DIRAMOTI DEBATA DO BANGSONA (Ev. 2 Rajaraja 4:42-44)

 

BAHAN SERMON HKBP RESSORT KISARAN

Jumat, 16 Juli 2021

 

DIRAMOTI DEBATA DO BANGSONA

(Ev. 2 Rajaraja 4:42-44)

 

I.                   Patujolo

Sipata di bagasan ngolu on olo do songgop angka ragam hasusaan nang haporsuhon ala ni persoalan manang sitaonon. Somal do di bagasan ngolu ni jolma molo songgop sitaonon di ngoluna pintor jalo do ibana mangalului dalan haruar sian nasa persoalan di ngoluna. Adong do deba patupahonsa marhite dalan na sintong alai tung na sai adong do deba patupahon dalan ruar marhite dalan na hurang sintong, di bagasan rohana holan, songon dia do ibana malua sian nasa sitaonon i. Alai tung boi do dohononta, ala balga ni sitaonon i gabe tung tangkas ma panghilalaan ni angka na porsea pangaramotion ni Debata di bagasan ngoluna dung malua ibana sian i saluhutna.

Panurirang Elisa dijou do songon halak ni Debata. Tung mansai godang do pambahenan na mambahen longang panghilaan alas i Elisa on. Di na masa hasusaan ni pigapiga jolma sai ingot do nasida asa rot u panurirang Elisa mangido pangurupion. Di bagasan situasi on ndang na gabe patengahon diri si Elisa jala manghilalahon na tumimbo sian angka na deba alai tarida do sian serep ni rohana di na laho mangurupi angka na marsak jala na marsitaonon.

II.                Hatorangan ni Turpuk

Ay. 42. Halak sian Baal-Salisa halak na daulat na manghasogohon marsilehonlehon tu angka nasida na so pola sintong di parange nang tu hadirion ni malim manang halak Lewi. Alai songon angka na daulat roha do nasida, tongtong do nasida patupahon silehonlehon nasida tu Debata. Dibagasan turpuk on taida do parjumpangan halak sian Baal-Salisa dohot panurirang Elisa. Diboan halak sian Baal-Salisa do patumonaanna tu halak ni Debata. Molo mangihuthon sian mula ni turpuk di bindu on jotjot do halak mamboan angka silehonlehon nasida tu halak ni Debata. Dipatupa nasida i ala daulat ni roha halak ni Debata i jala ala pangurupion na pinatupa halak ni Debata di nasida. Umbahen i, gabe sada hasomalan do di halak laho patupahon silehonlehon tu halak ni Debata.

Ay. 43. Disarihon si Elisa to situan na torop i marhite angka silehonlehon nasida tu ibana. Mangihuthon nasa na binoan halak sian Baal-Salisa songon na so jadi do lehonon na binoan tangan nasida tu situan na torop i molo mangihuthon torop ni bilangan nasida. “Beha ma pangalehonku mangganupi saratus halak?” Songon na so boi do sagion na binoanna tu situan na torop i. Alai panurirang Elisa patoguhon roha nasida hombar songon na tinonahon hata ni Jahowa di nasida. “Sai lehon ma i di situan na torop i, asa mangan nasida; ai songon on do hata ni Jahowa: Ingkon mangan angka jolma i jala ingkon adong dope teba.” Dipangasahon si Elisa parbinotoan hombar tu na tinonahon ni Jahowa. Hata ni Jahowa ima sada ketentuan. Ketentuan yang tidak pernah meleset. Hatontuan i ma na gabe ojahan na pinasahat ni si Elisa tu halak sian Baal-Salisa.

Ay. 43. Tutu ma nian masa songon na tinonahon Jahowa tu nasida songon naung pinasahat si Elisa. “Gabe mangan nasida, jala adong dope teba, hombar tu hata ni Jahowa.” Molo taida di ayat on, boi do tubu di roha ni halak Baal-Salisa na masa i songon tanda halongangan na pinatupa ni Jahowa. Hapengani ndang roha nang pingkiran ni jolma i na ingkon saut alai molo nunga tinonahon Jahowa, na ingkon saut do saluhut na i. Tangkas ma on di topik minggu na mandok diramoti Debata do bangsoNa. Tutu do masa i, ala hata ni Jahowa do i. Ndang tadinghonon ni Jahowa molo dung dihatahon Debata diramoti bangsoNa.

III.             Sipahusorhusoron

Diramoti Debata do bangsoNa. Songon pangaramotion ni Debata Jahowa di nasa na mangalualu tu Ibana marhite panurirangNa si Elisa, tung mansai gondang do naung manghilalahon denggan basa ni Jahowa di nasida. Dipalua do nasida sian ragam parmaraan. Tangkas idaon nasida tanda halongangan na pinatupa Debata Jahowa di nasida. Sian na masa i patambahon pos ni rohanta di Debata Jahowa do. Sai saut do nasa na nihatahon ni Jahowa di angka naniasian ni Jahowa (ptd. 2 Musa 23:20). Tutu ndang pasombuan ni Debata Jahowa angka na niasianni Jahowa (Psalmen 16:10) ala holong ni rohaNa di hita. Nuaeng sipahusorhusoron di bagasan rohanta, tung naung boha do pas ni rohanta di Debata? Molo ninna rohanta do, diramoti Debata do bangsoNa na marlapatan ma i ndang tadinghonon ni Debata hita. Alai sipata olo do hita manghilalahon keraguan di nasa pangaramotion ni Debata di hita. Tutu sada kepastian do di hata i na mandok diramoti Debata do hita nang bangsoNa. Jadi di hita patamba panghirimon ma anggo i di hita nang pos ni rohanta di Jahowa Debata ai tung balga situtu do pambahenan ni Debata di hita jala boi do tubu panindangion na mandok “sai songon tanda halonganan do nasa na masaon di hita ala pambahenan ni Jahowa”. Pos ma rohanta di Jahowa. Ditambai haporseaonta. Dipatugu hita di bagasan panghirimon. Marsihohot di bagasan Debata Jahowa sambing.