ROMA 10:16-21 SIAN NA TUMANGHON DO RO HAPORSEAON

 

BAHAN SERMON HKBP DISTRIK XIII ASAHAN LABUHAN BATU EVANGGELIUM MINGGU INVOCAVIT

(09 MARET 2025), ROM 10:16-21

SIAN NA TUMANGIHON DO RO HAPORSEAON

I.                  PAMUHAI

Diondolhon si Paulus di turpuk on, asi ni roha dohot haluaon ni jolma jaloon marhite haporseaon, ndada marhite mangulahon patik songon na pinodahon ni Jahudi. Malua do ganup na manjou goar ni Tuhan i, ninna si Paulus di turpuk on. Haluaon do sinta-sinta ni jolma. Malua sian hamatean, sian hapogoson, sian parungkilon, sian halojaon, sian parsahiton, sian penindasan. Mangeahi haluaon i diula jolma do ragam ni ulaon, jala dilului ragam ni pangurupi. Diula marbahudung, maraskese (meniksa diri), mardatu, mamele tu kuburan ni natorasna. Hape ndang jumpang haluaon i. Mangihuthon Jahudi, marhite na mangulahon patik do ro haluaon. Alani poda i do ditulak nasida Tuhan Jesus; Ndang dihaporseai nasida Jesus do silehon haluaon i. Marhite na manghaporseai hamamate dohot haheheonNa i do malua jolma sian dosana.

II.               HATORANGAN

Goar ni minggu on Invocavit, lapatanna: Jouonna ma Ahu, jadi alusanku ma ibana, Psalmen 91:15a. Joujou ni Debata do tu parpsalmen i, taringot tu holong ni rohaNa dohot haradeonNa mangalusi na manjou goarNa, dohot na marpos ni roha di Ibana. Marhite goar ni minggu on dipapatar tu hita sai na alusanNa do na mangido pangurupion tu Ibana. Mangihuthon Psalm 91:15a, pambuatan ni goar Invocavit, jolma manang na porsea i do na joujou tu Debata, dung i alusan ni Tuhan i ma na manjou i.

Mangihuthon si Paulus ndada marhite na mangulahon patik malua jolma sian dosa, marhite asi ni rohaNa do. Ringkot do patik i radotan ni na mangihuthon Kristus, alai fungsi ni patik ndada mamboan jolma tu haluaon, mamboan tu panandaon ni diri na gok dosa dohot hagaleon do. Ndang tarjalo jolma haluaon marhite pambahenan, marhite haporseaon do. I do na niondolhon ni si Paulus di ayat 9, "Ai malua maho, molo diparhatopot pamanganmi Tuhan Jesus i, huhut dihaporseai

roham, naung dipahehe Debata Ibana sian angka na mate". Pandohan, "molo diparhatopot pamanganmi Tuhan Jesus i", patuduhon na marhite panopotion di dosa do jaloon asi ni roha i. Boi do sada halak mangulahon patik alai ndang diparhatopot dosana. Asi ni roha ni Tuhan i dipatuduhon si Paulus di Rom 3, 24-26 marhite hata "dipintori", "dihophop", dohot "ditobus".

Marhite hata "dipintori" dipatuduhon hadirion ni jolma di pengadilan ni Debata. Ala dosa ni jolma ingkon dabuon ni Debata uhum tu jolma. Hape ala asi ni rohaNa dipintori jolma asa malua sian dosana. I ma asi ni roha ni Tuhan i. Pandohan "dihophop" patuduhon na dihophop. Jesus do jolma umbahen malua, ndada ala pambahenan ni jolma. Aut so ro Jesus manghophop jolma ndang mardame jolma dohot Debata. Dihophop jolma i marhite hamamate dohot haheheonNa.

Di haradeonNa tarsilang dipapatar Jesus balga ni holongNa di jolma. Rade Ibana mate tarsilang asa unang tipa uhum silang i tu hita. Olo Ibana gabe dosa, atik pe ndang mardosa Ibana. Marhite pandohan "ditobus" dipatuduhon naung diparhatoban dosa dohot sibolis jolma.

Di hasomalan ni Jahudi dohot Junani asa tanggal status parhatobanon sian sahalak hatoban ingkon adong na manobus. Domu tusi do haroro ni Jesus paluahon jolma sian dosa. Ala diparhatoban dosa jolma, ro Jesus manobus jolma asa mulak tu Debata. Marhite silangNa i ditobus hita sian uhum dosa asa malua sian parhatobanan ni dosa dohot sibolis.

Haporseaon na nidok ni si Paulus i ma haunduhon dohot pos ni roha di hagogoon ni Tuhan i. Ringgas do Jahudi mangulahon patik, alai ndang unduk tu Debata, ai diula do na maralo tu lomo ni roha ni Debata. Diradoti do patik i, alai mangunsande nasida tu hagogoon ni portibi on.

Di era reformasi on tarida do na so adong di roha ni jolma haunduhon. Tiruanna, somal do angka par kenderaaan menerobos lampu merah dohot mamarkir kenderaanna di inganan na so boi mamarkir kenderaan. Andorang so reformasi, ndang  somal  na  songon  i.  I  ma  patuduhon  na  so  adong

haunduhon tu peraturan Lalu Lintas di masyarakat Indonesia. Ala na mabiar tu Polisi do umbahen so di lampu merah, ndada ala haunduhon tu peraturan Lalu Lintas. Boi do songon i ngolu ni halak Kristen. Goarna Kristen, hape parangena ndang kristen. Ala na mabiar tu jolma, mabiar tu polisi do umbahen ndang diula manangko. Molo so adong jolma mamereng diula do hajahaton. I ma patuduhon na so mabiar jolma tu Debata. Diula na denggan ndada ala na mabiar tu Debata, asa dipuji jolma do.

Haporseaon i ma haunduhon dohot pos ni roha tu Tuhan i. Kristen lapatanna siihuthon Kristus, sitiru Kristus. Hape adong do sian halak Kristen na mangalo Kristus, ala diula parjujion, ala panangko, ala pangarampok, parlate, parbada, parhosom dohot ginjang rohana. Targoar Kristen, hape ndang unduk, ndang pos rohana di Tuhan Jesus. Burju do marminggu, hape ndang marparbue haporseaonna.

Didok si Jakobus: "Aha ma gunana ale angka donganku, molo didok halak di ibana haporseaon, alai ndang adong di ibana pangulaon", Jak.2:14; Haporseaon i pe songon i do. Anggo so adong pangulaonna, naung mate do hadirionna, Jak. 2:17. Na mate do haporseaon molo so marpangulaon. Ndang holan manangiangkon na pogos, ingkon patuduhononon parbue ni haporseaon/tangiang i marhite pangurupion. Molo taurupi na pogos, i do patuduhon na marparbue haporseonta.

Tubu haporseaon di roha ni jolma marhite sian na manangihon hataNa dohot marhite jamita ni parjamita, ay. 14-

17. Ndang sian dia dalanna tubu haporseaon di sada halak molo so olo manangihon hata ni Debata. Ndang porsea halak Jahudi ala ndang olo nasida manangihon Hata ni Debata. Aut porsea nasida di Hata ni Debata jangkononna do Jesus na binaritahon ni Padan na Robi. Asa tubu haporseaon ingkon rade manangihon Hata ni Debata, ingkon rade manangihon jamita taringot tu Jesus. I do na nidok ni si Paulus di ayat 17, "Ai sian na tumangihon do ro haporseaon, ia panangihonon i sian Kristus do".

Na tarjou do na porsea i manghatahon, mamaritahon, manghatindanghon Hata ni Debata asa marhite i tubu jala lam

matoras haporseaon ni na umbegesa di Jesus Sipalua i. Ingkon hobas jala barani na porsea i manghatahon Hata ni Debata marhite parange dohot pambahenan asa porsea portibi on di Jesus. Molo tabaritahon Hata ni Debata, ingkon taboto, ndada mamintor porsea portibi on, boi do ditulak manang ndang dijangkon songon na nidok ni si Jesaya, "Ale Tuhan, tung ise ma manghaporseai jamitanami", Jes. 53:1. Si Paulus pe diadopi do na songon i, ditulak ibana pola dihurungkon ala manjamitahon Hata ni Debata, Pil. 1:11-14, alai benget do ibana.

III.           PANIMPULI

Disungguli hita asa hobas mamaritahon Hata i tu angka ianakhon asa lam porsea nasida di Jesus jala marhite i margogo nasida mangadopi tantangan zaman. Sai taparsinta do asa marsihohot ianakhontamanghaposi Jesus. Marsak do hita molo ditinggalhon nasida Kristus. Asa unang ditinggalhon ianakhonta Kristus, ingkon dungo jala hobas hita mamaritahon Hata i tu sundut na umposo.

Di tingki na parpudi on, nunga lam moru roha ni ruas manangihon Hata ni Debata, tarida do i sian otik ni na ro tu parmingguon dohot tu partangiangan martimbanghon torop ni ruas na tarsurat di Buku Huria. Gariada di angka acara na niuluhon ni huria nunga jotjot tarbege pandohan "Pajempek hamu jamita i", isarana di acara penguburan ni na mate. Tu hata ni hula-hula na sai mulahulak jala leleng, so barani mandok "Pajempek hamu hatamuna i". Angkup ni i, godang kritik tu jamita na so boi mambahen mengkel. Ingkon jamita na mambahen mengkel do asa didok tabo jamita i. Lam porsea ma hita di Debata, molo ringgas hita manangihon HataNa. Amin.

Jamita : 1 TESSALONIK 3: 1-13 SATIA MANGIHUTHON DOHOT MANGHOBASI TUHAN I

 

Minggu II Dung Trinitatis

29 Juni 2025

1.      Marende BE. 14:1+4

2.      Invocatio : A.XV.A.2 – D.XIII.42

3.      Epistel : 1 Rajaraja 19: 15-21

4.      Marende BE. No. 672:1-2

5.      Jamita : 1 TESSALONIK 3: 1-13

 

SATIA MANGIHUTHON DOHOT MANGHOBASI TUHAN I

 

            Huria Tessalonik i ma huria na adong di propinsi Makedonia (1:1,7) na nidapothon Apostel Paulus dung sidung marbarita nauli sian Pilippi; jala dijangkon sahalak na margoar si Jason do Apostel Paulus dohot si Silas di Tessalonik. Tolu ari Sabbat padodot ma lelengna dibaritahon Apostel Paulus barita na uli di parguruan ni Jahudi. Gabe adong deba sian halak Jahudi songon i nang halak Junani padodot angka parompuan na mangoloi hata na tinariashon Apostel Paulus. Alai adong do deba halak Jahudi na mangiburu mangida Apostel Paulus, laos diarahon nasida do jolma na jahat mambahen haguguntur di huta i, laos ditahopi nasida do bagas ni si Jason. Alani i, dipaborhat angka dongan na burju roha ma Apostel Paulus dohot si Silas tu Berea laho manguduti panghobasion marbarita na uli (Ul.Ap 17: 1-9). Di Berea pe ndang diloas Apostel Paulus mamaritahon Kristus, alani lao Ap.Paulus tu Athena manaburhon barita na uli i.

            Alai masa do 2 parungkilon teologi bolon di huria i: i ma taringot tu etika ni huria (parsaoran ni baoa dohot boruboru) nang taringot tu poda parousia (haroroni Tuhan Jesus na paduahalihon). Deba nasida gabe sumurut haringgason nang hapadotanna mangulahon joujou ni haporseaonna siala na so marnasaut tulus ari parousia i. Ai ditagam rohanasida do hamamasa ni parousia i di ngolu nasida. Di ombas ngoluna sinuaeng do hasasaut ni parousia i. Asa sangkap ni surat tongosan ni apostel Paulus tu huria Tessalonik laho patoguhon panghaporseaion ni huria di hasasaut ni ari parousia marhite na tongtong satia mangihuthon dohot manghobasi Tuhan i.

Nunga masihol Apostel Paulus naeng mangebati huria Tessalonik alai ndang dapot dope tingki na lehet, alani disuru ibana ma si Timoteus mangebati nasida (ay.2) Mansai las do roha ni Apostel Paulus mambege barita taringot tu Partondion ni ruas di Tessalonik on. Marhite barita panangkasion na binoan ni si Timoteus taringot tu ruas i, mansai denggan do haporseaon, holong ni roha dohot haburjun ni ruas i; pola tarbarita hinadenggan ni ruas i laos gabe sitiruon di saluhut angka na porsea diluat Makedonia dohot Akaya. Marsihohot do huria Tessalonik  manghaporseai Jesus Kristus nang pe mangae pangaleleon nasida. Parangena pe gok holong maradophon donganna, songon i nang maradophon na paburuburu nasida. Ditongos Apostel Paulus ma surat tu huria Tessalonik on paboahon las ni rohana marnida haporseaon ni huria i jala patoguhon roha nasida asa satia mangihuthon dohot manghobasi Tuhan i.

Nang pe mandok mauliate apostel Paulus taringot tu huria Tessalonik jala nang pe las rohana marnida nasida togtong do ditangiangkon apostel Paulus nasida arian dohot borngin. Dipangidohon apostel Paulus tu Debata asa adong nian tingki di nasida masipaidaan bohi asa boi dipatingkos apostel i atik tung adong na hurang di haporseaon nasida. Ditangianghon apostel i do asa ditambai haholongan di huria Tessalonik nang pe nunga dipuji ibana holong ni roha nasida. Sada do tujuan ni tangiangna i: asa marhabadiaon nasida di jolo ni Debata (ay.13).

Haporsuhon na masa tu Huria Tessalonik dohot tu apostel Paulus ndang mambahen mansohot haporseaon nasida; ndang gabe ditadinghon nasida Tuhan Jesus. Tangkas diauhon jala dihaporseai nasida paboa naung parjolo Tuhan Jesus manaon na porsuk holan laho manghophop hajolmaon. Alani i songon siihuthon Jesus hita, ingkon rade ma hita manaon na porsuk; ndang jadi ragam ni haporsuhon na masa di portibi on mambahen sumurut haporseaonta, baliksa ingkon lam patoguhon doi. Boha angka dongan, togu do haporseaonta manang mura munggilunggil? So tung do marhaporseaon hita holan di tingki godang pasupasu dohot las ni roha. Manongtong ma mangihuthon dohot manghobasi Tuhan i!

Parsihohotan manghaporseai Tuhan Jesus Kristus ingkon tarida do di parange na denggan. Haporseaon na togu ndang boi holan di hata, ndang boi holan di roha, ndang boi holan di parbinotan alai ingkon tarida do sian ngolu siganup ari. Dia ma i? I ma mangolu dibagasan holong. Dihamauliatehon apostel Paulus do holong ni roha ni huria Tessalonik jala dihatindanghon apostel Paulus do nang holong ni rohana maradophon huria i (12). Sitaonon na niadopan nasida pahehehon roha na masihaholongan. Masihaholongan do huria i dohot apostel Paulus. Boha hurianta on? Marsihaholongan do parhalado dohot ruasna? Masihaholongan do ruas tu ruas nang parhalado tu parhalado? Tapadao ma angka hosom, pangiburuon, parbadabadaan, bangko holan naeng maruntung, monang jala mora sandiri.

Jamita partangiangan on manungguli rohanta di hinaringkot ni hasatiaon mangihuthon dohot manghobasi Tuhan i, lumobi uju masa haporsuhon di ngolunta. Asa masipatoguan mangadopi tantangan ni jaman jala masitangiangan hita sesama halak Kristen asa lam magodang di holong ni roha tu dongan huhut mangaradoti habadiaon diadopan ni Debata. Amen.

 

6.     Marende            BE. No. 443:1+3

7.     Tangiang Sian Na ro

8.     Marende            BE. No. 253:1-2

9.     Tangiang Sian Na Manjabui

10.Papungu Pelean huhut marende BE. No. 318:1…

11.Tangiang panutup

Jamita : Psalmen 42 : 1 – 12 DITALUHON JESUS TONDI NA JAHAT

 

Minggu I Dung Trinitatis

22 Juni 2025

 

1.      Marende BE. No. 648:1+4

2.      Votum : A.XV.13 – D.XIII.48

3.      Manjaha Epistel : Lukas 8 : 26 – 39

4.      Marende BE. No. 463:1+3

5.      Jamita : Psalmen 42 : 1 – 12

                                                                          

DITALUHON JESUS TONDI NA JAHAT

 

Na boi masa do ragam ni hamaolon na boi siadopanta di hasiangan on. Marganti sorin do las ni roha dohot arsak ni roha. Ngolo partondion pe tong do mengalami dinamika naik turun. Sipata mansai togu do haporseaon dohot pos ni rohanta mida Debata Jahowa; alai di sada partingkian boi do mansai gale  ngolu partondionta. Molo songoni pangalahona, hal na somal ( wajar ) do i. Holan i do, manang songon diape na masa na taadopi unang sumurut nian hita sian parsaoranta dohot Debata. Gariada tahe molo tahilala songon na lam dokdok parungkilon i manosak ngolunta ingkon lam mauas jala masihol tondinta naeng pajumpang dohot Debata. Ingkon lam taparsirangguthon parungkilon dohot nasa na pasorat hita rap dohot Debata.

Dibonai do Psalmen 42 on marhite hatorangan : “Ende Sipodaon sian angka anak ni si Kora”. Ise do angka anak ni si Koran na nidokna dison ?. Molo tajaha Bibel na ummotikna adong tolu ( 3 ) na digoari si Kora. Parjolo, si Korah anak ni si Esau ( 1 Musa 36 : 5; 1 Kron.1: 35 ). Paduahon, Si Korah anak ni si Hebron pinompar ni si Kaleb ( 1 Kron. 2. 43). Patoluhon. Korah anak ni si Iseber (sahalak Lepi ) rap dohot dua ratus lima pulu baoa sian halak Israel mambingkasi bada ( memberontak tu si Musa dohot si Aron ( 4 Musa 16 : 19 ). Hinorhon pemberontakan ni si Kora diuhum Debata do ibana rap dohot angka donganna panggunturi i, dipangangang tano i babana jala dibondut nasida, ro di jabunasida dohot sude jolma, angka na paihut si Korah ( 4 Musa 16 : 20 – 35 ).

Sian hatorangan na di ginjang i lumobi poin patoluhon boi ma tarimpun ia angka anak ni si Korah nidokna di Psalmen 42 i ma angka na manguluhon parende dohot parhinaloan di bagas joro ni Debata. Diendehon nasida ma parsorion ni bangso i naung holang sian Jerusalem dohot bagas joro ni Debata.

Ayat 2 – 6. Mansai dokdok do panghilalaan ni parpsalmen hatiha manggurithon turpuk on. Malungun situtu rohana di Debata. Bagas dihalungunhon rohana Debata tudos songon panghalungunhon ni ursa di angka guluan. Ursa na tongon mardalan di angka dolok naung mosok angka duhutna di ari logo, naung mauas situtu ala marsik sude angka guluan ( kubangan ) na somal gabe inganan panginumanna. Holan sada do na dihalungunhon rohana di partingkian i, i ma asa jumpangan guluan na marisihon aek nian laho pasombuhon uasna. Tudos tusi ma panghalungunhon ni parpsalmen di Debata, ai holan Debata do na tuk pasombu panghilalanna na maheu i. pasabam rohana na marsak i, jala na tuk gabe paradianan ni tondina na loja i.

Tongon tartaban do parpsalmen di partingkian ni turpuk on, dao do ibana sian Jerusalem hutana i, sian bagas ni Debata na gabe ingananna marlas ni roha nasailaon on. Disosak angka natorop i dope ibana marhite sungkunsungkun na mangarehei “ Di dia do Debatam ?”. Ai masa do pangantusion hatiha i paboa hinatalu ni debata na sinomba ni sada bangso do molo talu bangso i di parporangan . Dirajumi na torop i ma na so margogo hape Debata na sinomba ni bangso Israel ai tartaban do bangso i. On do na naeng nisoarahonni bangso sileban i marhite sungkunsungkun na i: “Ndang adong gogo ni debata na sinombami, ai ndang tarpaluana ho siantangannami”, Hira na sintong do antong na nidok ni bangso sileban i, ai ndang manigor dipatuduhon Debata huasoNa laho paluahon bangsoNa i. Punjung do dihilala parpsalmen. Tumatangis ibana arian dohot borngin, maradu madabu do iluiluna tu angka sipanganon na pinanganna.

Parir situtu do ditaon parpsalmen di na masa i. Sada do na mangapuli rohana i ma molo dipaingotingot ibana parsaoran nasida uju rap dohot angka donganna sahaporseaon di bagas ni Debata. Parsaoran di bagas joro na padamehon jala pasonang roha huhut parsaoran pangalapan gogo laho manguduti pardalanan ni ngolu. Sai dihasiholi rohana asa boi nian muse mulak ibana tu hutana i, marpungu rap dohot angka donganna sahaporseaon, marlas ni roha marsaor dohot Debata nang donganna sahaporseaon di bagas ni Debata.

Ayat 6 – 12. Marhite ayat on tangkas ma tarida pos ni roha ni parpsalmen di Debata. Nang pe sai direhei na torop i ibana na mansoadahon huaso ni Debata, ndang sumurut anggo haporseaonna di huaso ni Debata. Nang pe sai hira na tutu na nidok ni angka na torop i, na so margogo hape Debata paluahon nasida sian sitaononna i, ndang olo ibana manundalhon Debata, laho mangalului pangurupion sian debata na asing. Pos situtu do rohana, lehonon ni Debata do pangurupionNa di tingki na binuhulNa. Ido umbahen, ndang diloas ibana tondina sai tungki jala rusak di bagasan dirina.

Ayat 7 – 11. Parpsalmen dison manggombarhon borat ni sitaononna i tudos songon na dihuphupi ombak dohot galumbang sian sude arah. Mogap do ibana pola naeng suda hosanna, jala ndang jumpang dalan di ibana laho haruar sian panghuphupi ni galumbang i. Tung rura hamatean do tahe na tongon binolusna i. Alai halak na bonar do ibana. Dihaposi rohana do sasada Debata do na tuk paluahon ibana sian rura hamatean i.

Nang pe nian sai marhusari do rohana manungkun Debata, “ Boasa tung dihalupahon Ho ahu ? Tung marharoroan do sungkunsungkun on sian sihol ni rohana asa jonok tu Debata, ai di tingki jonok tu Debata do tarbahen ni jolma i marhasonangan jala marhagogo on. Tutu maol do antusan ni rohana na masa i, boi masa do tutu gabe ragu ibana di huaso ni Debata ai nunga leleng dipaima ndang ro pangurupion i. Alai dipadirgak ibana do simajujungna manatap tu ginjang, tu Debata do dialuhon na so dapot niantusan ni rohana i “ Boasa ingkon sai martujungtujung ahu mardalan dibahen pangarsahi ni musu i?.?

Huria ni Tuhanta nahinaholongan di bagasan Kristus Jesus. Bangkona do ingkon mangadopi ragam ni sitaonon nasa jolma na dihasiangan on. Ndang mardia imbar parsonggop ni sitaonon i, songgop do i tu angka na pogos alai songgop do i nang tu angka na mora songgop tu angka jolma na so marhasohotan dope, alai songgop do tong tu angka naung marrumatangga, songgop do i tu angka na marsingkola, alai songgop do tong tu angka jolma naung timbo parsingkolaanna; songgop do i tu halak na so porsea, alai songop do tong tu halak na porsea.

Rap mangadopi sitaonon do angka jolma na di hasiangan on, alai marhasurungan do pangalaho ni angka na porsea mangadopi sitaonon i. Taruli gogo dohot bisuk do nasida sian Debata na gabe haporusanna. Na so tupa boanon ni sitaonon i angka na porsea i tu pandelean dohot dosa, gariada tahe pabagashon panandaion nasida do i di huaso dohot holong ni roha ni Debata.

Torop do halak na mandele uju mangadopi sitaonon, ndang saotik tong na madabu tu dosa, mamurai Debata huhut mangalului pangurupion sian angka na marhagogoon di portibi on. Boi masa do i antong ala ndang Debata dibahen gabe haporusanna. Sai lalap ibana dibagasan biar dohot rimas ni roha mangadopi angka sitaononna i, dung i suda ma gogona laos mandele ma. Alai marasing do anggo halak na porsea, pos do rohana di pangaramotion ni Debata di ganup partingkian, di angka partingkian nang di partingkian na maol gumodang do dilehon ibana rohana mamingkiri jala manghaposi huaso dohot holong ni roha ni Debata sian ragam ni sitaonona i. Nang pe maol diantusi rohana parro ni sitaonon i, tu Debata do i dialuhon di bagasan tangiangna.

Marhite turpuk jamita on tasulingkiti ma dirohanta nunga songon dia sihol ni rohanta laho marsaor dohot Debata. Tahasiholi dope Debata disaluhut panggulmiton ni ngolunta, manang talehon dope tingkinta marsaor dohot Debata. Sada ciri ni halak na porsea sai dihalungunhon do marsaor tu Debata ala marhite parsaoran i do jumpang hita hagoon dohot las ni roha sian Debata. Laos songoni do parPsalmen dipatuduhon do parsaoranna dohot Debata rap dohot angka donganna sahaporseaon. Tung parsaoran na uli jala na dame do tutu na digombarhon di turpuk Jamita on. Antong asa sude ma hita mangharingkothon parsaoranta tu Debata asa taruli pasupasu hita dohot hagogoon na sian Debata. Amen.

Bahan diskusi :

1)      Boha do tutu molo ro tu hita sitaonon na mansai dokdok tu ise do hita mangalualu tu Debata do manang tu portibi on ?

2)      Aha do mambahen roha ni jolma di partingkian on lam sumurut manghasiholi parsaoranna dohot Debata ?

 

1.     Marende BE. No. 847:1+3

2.     Tangiang Sian Na ro

3.     Marende BE. No. 116:4

4.     Tangiang Sian Na Manjabui

5.     Papungu Pelean huhut marende BE. No. 316:1-2

6.     Tangiang 1anutup

 

 

Pdt. Luhut Marpaung, M.Th

Pendeta HKBP Resort Aek Loba

Jamita : ROM 5 : 1 - 5 Maningtinghon Taon Parasinirohaon Sian Jahowa

 

MINGGU TRINITATIS

15 JUNI 2025

1.      Marende BE. No. 561:1-2

2.      Votum : A.XIV.A - D.XII.35

3.      Epistle :  JESAYA 61 : 1 - 9

4.      Marende BE. No. 113:3-4

5.      Jamita : ROM 5 : 1 - 5

 

Maningtinghon Taon Parasinirohaon Sian Jahowa

 

Huria ni Tuhanta na hinaholongan di bagasan Jesus Kristus!

Mansai tangkas do disungguli turpuk on hita, paboa ndada ala ni pambahenanta umbahen na malua hita, alai ala asi ni roha ni Debata. Ndada ala ni hatigoranta umbahen na dipasintong hita, sandok ala ni haporseaonta do, naung binasabasahonNa tu hita. Hinorhon ni, ndang tarbahen hita mangasahon gogo dohot pingkiran laho pasintonghon jala paluahon dirinta. Dipatorang do andorang so turpuk on (Bindu 3) paboa halak pardosa do sude hita, ndang adong na tigor nanggo sada (Rom 3:10).

Sada sian godang na mambahen las rohanta dipambahenan ni Debata dibagasan Jesus Kristus, ima dipintori (Bah. Indo. Dibenarkan) hita. Pamintorion ni Debata on patubu hadameon di hita na manjalosa. Ingkon tangkas ma mian dibagasan rohanta, pamintorion ni Debata di hita pardosa on, ndada ala ni na kompromi Ibana maradophon angka dosanta. Ndang adong hadirion ni Debata na songon i, baliksa sai muruk do Debata marnida dosa. Alai marhite panghophoponNa i do pamintorion i, I ma hamamateNa di hau pinarsilang gabe malua hita sian dosanta. On do apala las ni roha ni Apostel Paulus dibagasan turpuk on, nang las ni rohanta na gabe manghorhon dame ni roha, pingkiran nang ngolunta (bnd. Kondisi orang yang telah dibebaskan, ditebus, dibayar hutangnya, maka demikianlah suasana batin penuh rasa syukur, sukacita dan damai). Diuduti Apostel Paulus do muse mandok di las ni roha na dipintori Debata taruli muse hita di asi ni rohaNa.

Aha do parbue ni pamintorionna tu haporseaon i? Parbue ni pamintorion i (pembenaran karena iman) ima mardame dohot Debata (hidup dalam damai sejahtera dengan Allah). Asa unang torop halak paburnangburnang dirina paboa angka na niulana. Alai marhite na tarsilang Kristus i, dilehon do di hita haluaon; dipintori jala dipadame hita dohot Debata. Dijou do hita mangolu dibagasan dame na sumurung i; ndang be mangolu mabiar mida rimas ni Debata alai gok dibagasan las ni roha na manongtong. Ngolu na mardame dohot Debata, ndada sada kondisi ni ngolu statis, baliksa sada ngolu na tongtong mengalami haimbaruon (pat. Gal.2:20 “Ndada ahu be na mangolu i nuaeng, Kristus do mangolu di bagasan ahu. . .). Halak naung mardame dohot Debata, I ma halak na matoras (bertumbuh) dibagasan habadiaon ni Debata. Halak naung mardame dohot Debata taruli hagogoon dibagasan dirina laho paimbaru diri. Ndang tarbahen hita mardame manang mian dame molo so jolo mardame hita dohot Debata. Laos i ma sibaritahononta tu humaliangta.

Sada na mansai balga dapot hita sian pamintorion ni Debata, ima manompa hita gabe halak na marpanghirimon. Hidup berpengharapan menghantar kita untuk tidak melihat segala sesuatu dari sesuatu dan mampu melihat sesuatu dari segala sesuatu. “Jala dihorhon habengeton ni roha i do hatauon, jala hatauon i do manghorhon panghirimon” (ay. 4). hata ‘dihorhon’ na dipangke Apostel Paulus mangajari hita marnida sesuatu ndang secara sempit, jala taida i, secara sudut pandang ni Debata, na umboto saluhut dohot na pargogo na so hatudosan. Panghirimon na sahat tu hita, na marharoroan sian pamintorion ni Debata di ngolunta, ima panghirimon na marojahan di asi ni roha ni Debata. Jala ndang murak hita (kita tidak akan kecewa) binahen ni panghirimon I ala nunga diusehon Debata dibagasn hita holong ni rohaNa, ima Tondi Parbadia, naung nilehonNa i tu hita.

Apostel Paulus manosoi ruas ni huria Rom asa margogo maradophon angka panosak ni na masa binahen ni panggomgomi dohot di huria (ada tekanan - penganiayaan). sian panggomgomi ima : na porsea di Tuhan asing ni Kaisar ingkon diuhum sahat tu na mate. Di situasi on ma Apostel Paulus mangapuli huhut margogoihon nasida, jala pabotohon tu saluhut na mangadopi hamaolon i, ingkon boi marlas ni roha ndang gabe putus asa manang kecewa, mandele. Ala marhite pandonganion ni Debata, dampak ni haporsuhon adong do nilai na denggan siputihon ima habengeton (ketekunan : semangat yang muncul terus-menerus untuk tidak mau kalah dengan kondisi hidup yang dialami). jala panghorhon ni habengeton i ma hatauon (tahan uji : lebih kuat atau labih baik. Jotjot dipangke laho menggombarhon kondisi ni logam naung diuji dohot api asa tarida logam na berkualitas na murni).

Marhite tema ni minggu Trinitatis on “Maningtinghon Taon Parasinirohaon Sian Jahowa” jumolo ma hita mangalapati partingkian dohot pambahenan ni Debata naung sahat tu hita ganup marsadasada asa sahat hita marnampunahon ngolu na mardame dohot Debata dohot ngolu na marpanghirimon i asa tuk hita maningtinghon  taon parasinirohaon sian Jahowa. Amen.

 

Bahan Diskusi :

1)      Torop dope halak na paburnangburnang diri paboa angka na niulana do umbahen dipintori Debata ibana.  Boha ianggo hita?

2)      Haporsuhon jotjot mambahen jolma i gale jala mandele. Boasa ingkon jumpang haporsuhon di ngolu ni halak na porsea?

 

6.     Marende            BE. No. 174:4

7.     Tangiang Sian Na ro

8.     Marende            BE. No. 112:2

9.     Tangiang Sian Na Manjabui

10.Papungu Pelean huhut marende BE. No. 16:1+6

11.Tangiang panutup