Jamita Partangiangan Februari- Juni 2022 HKBP Distrik XIII Asahan Labuhan Batu

 https://docs.google.com/document/d/1HhpQ-5tRbaW1I_q-fVngdrfR5kDpJvMC/edit?usp=sharing&ouid=101348253132151674615&rtpof=true&sd=true

Bahan Sermon Parhalado Na Gok Tingki HKBP Distrik XIII Asahan Labuhan Batu Jamita tu Minggu, 15 Mei 2022 (Kantate) Konvent di HKBP Sei Apung. Senin, 09 Mei 2022

 Bahan Sermon Parhalado Na Gok Tingki HKBP Distrik XIII Asahan Labuhan Batu

Jamita tu Minggu, 15 Mei 2022 (Kantate)

Konvent di HKBP Sei Apung. Senin, 09 Mei 2022

Ev. 2 Musa 15:19-21 “Marende Ma Hamu Di Jahowa” Ep. Pangungkapon 4: 8 - 11

1.      Pardalanan ni ngolu ni bangso Israel manuju tano Kanaan i ma na gabe gombaran ni pardalanan ni ngolu ni halak naporsea, na so marpassadian angka hamaolon diadopi asa sahat jala idaon ni angka naporsea i nasa sangkap ni Debata tu angka na hinaholonganna. Sada sian angka hamaolon na niadopan ni bangso Israel, i ma: uju na diadu raja parao rap dohot paranganna nasida hape di jolo nunga sonson laut Teberau. Sian parnidaan hajolmaon, nunga sonson be dalan nasida, ndang adong be dalan nasida asa malua sian hamaolon i. mabiar situtu ma saluhut bangso i, ai nunga ro musu sian pudi jala dijolo nunga sonson dalan di nasida. (maju kena-mundur kena). Diida Debata do na masa di bangsoNa i, jala disarihon do bangso na hinaholonganNa i. ala ni disuru ma si Musa naposoNa i patoltol tanganna tu laut i, gabe bola dua ma, bolas ma bangso i mardalan di na mahiang manaripari laut i. alai bongot tu bagasan laut do hoda ni raja Parao dohot angka huretana ro di parsihundulna, ala dipasuang Jahowa angka aek ni laut i mangalingkupi nasida.

2.      Diramoti Debata do bangso i sian angka na masa i. ala ni tung dipatuduhon nasida do las ni roha nasida tu Debata siala pambahenanNa na paluahon nasida sian ragam ni angka hamaolon lumobi tahi na jahat sian raja Parao. Molo tajaha na sabindu on (15), tung tangkas do pamujion nasida di Debata, lumobi ma di turpuk jamita on (ay. 21) marende taripar ma si Miryam boru panurirang (Nabiah), iboto ni si Aron rap dohot angka boruboru masitiop odap (rebana) na be. Aha do lapatan ni marende taripar, molo tapahombar tu Ditogihon si Miryam do nasida marende: “marende ma hamu tu Jahowa, ai marmulia situtu do Ibana”. Dia ma hamuliaon ni Debata nanidok ni si Miryam? I ma: Ndang diloas Debata marmara bangsoNa i siala hatangkangon ni raja Parao, na mangambati bangso Israel ruar sian tano Misir, patolhashon nasida sahat tu tano na pinarbagabaga i.

3.      Sada parsiajaran na arga na naeng putihanta sian turpuk jamita on, i ma: Manang ise pe ndang boi mangambati sangkap ni Debata. Laos songon dia hagogoona, huasona, toropna, ai sai na tulus do sangkap ni Debata tu bangso na hinaholonganna. Hatangkangon ni raja Parao, huasona, nang hagogoonna, ndang tuk mangambati sangkap  ni Debata naung sinangkapanna sian mula ni mulana dung ojak tano on lumobima tu bangsoNa Israel. Songon I do nang tu hita saluhutna, manang aha pe disangkapi Debata taringot tu hita ganup marsadasada, pos ma rohanta, sai na saut do i. Songon pandoha ni na naporsea di Ende Nang Gumalunsang, didok: “molo Tuhan parhata saut, mandok hataNa ingkon saut, sai saut do i.” Holan on, tahilala jala taparhatopot dope nuaeng hagogoon pambahenan ni Debata di bagasan ngolunta? Atik tung do naung mate panghilalaan i? molo naung mate do “panghilalaan i” tontu ndang tuk roha nang pingkiran lumobi haporseaonna laho manghatindanghon nasa pambahenan ni Debata di bagasan ngoluna, dung I gabe so adong tubu di rohana laho marende naimbaru di Jahowa.

4.      Ngolunta songon siihuthon Jesus ndang sude dalan na tabolus mura tadalani, sipata ingkon mardalan do hita di dalan na rahis situtu, sipata ingkon manganakkohi dolokdolok na timbo. Ndang sude dalan na tabolus mardoangn olopolop dohot las ni roha. Ndang sude na tahirim boi sahat tu ampuanta, jala boi do suharsuhar ni na tahirim i surduk ro so panagaman. Holan on taingot ma, nang pe paet pogu boi do i gabe sipandaoni di sahit na taae, sabalikna nang angka sipanganon na tonggi situtu boi do i gabe manghorhon sahit. Songon nidok ni na malo: “na paet unang pintor diutahon, na tonggi unang asal dibonduti”.

5.      Minggunta digoari do Kantate, lapatanna: Endehon hamu ma di Jahowa ende naimbaru (Psalem 98:1). Ditogihon do hita asa marende naimbaru, ala taparhatopot do nasa pambahenan ni Debata naung sahat tu ngolunta ganup marsadasada. Taarahon ma donganta nang saluhut ruas ni huria i, asa dohot nasida marende naimbaru, ala marhite na marende gabe sada panindangion do i di nasa pambahenan ni Debata. Marende sian nasa roha, I do patuduhon na tangkas pamujionta tu Debata. Molo so sian nasa roha do mangendehon Ende I tontu na so haru tangkas do panandaonta dipambahenan ni Debata, molo so tangkas panandaonta disi, gabe hurang parsitutuonta laho marende di Ibana, lumobi ma marende naimbaru. Ai taparhatopot do, sai imbaru do tongtong pambahenan ni Debata ganup ari ganup tingki, na mangaturhon saluhutna pardalanan ni ngolunta. Jala taingot ma na so tagamon loasonna hita marmara nangpe tabolus nasa ragam ni parmaraan, jala na so tupa tarambat langkanta tu ngolu na denggan na  sinangkapan ni Debata tu hita ganup marsadasada manang hagogoon dia pe na martahi naeng mangambati langkanta. Taingot ma, nasa naung sinangkapan ni Debata sai na saut do I, sai na tulus do I, jala sai angka naummuli I do patongononNa tu hita. I na mangarahon hita marende naimbaru, taarahon ma nang donganta asa dohot nasida marende naimbaru.

 

 

Pdt. Lamhot M. Simbolon, STh

ACARA PARTANGIANGAN PURBA BONA PASOGIT, ANAK BORU BERE IBEBERE KISARAN NAHUMALIIANGSA MINGGU 22 MEI 2022

 

ACARA PARTANGIANGAN PURBA BONA PASOGIT, ANAK BORU BERE IBEBERE KISARAN NAHUMALIIANGSA

MINGGU 22 MEI 2022

======================================================================

1.      Joujou tu parsaoran :         L = Liturgist ; H = Huria

L : Hamuna angka dongan, marpungu do hita dibagasan tingki on, ditonga-tonga ni inganan on di Partangiangan Purba Bonapasogit Anak Boru dohot Bere,Kisaran na humaliangsa,  bagasma pamujionta tu Ibana

H : Tama do tutu pujionta Debata sian nasa rohanta, sian nasa ate-atenta dohot sian nasa gogonta. Holan ala asi ni RohaNa do umbahen na boi hita marpungu manghalas-hon sude denggan basa Na i tu hita

L :  Mauliate ma tutu di Tuhanta na rade mandongani dohot mangaramoti hita, antong manghalashon saluhutna i, tadok ma songon nidok ni situatua; Disi sirungguk disi do sitata, ia dison hita hundul marpungu saluhutna, dison ma hita rap dohot Amanta Debata.

H :           Gabe ma tutu jala horas! Na uli basa do Tuhanta i, jala na mamora di pasu-pasu, asa songon na nidok ni situatua ma dohononta ; Dengke ni Tarabunga peak di Pinggan pasu, horas ma hita saluhutna Debata ma mamasu-masu.Asa tangkas ma uju Purba tangkas ma uju angkola tangkas ma hita maduma tumangkasan ma namamora

L : Nunga marpungu hita tutu dison Pomparan ni Ompunta Purba Bona Pasogit Kisaran nahumaliangsa dibagasan las ni roha, nunga nangkok hita sian toruan marpungu di dolok ni Debata di inganan on. siangkupna songon na hundul, sidonganna songon na mardalan. ai marangkup do nauli,mardongan do na denggan. Dia ma tutu nidok ni parpunguanta sadari on

H : Gabe ma tutu jala horas! Napuran ni Dairi niatup ni boru Angkola, Na patupa Partangiangan do hita sadari on anggiatma manghorhon tu nauli  mamboan sangap tu Tuhanta.

L : Gabe ma jala horas! Taolophon ma Jahowa, taoloi ma Jahowa marhite-hite las ni roha, beta ma tu jolo-Na marhite-hite olop-olop: Amen Marende ma hita

2.   Marende no 754: 1  Gok Las ni roha

           Gok lasni roha do au dingolungkon, dingolungkon dingolungkon. Gok las ni roha do au dingolungkon tongtong dingolungkon Mauliate, gok las ni roha, maringan holongMi Tuhan di au, Mauliate, gok las ni roha maringan holongMi Tuhan di au.

3. VOTUM.

L : Marhite hite goarni Debata Ama, dohot Anak dohot Tondi Parbadia.

H: Amen 

L:   Na mamolus do anggo portibion rap dohot na pinangido ni rohanna, alai na mian ro disaleleng ni lelengna do na mangulahon lomo ni roha ni Debata.Haleluya Martangiangma hita Ale Tuhan Debata, Parasiroha jala Pardengganbasa na sumurung! Tama do nian hona uhumMu hami ala ni garis ni rohanami mida HataM.

H : Alai sai sesa ma dosanami jala salpuhon sude pambahenannami na hurang i.

L :  Sai unang unsati asi ni rohaM sian hami.

H :           Sai tambai ma pasupasuM dohot gogo na sian banua ginjang tu HuriaM, asa hupuji hami Ho, dung malua hami sian pardangolan na dihasiangan on.

L :  Ala ni Tuhan Jesus Kristus, Tuhannami.

L,H;   Amen            

4. MARENDE B.E 587:1-2 (TAENDEHON LAS NI ROHA)

1.           Taendehon las ni roha pasangaphon Tuhan i, Roha holong na mangonjar laho mangendehon i, Ganup ari ganup borngin unang lupa ho disi. Angka ende na ummuli si pasangap Tuhan i, Nang parhinaloan i baen pasangap Tuhan i.

2.      Taendehon las ni roha, sipadame roha i. Tung dao do bada-bada, dohot angka hosom i. Hadameon ni Tuhanta i, do sihirimon i Tapalambas ma rohanta, mida angka dongan I Na martua do sude, na lambok maroha i.

5.  RENUNGAN SITUASIONAL & MANOPOTI DOSA

L:         Hamu Pomparan  Purba Bona Pasogit Anak , Boru, Bere dohot Ibabere di Ingananon, Sadarion marningotma hita di Partangiangan Purba Bona Pasogit ,Marpunguma sian marragam luat dipomparan Purba Bona Pasogit  marpanatap ma Tuhanta ala hahurangan dohot hagalehon siala dosa dohot pamabahenanta na so tama di adopan ni Debata.

H :       Disi do patar angka pangalaosion tu Ibana, hurang pos ni rohanta tu Ibana, gok hagaleon angka natoras maradophon ianakhon; parange ni ianakhon mangarsahi natorasna, hagaleonta maradophon dongan, bangso, masyarakat dohot negeranta. Hagaleonta papatarhon haporseaonta songon siihuthon Kristus di tonga tonga ni portibion. Hagaleonta patureture hasadaonta. Atong tu ise ma pangkirimonta i?

H :       (Mangendehon): BE No.769:1  “Tu Debata do pangkirimon”

            Tu Debata do panghirimonki, di tano laut nang awang-awang i. Ibana do haposanki tongtong do diramoti langkangki. Torop pe mara manahopi au, Debatangki do sumarihon au, pos rohangki, sonang do au. Ibana do na mandongani au.

L : Molo tatailihon pe tu pudi, asa dapotan bisuk do hita sian angka na tabolus i, ai i do guru di hita mangalangka jala patupahon Partangiangan Purba Bona Pasogit Anak , Boru, Bere dohot Ibabere, Godangna i na masa di pomparan ni Purba Bona Pasogit Anak , Boru, Bere dohot Ibabere na mambahen tarsonggot jala mabiar hita: bencana alam, angka marhabotni roha, hagaoron dohot lan na asing. Disaluhut angka na masa i, dia ma sidohononta tu Debata?

H :            Sintong mai tutu, “Torop pe mara manahopi au, Debatangki do sumarihon au, pos rohangki, sonang do au Ibana do na mandongani au.”

L :  Alani Itabegema hata ni Debata na tarsurat di Roma 1:16-17, na mandok:

      Ai ndang na huhailahon barita na uli i, ai hagogoon ni Debata do i, paluahon nasa na porsea.  Ai dipapatar do disi hatigoran ni Debata, na sian haporseaon tu haporseaon;

H:  Ale Tuhan Debata parasiroha na sumurung! Na ro do hami tu joloM manopoti dosanami na godang i. Nunga hubolus hami pardalanan ni ngolunami; Huhilala hami do godang ni dosa dohot pangalaosionnami manipat na sabulan on. Asi ma rohaM, sesa ma luhut dosanami i.

L : Hupabotohon hami ma tu Ho sude dosanamai jala ndang hutabunihon  hami hajahatonnami tu Ho. Asi ma rohaM, sai pangolu ma hami!.

H  :  Sai asi ma roham, ale Debata, sai jangkon ma hami jala sesama dosanami, ala ni Anak haholongan ni rohaM, Tuhan Jesus Kristus, Tuhannami. Amen.

H : (mangendehon BE No.432:1-2  “Sian hurungan ni dosangki” BL.292

             Sian hurungan ni dosangki, ro au tu Ho. Ro au tu Ho. Tu haluaon di mudarMi, Jesus au ro tu Ho. Nasa rohangku malum hipas, gabe mamora, nang pe pogos. Sian jeangku ro au tu Ho, Jesus au ro tu Ho.

L:   Tajalo ma apulapul hasesaan ni dosa sian Debata taringot tu angka dosanta. Parasi roha jala pardenggan basa do Jahowa, lambat tarrimas jala parasi roha godang. Ndang tongtong Ibana manorui, jala ndang gotos rohaNa saleleng lelengna. Hasangapon ma di Debata na di ginjang. Amen

6.    Marende B.E No.467:1-2

1.        Asi ni rohaM hupu ji ala Ho manobus au. Di paIas Ho rohangku, ga-be soranganMu Au. IngananMu rohanami. TondiMi manggohi i. Pangke dohot ngolunami gabe ulaulaMi.

2.        Sai ramoti ma rohangku, asa boi gohanMu au. Sai mabaor ma pasupasu nang marhite sian au, IngananMu……..

7. Epistel Psalmen 25:1-4

L:             Ho do, ale Jahowa, dihalungunhon rohangku.

H:             Ale Debatangku, marhaposan tu Ho do ahu, unang tung paila ahu, asa unang marsuraksurak angka musungku mida ahu.

L:                     * Ndang tahe tagamon tarurak sude angka na mangkaposi Ho, sai maila do sogot angka pangose soada alana.

H:                    Ale Jahowa, sai pabotohon ma tu ahu angka dalanmu, jala ajarhon tu ahu angka bogasmu. 

L:                     Ido sahatna  Martuama angka na tumangihon hata ni Debata jala naumpeopsa.

L/J:           A M E N.

8.  Marende B.E. No.741: 1  ( NANG RO PE HABAHABA)

Nang ro pe haba-haba i / Tuhan do pangondianmi,

Nang pe humuntal tano i / Tuhan do pangondian mi.

Ai Jesus do partanobatoan i di tano on di tano on,

Ai Jesus do partanobatoan i, dolok partahananta i.

9.  TANGIANG PANGONDIANON

10 .  Marende B.E No. 758:1-2 (JAHOWA PANGURUPI)

1.      Jahowa pangurupi disi ulaonmi. Dilehon pos ni roha di ganup tingki i,

Nang pe sipata ganggu haporseaonmi Jamot tongtong Tuhanmu manjaga ngolumi.

2.      Jahowa las ni roha saleleng ngolumi, Ibana haroroan ni nasa na uli

           Ai disarihon Jesus sude naringkot i, Halashon panoguon ni Jesus Tuhanmi.

11.  JAMITA   :

12.  Marende sian BE No.672: 1 + 3     “Tung godang situtu” (Pelean)

 Tung godang situtu ulaonmu antong dipasahat Tuhanta tu ho

Ndang adong be tingkim marnalemba tahe ngolumi bahen tiruan tongtong

Reff:        Sai patupa ma i alani Tuhan i so manghirim balosna tu ho

                        Debata do marnida na ni ulami, manang na adong parbueni i

      Ala ni i boan ma sondang na tiur i, boan ma hata ni Tuhan i.

      Sai urupi na pogos, namardangol i asa rot u Jesus Tuhanta i.

      Reff:        Sai patupa…

13. TANGIANG PANGUJUNGI/ PASUPASU- AMEN-AMEN-AMEN

AMA SONGON MALIM DI TONGA NI BAGAS

 https://docs.google.com/presentation/d/1ziU5vQSPrlxnMxFIMdC6LP7-HR9223pV/edit?usp=sharing&ouid=101348253132151674615&rtpof=true&sd=true

https://docs.google.com/presentation/d/197WBZdidGzr_Q6GXjvr-j8Q5pJ2fV2xa/edit?usp=sharing&ouid=101348253132151674615&rtpof=true&sd=true 

PARTANGIANGAN BONA TAON Parhalado dohot Keluarga HKBP Kisaran Kota Jumat, 07 Januari 2022

 

Partangiangan Bona Taon

Parhalado dohot Keluarga HKBP Kisaran Kota

Jumat, 07 Januari 2022

===========================================================

1.      Marende BE. No. 70: 1 - 2 “Naung Salpu Taon Na Buruk i” BL. 129

Ø  Naung salpu taon na buruk i, Ho ma hupuji Tuhanki.

Ai diramoti Ho tongtong, tondingku dohot dagingkon.

Ai diramoti Ho tongtong, tondingku dohot dagingkon.

Ø  (Jongjong) O Jesus sai asi rohaM, paian denggan ni basaM,

Muse di taon na imbaru on, di nasa huriaM tongtong.

Muse di taon na imbaru on, di nasa huriaM tongtong.

2.      Votum (P=Paragenda, H=Huria)

P   : Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen! Angka langit do mamaritahon hamuliaon ni Debata, jala jadijadian ni tanganNa do pinaboa ni na ratarata ni langit.

H  : Masipaboaan do angka ari jala masilehonan parbinotoan do angka borngin.

P   : Pardengganbasa do Jahowa jala Parasiroha godang, lambat tarrimas, jala ndang dibaloshon tu hita hombar tu angka hajahatonta. Haleluya! Martangiang ma hita: Ale Tuhan Debata! Sian asi rohaM do umbahen sahat hami tu taon na imbaru on; Ho do na mangaramoti hami di bagasan taon na salpu i. Sai asi ma rohaM, sai unang tulak hami nuaeng, sai dongani ma hami di bagasan taon na imbaru on. Pasupasu hami ro di angka ulaon na denggan, na huula hami marhitehite GoarMu. Pasupau HataM na badia i tu bagasan rohanami, asa imbaru rohanami, asa tarpamasuk Ho hami tu banua ginjang di hasusuda ni bohalnami. Amen!                      (hundul)

3.      Manjaha Turpuk

P   : Panjahaan hata ni Debata di partangiangan bona taonta sadarion, tarsudat di Lukas 3:15-17, 21-22. Tajaha ma marsingkatsorin. Managamnagam do bangso i, dirimpu be di bagasan rohana taringot tu si Johannes, atik beha Kristus i ibana.

H  : Gabe dialusi si Johannes ma nasida saluhutna: Ahu do tutu mandidihon hamu dohot aek; alai na ro ma na gumogo sian ahu; na hurang tama do ahu mangkarhari tali ni sipatuna. Didihonon ni I do tu hamu Tondi Parbadia dohot api.

P   : Di tanganna do purpuran, paiasonna ma pardegeanna: Papunguonna do emena tu sopona, alai tutungonna do hurangkam i tu api na so ra mintop.

H  : Alai uju tardidi natorop i saluhutna, gabe dohot ma Jesus tardidi; jala di na martangiang Ibana, mungkap ma langit.

P   : Jala mijur ma Tondi Parbadia tu atasna marrupa songon darapati, jala masa ma soara sian ginjang, songon on: Ho do Anakku, haholongan i; lomo do rohangku di Ho! Ido sahat na. Martua do angka na tumangihon hata ni Debata jala naumpeopsa.

P+H : Amen

4.      Marende BE. No. 65 : 1 “Patimbul Be Ma Sangap” BL. 129

Ø  Majumpang taon na imbaru on, di au dibahen Jesus.

Dibaen rohaNa di au on, basaNa dipatulus.

Ibana do manogu au, saluhut jea dipadao, mambaen las ni rohangku.

5.      Refleksi Hamauliateon Bona Taon

P     :  Huria ni Tuhanta, tahamauliatehon do pandonganion ni Debata dinasa pardalanan ni ngolunta. Jala boi taripar nuaeng hita dibagasan hahipason dibagasan roha na marhasonangan. Ndang alani gogonta manang haboionta umbahen tarbolus hita taon 2021 jala mamasuhi di taon baru 2022 on.

H    : Hupuji hami do Ho TUHAN di nasa denggan ni basaM dohot asi ni rohaM.

P     :  Panghobasion ni Huria pe nunga mardalan di bagasan taon pemberdayaan laos masuhanta ma taon hasadaon ni roha. Tung dibagasan hasadaon ni roha ma tarjalahi hita dame ni Kristus di tongatonga Huria marhite panghobasionta songon di hata ni Debata na mandok, “Haringgashon hamu ma mangaradoti hasadaon ni Tondi, pinadomu ni dame!”

H    : Asi ma rohaM di hami ale Tuhan, sai saut ma songon na hinalohomon ni rohaM.

P     :  Diadopan ni Debata tung so tama hita mangulahon nasa parsuruonNa i di hita songon Parhalado na manghobasi di HuriaNa dibagasan tohonanta i. Alai tung dibagasan roha sisean do hita mangulahonsa asa tarjalahi hita gogo na sian Debata laho mangulahon tohonan i.

H    : Tatap ma hami O Tuhan. Asi ma rohaM di hami ai Naposo na so hasea do hami; intap ulaon na patut do huula hami.

P     :  Taon 2022 gabe taon namampareahi hembang ni parbaritaon nauli ma hita marhite parbue ni haporseaonta dohot parsitutuan mangulahon parsuruonNa di hita. Asi roha ni Debata, manumpak ma Debata mamasumasu ruas ni Huria na sai tongtong tatangianghon ganup ari ganup borngin.

H    : Sai pasupasu ma Tuhan HuriaM nang hami on saluhutna.

P     :  Taon hasadaon ni roha ma di hita taon on. Songon hata ni Debata na mandok, “Molo tung adong apoapo marhitehite Kristus, dohot sosososo holong ni roha dohot parsaoran ni tondi, nang talup dohot asi ni roha, gohi hamu ma halalas ni rohangkon: Sada ma parrohahon hamu; sada ma haholonganmuna; saroha, sapingkiran ma hamu!

H    : Pinuji ma TUHAN Debata di nasaluhutna.

P     :  Hasangapon di Debata na di ginjang. Amen

6.      Marende BE. No. 64 : 1 - 2 “Naung Moru Do Muse Sataon” BL. 192

Ø  Naung moru do muse sataon, huhut lam suda bohalhi,

Beha do au na sailaon, ture do pangalahongki?

Lam ganda haporseaonku, nang holong ni rohangku pe.

Di Jesus dohot Debatangku, nang di donganku sasude?

Ø  Aut alusanku Debatangku, ra tung maila au disi,

Marningot salpu ni rohangku, ro di sude ulaonki.

Ai dosa do binaen ni tangan, gok dosa nang rohangku pe.

Nang pat, nang mata, nang pamatang, luhut marsala do hape.

7.      Jamita

8.      Marende BE. No. 67 : 2 “Debata Baen Donganmi” BL. 052

Ø  Debata baen donganmi! Molo Debata donganmu,

Ndang tarbahen ho be lilu, sai ture do langkami.

Debata baen donganmi, Debata baen donganmi.

9.      Tangiang Sian na ro

10.  Marende BE. No. 68 : 1-2 “Ihuthon Au Sude Hamu” BL. 093

Ø  Masilelean angka taon, ro di ujung na sogot.

O Jesus lehon parrohaon, na naeng tongtong marningot,

Di halalao ni aringki, huhut manimbang ujung ni.

Ø  Diudut Ho do hosangki, paidaida ahu,

Manang adong parbue ni na niulaM di ahu.

Hape jotjot tarhirim Ho, parbue i ndang olo ro.

11.  Tangiang sian na manjabui

12.  Marende BE. No. 69:1… “Ungkap Bahal Na Ummuli” BL. 084

(Papungu Pelean)

Ø  Jesus sai urupi hami, dohot di taon baru on;

Paimbaru gogonami, mangihuthon Ho tongtong

Pasupasu ma muse, na porsea sasude.

Ø  Pingkirangku, ulaonku, tau pasangap Ho ma i,

Dungo manang modom ahu, Ho tongtong di lambungki;

Nang lao ruar masuk pe, Ho ma donganki muse.

Ø  Taon parasinirohaon, baen di au sandok taon on,

Lam pahot ma hasesaan ni dosangku di au on.

Holan Ho do, Jesuski, tuk pasaehon dosangki.

Ø  Sai pagomos ma rohangku, manundalhon dosa i,

Lam paganda ma ringgashu, mangulahon patikMi.

Asa unang rohangkon, lalap di portibion.

Ø  Sai ramoti au Tuhanku, sipat taon naimbaru on!

Usung ahu di tanganMu, molo suda bohalhon.

Asa las rohangku lao, ia ro panjouM di au.

13.  Tangiang Panutup

14.  Acara Diaturkan Tersendiri