LUKAS 21 : 25 - 36, DUNGO JALA MANONGTONG MARTANGIANG (BERJAGA-JAGA DAN BERDOA SENANTIASA, MINGGU ADVENT I, 01 DESEMBER 2024

 

MINGGU ADVENT I, 01 DESEMBER 2024

DUNGO JALA MANONGTONG MARTANGIANG

(BERJAGA-JAGA DAN BERDOA SENANTIASA

LUKAS 21 : 25 - 36

I. PATUJOLO

Turpuk on ima pangajarion taringot tu angka na naeng masa andorang haroroni Jesus napadualihon. Digombarhon Jesus do angka tanda na naeng mamolgap portibi on. Ditongatonga gombaran haroroni ajalni hasiangan on, dipaingot dohot dipodahon do tu hita asa dungo jala manongtong martangiang. Sipaingot Jesus i pabotohon tu hita angka tanda na naeng masa i ma na adong hamusuon, hagunturon, parporangon, lalo, sahit, haleon nang angka na porsea tartangkup. Didok Jesus pe saluhut na i ndada laho manghabiari alai laho patuguhon asa unang di ihuthon angka parpoda haliluon dohot unang tarsonggot molo masa si songon i. Alani ingkot dungo jala manongtong martangiang asa malua hita sian na manghaliluhon hita.

II. HATORANGAN

Ayat 25 – 28 taringot Angka Tanda. Molo marganti musim sian partaonan ngali tu partaonan las sai adong do tanda na nang panghorhonna, isarani molo martunasi punsuni hau ara jala rungkar angka bulungna naung jonok ma partaonan las (Mat. 24:32). Songon pargantian musim na adong tandatanda na songoni do nang haroro ni Tuhan Jesus paduahalihon, adong tandatandana. Di angka jolma, boi do gabe tahutan marnida angka tandatanda na adong, ima di na masa angka tanda di mata ni ari, di bulan dohot di angka bintang pe; jala hapusohan ma angka bangso di tano on jala bobonosan, bahenon ni gasak ni laut i dohot galumbangna. Langitan marsuara suang songoni panggora ni gasak ini laut dohot galumbangna, saluhutna patubegehon suarana patuduhon na adong kekacauan, hasusaan na parir. Alani molo masa angka tandatanda i dirgak ma hamu ala nunga jonok haluaon muna. Dirgak ma hamu mandok manatap tu Jesus, simalolong na terarah tu Jesus dibagasan haporseaon jala marolopolop ala haluaon nunga jonok, jadi na sa na manghaporseai Jesus dipaimbaru. Sialani do ndang pola be tahutan. Dipahibul ma roha manang fokus ma di hasintongan hata ni Debata na gok huaso asa unang dipalindak, dipalilu angka huaso ini portibion.

Ayat 29-33 taringot Umpama. Marhite umpama i di igil do asa ummara antusan ini situan natorop aha do na didok ni Jesus. Di turpuk on dihatahaon Jesus do sada umpama taringot tu hau ara dohot hau na asing na gabe parsiajaran, marningot angka tanda di ayat sebelumna. Jadi umpama taringot tu hau ara laho manggombarhon asa jaga hita di angka nubuatan naung dipaandar Tuhan Jesus. Hau ara na boi do diparateatehon, bulung na manang parbuena, molo martunas patuduhon naung jonok partaonan las. Songoni ma angka tanda alam semesta portibion na boi ta parateatehon mandok naung jonok harajaon ini Debata. Didok Jesus “Salpu pe sogot langit dohot tano on, anggo hatangki na so tupa salpu”, ia langit dohot tano secara fisik punya keterbatasan, dibatasi ruang dohot waktu. Salpu do saluhutna, ngolunta on pe salpu do ai holan hata ni Debata do na so tupa salpu. Tangkas do ia Hata ini Debata ima diriNa sandiri do (ida. Yoh.1:1); Nasa Surat i, sinihatan ini Debata do (2 Tim.3:16). Ayat 34 – 36 taringot dungo ma hamu. Jaga hamu ma dirimuna unang sorat rohammuna binahen ini parminumon dohot parmabuhon dohot panarihon di hangoluan on. Sada singotsingot ma on tu angka na porsea boa do pardalanan ni ngolu na siganup ari. Marhite turpuk, dipaingot asa jaga ma rohamuna, dungo ma hamu marlapatan asa manongtong mian dibagasan kewaspadaan, hati-hati, bersiap-siap, roha na manongtong satia tu Tuhan Jesus. Sian dia gogo asa boi dungo? Ima marhite na melatih diri martangiang, jala marsihohot martangiang, marparsaoran dohot Tuhan Jesus.

III. PANIMPULI

Masa Advent ima tingki na une laho pahusorhusorhon di bagasan roha haroroni Tuhan Jesus dibagasan huaso dohot hamuliaonNa na laho manguhumi na mangolu dohot na mate. Di masa Advent on merenungkon angka tanda na masa dohot na naeng masa ndada alasan laho gabe mandele manang gabe mandao sian Tuhan Jesus. Advent paingothon hita saluhut asa cerdas secara rohani laho menyikapi angka na masa nang pe so taboto pasti na manang sadihari tingkini. Advent na ro ma Tuhan i, antong tagam ma. Alani ma aha do na boi putihan sian turpuk on? Didok jaga ma hamu, dungo ma hamu (ay. 34) manongtong martangiang (ay. 36). Jaga ma unang tarpodom, unang terpengaruh tu angka na masa di portibion, alai marsihot ma di tangiang na mangalehon gogo di ganup na porsea (ida BE 487). Di advent na parjolo on huhut marningot ari HIV/AIDS sedunia, na paingothon hita lao manghaholongi angka dongan na hurang diparateatehon songon tanda na marsihohot manomunomu Jesus. Di hurianta adong do lembaga HIV/AIDS na fokus mendampingi, mangurupi Orang dengan HIV/AIDS (ODHA), na sai tongtong mangalehon angka paarbinotoan taringot tu HIV/AIDS on ala sai jumpang dope hamaolon manjalo ODHA on ala dianggap dope sahit na sumalin. Manongtong ma martangiang anggiat ODHA mandapot hak na di tongatonga ni masyarakat.