Jamita : Amos 8 : 1 – 12 MAMILLIT TOHAP NA UMMULI

                                                             MINGGU, 20 JULI 2025

Panitia Tahun Transformasi dan  Gotilon HKBP Kisaran Kota 2025

V DUNG TRINITATIS

 

1.    Marende       : BE No. 14 : 1 – 2 “PUJI HAMU JAHOWA TUTU”

2.    Votum          : A.XV. A5 – D.XIII. 42

3.    Epistel          : Lukas 10 : 38 – 42

4.    Marende       : BE No. 826 : 1 – 2  “GOHI AU TUHAN”

5.    Jamita               : Amos 8 : 1 – 12

 

MAMILLIT TOHAP NA UMMULI

 

1.  Dang boi buni keadilan, hasintongan i. Sai patar do I ditingkina. Sai dilului hasintongan I do dalanna. Kebenaran selalu mencari jalanya sendiri. Molo dietong jolma boi dibunihon hasintongan jala sai hira na olo mempermainkan hasintongan taingot ma:  Patar do saluhut angka na buni di tingkina. Ido nang pos ni rohanta tu Tuhani dibagasan ngolunta asa taula angka na denggan, na sintong dibagasan ngoluon.  Ala ni ima sai siula na sintong ma hita ala na mabiar hita tu Debata. Molo tung adong pe angka na di hita, huaso gogo, haadongon, hamaloon tapangke ma laho pajongjong lomo ni roha ni Debata. Ai hasintongan do lomo ni roha ni Debata, jala hasintongan I do manifestasi ni Debata di tongatonga ni pardalanan ni ngolu on. Taingot angka sejarah marhite ulaon ni Debata, di angka partingkion, luat, bangso hasintongan sai patar doi jala boido  taida iPanurirang Amos na sian huta Tekoa Israel , sahalak parmahan birubiru. Nang pe sahalak parmahan panurirang Amos on, alai sahalak panurirang na barani do ibana. Barani do ibana palumbahon uhum ni Debata tu tongatonga ni bangso Israel tu  kalangan istana, elit, tokoh, songon sikendalihon ngolu ni natorop. Diampehon do gelar ni panurirangonna songon : Singa na Mengaum . Singa na tung mansai gogo soarana mambahen humordit jolma manangihon uju mardalan di tombak. Songoni ma soara hapanuringon ni Panurirang Amos marhite lumbalumba sipasahatonna tu tongatonga ni bangsona. Boasa ingkon songon soara ni singa na mengaum ? Ai nunga dang diterge/tidak perduli di hata ni Debata. Molo dang parduli di hata ni Debata, tontu merajalela ma mangulahon angka dosa dohot hajahaton. Masa ma naso uhum, ketidakadilan, pemerasan. Dang adong be mangkuling holong marnida angka halak na dangol dohot na pogos. Lam pogos jala dangol ma angka na dangoli. Tung songoni ma nasib ni angka na dangol diperlakukan tidak adil dan tidak benar, laos so humuntal ma tano on taringot tu hajahaton na niula ni angka na mangulahonsa ( ay 8 ). Dang tarpahohom ni Debata hajahaton I mambaen dangol angka na dangol I, nuaeng dapot ma tingkina,. Ingkon uhumon ni Debata ma nasida. Ai ingkon marhite uhum songon singa yang mengaum do soara ni Debata marhite panurirang Amos asa tarsonggot jala tahutan nasida di angka dosa hajahaton na niula nasida. Sipata hira songoni do taida, taparrohahon, jolo masa angka na masa, baru pe adong perenungan di angka pangalaho na masa. Didok ma nunga diuhum Debata. Unang ma nian sanga  masa angka na na masa, panolsolion, alai lam manat ma dibagasan ngoluon.

2.  Memang ingkon jumpang do uhuman I, jala I ma na niida ni Panurirang Amos di pangkataionna dohot Debata. Diida keranjang na marisi parbue na malamun (buah yang sudah matang). Parbue na matang patuduhon : Jumpang ma tingkina pamasaon ni Debata ma uhum I tu angka dosa dohot hajahaton i. Dang pasombuon ni Debata be hajahaton na niula nasida mambaen penderitaan tu angka na pogos na mardangol i. Dosa dan kejahatan tidak akan menarinari di atas penderitaan orang miskin dan   orang yang melarat. Tung tangkas do I dipajojor Panurirang Amos   di ay 4-6 . Tung kejam do dosa yang tersembunyi, buni alai tangkas panginonana tu angka na metmet.

3.  Alai tung pardenggan basa jala siparasiroha do Tuhanta i. Tung hamubaon do diigil rohana sian bangso na hinaholonganNa i. Dang dipasombu dosa hajahaton I sai mangararati jala maghorhon tu angka penderitaan . Tangkas do keberpihakan ni Debata tu angka na pogos na mardangoli . Di ari na sasadai ninna Tuhan Jahowa : Sundut ma mataniari di hos ni ari, jala dipaholom Jahowa ma tano on arian. Ba dang na binoto be molo mangholom paortibion. Hari mendung,kelam,tangis,andung ima uhuman i. Dang adong na tahan molo manguhum Debata. Molo jumpang  ari raya, angka  ende las ni roha do angka ende disi, alai nuaeng ende andung nama ende nasida. Memang molo dipikiri bagas, ala ni angka hajahaton na masa, sotung masa be nian, marpamuati ma Jahowa tu angka dosa  i, jala muba ma sian angka hajahatonna be. Dilului jala mauas ma, dohot male di hata ni Debata. Roma tu Jesus roma tibu ninna hata ni buku endenta i.. Amen

Diskusi :

a)    Nunga tapaihutihut angka na masa dibagasan ngoluon. Taida jala taparrohahon do masa angka naso adil,naso sintong. Panghorhonna tu angka jolma na metmet. Aha ma pandapotta taringot tusi.

b)   Hea  do  taarsakhon  angka  naso  sintong,ketidakadilan  na  mengorbankan  angka  na metmet? Molo hea do, dipangido do asa bagian ni keadilan,hasintongani ngolunta. Dia dia ma patuduhononta i ?

6.    Marende : BE No. 467 : 1 – 2  “ASI NI ROHAM HUPUJI”

7.    Tangiang : Sian ruas na ro

8.    Marende : BE No. 435:1 “MAROLOPOLOP TONDINGKI”

9.    Tangiang : Sian na manjabui

10.  Marende : BE No. 672 : 1 … “TUNG GODANG SITUTU”    (Pelean)

11.  Tangiang Ale Amanami – Pasupasu.

Pdt. Sumihar Sihotang, S.Th.

(Pendeta HKBP Resort Tanjungbalai)

Jamita : Epesus 6 : 21 – 24 MANGHAHOLONGI DEBATA JALA MANANGIHON SOARANA

 MINGGU, 13 JULI 2025

IV DUNG TRINITATIS

 

1.    Marende       : BE No. 3 : 1 + 3 “PUJI JAHOWA ALE TONDINGKU”

2.    Votum          : A.XV.A.4 – D.XIII.41

3.    Epistel          : 5 Musa 30 : 15 – 20

4.    Marende       : BE No. 485 : 1 + 3 “DONGANI AU TUHAN”

5.    

Jamita            : Epesus 6 : 21 – 24

 

MANGHAHOLONGI DEBATA JALA MANANGIHON SOARANA

 

Turpuk na tajaha on, ima songon hata pangujungi surat ni apostel Paulus mandapothon huria Epesus na marisihon taringot tu si Titikus dohot hata pasupasu. Buku Epesus on disurathon Paulus na tongon di hurungan, alani ima disuru ma si Tikikus on laho pasahathon surat Epesus on huhut pabotohon tu huria Epesus songon dia keadaan ni apostel Paulus. Adong ma 2 hal na arga boi putihonta sian turpuk on:

1.      Haposan diparsuruon

Molo pola dihaposi apostel Paulus suratna asa diboan si Titikus, nungga gabe sada tanda on na mandok ia si Titikus on ima sahalak na haposan. Jala dang holan siboan surat ibana, ala ditongos do nang si Titikus on paboahon keadaan ni apostel Paulus huhut mangapuli roha ni huria Epesus. Asa gabe tiruan ma si Titikus on dibagasan pargoluanta, asa boi hita gabe sahalak na haposan di ulaon, di hata dohot pambahenan. Molo tajalo sada ulaon manang parsuruon, ingkon rajumanta do on songon kepercayaan sasahalak tu hita laho maniop sada ulaon. Tontu ingkon taargahon do kepercayaan na dipasahat tu hita. Tarlumobi ma muse molo gabe haposan hita di Tuhan i. Aha na dipercayahon Tuhan i di hita boi taulahon dohot denggan. Boi do tohonan di panghobasion di huria, ulaon siganup ari, keluarga manang arta pe. Molo parhalado do hita, sahat ma ta ula tohonanta i hombar tu parsuruon na sahat tu hita, unang asal na tajalo tohonan alai dang taulahon manang gabe asing parulaonta sian poda tohonan na sahat tu hita. Songon i do nang parkarejoanta siganup ari, ndada holan dalan mangalului na ringkot dipargoluanta siganup ari i, alai ingkon rajumanta do i songon panjouon na sahat tu hita sian Debata na ingkon taulahon sadenggandengganna na hombar tu lomo ni roha ni Debata, jala boi gabe pasupasu hita tu saluhut halak marhite ulaonta i. Sasudena na tarajumi do na dihaposi Tuhan i hita laho mangulahon manang manjalo i. Alani i, ingkon patuduhononta ma tu Tuhan i dibagasan pargoluonta dirinta gabe ‘naposo na haposan’ di Tuhan i.  

 

 

2.      Sintong manghaholongi Tuhan i

Ditangiangkon apostel Paulus do huria Epesus asa dipatau nasida songon naung manghaporseai Tuhan Jesus. Tarida ma i sian dame, holong ni roha dohot haporseaon na togu. Halak na sintong manghaholongi Debata ingkon tarida ma i sian parngoluanna dang holan di hata. Songon dia hita manghaholongi Tuhan i, idaonNa do i sian parguluanta na patar boi idaonni Tuhan i. Di ayat 24 dipatuduhon ma tu hita songon dia hadomuan ni asi ni roha ni Debata (kasih karunia/anugerah) dohot na manghaholongi Tuhan i. Asa tung tarbahen hita manghaholongi Tuhan i ima molo tarajumi do bagasan ngolunta songon dia balga ni asi dohot holong ni roha ni Tuhan i tu hita. Asa unang tu hamatean hita, dilehon Tuhan i do diriNa mate tarsilang pasaehon utang ni dosanta na godang i, sai diparmahani Tuhan i do ngolunta gabe rade di hita angka na ringkot di parngoluan siganup ari, sai di ramoti Tuhan i daging nang tondinta, dilehon dope hita hosa hangoluan, sasude na asi ni roha ni Debata do i, jala godang dope na so habilanganta asi ni roha ni Tuhan i naung tajalo dingolunta. Molo tarajumi do godang ni asi ni roha ni Debata naung tajalo di ngolunta, balga ma nang holong ni rohanta tu Tuhan i.

Dipatuduhon ma tu hita di turpuk on, songon dia do tanda na holong ni rohanta tu Tuhan i (ayat 23):

a.       Dame (damai sejahtera/shalom)  

Angka halak na porsea tu Tuhan Jesus Kristus ingkon do patuduhon dirina songon halak siboan dame songon Tuhan Jesus na mamboan dame tu portibi on. Asa diparsaoranta siganup ari, dao ma sian hita na digoari “sumber konflik” manang “sumber masalah”, alai ingkon baliksa ma, ima hajongjonganta boi padamehon, pasadahon dohot gabe “sumber solusi”.

b.      Holong ni roha (Kasih) raphon Haporseaon (Iman)

Dipatuduhon apostel Paulus do diturpuk on hasadaon ni holong dohot haporseaon na so boi sirangon. Songon na nidok ni Tuhan Jesus na tarsurat di Johanes 13: 34 “Naeng ma marsihaholongan hamu, songon holong ni rohangKu di hamu”. Asa songon Tuhan Jesus na mangusehon balga ni holongNa tu hita jolma pardosa, songon i do ma nang holongta tu saluhut halak. Songon na tarsurat di 1 Johannes 4: 8 “Halak na so marholong ni roha, ido na so tumanda Debata, ai haholongon do Debata”. Jadi, dang situtu hita marhaporseaon tu Tuhan Jesus molo so parholong ni roha hita.

Molo mulak hita mamereng tu pudi dipardalanan ni nglunta, tontu nungga godang ragam pasupasu naung dipasahat Tuhanta di ngolunta. Sasude na i, nungga ingkon mangonjar rohanta manghaholongi Tuhan i. Alani, tanda na holong rohanta tu Tuhan i, patuduhononta ma dirinta songon sahalak na haposan di Tuhan i dohot manghangoluhon holong na sian Tuhan i. Amen

 

Diskusi:

a.       Adong do pengalaman hidup na songon dia ma na tarajumi songon asi ni roha ni Debata?

b.      Berbagi pengalaman hidup: pengalaman hidup na songon dia ma na tarajumi songon asi ni roha ni Debata na gabe paubahon ngolunta na tu lam dengganna?

6.    Marende : BE No. 666 : 1 + 3  “INGKON DO BOANONTA BARITA”

7.    Tangiang : sian ruas na ro

8.    Marende : BE No. 247 : 1 – 2  “SAI HEHE MA HAMUNA”

9.    Tangiang : sian na manjabui

10.  Marende : BE No. 758 : 1 – 2  “JAHOWA PANGURUPI”   (Pelean)

11.  Tangiang Ale Amanami – Pasupasu

 

 

 

 

Pdt. Porisman Lubis, M.Th

(Sekretaris Distrik XIII Asahan Labuhan Batu)

Jamita : Jesaya 66 : 10 – 14 GABE TINOMPA NA IMBARU

                                            MINGGU, 06 JULI 2025

III DUNG TRINITATIS

 

1.    Marende       : BE No. 125 : 1 – 2   “MARLAS NI ROHA HITA ON”

2.    Votum          : A.XV.3 – D.XIII.38

3.    Epistel          : Galatia 6 : 11 – 18

4.    Marende       : BE No. 142 : 1  “PARARAT MA BARITAMI”

5.    Jamita            : Jesaya 66 : 10 – 14

 

GABE TINOMPA NA IMBARU

 

Buku Panurirang Jesaya on diujungi marhite hata bagabaga sian Debata laho mangapuli bangso Israel na manaon na hansit alani habuangan. Ro do hata ni Debata tu bangso i asa marlas ni roha jala marolopolop ala paluaon ni Debata ma bangso i sian parungkilonna. Molo pe ingkon manaon parungkilon nasida di habuangan ala ni hajahaton nasida, alai adong do tingkina Debata paluahon nasida sian parungkilonna, ala tung na so jadi halupahonon ni Debata bangsoNa di angka na sai tongtong marholong ni roha di Debata. Dung ro tingkina, tompaon ni Debata ma Jerusalem na imbaru (65:17-19) Asa gabe marlas ni roha jala marolopolop ma muse angka na pinalua ni Debata. Marhite haluaon na sian Tuhan Jesus Kristus, nungga dipatulus Debata be bagabaga haluaon i di angka na porsea tu Tuhan Jesus. Nuaeng hita angka na porsea di Tuhan Jesus Kristus ima angka  naung tinompa na imbaru, dipatuduhon ma tu hita marhite turpuk on, songon dia ma hita songon halak naung na imbaru dibagasan Jesus Kristus:

1.      Ngolu na marlas ni roha

Na gabe dasor halak na porsea tu Debata laho marlas ni roha dibagasan ngoluna ndada alani keadaan, alai ala taboto na adong do Debata na sai tongtong mangaramoti ngolunta. Sian Debata do haroroan ni pasupasu dohot na denggan di bagasan ngolu on songon batang aek godangna jala songon sunge na sirnip (ay.12). Alani i, halak na sai tongtong marpanghirimon tu Debata sai manahan do i diparungkilon, dang loason na parungkilon i mangambati las ni rohana mandalani ngoluna. Adong do pos ni roha di angka halak na porsea tu Debata paboa dang adong na so tarpatupa Debata. Di halak naung porsea di Tuhan Jesus, dang adong putus asa/kehilangan harapan, ala sai adong do dalan ni Debata laho paluahon angka na porsea tu Ibana.

2.      Songon ina na mangapuli ianakhonna

Dipabotohon ma tu bangso Israel paboa tung so dihalupahon Tuhan ido nasida na digombarhon songon holong ni sahalak ina tu ianakhonna. Na ingkon jagaon jala ramotan ni sahalak ina do ianakhonna, abingonna jala didengdidengonna diampuanna. Songon na tarsurat di Jesaya 49: 15 “Tung tarhalupahon inaina ma posoposona, so asi rohana mida anak tinubuhonna i? Tung sura pe tarhalupahon nasida, ianggo ahu laos so halupahononku do ho.” Kasih keibuan Allah (“kamu akan menyusu, akan digendong, akan dibelai-belai di pangkuan” – ay. 12) diungkapkan dalam nas ini memberikan kita pesan yang sangat kuat tentang bagaimana kasih dan perhatian Allah dalam keterbatasan kita manusia. Molo marsahit sada dakdanak/posoposo lobi sian na tinaonni ianakhonna i panghilalaan ni ina na manubuhonna. Songon i ma nang Debata, lobi sian hansit na tinaon ni bangso na i na tinaon ni Debata, jala dang pasombuon ni Debata bangsoNa manaon na hansit, ala marhuaso do Debata mangurupi hita ruar sian parungkilonnta. Alani i ma, molo tataon pe na porsuk dingolunta on, taingot ma adong do Debata dilambungta laho mangapuli dohot pasonangkon rohanta dohot na mangurupi hita, dang pasombuon ni Tuhan i hita sai tumatangis alani parungkilon i. 

3.      Martumbur songon ingkau rata

Hita angka na tinompa na imbaru dibagasan Jesus Kristus, ingkon tanda ma tangan ni Jahowa naung paluahon hita. Ima marhite parange dohot pambahenta na denggan. Ingkon martumbur sahat tu na marparbue ma haporseaon naung tajalo sian Tuhan Jesus. Tandaon ni portibion ma hita siihuthon Kristus sian parange dohot pambahenan na marojahan tu holong na niajarhon Kristus tu hita.

 

Diskusi:

a.       Sian hatorangan ni turpuk on, songon dia ma tanda ni halak naung tinompa na imbaru di bagasan Jesus Kristus

b.      Nunga termasuk hita gabe imbaru dibagasan Kristus?

6.    Marende       : BE No. 763 : 1 “MOLO JESUS DONGANMI”

7.    Tangiang            : Sian ruas na ro

8.    Marende       : BE No. 385 : 2 “DIJOUHON JESUS RO HAMU”

9.    Tangiang            : Sian na manjabui

10.  Marende       : BE No. 713 : 1 … “TOGU AU O TUHANHI”    (Pelean)

11.  Tangiang Ale Amanami – Pasupasu.

 

 

 

 

 

Pdt. Sampur Manullang S.Th

(Praeses HKBP Distrik XIII Asahan Labuhan Batu)

BAHAN SERMON MINGGU PASKAH I (20 April 2025) TOPIK : INGKON HEHE IBANA SIAN NA MATE (YESUS BANGKIT DARI ANTARA ORANG MATI) Ev : Johannes 20 : 1-10 Ep : Psalmen 115 : 9-1

 

BAHAN SERMON MINGGU PASKAH I (20 April 2025)

TOPIK : INGKON HEHE IBANA SIAN NA MATE

(YESUS BANGKIT DARI ANTARA ORANG MATI)

Ev : Johannes 20 : 1-10                                                                     Ep : Psalmen 115 : 9-1

I.                   Pendahuluan

                     Paskah ima pesta na tumua di halak Kristen. Didok Paus Leo (440-461) mandok ringkot ni ulaon Paskah umbahen na didok festum festorum-perayaan dari semua perayaan.

                     Di Padan Na Robi dohot di Padan Na Imbaru, hata “Paskah” adong didok 80 kali, manggombarhon hinaringkot ni pesta Paskah di ibadah ni Israel Kuno dohot di ibadah di partingkian on. Piga-piga hata na dipake mandok paskah ima, di Bahasa Latin páscha, Yunani : paskha, Bahasa Aram: pasha, Bahasa Ibrani: pesah jala di Bahasa Inggris: Passover, na marlapatan manalpuho (melewatkan). Adong do muse tradisi na dienet sian mitologi Yunani na mandok easter. Di Israel, pesta paskah ima ari parningotan na haluaon nasida sian parhatobanon Mesir, alai nuaeng hita mamestahon ni Tuhan Jesus Kristus na paluahon hita sian hamatean marhite haheheon ni Yesus na manaluhon huaso ni hamatean (dosa).

            Di dasar ni par-Mingguon nian adong do muatan ni pesta Paskah. Ala sai dipaingot do hita laho manghamauliatehon holong ni Debata na mansai balga laho paluahon hita sian hamatean alani dosa, ala holong ni rohaNa tu saluhut na tinompa. Alani  Paskah ima ari haheheon ni Tuhan Jesus. Marningot na monang do Jesus Kristus manaluhon dosa dohot hamatean, Jala on ma na gabe dasor haporseaon ni Halak Kristen. Songon na tarsurat di 1 Korint 15: 14, “Ai anggo so hehe Kristus sian angka na mate, rumar ma jamita nami, laos rumar ma nang haporseaonmuna”.

II.                Hatorangan

                     Maria Magdalena, na secara harafiah didok Maria Magdalena siala na ro sian Magdala, huta ni parjala (sibuat dekke). Di Lukas 8: 2-3 dipatorang ia si Maria Magdalena ima sada sian parompuan na dohot mangurupi panghobasion ni Jesus marhite hamoraon na. Ibana sahalak parompuan Jahudi na satia mangihuthon Jesus.  Dipatorang do muse na dipalao (diusir) Jesus pitu tondi (roh jahat) sian si Maria Magdalena.

            Ro ma si Maria Magdalena sogot di na holom i dope tu tanoman i, jadi diida ma naung dihindat batu sian tanoman i na dirippu ibana nunga dibuat halak Tuhan i sian tanoman. Marlojong ma ibana manopot si Petrus dohot siscan na sada nari paboahon na masa i. Jadi borhat ma si Petrus dohot sisean na sada nari tu tanoman i jala tong dang be di ida Tuhan i disi. Gabe gok halongangan ma rohanasida jala tahuton. Alai disi ma unokia, naung dipabalik Tuhan i lapatanni hamatean. Apa yang dulu diangggap sebagai akhir yang menakutkan, nuaeng marhite Haheheon ni Jesus gabe dalan laho bongot tu hangoluan na imbaru. Marhite Jesus, hamatean dang gabe ujung ni saluhutna, alal gabe parmulaan ni ngolu haimbaruon.

Dosa do na mamboan jolma tu hamatean. Hamatean bongot tu portibion alani pemberontakan ni jolma maradophon Debata. Dosa mambahen jolma tarsirang sian Mual ni Hangoluan. Panghorhon i dosa, ima hamatean na ingkon jaloonta. Ro ma Jesus menanggung saluhutna dosa i di hau pinarsilang jala diboan tu hamatean. Dung Hebe ibana, angka dosanta i ditadinghon, terkubur salelengna.

 

Songon na didok Apostel Paulus di 1. Korint 15:55 “Jo hamatean, didia hamonanganmi? Jo hamatean, didia soropmi? Pandohan on, dang holan ungkapan hamonangan ni Jesus, alai dohot do hamonanganta na porsea di Ibana. Marhite haheheonNa, ditaluhon Jesus do dosa dohot hamateanta. Kubur kosong gabe tanda, ia manang aha pe na tahabiari, hamatean nang basalaan, dang be marhuaso tu angka naporsea. Di tingki diida si Maria Magdalena tanoman i, responna parjolo dang na marlas ni roha. Dang manigor mangantusi ibana ia naung Hehe Jesus i. baliksa, dirippu ibana na dibuat halak do bangke ni Jesus. Songoni nang si Petrus dohot sisaean na sada nari, dang diantusi dope dohot denggan na masa i. Disurat si Johannes ia Jesus ingkon hehe Ibana sian na mate Joh 20:9. Reaksi ni si Maria dohot si Petrus manggombarhon kekhawatiran dohot ketidakpastian di ganup jolma. Sipata, di tingki taadopi angka hasusaan na so hasuhatan ni pingkiranta, responta parjolo ima khawatir manang gabe tahuton. Alai, dang na gabe i ujung ni cerita. Disurathon si Johannes do di turpuk on ia sisean na sada nari marnida gabe porsea 20:8. Atik pe dang singkop pangantusionna tu na masa i, mulai tubu haporseaon dibagasan rohana. Songon sahalak dakdanak na marsiajar mardalan do proses ni haporseaon i. jotjot madabu, alai adong dorongan na mambahen bangkit dohot mangulahon marulak-ulak, gabe boi mardalan.

Haporseaon i dang selalu siat di pingkiran, bahkan jotjot tubu di tonga-tonga ketidakpastian. Ditingki humaliangta dang be bersahabat jala dang taboto aha do na naeng bahenon ni Debata, disi ma haporseaonta di uji jala dipargogoi. Laos gabe on ma tona Barita Na Uli, bahwa sekalipun kita berada di tengah kebingungan Tuhan sedang bekerja dan iman kita sedang dipupuk. Jotjot do hita naeng mangalapati jumolo saluhut na masa andorang so porsea. Alai kisah Maria Magdalena patuduhon ia haporseaon jotjot mangalumbahon pangantusion, Anselmus “Fides Quaerens Intelectum” (Iman Mencari Pengertian). Dang ingkon tapaima asa jumolo tangkas dungi  porsea hita tu Tuhan. Haheheon ni Jesus mangontang hita asa porsea di Ibana, atik pe dang singkop hita mangantusi songon dia Ibana mangula dibagasan ngolunta. Rom 6:4 mandok “Antong, naung tartanom do hita rap dohot Ibana marhitehite pandidion i tu bagasan hamatean, asa marparange hita di bagasan ngolu na imbaru, songon Kristus naung hehe sian angka naung mate hinorhon ni hasangapon ni Amana”. Songoni ma nang hita ingkon mangolu dibagasan haimbaruon. Ngolu na imbaru ima ngolu na diuluhon Tondi Parbadia. Dang be dibagasan hatoban ni dosa hita. Di ngolu siganup ari, tontu taadopi dope angka godaan dohot tantangan, alai ngolunta na imbaru nuaeng marurathon di bagasan Asi ni Roha ni Debata. Haheheon i mangalehon hita kesempatan untuk memulai Kernbali setiap hari dengan sukacita yang baru.

III. Panutup

Dibagasan haheheon ni Jesus do adong panghirimon na mangolu, hadirionNa tuk paubahon ganup situasi. Sian na kosong gabe gok, sian na mate gabe mangolu. Alani i, talangkahon ma dibagasan ngolunta na imbaru on mardongan haporseaon na togu, pos roha ia Tuhan I naung manaluhon dosanta dohot hamateanta. Kristus naung hehe, hita pe rap hehe dohot Ibana.

EVANGGELIUM MINGGU PALMARUM (13 APRIL 2025), PSALMEN 68 : 25 - 36 LEHON HAMU MA HAHORMATON TU DEBATA

 

BAHAN SERMON HKBP DISTRIK XIII ASAHAN LABUHAN BATU

EVANGGELIUM MINGGU PALMARUM

(13 APRIL 2025), PSALMEN 68 : 25 - 36

LEHON HAMU MA HAHORMATON TU DEBATA

 

I.     Pamuhai

Adong do ende na mandok “Na sonang au dung na mar Tuhan”. Ende i naung patuduhon, dung na mar Tuhan ahu, dilehon di ahu angka na pinangido ni rohangku, jala lumobi sian i dilehon hamonangan di ahu maradophon manang aha pe. Jadi sonang do au dung na mar-Tuhan. Songoni do gombaran ni turpuk on. Sada gombaran las ni roha ni bangso i na ro Debata di tongatonga nasida, jala na tongtong Debata mandongani nasida, jala marhite i dapotan nasida angka hamonangan. Hamonangan ni Debata maradophon huaso manang hagogoon ni portibi on, songoni nang angka debata na asing. Debata na mangatasi saluhutna.

 

Turpuk on, ima Ende las ni roha alani hamonangan na pinasahat ni Debata, na nilehon ni Debata tu nasida, jala saor nasida rap dohot Debata di tongatonga ni sada parpunguan Pesta na bolon, jala adong di si simbol kehadiran Tuhan (poti parpadanan). Ende pamujion mangolophon Debata na gabe Raja Sasadasa di Jerusalem (Psalmen 24:76, 97-99, Panguhum 4:12, 5:13).

 

II. Hatorangan ni Turpuk

 

a.  Ayat 25-28

Di pesta las ni roha i, manggombarhon pawai kemenangan. Jala bangso ni Debata na manomunomu jala marnida Debata mamongoti bagas habadiaonNa.  Ala diakui nasida, Debata do na mambahen nasida dapotan hamonangan. Disi ma hira na diida nasida bongot Debata tu JoroNa di Jerusalem. Sude manomunomu marhite olopolop dohot suraksurak.  Mardalan ma dijolo angka parende, di pudina parsarune na mamalu doal. Jala sude mangendehon ” Pinuji ma Debata di bagasan luhutan”. Angka na marbaju marende dohot mamalu odap mamuji Debata, songoni nang si Miryam iboto ni Musa dohot Aron, rap dohot donganna na marende di topi ni laut Arung (2 Mus. 15:20, 2 Sam. 6:5). Ende ni angka parompuan i, mansoarahon asa sandok angka na sian mual ni Israel mamuji Debata. Mual ni Israel lapatanna angka jolma na marharoroan sian pinompar ni si Jakob, di goari ma dua marga Israel Selatan i ma sian marga Benjamin, i ma marga ni raja Saul dohot Jehuda i marga ni raja Daud, jala dua marga Israel Utara, i ma Sebulon dohot Naptali.

 

Di tingki Raja Saul dohot Raja Daud di Israel, godang do hamonangan ni Israel maralohon bangso na asing. Songoni nang Sebulon dohot Naptali tarbarita do hasurunganna rade sumeahon hosana tu hamatean laho mangadopi angka musu nasida asa dapot hamonangan (Panguhum 5:18). Sian opat marga i gombaran ni hamonangan maralohon musu, tarsongon hamonangan ni Debata maralohon saluhut huaso na di portibi on.

 

b. Ayat 29-30

Di si ma nasida tongtong pasahat panghirimonnasida tu Debata. Hibul do soara nasida manjouhon : “ Sai pargogoi ma ale Debata na pinatupam tu hami – Kerahkanlah kekuatanMu ya Allah, tunjukkanlah kekuatanMu ya Allah, engkau yang telah bertindak bagi kami ”. Marhite i ma tangkas pangidoannasida, asa tong di patudu Debata hagogoonNa, asa lam marhamonangan nasida. Laos sada pos ni roha do i di nasida, paboa tung na so mabiar do nasida mangadopi musu dohot situasi dia pe, saleleng Ibana na mandongani nasida. Jala diparhatopot nasida do, tung Debata na sun gogo jala marmulia do Jahowa. Alani i dihaporseai nasida do, ingkon sude bangso marsomba jala pasahat silehonlehonna tu Debata.

 

 

c. Ayat 31-32

Udut ni tangiang ni bangso Israel dipangido do asa disonggahi Debata angka buea (dikiaskan sebagai binatang buaya di muara Sungai Nil-Teberau), i ma gombaran ni huaso dohot hagogoon ni bangso Misir na boi mangancam Jerusalem. Jala bangso Israel di sada tingki, ingkon ditanda jala ro marsomba huhut pasahat pelean bangso Misir tu Debata, songon i halak Kus ingkon ro marsomba tu Debata (Jes.19: 21, Sep. 3:10, Psalm 87:4).

 

d. Ayat 33-36

Paboaboa hamu ma di tongatonga ni angka parbegu: Jahowa do raja! Hot ma antong portibi on, ndang tagamon humordit, uhumonna ma sogot angka bangso di bagasan hatigoran (Psalm 96:10). On ma sai tongtong lohot di roha ni halak Israel. Ditogihon parpsalmen do sude angka harajaon na di portibi on mamuji Tuhan jala mangalehon hahormaton tu Debata. Debata ima Raja di saluhut bangso na di portibion, talup do pamujion dohot hahormaton pasahaton tu Debata, ai hamuliaonNa do gumomgom Israel, jala di banua ginjang sahali do hagogoonna. Songkal do Debata (Dahsyat) ro sian inganan angka na badia, Debata ni Israel do Ibana silehon hagogoon dohot hamuliaon tu bangsoNa i. 

 

III. Panimpuli

·        Turpuk on manggombarhon sude bangso i dohot di bagasan sada arak-arakan laho mangendehon hasangapon ni Debata, hamonangan na sian Debata. Menyanyikan kehadiran Tuhan di tengah-tengah umatNya. Songon gombaran ni parmingguonta di na marsaor hita dohot Debata, pajumpang dohot Debata marhitehite pamujionta, tangiangta dohot hata ni Debata na tatangihon, disi ma godang dapot hita pasupasu, hasesaan ni Dosa, hagogoon di na mangadopi ngolu siganup ari dohot hamonangan maradophon saluhut angka tantangan na masa.

 

·        Turpuk jamita di minggu palmarum on ima manomunomu parningotan ari hamamate dohot haheheon ni Tuhan Jesus. Naeng ma nian sipatupaonni angka na porsea asa tangkas mamujimuji Debata naung mangalehon angka hamonangan di hita, na mangalehon pangurupion tu hita. Paposhon rohanta asa tung unang mabiar hita mangadopi parporangan rohani nang tantangan portibi on. Jala sai tajouhon ma di rohanta joujou dohot suraksurak ” Hosana, Hosana ” palua ma hami nuaeng, jala pargogoi ma ale Debata na pinatupam tu hami.

 

·        Tontu hamonangan ni Debata di Padan Narobi songon na tarsurat di turpuk tarida do i marhitehite Tuhan Jesus Kristus. Di epistel minggu on mansai ampit do berengonta keteladanan ni Jesus uju na hundul Ibana di atas halode mamongoti Jerusalem uju masa pesta paska Jahudi. Laos i do gombaran tu parsuruanta do i ima mamboan hadameon di tongatonga ni portibi na gok partontangan on. Asa angka siboan dame halak Kristen i di ganup inganan dohot tu ise pe marsaor.

 

·        Marlas ni roha do bangso Israel ala hagogon dohot hamonangan ni Debata Jahowa, tanda ni las ni roha i ima marhite na mangelehon hahormatan tu Debata. Boha do rumang ni hahormatan i ima marhite ngolunta na tongtong di bagasan lomo ni roha ni Debata, manjaga hamuliaonNa di ngolunta.