JAMITA EVANGELIUM EFESUS 2:11-22

 

Jamita Minggu 18 Juli 2021

Efesus 2:11-22

            Huria ni Tuhanta, Nuaeng masuk ma mita tu minggu VII dung Trinitatis, jala na gabe topic minggu di hita ima : Hasadaon dohot Hadameon Dibagasan Tuhan. Tontu mansai ringkot do hasadaon, mansai ringkot do hadameon. Isarana songon hita dimasa pandemic on, tontu porlu do hasadaon dohot hadameon. Molo naeng monang do hita maralohon covid 19 on ingkon marsada do hita saluhutna, ingkon olo do hita mardame marhite hite na olo mangihutton prokes di saluhut aktifitas ta ganup.

            Huria ni Tuhanta, ia  Di huria Efesus na parjolo, hangat dope taringot tu na mangalapati hamamate ni Kristus di hau pinarsilang dohot panghorhonna dingolu dohot di parsaoran ni angka na persea. Jumpangta ma piga piga gagasan taringot tu lapatan ni panghophop ni Kristus di silang, i ma isara ni panobusion, pamintorion, dohot pardengganan. Marhite gagasan pardengganan i dipaandar hauungkap ni dalan tu sude halak(Jahudi dohot na so Jahudi laho manjonokT bahkan masuk tu parsaoran dibagasan harajaon ni Debata/ Tarbungka ma kesempatan di Sude halak ( Jahudi dohot na so Jahudi) laho paturehon parsaoran maradophon Debata songon i maradaphon dongan na jolma. Alani I, laho mangurupi hita asa lam ta antusi tupuk on adong ma piga piga poin na porlu si botoon ta:

 

·         Jambar ni halak sipelebegu

            Na manjalo manang hasahatan ni surat efesus didok, na badia na di Efesus( 1:2). Adong muse didok di 2:1-3, najolo nasida hea mangulahon lomolomo ni daging, jala tama sirimasan. Na tumangkas muse didok di 2:11-12, nasida sipelebegu hian(ndang tarsunat jala ndang Jahudi). Taida dison, ma latar belakang nasida na so Jahudi. Nungga halak Kristen nasida tingki di dapot surat on, alai ternyata mansai ringkot dope laho manaringoti latarbelakang nasida Ditaringoti masa najolo ni huria i, i ma status hadosaonna( na tama sinimasan), tradisi ugamona (na so horong ni halak na tarsunat) dohot harugian nasida andorang so manjangkon Kristus (ndang adong parsaoranna maradophon Debata ni Abraham-Ishak-Jakob). Parjongjong nasida i ma halak na mian di duru ni haporseaon hajahudion. Tarrajum ma nasida halak na dangol jala dao status nasida di toru ni halak Jahudi. Boasa tarrajum halak na dangol nasida i ma ala ndang adong parjumpangan nasida dohot Debata. Ala so adong parsaoran nasida dohot Debata gabe ndang adong sihirimon nasida. Jala ndang adong dapot nang bagabaga taringot tu sangkap ni Debata tu jolo na marpardomuan tu Mesias.

 

·         Ulaon Pardengganan

Marhite asi ni roha ni Debata gabe diungkap dalan haluaon tu sude bangso. Sude halak (Jahudi dohot na so Jahudi) rap parjambar di sangkap haluaon na sian Debata marhite ulaon panghophopon ni Jesus Kristus Ulaon panghophopon ni Jesus Kristus di 1:7 didok mamboan haluaon dohot hasesaan ni dosa. Di bagasan turpuk on, ulaon panghophopon ni Kristus mamboan perdengganan dohot dame di antara halak na seleleng on ndang adong parjumpangan, i ma: nasida songon halak Sipelebegu dohot halak Jahudi. Ulaon pardengganan na pinatupa ni Kristus na di hau Silang (ayat16) tudos tu na manangtangi dorpi parholangan (ayat14) dohot na mamusa hamusuon (ayat16). Dua pihak na so boi parjumpang na sailaon gabe dipadomu jala dipasada marhite ulaon pardengganan na pinatupa ni Kristus (ayat15). Gabe jumpang ma rumang ni dame na sasintongna na tubu sian parsaoran na bagas maradophon Debata.

 

·         Hatuaon dohot Hatauon

Molo status halak na di ruar Hajahudion najolo dietong harugian jala tumoru sian halak Jahudi alai molo nunga dijangkon jala mian di bagasan goar ni Kristus, gabe dipados ma parjongjong nasida di bagasan parsaoran ni angka na porsea. Ndang adong be istilah na dao manang paisolat ala luhutna nunga gabe dongan saharajaon, dongan na badia jala dongan sabagas ni Debata.

Di udutna, parsaoran di bagasan Harajaon ni Debata ingkon tongtong mardalan tu jolo. Parsaoran i ndang holan sae di dirina sandiri. Parsaoran i ingkon tongtong dipauliuli jala lam tu gandana. Ingkon sahat ma tu sintasinta na songon i, ingkon loason nasida ma Debata mangula (2:7) di bagasan hadirion dohot dibagasan parsaoran ni angka na porsea. Alana ndang holan intap ni ulaon panobusion dohot pardengganan, na mangula do Ibana sahat ro di ujungna laho pasingkophon sangkap na uli naung pinungkaNa andorang so ojak dope tano on (1:4).

 

            Huria ni Tuhanta, tontu mansai ringkot do keharmonisan ni angka na sahaporseaon/ na sahuria. Molo pe di partingkian saonari lam godang na mamboan mara tu hadameon dohot hasadaon ni angka na porsea/ na sahuria. Ingkon marusaho do hita mangeahi hasadaon dohot hadameon. Sai unang masa pangalaho na paduruhon dongan ( kecuali ala ni na so disiplin dohot naung lipe haporseaonna). So tung dipaduru nampuna huria i hita.

marragam do latar belakangta, sian habatahon pe ragam do marganta, ragam do na tapingkiri, marasing do adatta, alai dipasada do hita digoar ni Kristus Jesus. Dibagasan Kristus ma hita dipauliuli gabe pamianan ni Debata di bagasan Tondi. Debata mian dibagasan ngolunta, na manorusi ateatenta mandok tu donganta sada do hita. Rap mangalangka ma hita mamujimuji Detata, ndang mardia imbar hita sian utara dohot dangsina. Antong taloas ma Kristus manguluhon ngolunta. Amen.