D.VI/23

3. Epistel   : Markus 15 : 33-41

4. Marende BE. No. 88: 1-2  Jesus Na mamorsan

5. Jamita   : Sakaria 9 : 11 – 17

 

MALUA BINAHEN NI MUDAR PARPADANAN

Hamu angka dongan sahaporseaon, molo diadopi jolma hamaolon dohot haporsuhon di parngoluonna siganup ari, na boi  tubu do di roha ni jolma i angka sura-sura ni roha taringot tu sitaonon na lobi umbagas, bahkan boi do sahat tu na so adong be pangkirimon di ngolu nalobi dumenggan tu tingki naro, ujung madabu ma tu pandelean dohot tu keputus-asaan. Hira songon i ma keadaan ni Bangso Israel dung dibolus nasida habuangan Babel, jala mulak nasida tu Jesrusalem, ternyata ndang mansohot parungkilon nasida, asing keadan ni huta Jerusalem naung hancur, laos diadopi nasida do pangarupaon sian bangso na leban na di humaliang nasida. Siala ni ido manghirim bangso i asa dipabangkit raja di tongatonganasida na pamalum roha dohot na pasaehon sude parungkilon nasida. Alani ima marhite Panurirang Sakaria dipasahat ma tu bangso i, paboa na dapotan haluaon do bangso i marhite mudar ni parpadanan na pinatupa ni Debata.  Domu tusi ma adong manang piga nanaeng dohonon ni turpuk on :

1.      Mudar Parpadanan na paluahon.  Ditaringoti do di turpuk on taringot mudar ni pardalanan na paluahon angka na tarbuang sian bangso Israel di godung na so marisihon aek (ngolu na tarhurung). Mamungka sian na robi nunga tarihot bango Israel di parpadanan nasida tu marhite mudar ni pelean situtungon dohot pelean hamauliateon tu Jahowa, dipispishon do deba mudar tu i tu langgatan jala debanari ima luhutan ni halak Israel.  Di Padan na imbaru mudar ni parpadanan i ima mudar ni Jesus Kristus, naung dipispishon manang diusehon laho paluahon halak Israel dohot sude angka na porsea di sandok portibion. Alai tontu asa sahat haluaon i ingkon na olo do mulak jolma i tu Debata, jala manongtong marpanghirimon tu Tuhan i, ido didok diturpukta on : Mulak ma hamu tu huta na gonting, hamu ale angka na tarrante na marpangkirimon dope! Gari sadarion ahu mamaritahon hian:  Silompit dua do pasuangonku tu ho. Ndang dihilala nasida be angka haberniton i, ndang aeonnasida be angka hinamaol ni parngoluon i gariada dua lompit pasuangonNa tu nasida.

2.       Debata papatar hadirionNa. Molo di padan na robi gidang do na boi idaonta hapapatar ni Jahowa maradophon bangsoNa. Boi do hapataronNa i digombarhon tu haroro ni ronggur, sillam, ombung dohot lalo. Marhite hapataronNa i tarida ma Jahowa di atas nasida, jala ruar sumbiana songon hilap, lapatanna Debata patuduhon hadirionNa songon Debata na sun hingogo, na tuk paluahon bangsoNa sian habuangan i. Jala didok muse : Jala paluon ni Tuhan Jahowa ma sarune, ima patuduhon hamonangan naung nilehon Jahowa tu bangsoNa.  Jesus Kristus naung mate di hau pinarsilang i do hapapatar ni holong ni Debata tu sandok portibion, laho mangalehon haluaon tu saluhut jolma di portibion.

3.      Lasniroha ni angka na dapotan haluaon.   Molo didok diturpuk on : gabe suda panganonnasida jala luntakhononku angka batu ni ambalang; jala minum nasida jala marhariburon hira sian anggur, gabe gok nasida songon saoan pangurasan, songon angka suhi ni langgatan. Mangan minum martudutudu do i tu pesta lasnniroha, pesta hamonangan maradophon musu na humaliang nasida. Batu ambalang be ndang marguna be disi songon na masa di parporangan uju i, didok di ayar 16 : Jadi di ari na sasada i lehonon ni Jahowa, Debatanasida ma tua tu nasida, songon tu parduan birubiru ni bangsona, ai angka batu ni tumpal do nasida, angka na gabe partonggol di atas ni tanona. Laos Jahowa na menjamin masa depan nasida, songon dahanon na pasimbur dolidoli, jala anggur angka na marbaju.   

Hamu angka dongan sahaporseaon. Mudar ni Jesus do na gabe mudar parpadanan ni di angka na porsea asa dapotna haluaon sian huaso ni dosa dohot hamatean. Jala marhite hamamateNa i dipapatar ma tu hita hadirion ni Debata na gok asiniroha, ndada holan haluaon sian musu dilehon tu hita, alai laos dohot do masadepanta dijamin Mudar ni Kristus, ima hangoluan na saleleng ni lelengna. Antong las ma rohanta manjalo mudar parpadanan i. Amen.

Bahan Diskusi :

1.        Tarajumi do molo uju tapangan “Ulaon Nabadia” na manjalo parpadanan do hita marhite mudar ni Kristus i. Mangihuthon hita boasa sai adong dope halak Kristen na bangkol rohana manjalo Ulaon nabadia?

2.        Aha do lasnirohanta molo tapatupa Passion dohot parningotan di panaonon ni Tuhanta i?

6. Marende BE. No. 411:1-2  Nang Pe Rara Dosamu

7. Tangiang sian na ro

8. Marende BE No. 622 : 1  Mansai Nalnal Di Angka Partingkian

9. Tangiang sian Na Manjabui

10. Pasahat Pelean huhut marende BE No. 88:1---  Na lao do birubiru i

11. Tangiang panutup

 

Pdt Janti D Nababan

HKBP Resort Desagajah

 

 

Catatan:  Molo tapatupa do partangiangan jala jamita na  tajamitahon ima Jamita tu Minggu na ro, on

                 ma tapangke, unang ma tapatupa Acara Partangiangan taringot tu Haheheon tongon di   

                 Panaonon ni  Tuhan Jesus.

Jamita: Johannes 12: 12 - 15 LEHON HAMU MA HAHORMATON TU DEBATA

 

MINGGU PALMARUM

13 April 2025

1. Marende BE. No. 5 : 1 + 3  Sai Tapuji Ma Jahowa

2. Votum : A.VI.B.6 - D.V.22

3. Manjaha Epistel: Psalmen 68: 25 - 36

4. Marende BE. No. 28 : 1-2   Hata Ni Jahowa

5. Jamita: Johannes 12: 12 - 15

 

LEHON HAMU MA HAHORMATON TU DEBATA

]

Hita angka na hinaholongan ni Tuhanta Jesus Kristus !

Ganup taon do marpesta Paskah halak Jahudi marningot haluaon na pinatupa ni Debata, di na boi nasida haruar sian tano parhatobanan ni halak Misir. Jala sian ganup inganan do halak Jahudi (sian desa na ualu) ro tu Jerusalem laho marpesta Paskah, tung mansai torop jala ribur do na ro tu huta Jerusalem. Di partingkian na songon i ma ro Jesus tu Jerusalem, jala pintor hatop do sar barita taringot tu haroro ni Jesus on. Tarlumobi ma angka naung marnida tanda halongangan na pinatupa ni Jesus. Holan dibege natorop na ro Tuhan Jesus tu pesta Paskah i pintor ro do nasida manomunomu Ibana. Panomunomuon nasida di Tuhan Jesus patuduhon molo nunga jumpang be na nihirim nasida na sai laon, haroro ni Tuhan Jesus tu Jerusalem laho paluahon nasida sian panggomgomian ni halak Romawi.

Sude do na opat evanggelium (Matius, Markus, Lukas, Johannes) manurat taringot tu haroro ni Tuhan Jesus tu huta Jerusalem on, na ditomutomu jala diudurhon angka natorop. Alai holan evanggelium Johannes do na manurathon “maremare” (daun palem) na marlapatan manomunomu Raja Siparmonang. Songon on ma cara ni halak di abad na parjolo manomunomu sahalak Raja na ro manopot nasida, haruar do nasida saluhutna laho manjumpangisa, mangalehon hahormaton tu Raja na ro, jala mangudurhonsa sahat tu inganan na dituju. Jala ido na dipatuduhon angka natorop i di bagasan turpuk on, manomunomu Jesus Raja na mamboan hamonangan, na gabe Raja nasida sandiri na independen sian halak Romawi. Marhite panomunomuon na pinatupa ni angka natorop i patuduhon pengakuan/panindangion nasida di huaso ni Tuhan Jesus na mamboan haluaon, jala Jesus do Mesias dohot Raja na dibagabagahon di padan na robi. Ibana ma na paluahon nasida sian tangan ni parhuaso, penindasan ni panggomgomi Romawi. Nunga diida nasida huaso dohot hagogoon ni Tuhan Jesus, umbahen na dijouhon nasida “Hosianna! Pinasupasu ma na ro marhite goar ni Tuhan i, Raja ni Israel” huhut mamboan maremare manomunomu Ibana. Hata “Hosianna” na marlapatan do i Asi ma roham di hami, palua ma hami. Ungkapan pengharapan do on sekaligus pengakuan molo Jesus do Raja na sian Debata na disuru laho paluahon nasida sian panggomgomi Rom na mamparhatoban nasida.

Ndada songon na nihirim ni natorop na dipatuduhon Tuhan Jesus laho paluahon jolma di portibi on, ai ndada holan sian harajaon portibi paluaonNa jolma, alai sian dosa dohot hamatean. Molo didok rohani natorop i, on ma tingkina Tuhan Jesus patuduhon huasoNa laho manaluhon panggomgomion ni halak Rom, alai Tuhan Jesus ndang justru patuduhon huasoNa, hagogoonNa, di na dihunduli Ibana halode. Hundul Ibana di atas ni halode patuduhon haserepon ni rohaNa, jala mamboan dame, padamehon jolma i tu Debata. Ido umbahen di barita panaonon ni Tuhan Jesus, nasida (angka natorop) na mangalehon hahormaton tu Tuhan Jesus laos nasida do na mangaleai Tuhan Jesus mahite na mandok “padao hamu ma Ibana sian hami, parsilangkon ma Ibana, parsilangkon ma Ibana”, holan ala na cara na ditempuh Tuhan Jesus laho paluahon nasida berbeda dohot cara na nihirim ni angka natorop i.

Haroro ni Tuhan Jesus tu portibi on laho paluahon hita sian panggomgomion ni sibolis patut hita halashon. Ibana na ro di bagasan lambok dohot serep ni roha gabe tiruan ma i di hita angka na tinobus ni mudarNa. Patut do lehononta hahormaton tu Debata songon alusta di pambahenan ni Debata na paluahon ngolunta sahat ro di tingki on. Tatomutomu jala tajouhon ma tongtong di bagasan ngolunta molo Ibana do Raja na sinuru ni Debata, na mangarajai roha nang pingkiranta. Tongtong ma unduk jala serep rohanta di adopan ni Debata songon tanda ni hahormatonta di Debata na mangalehon haluaon di hita saluhutna. Amen.

Bahan Diskusi :

1. Songon dia do sikapta mangalehon hahormaton tu Debata?
2. Molo so jumpang na nihirim ni roha, tagamon do ulaning lehonon hahormaton tu Debata?

 

 

1.     Marende BE. No. 568a:1-2   Nasa Soara Ingkon Do

2.     Tangiang Sian Na ro

3.     Marende       BE. No. 116:2  Ditompa Ho Do Au

4.     Tangiang Sian Na Manjabui

5.     P. Pelean huhut marende BE. No. 316:1---Nunga lao Muse Sadari

6.     Tangiang panutup