MANGHAHOLONGI JAHOWA JALA MANGARADOTI PATIKNA SERMON JAMITA TU MINGGU “OKULI” 8 MARET 2015 Ev: 2 Musa 20:1-17

SERMON JAMITA TU MINGGU “OKULI”  8 MARET 2015

Ev: 2 Musa 20:1-17

MANGHAHOLONGI JAHOWA JALA MANGARADOTI PATIKNA

===================================================================

I.                   Patujolo

Turpuk on ma nagabe dasor ni Patik na 10 nanilehon ni si Musa di dolok Sinai, ima angka hata naniaturhon ni Debata siradotan ni Bangso Israel di tingki patolu bulanhon nasida haruar sian parhatobanan Misir. Dung di paharuar Debata Israel sian parhatobanan Misir marhite angka halongangan nabalga, diboan ma nasida tu dolok Sinai. Disi ma naeng pudunon ni Debata parjanjianNa dohot bangsoNa i asa olo nasida gabe bangso-Na jala Ibana gabe Debata ni Israel, laho mangarahut parjanjian i Dilehon Debata ma Patik i. Debata do namangalehon patik i jala halak Israel hasahatanna alai tu nasa jolma do sasintongna di tujuhon patik i  laos di surathon mai tu dua lei batu ( 5 Musa 4:13). Ahado guna ni patik i?  Mansai marguna doi laho mangajari hita, asa taboto  dia lomo ni rohaNa sipasautonta dohot sogo ni rohaNa sipasidingonta. Dipatuduhon patik i do muse tu hita dosanta jala ditogihon do hita tu Tuhan Jesus, Gabe Siparorot doi manogihon hita tu Kristus ( Gal 3:24) Sorminan dohot aturan si ihuthonon , asa marhite patik i tatanda dosanta . Marguna situtu doi maminsang molo sala manang maninimbil sian Debata laos paingothon hita manghaholongi Debata dohot dongan Jolma. Jala pamusatan ni patik i ima holong ni Debata na paluahon. Dua bagian bolon do patik  i ima naparjolo sian patik I-IV na mangarodihon holong ni roha ni Debata, Sihaholongan mu do Tuhan Debatam sian nasa roham dohot sian nasa ateatem , sian nasa hosam dohot sian nasa roham ( Mat 22:37-38) na paduahon patik V-X ima na mangajarhon tu hita manghaholongi jolma songon dirinta sandiri. “Sihaholongonmu do dongan mi doshon dirim ( Mat 22:39). Ndang malua nian jolmai bahenon ni namangulahon patik, ai sian haporseaon do hita dipintori. Alai parbue ni haporseaon tu Debata do umabahen na ta ula patik ( Pat Gal 3:13; Rom 8:3)

II.                Manghaholongi Debata

Holan sada do Debata “ Ahu do Jahowa Debatam napaluahon ho sian tano Misir sian bagas parhatobananmu” Bagas do hinangkam ni pandohani ima patuduhon na Jahowa Debata do na paluahon nasida sian Misir ndada debata ni Misir manang debata na asing,  alai JHWH –Ahu nuaeng, Ahu sogot; Aku adalah Aku, Debata na satia, Debata na paluahon jala naung paulakhon hajolmaon nasida songon bangso naung mardeka ( malua sian parhatobanan ). Alani ingkon rajuman ni bangso i do  ndanda holan parenta sambing  patik i alai pambahenan na mardongan haluaon do i ( tindakan pembebasan) ni Debata do. Ayat 1 on ma patuduhon paboa  patik i dibonai sian haluaon naung pinatupa ni Debata dung i diondolhan ma muse ia Padan-Nai ( Patik-Nai )  ingkon siulahonon//si-ihuthononton. “Ndang Jadi marangkup Ahu adong Debatam” martujuan asa unang adong be debata na asing so dungkon ni Debata Jahowa ( 5 Musa 10:17)  holan Ibana do sisombaon  sihaholongan dohot sihaposan.  “Tangihon ma, ale Israel anggo Jahowa Debatanta i, Jahowa sasadasa do. Jala ingkon haholongan mu Jahowa, Debatam sian nasa roham dohot sian nasa ateatem dohot sian nasa gogom” ( 5 Musa 6:4-5). Debata na mamunjung do Ibana, na marhuaso namanggomgomi saluhut angka na tinompaNa dohot hata na jempek dohonon ma Unang dipardua Debata. Ingkon umpos do rohanta mida Debata asa mida nasa na adong.

Holan Ibana do Sisombaon dohot Sioloan“Ndang jadi bahenon mu di ho ganaganaan” manang suman suman dia pe na dibanua ginjang dohot na di tano on, ro di na dibagasan aek na di toru ni tano marlapatan doi asa unang dibahen bangsonai angka na tinompa na di tano on gabe debatana, ai debata na mate doi di toru ni huaso ni jolma ala jolma sandiri do na manompai alai anggo Debatanta i Debata namangolu do Debata na boi paluahon . Situlahon ni Bangso Israel doi jala dosa do molo marsomba tu debata sileban laos songoni do na mambahen ganaganaan maniru debata sileban pe tung dosa si tutu do ( 5 Musa 4:19+23-28) jala konswekensi na ima luluhonon na ma dosa ni amaama tu angka anakna ro disundut patoluhon ro disundut paopathon, angka na sogo roha di Ahu, lapatanna Debata Parrimas do Debata ndang olo Ibana lea an manang sombaon Ibana marhite roha na danggoldanggol sisilon , ingkon sian nasa roha dohot sandok ateate. Ingkon holan Ibana do Sisombaon. Sikap ”parrimas” dohot “ mangaluluhon” na nidokna disi ima bagian ni holong Na doi  ala di igil Debata do bangsoNai satia maradophon Ibana ( 5 Musa 4:24) togihononNa do sude jolma sialo\ Ibana tu paruhuman ( 1 Raja 14:22) alai namangoloi Ibana ondihonon-Na do ( 2 Raj 19:31). Laos dipatangkas doi di lapatanni patik paduahoni, Ingkon dihabiari rohanta Debata jala ingkon holong rohanta di Ibana asa ndang jadi iba marsomba tu sombaon manang tu ganaganaan, mangido hangoluan sian i jala ndang jadi oloan begu manang ulpuhan ni hadatuon jala ndang jadi pos roha di ugasan homitan .

Unang neang rohanta di goar ni Debata “  Ndang jadi dohonon goar ni Debata ianggo so ture dalanna….Unang sala mamakke goar ni Tuhan i isarani na mangose padan tu jolma ( bersumpah palsu ) laho pasintonghon diri , margabus dohot mengutuk, mamurai , manang manolon nolon, marujarujaran na roa , dohot mangansi , ai di tingki na tarsosak, di tangiang dohot di pujipujian do sidohonon goar ni Debata ( Pat 3 Musa 19:12; 5 Musa 5:11, Mateus 5:33-37)

Pabadiahon Ari ni Tuhan “ Ingot hamu ma ari sabbat laho pabadiahonsa…on ma namangatur parsaoran tu Debata ima pabadiahon ari sabbat manang ari papituhon , mangula ma jolma i di na onom ari . Disi ma hita mangalehon tingkinta marsaor tu Debata. Tapangke ma ari sabbat i gabe ari na-khusus pamujion tu Debata, tapillit ma angka ari ari na asing gabe ari kerja di hita alai anggo ari papituhoni ari paradianan mai ( Berhenti dari segala aktifitas dan rutinitas kerja) ndada holan hita na ringkot maradi disi dohot do ianakhonta, borunta, naposo lahi lahi, naposo boru boru gariada tahe sahat ro di pinahan ro di pangisi ni huta ni halak namangebati hutanta.

III.             Manghaholongi dongan Jolma

Pasangaphon natoras. Ingkon ganup halak pasangaphon amana dohot inana ( 3 Musa 19;3) arga do bahenon nasida jala na so jadi neang roha maradophon nasida .Ingkon pantun jala porma rohanta tunasida , sioloanta jala sisubutonta do roha nasida dohot sitangianghononta ( Rom 13) Nadada holan natoras manang namanubuhon hita na nidokna disi,  alai dohot do tu natumua sian hita, panggomgomi, pangajari, dung taulahoni dapotonta ma tua saleleleng mangolu

Unang Mamunu : Ingkon argahononta do ngolu ni dongan jolma marhita hata nang tindakan ta ,ingkon roha pangoluhon do rohanta di nasa namangolu ( Pat Mat 5:21-26)

Unang Mangalangkup : Dosa dompak Debata dohot dosa pardongan saripeon do pangalangkupon ( Mat 5:27-30) ingkon badia do pardongan saripeon ni halak Kristen, napinadomu ni Debata na so jadi sirangon ni jolma ( Pat Mateus 19:6)

Unang Manangko : asa dibagasan haserepon ma jolmai mamangke angka pasupasu ni Debata, marhanalomhon na adong. Unang dibuat na so ugasanna ( unang mangallang nadibalian ni hurum na) baliksa tahe ingkon sipagandaon do arta ni dongan jala siramothononton

Unang olo sitindanganghon gabus maralohon donganmu: Diajari do jolmai asa manghatindanghon na sintong, jujur. Angka na jahat do namangulahon sisongoni ( Mat 15:19) Ai sian roha i do hehe pingkiran na jahat, pamunuon, pangalangkupon harorangon, panangkoon, hata gaggap dohot panginsahion. Alani sian sude sijagaon i jaga ma roham.

Unang Manghaliangi : Siradotan do arta ni dongan, jala sipadaoon do diri sian hisaphisap, pangahution tu diri dohot na mardebata sileban. Bolong ma angka motivasi na jahat tu ngka donganna .Unang binahen berbagai cara laho manghuasoi ugasan, dongan saripe, manang naposona baoa, nang naposona boru boru , ro dipinahanmu , nang na sorang  dibagasan hutanta alai di tuntut Debata do sian hita laho mangapoi asa hot nasida di ugasan dohot di ulaonna

IV.              Sipahusorhusoron ni roha

Upa tu angka namangulahon patik , Manongtong do patupaon ni Debata haluaon tu angka namangulahon patik-Na jala tumpahan ni Debata do ganup namangaradoti patik-Na ( 5 Musa 7:6-9)  Alai marhite sian si Musa do dilehon patik i, alai hinorhon niJesus Kristus do manjadi asi ni roha dohot hasintongan ( Joh 1:17)

Uhum tu angka na mangalaosi patikna, Hona toru ni Jahowa do angka na so mangulahon Patik ( 5 Musa 27:15-26)  di huta nang di ladang ( 5 Musa 28:16) ndang adong hasonangan dohot hadameon . Hagaoron dohot hinamago do saluhutna di angka namanadinghon Jahowa ( 5 Musa 28:20) ai Debata parrimas do Jahowa namangaluluhon dosa ni ama amaama tu pinomparna ro disundut patoluhon ro di sundut paopathon ( 2 Musa 20:5-6)

Unang adong be halak Kristen na mardua roha manomba Debata, martangiang do tu Debata alai huhut mangido tua sian sumangot dohot sahala ni ompuna manang huhut marhaposan tu dirina sandiri, mardebatahon mammon dohot artana, nunga godang be angka ruas nuaeng on namambahen harta diatas segalagalanya ( Materialisme) namambahen hagiot  ni dagingna na tumimbo sian sasude. Asa unang adong sian halak Kristen na mamakke goar ni Debata laho manolon ( Bersumpah palsu, Rekayasa ) holan laho pasintonghon dirina manang kelompok tertentu, margabus, ( Isarani  hata pandohan “ sai di ripashon Debata”  Debata ma mardabudabu dna ) Debata parasiroha do Debatanta i. Ndang siulaon ni halak Kristen na mengutuk alai manangiangkon do ( nunga ragat di tingki na parpudion halak mardemonstrasi laho mengutuk sada sada halak  manang bangso .  Talehon ma dirinta nang tingkinta Pabadiahon ari Minggu i, asa unang gabe hatoban ni ulaoni hita songon Debata namaradian di ari Sabbat ( ari papituhon ) disi ma hita marsaor dohot mamuji debata ndada ari berlibur manang rekreasi ari Minggu i. ( na parpudion nunga godang sian angka ruas ni Huria na mambahen ari minggui gabe ari rekreasi manang bertamasya, angka arisan arisan marga, punguan, parsahutaon gabe manundati marminggu  sajamothonon jala si jagahonoonta do i ). Aktivitas di ari minggu sukkup ma holan angka namarpardomuan tu pujipujian tu Tuhan ta ). Taargahon ma ngolu ni donganta marhite , hatanta nang pambahenanta sude hata na haruar sian pamanganta naenma mambahen hasonganan tu angka donganta,  unang gabe mambahen hansit ni rohana na boi mambahen ibana gabe marsahit. Unang be masa angka panangkoon , Ilegal Loging, Ilegal Fishing dna.  Angka barita di Mas media masa do pamunuon tu natoras holan alani arta, warisan. ( Mansai jahat situtu rohani jolma alani artai ) Ingkon badia  do parsaripeon ni halak Kristeni alani ingkon jamothonta doi asa unang masa disi angka na so hinalomohon ni Debata, isarani na marimbang, pangalangkupon, ingkon satia ma angka na mardongan saripei di dongan saripena, ai hasatiaon do dipangido Debata sian angka na mardongan saripe. Asa unang adong be istilah PIL dohot WIL . Ingkon  bolongkonon ni halak Kristen do roha ahut dohot na  mambuat na so ugasanna , Ingkon barani do hita manghatahon na sintong . Unang mangalatei dohot manghosomi donganna, taparhaseang ma tingki laho mangulahon lomo ni roha ni Tuhanta . Tahaholongi ma Jahowa, sian nasa rohanta, ateate, hosa nang rohanta, jala tahaholongi ma dongantai doshon dirinta , Taradoti ma Patik-Na . Patik-hos Uhum Pamujion tu Debata, Patik-hos Uhum manghaholongi dongan jolma .Laos tasoarahon ma goar ni Minggunta sadarion  “ Sai tong do mangaranap matangku dompak Jahowa  OKULI Amen 

JAMITA EPISTEL( Partangiangan ( 1 Musa 17:1-7, 15-16) tu Minggu Reminiscere 1 Maret 2015

Sermon Parhalado HKBP Resort Wahidin Baru, Selasa 24 Februari 2015

Di : HKBP Maranatha Resort Wahidin Baru, Jln Tangguk Bongkar VI No 40

Hot do Padan ni Debata

 Epistel   1 Musa 17 :1-7, 15-16

Pamuhai

Padan manang Janji  ima sada hal na mansai arga,  jala somalna dipatupa mai laho pahothon dohot patoguhon paralealeon, parsaoran nang  kerjasama na lam tu denggan na  di kedua belah pihak na mambahen parjanjian i . Alai anggo turpuk Epistelon ndada songon padan na binahen ni jolmai kerjasama ni dua belah pihak alai Debata sandiri do na marpadan tu Abraham.  Di turpuk ta sadarion di pungka Debata ma padan- Janji Na dohot si Abram. Debata do mambahen inisiatif/Prakarasa  ni Parpadanan i ndada si Abram dohot tujuan marhite padan i naeng pungkaon ni Debata ma sangkap haluaon tu bangsoNa ( 1 Musa 3:20).Debata do na mambahen padan i na so boi ubaon ni jolma.  Abraham na pinillit ni Debata gabe habaoran ni pasupasuNa . Padan na umbalga jala na utama tu si abraham ima “ Gabe bangso na bolon ma si Abraham, lehonon na ma tu ibana pinompar na mansai torop  jala ompu ni saluhut bangso ma ibana. 1 Musa 17 on manggombahon Debata pahothon padan-Na dohot pasupasuNa tu pomparan-Na jala mangganti goarna

Hatorangan

Ditinggalhon si Abraham do hutana, luatna nang sude angka artana laho mangoloi panjoun ni Debata na tu ibana, borhat ddo ibana dibagasan haunduhon jala di patuduhon do pos ni roha dohot balga ni haporseaon tu Debata. Marumur ma ibana di hatiha panjouni 75 taon ( 1 Musa 12:4) nuaeng dung marumur ibana 99 taon dipahot Debata ma padan-Na i i ma turpukta on ( Ayat1 ) dipatuduhon Debata diri-Na tu Abraham paboa Ibana do Debata na sun hinagogo, naboi patupahon saluhut ( Pat Luk 1:37 “Ai ndang adong na so tarpatupa Debata”) ai luhutnai tarpatupa Debata do andul lumobi sian na piningkiran nijolma. Dibagasan turpuk on tubu ma sungkun sungkun boha do sikap ni si Abraham manjalo padan i:?,Jala aha do padan najinalonai, Sikapna:  Manungkap ma Ibana ( Ayat 2 ) Patuduhon tanda ni hahormatonna tu Debata, ingkon marparange hadaulaton dijolo Na ( dengan tidak bercela) Sempurna, lengkap, dengan jujur melayani Allah – dan mengabdi sepenuhnya kepada Allah. Padan na jinalona i ima : hu pa hot padanHu tu ho , jala hupatorop situtu ho, Dipasu pasu Debata do bortian ni si Sara gabe tumubuhon anak ibana namargoar si Isak jala on ma namamopar Bangso Israel , gabe Bangso nabolon,  bangso na so dijujur halak hian gabe bangso nabolon na mangomgomi torop bangso, torop angka bangso marompu tu Abraham, ompu ni saluhut bangso, marhororoan sian ho angka raja. ( Sian Pinomopar ni si Abraham- Ishak - Jakob  do muse bangkit Raja di Israel,)  Ahu ma gabe Debatam jala Debata ni Pinomparmu Sogot  martudutudu doi paboa na Holan Debata do sisombaon ni Abraham dohot pinomparna sogot, ( Pat Patik Parjolo dohot Lapatanna) Nunga hot Padan Hu tu ho marlapatan doi ia Padan i hot do salelenglelengna na so jadi maruba manang mose

Dung dipasahat Debata Padan-Na tu si Abram, digonti Debata ma goar Abram  gabe Abraham, Abram : Bapa yang mulia , Abraham : Bapa beberapa banyak Bangsa, ama ni torop bangso   Sarai : Ina na marsahala gabe Sara ; Ina ni torop bangso . Jala marpanghorhon situtudo pargontian ni goari marhitei di lehon Debata ma jaminan paboa Goar Abraham ima sada pribadi na marsihohot dihaporseaon jala naboi mamboan bangso i tu lomoni roha ni Debata.

Hahonaanna tu Parngoluon si ganup ari

Ia Debatanta ima Debata na hot di padan-Na , Jala padanNa ima padan hadameon , padan laho paluahon dohot pasonanghon sude natinompaNa , Nang pe mardosa hita , alai anggo holongNa sai hot do i manghaholongi hita , ido Umbahen na di Lehon anakNa Tuhan Jesus Kristus di Padan Naimbaru bahen haluaonta.

Debata na sun hinagogo do Ibana na boi patupa saluhut , na so tuk piningkiran ni Jolma tarpatupa Debatado, alai holan on Ingkon Manungkap do hita di joloNa, marparange na daulat  marhaunduhon, marpangoloion jala marhaporseaon songon si Abraham .Marparange di jolo ni Debata marlapatan patuduhon cara hidup, tingkah laku na saurdot dohot lomo ni roha ni Debata   Parange na denggan ima sada hataridaan ni tanggung jawab tu Debata, dipatuduhoni do ngolu naung marhaimbaruon. Nuaeng marpadan do Debata dohot hita ingkon patuduhononta ma Haporseaon na marsitutu tu Debata. Ingkon olo do Hita mambahen Debata gabe Debatanta jala Debata ni ianakhonta/Pinomparta sogot , ingkon warishononta do padan laho manghaporseai Tuhan Jesus tu angka pinomparta,  tanggung jawab ni natoras do mewariskan haporseaon na sintong, asa boi nang sundut na mangihut gabe marhaporseaon na tutu, nunga godang be  nuaeng on angka ianakhon na so sahaporseaon be dohot natorasna, sijamothonon jala siradotanta doi . Taingot ma nang hita angka natoras naung marpadan dohot Debata di tingki mamboan ianakhon tu Pandidion , sude do hita mangundukhon padan i, Dison ma ringkot hita natoras mangajari ianakhonta asa marhaporseaon tu Debata naung hinaporseaanna

Unang be gogonta artanta , parbinotoanta jabatan nang pangkat tapangasahon alai maporus ma hita tu hagogoon ni Debata .Ai Ibana do Debata na sun hinagogo. Halak na marpadan dohot Debata patuduhonon ni do ngolu na mamansoadahon diri huhut manuhuk silang ni Tuhani Songon si Abraham naung gabe pasu-pasu tu saluhut bangso, songoni ma hita gabe pasu-pasu tu na humaliang hita ( 1 Musa 12 : 2)

Ragam do angka hamaolon dohot parungkilon na ta bolus alai luhutna Tuk do huason ni Debata laho mangatasi i, asal ma Porsea hita suang songon si Abraham . Nang pe so mungkin di pingkiran ni jolma , alai porsea do ibana gabe saut ma padan i masa di ibana, Rom 4 : 19-21 Ndang na olo gale haporseaonna i paidaida pamatangna na hira so marngolu be, ai nunga saratus taon ne umurna na nang paidaida si Sara naung saep ladang i. Ndang olo ganggu rohana tumadingkon haporseaoan di bagabaga ni Debata; na lam tu toguna do tahe haporseaonna jala di parsangapi do Tuhan i. Ai Pos situtu do rohana; Tuk do Debata patupahon na pinarbagabaga-Nai ( Bagi Tuhan Tak ada yang Mustahil ) Luk 1:37

Tajalo jala tahaporseai ma Padan-Na , ai na satia do Debata , satia ma hita nang disude padanta. Mardalan ma hita dibagasan padan dohot Debata . Halak na porsea nunga dohot di paimbaru marhite hamamate ni Kristus , jala jolma naporsea i pe dohot ma patuduhon haunduhon, pangolooion, hasataioan tu Debata.  Luhutna do boi Tarpatupa Debata Martua ma Hita Mangulahonsa  Reminiscere “Ale Jahowa sai ingot ma angka denggan ni BasaM- di ingot Jahowa do saluhut halak angka na satia, huhut marhaporseaon di Ibana, Martua ma hita mangulahonsa Amen

.

SELAMAT PENSIUN AMANG ST ARIFIN SIAHAAN

Paborhathon St Arifin Siahaan Pensiun Sian Hasintuaon

  ( Foto : Martin Benardo Situmorang )

PELEPASAN MEMASUKI MASA PENSIUN St Arifin Siahaan

Pada Hari ini Minggu 28 Desember 2014 HKBP Wahidn Baru, Melepaskan ( Paborhathon ) Bapak St Arifin Siahaan Memasuki Masa Pensiun Pada Minggu Dung Ari Hatutubu.

Goar : St Arifin Siahaan

Tubu : 28 Desember 1949

Manjalo Tohonan Sintua 02 Juni 2002

Angka Ulaon na Hinobasanna di Huria 

Tahun 2009 - Sekretaris Seksi Sejarah Jubileum 50 Tahun HKBP Wahidin Baru 

Februari 2010- Februari 2012 - Seksi Ama HKBP Wahidin Baru 

Februari 2012 - Februari 2014- Seksi Lansia HKBP Wahidin Baru 

Pensiun : Minggu 28 Desember 2014, Tepat pada Hari Ulang Tahun nya yang ke 65 

Terimakasih atas Pengandian dan Pelayanannya Selama 12, 5 Tahun di HKBP Wahidin Baru 

Selamat Pensiun St Arifin Siahaan/Br Simarmata

Foto HKBP Wahidin Baru Medan

PARTURE NI PARMINGGUON DI HKBP DISTRIK X MEDAN ACEH DI MINGGU UJUNG TAON PARHURIAON – PARNINGOTAN DI ANGKA NA MONDING

PARTURE NI PARMINGGUON DI HKBP DISTRIK X MEDAN ACEH                   DI MINGGU  UJUNG TAON PARHURIAON – PARNINGOTAN              DI ANGKA NA MONDING                                                                                                Minggu Pa-23 Dung Trinitatis, Tanggal 23 Nopember 2014

JESUS DO HAHEHEON DOHOT HANGOLUAN

I.        ACARA IBADAH           (U= Uluan     H= Huria     S=  Sude )

1.      Pangaradeon dohot joujou

U.   Huria ni Tuhanta,  andorang so tapungka parsombaonta tu adopan ni Jahowa, tama do jumolo pabotohonon, ia parminggunta sadari on, ndada parminggupon na somal, alai na khusus do. Hombar tu Kalender taon parhuriaon, minggu sadarion digoari do minggu ujung taon parhuriaon. Dipasunggulhon kalender taon parhuriaon I do, na ingkon sahat do hita tu tingki parujungan, ima ari ni Tuhan i.  Na ingkon marujung do saluhut na tinompa ni Tuhan i,  termasuk hita jolma manisia. Angkup ni i, laos digoari do minggu sadari on : Minggu parningotan di angka na monding, laho pasunggulhon tu hita asa mangarade hita tu ari parujungan i marhite haporseaon dohot panghirimon na togu di Kristus i, ai holan di bagasan JESUS DO HAHEHEON DOHOT HANGOLUAN.

2.      Marende  BE.  3: 1-3        ( Puji Jahowa  ale tondingku )     BL. 137

Ø  Puji Jahowa ale tondingku, puji Ibana Debatami. Tagan so sude dope bohalhu, naeng pujionhu basaNa i. Sitompa daging, tondi pe ingkon dipuji sasude. Haleluya, haleluya.  

Ø  Tubu ni jolma do nang na sangap jala na mulak tu tano i. Tahitahina pe laho do monjap, molo dibondut tanoman i. Ndang jolma hasonanganhi, Debata do haposanhi. Haleluya, haleluya.

                                                          …………( jongjong)……

Ø  Martau halak na niondingan ni Debatanta Jahowa i. Angka na hot marhaporseaon, di Jesus Kristus Tuhanta i. Molo Debata donganmu, ndang adong hurang tuamu. Haleleuya, haleluya.

3.      Votum –Introitus  :

U.  Marhitehite Goar ni Debata Ama, dohot Goar ni AnakNa Tuhan Jesus Kristus, dohot Goar ni Tondi Parbadia, na tumompa langit dohot tano  on.

H.   Amen

U.  Dungo ma hamu, jala martangiang, asa unang bongot hamu tu pangunujunan. Managam ma hamu, dungo ma hamu jala martangiang, ai ndang diboto hamu mamang andigan tingki ni i.

H.    ( mangendehon BE.  539 :1 : Sai Hutagam do Tuhanku )

Ø  Sai hutagam do Tuhanhu, sai masihol rohangki, di haroro ni Tuhanhu, amen sai tibu ma ro. Sai mardongan olopolop huriaM managam Ho. Maranatha ro o Tuhan. Amen sai tibu ma ro.

U.  Magira ma Au ro. Tiop ma na di ho unang adong na mambuat  tumpalmi.

H.    (mangendehon BE. 539:3 )

Ø  Sai rade ale tondingku, tagam panjouonNa i. Sai tu langit an manomu, ho di Jesus Tuhanmi. Sai mardongan….

U.  Songon on do hata ni Tuhan Jesus: Na maonang i do siparulosan dohot angka ulos na saksak. Jala ndang sesaonKu goarNa sian pustaha hangoluan, jala parhatopotonKu do goarna di jolo ni Damang  dohot di jolo ni angka surusuruanNa.

H.   Haleluya, Haleluya , Haleluya  ( diendehon )

U.  Martangiang ma hita.   Ale Tuhan Jesus, Tuhan ni angka na mate dohot angka na mangolu. Ho do nampuna hami, manang mangolu manang mate pe hami. Nang pe mardalan hami di rura ni linggoman ni hamatean, ndang huhabiari hami be hamatean, ai Ho do dongannami.  Ndang tartiop hamatean manang tanoman be hami, ai Ho do Tuhannami, naung humophop hami. Jala Ho nampuna hami. Ro hami nuaeng tu Ho: sahat tu Ho ma tondinami dohot dagingnami, asa di Ho hami manang na mangolu manang na mate pe. Sai tiop ma tangannami, urupi hami marhitehite panghophopMi, asa sahat hami tu hangoluan na so ra suda. Amen.                         ..….(hundul)………

4.      Marende   B.E.  834: 1-2  ( Na Masihol do Rohangku )

Ø  Na masihol do rohangku tu na sonang i, tu inganan ni Tuhanta i. Tano on ro di sudena pangisina i susa, sai susa rohangki. Marolopolop rohangki, di surgo, di na sonang i. Soada na hurang, sabam, sonang rohangki, molo dung sahat au tusi.

Ø  Ai andigan idaonhu haholonganhi raphon Jesus alealengki. Haholongan na badia  sian Jesus i, sonang, sai sonang rohangki. Marolopolop, …..

5.      Patik:

U.  Tangihon hamu hata ni Debata, na gabe patik ni minggu ujung taon parhuriaon on, na laos minggu parningotan di angka na monding, ima na tarsurat di  2 Korint 15: 19-21 : Ai anggo holan di tano on hita manghirim di Kristus i, jolma na dumangol do hita sian saluhutna. Alai nunga hehe Kristus i sian na mate, Ibana do parjolo ni angka na monding. Ai songon marhite  sian sada jolma  songgop hamatean, songon i do  marhite sian sada jolma  haheheon ni angka na mate. 

Antong rap mangido gogo ma hita laho mangulahon na hombar tu patik i.

S.  Ale Tuhan Debata, sai pargogoi ma hami, mangulahon na hombar tu patikMi. Amen.

6.      Koor  :

7.      Marende BE.  677: 1, 3 ( Mansai Lambok )

Ø  Mansai lambok Tuhan Jesus manjou, manjou ho dohot au. Ida Ibana paima haroromu, mulak ma ho dohot au. Antong sai ro ma ho, angka na sorat sai ro ma ho, mansai lambok Tuhan Jesus manjou pardosa mulak ma ho.         

                                                            ….. ( jongjong )……..

Ø  Ngolu ni jolma hatop do lao salpu, salpu do ho dohot au. Ai hamatean musu na jumoorbut, mangonggop ho dohot au. Antong sai ro …..

8.      Tangiang Manopoti dosa- Hasesaan ni dosa

U.  Tapaunduk jala tapaserep ma rohanta di adopan ni Debata na sun badia i, laho manopoti angka dosanta, martangiang ma hita. Ale Tuhan Debata, Pargogo na so hatudosan, Parasiroha na sumurung. Ama ni Tuhan Jesus Kristus Sipangolu hami.  Hami halak pardosa na dangol on ro tu jolo ni habangsa habadionMi manopoti jala manganggukhon  dosanami. Mansai jotjot huarsahi hami Ho marhitehite pikkiran dohot hata  dohot pambahenannami na roa i. Ndang huhaholongi hami Ho sian nasa rohanami dohot nasa ateatenami dohot nasa tondinami dohot nasa gogonami. Nang dongannami ndang  doshon dirinami hubahen hami. Dibahen i tama do rimasanMu hami tu hamatean salelengna i.

H.   (mangendehon BE.  683 : 1 :( Di AdopanMu Jesus )

Di adopanMu Jesus lea tutu do  diringkon.  Dibaen godang ni dosangkon, di adopanMu Jesus.

U.  Alai na maporus do hami nuaeng tu asi ni rohaM na godang i mangido sian nasa rohanami hasesaan ni dosanami saluhutna. Sai urupi ma hami paubahon rohanami ala ni Tuhan Jesus Kristus, Anak haholongan ni rohaM, Sipangolu hami dohot ala ni GoarMu na badia i. Ale Tuhan, sai asi ma rohaM di hami halak na dangol on.  Amen

H.  ( mangendehon BE. 683:3 )

Di adopanMu Jesus, tarsolsoli bagi rohangkon. Muba ma au tu jolo on, di adopanMu Jesus.

U.   Hata ni Debata, bagabaga taringot tu hasesaan ni dosanta . Songon on do panghaholongi ni Debata di portibi on, pola do Anakna na sasada i dilehon, asa unang mago ganup na porsea di Ibana, asa hangoluan na saleleng ni lelengna di Ibana.  Hasangapon di Debata na di ginjang !

H.   Amen.                                                            ….… (hundul)…….

9.      Koor :

10.  Marende   BE. 213:1,4 ( Dung Sonang Rohangku )   BL.   115

Ø  Dung sonang rohangku dibaen Jesus i, porsuk pe hutaon dison. Na pos do rohangku di Tuhanta I, dipasonang tongtong rohangkon. Sonang do, sonang do, dipasonang tongtong rohangkon.

Ø  Mangolu nang mate di Jesus do au, Ibana haporusanhi. HataNa sambing do partogi di au, ai na tau haposanku do i.  Sonang do….

11.  Epistel

U.  Hata ni Debata na gabe Epistel di parmingguonta sadari on, ima na tarsurat di buku Panurirang Hesekiel 34: 20-24, tajaha ma secara responsorial: Dibahen i songon do hata ni Tuhan Jahowa tu nasida: Idama ma, Ahu sandiri mamutus uhum di holangholang ni birubiru angka na mokmok martimbanghon birubiru na marniang.

H.   Ala didorongi hamu marhite lambung dohot abara, jala ditimbangi hamu marhitehite tandukmuna saluhut birubiru angka na gale i, paima pola marserak nasida tu balian dibahen hamu.

U.  Dibahen i Ahu ma manolongi birubirungKu, asa unang be ripe pupusan, jala Ahu mamutus uhum di holangholang ni birubiru martimbanghon birubiru.

H.   Jala Ahu patindang di nasida sada parmahan, asa ibana marmahan nasida, ima naposongKu si David. Ibana marmahan nasida, jala ibana gabe parmahan di nasida.

U.  I do sahatna.  Martua do  na tumangihon hata ni Debata jala na umpeopsa.

H.   Amen.

12.  Marende  BE. 188: 1, 6   ( Jahowa Siparmahan Au )       BL.  131

Ø  Jahowa Siparmahan au, ndang hurang manang aha. Ai nasa jea dipadao  do sian dorbiaNa.  Tongon dibaen na lomak i, lao pangoluhon tondingki, dibaen asi rohaNa.     …..( jongjong )…

Ø  Tongtong do denggan ni basaM jambarhu di ngolungku. Tongon do asi ni rohaM mangihut di langkangku. Dung i dung suda bohalhi, sai ingananhu jabuMi, saleleng ni lelengna.

13.  Manghatindanghon Haporseaon

U.  Tahatindanghon ma haporseaonta i, songon na hinatindanghon ni donganta sahaporseaon  di sandok portibi on.  Rap hita mandok:

H.   Ahu porsea di Debata Jahowa……

14.  Koor

15.  Tingting

16.  Acara Parningotan di angka na monding

U.     Saonari sahat ma hita tu acara khusus, ima parningotan di angka na monding. Adong do hata na mandok “momento mori”  na marlapatan ingot ma ari hamamatem. Molo dijahahon pe angka nasida naung jumolo monding i, ndada na parigatrigat bulung pasigatsigat bulung gaol, ndada na parigatrigat sinalungun manang pasunggulsunggul sinadangol. Asa ganup do hita tangkas  maboto,  jala mangarade diri dibagasan haporseaon,  na ingkon  mate do hita muse songon nasida naung jumolo mate i.  Ndang tarpasiding hamatean i, ai nunga torop  angka dongan na jumolo sahat tusi, jala hata ni Debata do i.  Ingot jala haporseai ma, nunga jumolo Jesus mamolus hamatean i, jala nunga ditaluhon Ibana hamatean i marhite naung hehe sian na mate. Dibahen i binsan sadihari dope, lam pasolhot ma dirim tu Jesus, asa tau ho parjambar di haheheon  dohot hangoluanNa i.  Antong marende ma hita.

H.     Marende  BE. 334:  1   ( Nasa Jolma Ingkon mate )    BL.    186

Ø  Nasa jolma ingkon mate, ingkon mago sibuk i. Na mangolu ingkon mate asa tung denggan muse. Daging on do gabe bangke jala ingkon do malangke, asa   sogot bangkit tu hasangaponna i.

U.     Tabege goar-goar ni ruas ni huria…….  on, na monding di bagasan sataon parhuriaon ima sian tanggal 25  Nop. 2013 s/d 23 Nop. 2014 ), na jinahon ni  ………..

U.  Nunga tabege goar –goar ni donganta sian huria on na monding di bagasan sataon parhuriaon on. Songon dia do pandok ni hata ni Debata taringot hamatean dohot haheheon sian na mate ?   Didok hataNa i do: Alai naeng ma tangkas botoonmun ale angka dongan, taringot tu angka naung monding i, asa unang marsak hamu songon angka na leban, na so marpanghirimon.

H.   Ai molo porsea hita, naung mate  Jesus dohot hehe, sandok togihonon ni Debata do  rap dohot Jesus nang angka naung monding marhitehite Ibana.

U.   Ai hata ni Tuhan i do na hupasahat hami tu hamu: Ia mangolu pe hita angka na mian ro haroro ni Tuhan i, ndada sumurung hita  sian nasida naung monding i.

H.   Ai na tuat ma Tuhan i,  sian banua ginjang mardongan suraksurak, marsoara ma raja ni surusuruan, tarbege ma sarune ni Debata. Dungi hehe ma jumolo angka na mate di bagasan Kristus.

U.   Dung songon i, hita angka na mangolu dope angka na mian i, taitonNa ma hita raphon nasida di bagasan angka ombun, laho manomunomu Tuhan i tu langit an. Jadi olat ni i sai tongtong ma hita  rap dohot Tuhan i.  

H.   Dibahen tama antong, lam sumurung hita di parange na badia, dohot hadaulaton,  jala taharingkoti ma asa didapot Tuhan i hita so martihas, so hasurahan alai di bagasan dame.

U.   Jala  unang  be sai marsak rohamuna marningot angka nasida naung monding, alai naeng tarapul jala benget  di bagasan panghirimon na mangolu. Songon nidok ni endenta sian  buku ende nomor 347 : 1-3  (BL.11) , “sai masipaidaan do sogot angka na porsea i, dung sahat be langkana tu hasonangan I”, jongjong ma hita, laos taendehon ma. (lembut).

Ø  Sai masipaidaan do na porsea i. Dung sahat be langkana tu hasonangan, tu hasonangan i, tu hasongan i.

Ø  Antong burju ma hita mangalo dosa i. Sai unang tading hita di tonga  dalan i, di tonga dalan i, di tonga dalan i.

Ø  Sai masipaidaan ma hita on muse di lambung ni Tuhanta i dung monang hita be, dung monang hita, dung monang hita be.

U.   Martangiang ma hita   ( baca Agenda bag. E : II  Parningotan di angka na monding, jala dung amen hundul ma saluhutna )    

17.  Marende  BE.541: 1- (Na Mulak Jesus i )   BL. 373  Pel. IA& I B

Ø  Na mulak Jesus I di hasangapon i. Mangalap na badia I tu hasonangan i. Hutundalhon ma na di pudingki, Jesus ma haposanhi di haroroNa i.

Ø  So tung na tading au, di haroroNa i. So tung ditiop rohangkon na olo sego i. Hutundalhon ma……                    

Ø  Nang arta sangap i, tu aha ringkot i, na tinggal do sudena i di hamagoan i.  Hutundalhon ma….

Ø  Ias ma rohangki dibaen mudarNa i. So tung di haroroNa i ramun sambing ma i. Hutundalhon ma….

18.  Jamita   Johannes 11: 25-26 .

19.  Marende  BE. 544: 1-  (Molo Ro Panjou ni Tuhan )   BL.419  Pel.  II

Ø  Molo ro panjou ni Tuhan molo salpu tingki on, molo binsar bintang sipaias i. Jala sahat ma tu ginjang angka na tinobus I, dohot au dibaen Tuhanta lao tusi. Molo jouon ni Tuhanta angka goar di pustaha, dibaen asi ni rohaNa, alusanhu: O Tuhanhu, au di-son.

Ø  Molo dapot tingki hehe angka na tinobus i, idaon nasida Tuhan Jesus i. Di panghuling ni sarune lao manomu Tuhan i, dohot au dibaen Tuhanta lao tusi. Molo jouon, …..

Ø  Dibaen i,  o ale dongan ringgas be hita on, pararathon harajaonNa i tongtong. Ai dung salpu tingki on na masuk be tu surgo i, dohot au dibaen Tuhanta lao tusi. Molo jouon, ….

20.  Agenda: Tangiang-Ende  Pelean, Ale Amanami, Pasupasu. Amen3x

                                                                               

PARTURE  NI PARMINGGUON

 DI HKBP DISTRIK X MEDAN ACEH:

MINGGU UJUNG TAON PARHURIAON –

PARNINGOTAN DI ANGKA NA MONDING

                                   

TOPIK:

JESUS DO HAHEHEON DOHOT HANGOLUAN

Oleh : Pdt Gerhard P Sihombing, M,Th