Topik: Pauli Hamu Dalan Di Jahowa – Persiapkan Jalan Untuk Tuhan. Jesaya 40: 1-5

 

BAHAN SERMON JAMITA TU MINGGU ADVENT II 08 Desember 2024

Jesaya 40: 1-5

Topik: Pauli Hamu Dalan Di Jahowa – Persiapkan Jalan Untuk Tuhan

I. Patujolo

Sada sihol ni roha di halak na adong di bagasan hurungan manang penjara ima di tingki adong barita pembebasan/pelepasan di ibana. Songoni do nang turpuk ta di Jesaya 40:1-5 on, ima turpuk na sinurathon ni panurirang Jesaya jala masuk tu bagian Deutro Jesaya (40-55), na di perkirahon di tingki masa habuangan di Babel. Bagian on ma na gabe sada pembaharuan, pos ni roha dohot apul apul di bangso i di tingki di habuangan Babel. Na gabe sada pangondion manang parlinggoman sian Debata tu bangso Israel, di tingki mulak bangsoi sian  masa habuangan di Babel hinorhon ni dosa dosana. Alai marhite asi dohot holong ni roha ni Debata di bangsoi,  gabe dipatuduhon Debata ma haluaon na tu nasida sian habuangan i, laos boi ma nasida manjangkon  haluaon/pembebasan na sian Debata, ima na adong di turpuk ta on.

II. Hatorangan Ni Turpuk

Ayat 1-2, apuli hamu ma bangsoKu,... dok hamu tu roha ni isi ni Jerusalem. Hata apuli di ayat 1 on, ima na patuduhon sada tanda apul apul na mansai lambok dipasahat tu angka na manghilalahon sada hasusaan, habot ni roha, parungkilon, hadangolon dohot angka na hansit hinorhon ni hamatean. Alai molo nunga dipasahat hata apul apul, sahira na adong do sada hagogoon dohot ketenangan di bagasan roha ala sada panghophop na boi dipanghilalahon sian Debata. Songoni ma nang dipanghilalahon bangso Israel marhite panurirang Jesaya na  tongon marsitaonon di habuangan Babel na mangalehon tona pangapulion/penghiburan na sian Debata. On patuduhon, nang pe bangso i naung mardosa, manundalhon jala manadingkon Debata, alai tongtong do Debata marasi ni roha, memiliki belas kasihan, laos marsangkap mangapuli bangso-Na i. Pandohan: Apulapul ma dok hamu tu roha ni isi ni Jerusalem, ima na gabe tona na dipasahat tu bangso ni Debata asa taruli di hasesaan ni dosa nasida huhut nunga marujung parungkilon nasida, ai nunga sesa dosa nai jala Debata do na mangalehon hasesaan  ni dosa i (pengampunan dosa) tu nasida.

Ayat 3-5, Pauli, patigor hamu dalan di Debata asa patar hamuliaonna. Hata “paulihon dalan” di bagasan turpuk on, ima songon sada tanda na patuduhon na ingkon adong sada penyambutan tu sahalak na tung mansai  terhormat. Songoni ma nang di haroroni Debata, na patuduhon hadirionNa, hagogoonNa, dohot hamuliaonNa di bagasan ngolu ni bangso i. Jala tona ni Debata do tu nasida asa ringkot b e m a laho paradehon, mempersiapkan, roha dohot pingkiran di sude gulmit ni ngolu laho manomunomu haroro niTuhan na Badia i. Jala on ma na patandahon hadirion ni Debata di bagasan ngolu ni bangso Israel marhite haluaon na niboanna tu bangsoi. Apul apul tu bangso Israel dipungka ma i dohot paulihon dalan, ai dalan ido na boi mamboan nasida tuhamumulak sian hadosaonna. Jala dung masa saluhutna i, hasangapon ni Debata dipapatar tu saluhut bangso, laos sude rap marnida songondia huaso dohot holong ni Debata mangula dingolu ni bangso nahinaholonganNa i.

III. Sipahusorhusoron 

Di bagasan parngoluan nuaeng on, gumodang do halak mangolu holan mangasahon pingkiranna sambing dohot gogona di na laho mangantusi saluhut sangkap nang pambahenan ni Debata di bagasan ngoluna. Nang pe nunga tangkas ai angka halak na gale jala na terbatas do nian hita di adopan ni Debata, umbahen na so adong na boi mengukur manang mangantusi huaso ni Debata secara keseluruhan. Alai, tontu adong do sada cara na boi ta ulahon laho mangantusi taringot tu hadirion manang huaso ni Debata na so tarbilangi, ima marhite haporseaonta na mangolu. Marhite haporseaon i, diajarhon do tu sude halak asa tutu marpos ni roha laho tumanda Debata dohot saluhut sangkapnai

Ondol tu topik ni minggunta ima pauli hamu dalan di Debata, on ma na manogihon hita di bagasan parngoluan nuaeng on asa rade laho manomunomu haroro ni Debata sipalua hita sian angka parmaraan ni parngoluon on, jala na mangalehon las ni roha di hita. Jala nuaeng nunga sahat hita tu minggu advent na paduahon, tarjou do hita angka halak na porsea asa tutu rade manomunomu haroro ni Jesus Kristus marhite perayaan natal, ima hari hatutubu ni Jesus Kristus siboan hadameon, hangoluan dohot haluaon di hita saluhutna. Alani i, ta parade ma dirinta, rohanta, pingkiran nang sude na adong di hita, nang di saluhut situasi ni parngoluon on asa manjangkon Ibana sian habuluson dohot las ni roha. Ai nunga be sipardohot Jesus Kristus sebagai bagian sian sejarah di saluhut pardalanan ni ngolunta. Amen.