Topik : Saluhut do Diramoti Debata. Ev : 1 Musa 21:8-21

 

Bahan sermon HKBP  Resort Agape, Pangkalan Kerinci

Minggu III Dung Trinitatis

21 Juni 2026

Ev : 1 Musa 21:8-21                                                                         Ep: Mateus 6:25-34

Topik : Saluhut do Diramoti Debata

FOTO : PEMBEKALAN PARHALADO RESORT AGAPE PANGKALAN KERINCI

I.            Patujolo

Ndang  mansohot nasa parukilon sian ngolu ni jolma, ndang mansohot nang ilu-ilu haruar sian simalolong molo masa tutu  parukilon bolon i, ndang mansohot nang bada bada di tonga ni rumah tangga, alai ringkot do tong di bagasan haporseaon jolma I mandok, ndang mansohot nang asi ni roha ni Debata di angka na porsea di Ibana, di angka na sai pajoujou goarNa. Ido na masa di turpuk 1 Musa 21:8-21 on mamungka sian sada pesta na mansai balga na dipatupa si Abraham tu si si Isak ditingki disapih (sirang susu). Luhut halak marlas ni roha, nunga gok sipanganon dohot parengkelon, alai masa ma parsalisian dohot arsak ni roha, dohot ulaon na pabalihon di ujungna.

II Hatorangan Ni Turpuk

1. Parsalisian dohot Pabalihon (Ayat 8-14)

Pesta na balga masa di jabu ni si Abraham ala nunga sirang susu (disapih) si Isak (anak parpadanan) na tubu sian si Sara. Alai di bagasan pesta i, diida si Sara ma si Ismael (anak ni si Hagar, naposo boruboru sian tano Misir), adong parnidaan na mambahen sogo roha ni si Sara. Diida ma si Ismael mangarehei si Isak. Di bagasan hata Ibrani “ metzachek “. Lapatanna : mengejek, manginsahi,  (intimidasi/bullying) ala nunga lobi matua si Ismael sian si Isak. Sian i, tubu ma rimas ni si Sara, gabe didok ma tu si Abraham asa dipabali si Hagar dohot anakna i. alai di bagasan roha na marsak do si Abraham laho mangoloi pansuruon ni si Sara (ayat 11), alai didok Debata tu ibana asa ditangihon hata ni si Sara, ala sian si Isak do sipasahatonNa pinomparna, alai nang si Ismael pe bahenon ni Debata do gabe sada  bangso .  Boi idaonta  Debata ro mangalehon dalan na so hapingkiran ni jolma di tonga tonga ni na masa  parsalisian di rumatangga ni si Abraham. Laos  tong do dipapos Debata roha ni si Abraham, laho pabalihon si Ismail dohot inanai dibagabagahon Debata do  jongjong sada bangso muse sian si Ismail. Debata marhuaso mangaturhon pardalanan ni ngolu  na gok parbadaan  gabe mardalan di bagasan sangkap hasonangan. Si Abraham patuduhon haporseaon na mangoloi hata ni Debata, gabe dipaborhat ma si Hagar dohot si Ismael pasauthon pansuruon ni Debata. Songon halak na porsea si Abraham tumimbo do di ibana haunduhon tu Debata, sian holong ni rohana tu anakna si Ismail.

2. Haroroan ni Arsak  (Ayat 15-19)

Laho ma si Hagar mamboan anakna si Ismael tu halongonan Berseba, jadi dung suda aek na di bagasan tabutabu i, gabe lilu ma nasida, jala mampar ma roha ni si Hagar.  Tubu ma roha na mandate di ngolu ni si Hagar. Suda bohal , suda gogo, jala sahat tu na mandele situtu si Hagar Alani na masa i. ndada tarpaidaida ni si Hagar anakhon na mate dibagasan na so adong si inumonna (kehausan), gabe dipeakkon ma si Ismael di toru ni ramba jala mardalan ibana dao (sansinior, lobi hurang 100 meter). Hundul ibana jala tumatangis, patuduhon hagaleon dohot roha na mandate  na mansai bagas, ala ndang tarpaidaidasa mate anaknai di bagasan na anturaparon. Tumatangis ma si Hagar ihut dipangiar soarana. Disituasi namansai maol si sosongoni ditingki dang adong be panghirimon laho mangolu,  ditingki  dang  adong  be  na  boi  mangurupi,  rodo  Debata  mandok  tu nasida “ unang ho mabiar” (ay.17)    Pandohan unang ho mabiar dibahasa ibrani didok “Altirah” namarlapatan “mangotang habaranion”, pandohan on  paposhon roha di angka na gale naung mandele naung gotap di panghirimon. Alai pandohan I patubuhon las  niroha di panghirimon ni nasida, Hadirion  ni jolmai  do  parjolo di pature Debata songon namasa tu si  Hagar, songon  ilmu psikologi  mental do parjolo di pature baru pe tu fisik. Didok do nunga ditangihon Debata soara ni dakdaknak I, jala di uduti muse di patupa Debata do halongangan dinasida di pataridahon  do  tunasida  mual  laho  manggohi  tabutabu  nasida,     asa  adong  si inumon ni anakhon nai (ay 19) diparade Debata do dinasida aha     naringkot dipargoluaanna (secara fisik) ima marhite pataridahon mual,    Mual Aek ditonga haholongonan Beer  Seba ( padang Gurun) pinatudu ni  Debata ndang holan  aek sambing, alai gabe symbol ningolu na imbaru doi, Patubuhon panghirimon, patuduhon hangoluan ditongatonga ni Hamaolon.

Tarida do dison Panarihonon ni Debata di nasida, dang holan di partondionna, alai dohot do di pamatangna, dang mardia imbar panarihonon ni Debata tu sarah manang na si Hagar, tu Si Isak manang na tu Ismael, atik pe holan hatoban do nasida, jala halak Misir tontong do disarihon Debata. Molo jolma donganna do di haholongi, dang dohot musuna, alai ia Debata dang si ida bohi, najahat na burju dihaholongi do, Didok do di Mateus 5: 45 ” Parasi roha do Debata, Ai di pabinsar do mata ni arina tu angka parroha na jahat nang tu nabonar, diparo do udan tu parroha na tigor dohot na geduk”. Jala dipataridahon doi muse Marhite Anakna Jesus Kristus (Yoh 3: 16)

3.   Sarihonon ni Debata ngolu ni Jolma di ari Marsogot (Masa Depan) (20 -21)

Molo Jolma mangurupi donganna boi do taretong  piga hali urupanna, jala boi do mansohot (terbatas). Songon si Abraham maradophon si Ismael dohot si Hagar, Pangurupion ni Debata tu si Hagar dohot tu si Ismael dang songoni jala dang holan sahali, ta ida ma pangurupion ni Debata ndada holan  na patupahon Mual Aek di halongonan ( padang Gurun), dohot do muse  sahat  tu ari marsogot (tidak terbatas) panarihonon ni Debata, songon si Ismael sahat tu namagodang jala marpinompari (ay 20). Di tongatonga ni hahurangan ro do Debata paturehon ngolu ni si Hagar dohot si Ismael.  

 

III. PANIMPULI

1.     Pos  ma  rohanta  Disarihon  Debata  do  ngolunta.     Songon namasa tu si Ismael dohot tu si Hagar, ditingki mandele, mago panghirimon nasida  ala  nunga  habis  be  sipanganon  dohot  sinumon  jala  dang  adong namangurupi nasida, ro do Debata manarihon nasida sian naso panagaman. Songoni do nang dihita boi do gabe ragu hita di parngoluanta sogot ala ni sipanganon/sinamot tu ari marsogot dang adong be, Alai pos ma rohanta, di pataridahon Tuhan I do angka dalan di nalaho mandalani na maol i

2.Ditongatonga  ni  parngoluanta  jotjot  do  tapatupa  lomo  ni  rohanta  hape dang lomo ni roha ni Tuhan i.Dipaingot  do  hita  marhite  turpuk  on,  Asa jumolo lomo  ni  roha  ni  Tuhan  I  do natapatujolo di ngolunta siganup ari. Amen

                                                                                                                                                                         Gr. Leonardo Saragi. S.Pd.K

 

 

 

Evangelium : Galatia 2 : 15-21 “DIPINTORI ALA HAPORSEAON”

 

 Jamita Tu Minggu  II Dung Trinitatis ,

14 JUNI 2026

Evangelium : Galatia 2 : 15-21

“DIPINTORI ALA HAPORSEAON”

============================================================

Patujolo

 Marhite situasi (konteks sejarah) boi ma ummura antusanta laho mangantusi turpuk on. Surat Galatia 2:15- 21 on, masa do krisis teologis dohot sosial  di huria Galatia. Ia ruas ni huria Galatia umumna marharoroan sian non Jahudi naung manjalo barita nauli marhite panghobasion ni Paulus. Porsea do nasida tu Kristus ndang alani patik, alai marhite   pamaritaon   taringot   tu   silang   dohot   haheheon   ni   Kristus.   Dung ditadingkon si Paulus nasida, ro ma angka parbarita na imbaru (jotjot di goari Judais) mangajarhon ia haporseaon tu Kristus ndang cukup mangalehon haluaon. Dituntut do halak Kristen non Jahudi mangaradoti patik termasuk ma parsunaton dohot aturan sipanganon asa sintong di adopan ni Debata. Jala dipengaruhi angka Judais do angka ruas asa meragukan haapostelon ni si Paulus. Jala didok nasida haporseaon tu Jesus Kristus ndang boi paluahon ngolu ni jolma. Mangihuthon pangantusion nasida, ganup halak naung targoar gabe Kristen ingkon parjolo mangalehon dirina di sunat, jala rade mangulahon patik i dingoluna. Mangadopi situasi i, Paulus marhite suratna mangido asa hot ruas ni huria Galatia maniop Barita nauli naung dibasabasahon Debata marhite anakNa Jesus Kristus.

 

Hatorangan ni Turpuk

 Ayat 15-16 . Paulus patuduhon, halak Jahudi do ibana na mangantusi patik ni Jahudi dohot bangko ni hajahudion, jala halak Jahudi i ma bangso na pinillit ni Debata . Sasintongna ndang na naeng pabotohon keunggulan ni halak Jahudi ibana, alai mamangke pengakuan identitas songon halak Jahudi, pabotohon ia nasida pe dipintori ndada alani status dohot Patik, alai dipintori marhite haporseaon tu Kristus, jala ndang holan tu nasida alai na marlangku do tong tu saluhut jolma. Didok si Paulus : ‘ai ndang dapotan hapintoron nasa na mardaging, anggo sian ulaon patik (Gal. 2:16). Pamintorion i basabasa ni Debata na dijalo marhite haporseaon tu Kristus, ndada alani haunduhon alani patik, jala marlaku do i tu sude jolma.

 

Ayat 17-18.  Ngolu  ni  angka  siihuthon  Jesus boi  do talpe tu  bagasan  dosa,  alai  ndang  gabe pardosa Jesus alani hadosaon ni jolma. Songon tuhas tu Paulus na mambahen Jesus Kristus songon parhobas pardosa marhite sungkunsungkun nasida mandok ἆρα Χριστὸς ἁμαρτίας διάκονος; marlapatan “apakah Kristus pelayan dosa?” nda gabe sitambai dosa do Kristus disi? (ay. 17)’. Laho mangalo tuhas i dipangke Paulus do bahasa retoris laho manulak tuhas i. Koras do didok ibana : “sekali-kali tidak!”. Ndang parhobas ni dosa Jesus Kristus, alai Ibana do Sipalua jolma sian gomgoman ni dosa. Alani  ingkon  mangolu  di  bagasan  Jesus ganup  na  porsea  di  Ibana,  jala  sai  olo paimbaruhon diri songon hataridaan

naung dipintori Debata di bagasan Jesus. Unang be mulak tu bangko na leleng naung manghaporseai Jesus, ai molo mulak tu bangko  na leleng na manegai hasintongan na binoan ni  Jesus do i, alai ingkon mangeahi haporseaon na rap sangkambona ma dohot Jesus.

 

Ayat 19-21. Tarida do perubahan hubungan Paulus tu Patik dohot Debata. Didok si Paulus ‘nunga mate ahu di patik i hinorhon ni patik i (ay.19)’.  “aku telah mati,” ‘ai nunga mate au’. Dipaboa si Paulus do, nunga mate ibana dibagasan patik i, na pabotohon na so tarihot ibana tu dibagasan patik i, ai nunga mangolu ibana songon halak naung pinintoran ni haporseaon di bagasan Jesus. Patik i ndang manghorhon hangoluan, alai  patandahon  ibana  tu  Debata  do.  Marhite  hamamatena  tu  patik,  nuaeng mangolu ibana dibagasan relasi naimbaru dohot Debata. Ngolu naimbaru dipatupa marhite hasadaon dohot Jesus Kristus. Jala diokuhon ibana do ‘ndada ahu be na mangolu i nuaeng : Kristus do mangolu di bagasan ahu (ay.20)’. Didok Kristus do mangalu di bagasan ahu (Kristus hidup di dalam aku).  menunjuk tu realitas ngolu na imbaru. Alani nuaeng ngolu ni halak na porsea ingkon marurat jala dipasada di bagasan Kristus na tarsilang, hot jala togu ma di haporseaon, na dirahut holong dohot panghophopon ni Kristus songon dasor identitas dohot etika ni ngolu na imbaru. Di ujung ni turpuk on dipatorang do taringot tu asi ni roha dohot silang marhite penegasan teologis na tajom. Didok : ‘ai aut adong hatigoran marhite sian patik  i,  magopo  ma  hamamate  ni  Kristus  I  (  maka Kristus  mati dengan sia-sia (ay.21). Secara   pemaknaan,   naeng   dohonon   ni   Paulus   molo   gabe   Patik   do   dasor pamintorion dos doi mansoadahon asi ni roha ni Debata dohot mansoadahon makna ni hamamate ni Kristus. Alani haluaon ingkon do antusanta songon asi ni roha ni Debata na tarida marhite silang ni Kristus, ndada alani haunduhon mangulahon patik. Didok Paulus, molo tapangke usahanta sandiri singkat ni asi ni roha ni Debata, gabe mangopo do hamamate ni Jesus. Alani ingkon Kristus na ma bongot jala manggohi ngolunta asa masa haimbaruon di bagasan ngoluna. Tahaporseai molo tung mangolu pe dibagasan daging, mangolu di bagasan haporseaon di Jesus ma. Ndang magopo be hadagingon ni jolma, molo Jesus na mangolu i di bagasanna. Ndang daging i be na mangarodihon hadirion ni jolma, alai Jesus na mangalehon diriNa humophon jolma i. Jala unang ma tatulak asi ni roha ni Debata, ai i do dasor ni haluaonta dibagasan Jesus.

 

Panutup

Tung so boi sasahalak dipintori alani ulaon patik, tradisi, manang usaho ni jolma. Pamintorion i asi ni roha ni Debata sambing do i na dijalo marhite haporseaon tu Jesus Kristus i. Nunga dipintori Debata hita jala nunga parnampuna hita di haluaon na manontong i hinorhon ni haporseaonta tu Tuhan Jesus. Alani dingolunta on, ingkon marparbue do haporseaonta tu Debata, i ma marhite angka ulaon na denggan, parenge na denggan. Jala ulaon na denggan i ndang amal laho manubut roha ni Debata. Pambahenan na denggan i ma parbue ni haporseaon tu Debata. Ndang sintong nidok porsea tu Debata, hape nihosoman dongan jolma. Parbue ni haporseaon tu  Debata,  nihaholongan  dongan, pinaholang diri  sian angka  ulaon haramunon. Parbue ni haporseaon niradotan patik ni Debata. Ingkon papataron parbue ni haporseaon i, ai parbuena i do patuduhon na tahaporseai Debata. Alani do didok si Jakobus, haporseaon i pe songon i do. Anggo si adong pangulaonna, naung mate do hadirionna. Amen

 

Gr. Benson Manurung

EV : PSALMEN 50 : 7-15 Topik : “GURU DI DEBATA DO PORTIBION RO DI NASA ISINA

                   SERMON PARHALADO RESORT AGAPE PANGKALAN KERINCI

EVANGELIUM MINGGU, 07 JUNI 2026 (Minggu I Dung Trinitatis)

EV : PSALMEN 50 : 7-15

Topik : “GURU DI DEBATA DO PORTIBION RO DI NASA ISINA

HKBP MADUMA 09 FEBRUARI 2026

I.    PATUJOLO

Turpuk jamita ima Psalmen 50 on disurathon si Asap (seorang ahli musik keturunan suku Lewi pada zaman Raja Daud) anak ni si Berekia dohot si Simea. Angka ende na sinurathon ni si Asap, dipapungu halak Israel jala dipangke diangka parpunguan parsombaon (ibadah) nasida. Ditaringoti do di turpuk on ima parsombaon na pinatupa ni bangso Israel di napasahathon angka pelean. Taronjar do roha ni si Asap laho paingothon bangso i asa tangkas dipataridahon nasida laho patupahon parsombaon na sintong tu Debata ndada laho mangalului hasangapon manang pujian sian angka na humaliang jala unang jumpang di tongatonga nasida ngolu sipaulaula. Sipaingot na pinasahat ni si Asap tu bangso i marbonsir ma i sian pangalaho ni bangso na so sintong be pataridahon ngolu na marhabiaran tu Debata alai nunga mangolu nasida di bagasan halumlalom marhite pangalaho na so hinalomohon ni Debata tarlumobi di na patupa parsombaon tu Debata. Di partingkian saonari on marpardomuan ma i tu panghorhon ni hamajuon ni zaman, torop do halak na manghasiholi asa jumpang pamujion tu dirina nang pe olo sian dalan na so sintong jala nunga torop halak na holan manarihon dirina sandiri jala berfokus tu dirina, tarida ma i sian istilah na jotjot tabege ima  Self Picture. Alai beha do halak na porsea ikkon naeng marasing sian portibion marhite na mengalami transformasi marhite hamubaon ni roha dohot hamubaon ni pikkiran.

 

II.  HATORANGAN NI TURPUK

Di Ayat 7, Sai tangihon ma, ale bangsongKu (Heber : Shema Yisrael), hata patujolo na patuduhon parsitutuon dipanangihonon ni bangso Israel tu Debata. Ndang holan manangihon sambing alai adong pangulahonon marhite angka naung tinangihonna. Joujou i ima sada tanda paboa na adong sipasahaton ni Debata na mansai ringkot tu bangso i laos dipatandahon Debata do diriNa nampuna ngolu ni bangsoNa. Ahu do Debatam (Heber : Elohim) patuduhon huaso dohot gogo ni Debata gabe panggomgomi di saluhut na tinompaNa.

Di Ayat 8 – 13, “Ndada ala ni peleanmi” ndang dipinsang Debata nasida taringot tu angka pelean na pinasahat nasida, ndang ala hurang pelean nasida i. Alai na padengganhon pamingkirion ni bangso i do taringot tu pelean i na ringkot di Debata, dirajumi nasida do pelean i na boi mangurupi Debata. Alani, dihatahon Debata do nampunaNa sude angka binatang di harangan, pinahan na marriburibu, ditanda Ibana do sude angka pidong angka na di dolok dohot sude na manggulmit guru di Ibana do. Naeng dipatuduhon Debata, ndang sarupa Ibana dohot debata sileban na disomba ni angka bangso na asing na manghaporluhon pelean. Portibion dohot sude isina di bagasan huaso ni Debata do. Diarahon do bangso Israel asa lam mangantusi paboa pelean i ima hataridaan ni pangoloion dohot parningotan di asi ni roha ni Debata.

Di Ayat 14 – 15, pelehon ma tu Debata hamauliateon (Heber : zabach todah) patuduhon pangongkuhonon ni haporseaon na sintong dohot pasahathon hamauliateon tu Debata ima mangongkuhon saluhut ngolu i holan ala asi ni roha ni Debata. Hamauliateon i ma alus sian roha na marhatopothon saluhutna i ro sian Debata. Hata “Garari ma (Heber : shalam artinya menepat, menyelesaikan) angka bagabagami tu Nasuntimbul (Heber : elyown, penegasan akan keMahakuasaan Allah di atas segala kuasa). On ma joujou laho mangahangoluhon haporseaon na sintong tu Debata na marhuaso i. Jala jou ma Ahu (Heber : qara, menegaskan ketergantungan manusia kepada Tuhan) jumpa di ari hagogotan, asa Hupalua ho (Heber : chalats, membebaskan/melepaskan dari tekanan), asa dipuji ho Ahu. On ma gombaran parsaoran ni Debata dohot jolma i, Debata na marnampunahon jala jolma i na diurupi. Saluhut ngolu ni jolma diangka paraloanna, sitaononna, dipatuduhon do na di bagasan holong ni roha ni Debata do.

 

III.         SIPAHUSORHUSORON

Marhite Minggu I dung Trinitatis dohot topik minggu na mandok “Guru Di Debata Do Portibion Ro Di Nasa Isina” jala laos marhite turpuk on dipaingot do hita asa tangkas manjamothon motivasi laho marsaor dohot Debata di tongatonga ni bagas joro i unang tu kepentingan pribadi alai ala  sihol ni roha laho pajumpang dohot Debata songon na didok di BE. No 18 “Ungkap bahal na ummuli bagas ni Debatangki, ai tu si do au naeng muli ganup jumpang minggu i, hulului do disi bohi ni Debatangki”. Disungguli do hita songon halak na porsea pataridahon parsitutuon patupa parsombaon tu Debata laos pasahat pelean songon tanda hamauliateon ni rohanta tu Debata. Parsitutuon laho marsomba tu Debata ima songon tanda parbue ni haporseaonta namangokuhon na so tuk hita mangulahon angka ulaonta tarlumobi mangadopi hamaolon na masa di tongatonga ni ngolunta anggo so ala ni pandonganion dohot pangurupion ni Debata. Dibagasan pos ni roha ma hita mangokuhon jala manghatindanghon di bagasan ngolunta holan mardonganhon Debata do dipatuk hita mangulahon ulaon na hombar tu lomo ni rohaNa, jala na marhite gogo na marharoroan sian Debata tuk mambahen hita mangolu dibagasan pangkirimon na mangolu na sai tongtong do Debata manjoloani pardalani ni ngolunta manang aha pe na masa tahaporseai do Tuhan manjaga jala mangaramoti hita saluhutna holongNa do tongtong mangondihon hita. Di bagasan parsitutuon dohot dibagasan panghirimon na mangolu tapasahat ma saluhut pardalanan ni ngolunta tu Ibana jala molo jumpang hagogotan. Tajou ma Ibana asa Ibana paluahon hita. Marhite tangiang tapangido ma pangurupion tu Debata jala raphon Ibana ma taula ulaonta songon nidok ni BE No 66 : 1 “Debata baen donganmi lao mangula ulaonmu, Baen Ibana haposanmu sai paserep rohami, Debata baen donganmi, Debata baen donganmi”.

Nang marhite turpuk on, dipaingot do asa unang gabe patubuhon pargasipan di na pasahat pelean jala dang hombar tu lomo ni roha ni Debata, gabe jotjot dipangke i laho pasombu tagas marhite na gabe so parduli tu angka na pogos, halak na so mardihadiha, na holan manarihon dirina sambing (songon na masa di tonga ni halak Israel hatiha i). Sasintongna nian songon parbue ni holong ni Debata na mian di ngolu ni sasahalak ikkon do dipataridahon marhite tindakan keperdulian tu halak na asing asa unang holan manarihon na ringkot di dirina sambing alai dohot ma manarihon na di dongan tarlumobi tu angka na metmet. Ulaon panarihonon tu angka halak na memet ido na dihasiholi Debata di ngolu ni halak na porsea songon na dipaingot di Mat 25:40b “nasa na binahenmu tu sada sian anggiKu na metmet on na tu Ahu do i dibahen hamu”. Ngolu ni halak na porsea ndada holan tu dirina sambing alai boha do asa bolas marpanghorhon ngoluna songon hataridaan ni holong na marharoroan sian Debata. Marhite turpuk on dipaingot do hita taringot tu hinabalga ni holong ni roha ni Debata maradophon jolma manisia nang pe jotjot mangulahon na so hinalomohon ni Debata jala olo marsak Debata ala ni pangalaho dohot pambahenan na so hombar tu lomo ni rohaNa alai tongtong do ndang dipatupa Debata pamaloson tu angka na mangalaosi patikNa. Ido pataridahon hinaandul ni balga ni holong ni Debata sian rimasNa jala i do na pinatuduhon ni Debata tu hita. Disungguli do hita i asa pataridahon hamubaon ni roha marhite na pasahathon pelean ima songon tanda hamauliateon ni rohanta tu Debata di saluhut angka pasupasu na tajalo sian Debata. Amen.

                                                                                     Pdt. Donna Kristina Sinaga, S.Th

 

 

 

 

PISAH SAMBUT PENDETA HKBP RESORT AGAPE PANGKALAN KERINCI

HKBP Disreik XXII Riau melaksanakan serah Terima dan pangojakhonon Pendeta HKBP Resort Agepe Pangkalan Kerinci Pada Hari Minggu 30 Npember 2026 yang dipimpin Oleh Praeses HKBP Distrik XXII Riau Pdt Hardy Bontor Lumbantobing, MTh , Dari Pdt Juniarman Butar Butar M.div Kepada Pdt Budianto Siantiri, S.PAK , Pdt Juniarman Butar butar akan Melanjutkan Pelayanan ke HKBP  Resort Jatiwaringin Disrik VIII DKI jakarta, sebelumnya Pdt Budianto Sianturi melayani di HKBP Resort Kisarab Disrik XIII Asahan Labuhan Batu 

                          Pdt Budianto Sianturi dan Kel di perkenalkan  kepada jemaat

Khotbah dan Pangojakhonon Di Pimpin Oleh Praeses, Liturgis dan Pembacaan SK Oleh Sekretaris Distrik Pdt Bakti J Situmorang STh, Sebelum acara pemberangkatan acara serah terima jabatan telah di laksanakan yang di hadiri oleh MPSD , Parhalado Resort, Semua Full Timer dan Uluan Huria Resort Agape

                                                                    Pangojakhonon

                                                                       Bersalaman

                                                             Full Timer se Resort

                                              Koor Ama Immanuel HKBP Kisaran Kota

                              Serah Terima dari Pdt Juniarman Butar Butar kepada Pdt Budianto Sianturi

                                       Suasana penanda tanganan naskah serah terima