ACARA IBADAH RAPAT HURIA HKBP KISARAN KOTA

 

Ibadah Pamuhai Rapot  Huria HKBP Kisaran Kota

Jumat, 26 Februari 2021

========================================================

Niuluhon ni                             : Pdt Albert J Pasaribu STh

Tangiang Pangondianon        : Diak M Br Hutagaol, M.Pd

 

     1. Prelidum: Martangiang  na hohom dibagasan roha

     2. Jaoujou tu Parsaoran

U: Horas ma di hita saluhutna dibagasan tingki on!

H: Horas ma tutu di hita saluhutna

U: Mauliate ma tadok tu Debata Pardenggan Basa i, ala denggan ni basaNa sambing do na pataruhon hita tu inganan on, tu Rapot Huria HKBP Kisaran Kota di tingki on. Antong, Dibagasan serep dohot unduk ni roha tu Debata tahalashon ma parsaoranta di tongatonga ni punguanta.

H: Hupuji hami ma Ho Tuhan, ai denggan ni basaM sambing do na padomuhon hami, umbahen na boi hami marsaor di tingki on.

U: Dijou Debata do hita asa manghobasi di tongatonga ni huriaNa i. Antong, taparade ma ngolunta manjalo gogo dohot habisuhon sian Debata. Tapuji jala tapasangap ma Ibana, marende hita.

      3.  Marende  BE. No. 14:1+2            ”Puji hamu”

Ø Puji hamu Jahowa tutu pardenggan basa, parasiroha salelenglelengna i. Pardenggan basa i, parasiroha i.              (jongjong)       

Ø Ingot tongtong ale tondingkon sudena denggan na pinasonggop Debata tu ho denggan basaNa do, na pangoluhon ho.

 

     4.  Votum Introitus/Invocatio

U:  Marhitehite Goar Ni Debata Ama, dohot Goar ni Anakna Tuhan Jesus Kristus, dohot goar ni Tondi Parbadia na tumompa langit dohot tano on.

H:  Amen

U:  “ Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue!” ninna Tuhan Jesus Kristus. Alani borhat ma hamu mamaritahon Hata i.

H:   Mauliate ma Tuhan, dipamillitonMi di hami. Dison do ahu, suru ma ahu!

U:   Di jolo ni angka ari on, pagomos hamu ma tanganmuna. Ai bahenonKu ma hamu gabe pasupasu tu saluhut bangso, asa gabe bangsongKu nasida, jala Ahu gabe Debata nasida. Songon hamu dibagasan Ahu, songoni ma nang nasida dibagasan Ahu.

H:   Mauliate ma Tuhan, dipamillitonMi di hami. Dison do ahu, suru ma ahu!

U:   Puji hamu ma Jahowa, baritahon hamu ma Goarna i, pabotohon hamu ma di tongatonga ni angka bangso angka pambahenanNa i!

       Haleluya.Martangiang ma hita! Ale Tuhan Debata, Ama na marasiroha! Hudok hami mauliate tu Ho, sian nasa rohanami, ala dijou hami sian haholomon tu hatiuron, marhitehite AnakMu Tuhan Jesus Kristus. Sai dirajai tondiM na badia i ma hami, asa lam ganda haporseaonnami, jala asa lam badia parangenami, unang marlindang binahen ni portibi on. Nunga dipapungu Ho hami sian ganup Lunggu panghobasion nami di HKBP Kisaran Kota on, laho patupahon Rapot Huria manghatai Program dohot anggaran ni huriaM tu taon 2021 on. Antong sai dongani jala parbisuhi ma hami, asa margogo hami laho pahembangkon panghobasionnami. Pos do rohanami, lehononMu dame dohot holong ni roha di parrapotonnami, asa marlas ni roha saluhutna mamuji pasangaphon Ho jala marsangap ma goarMu na badia i. Ale Tuhan pasaut ma bagabagaMi, tangihon ma pangidoannami, marhitehite AnakMu, Tuhan Jesus Kristus, Tuhannami.  Amen.   (hundul)   

5. Marende: BE No. 727 : 1  “Hupillit Asa Marparbue”

Ø Songon on didok Tuhanta Jesus: Ahu do na mamillit hamu, asa lao hamuna marparbue, jala mian parbuemuna i. Hupadiri asa lao marparbue, jala mian parbuemuna i. Hita na pinillit ni Tuhanta, ingot ma hata ni Tuhan i, parbuehon ma nasa na denggan, na hombar tu patik ni Tuhan i. Na tarjou do hita paimbaru diri, dibagasan Kristus Tuhanta i. Tasolsoli ma nasa dosanta, tapauba ma rohanta, tapelehon ma nasa dirinta, baen pelean na mangolu, na badia di Tuhanta, na hinalomohon ni Debata. Amen.

6. Manjaha Hata ni Debata ayat sijahaon manogot : Heber 2 : 14 - 18

U:  Asa songon dakdanak partohap di mudar dohot sibuk, gabe suman do dohot Ibana partohap disi, asa marhitehite hamatean i dipasohot Ibana sibolis i, na marhuaso mambahen mate.

H:   Asa dipalua sasude na pinarhatoban ni biar ni roha managam hamatean, saleleng mangolu.

U:   Ai apala angka surusuruan disarihon, pomparan ni Abraham i do.

H:   Ala ni i, ingkon gabe dos situtu Ibana tu angka anggiNa asa gabe parasiroha Ibana jala Sintua ni Malim haposan maradophon Debata, laho pasaehon angka dosa ni bangso i.

U:   Ai intap ni naung marrsitaonon Ibana di na tarunjun i, haurupan Ibana do angka na tarunjun i. Ima sahatna. Martua do angka na tumangihon hata ni Debata jala na umpeopsa. Amen.

 

     7. Marende BE. No. 504 : 1               Ditogu Tuhan Jesus Au 

Ø Ditogu Tuhan Jesus au, i do na mangapuli au. Di ganup dalan nang tung maol tanganNa do tongtong huhaol. Di togutogu Jesus au, tanganNa sai maniop au. tongtong ma siseanNa au, paima boi tu surgo lao.

     8. Tangiang Pangondianon   :

      9. Marende BE. No. 30 : 1                Jesus Lehon Hatorangan

Ø  Jesus lehon hatorangan, hapistaran mangantusi hataMi. Lehon mata na marnida dohot roha na umboto dalanMi. Asa tongtong maradophon bohiMi mardalan hami. Asa digomgomi TondiMi ma hami.

    10. Jamita :

    11. Marende BE. No. 512 : 1, 4          Di Dalani Jesus           (P. Pelean)

Ø  Didalani Jesus tano dohot laut Tahi holong ni rohaNa dipasaut. Na mura luhut dibaen TondiNa i, dung disesa utang ni dosanta i. Hahaanggi, rohamu sude, taarahon ma donganta be. Hahaanggi, dao nang jonok be! Hara tu jolo Na donganmu sude.

Ø  Ganggu roha mida pangunjunan i, moru pe gogonta lao marungkil i. Sai tabereng dompak Jesus Tuhan i, ganda hiras ni rohanta baenon nii. Hahaanggi,……

Ø  12. Laporan Panitia

     Sian asi dohot holong ni Tuhanta, nunga sahat hita tu inganan on. Hombar tu Aturan dohot Paraturan Huria Kristen Batak Protestan , tahirim do torop ni peserta Huria on ima:...........Halak. naung ro:.....Halak, jala na parmisi.....halak, na so ro:......halak. Torop ni peserta naung ro dohot na parmisi ima:.....halak (.....%), sian jumlah peserta naung ro, nunga manggohi quorum.

 

     13. Marende BE. No. 309 : 1             Raphon Tuhan Jesus i

Ø  Raphon Tuhan Jesus i pungka ulaonmu. Ingkon tu Ibana i parguruhononmu. Baen Ibana donganmi, hehe dohot modom. Dege ma bogasNa i. Rohami pahohom.

    14. Pembukaan Rapot Ressort

Pandita Ressort:

Marojahan tu Aturan dohot Paraturan Huria Kristen Batak Protestan, domu tu harentaon Rapot Huria di Huria Kristen Batak Protestan, jala hombar tu laporan ni Panitia  , torop ni na ro nunga be manggohi quorum jala sah mambuat angka haputusan. Antong, ahu Uluan HKBP Kisaran Kota dibagasan roha na mandok mauliate tu Debata, hubungka ma Rapot Program Kerja Dan Anggara HKBP Kisaran Kota on, dibagasan Goar ni Debata Ama, AnakNa Tuhan Jesus Kristus dohot Goar ni Tondi Parbadia. (Ketuk palu 3 x). Didongani jala sai dipasupasu Tuhanta ma Rapot  on, gabe hamuliaon dohot hasangapon di Debata jala las ni roha dohot pasupasu tu sude ruas ni HuriaNa. Amen.

1)      Marende BE. No. 12 : 1                     Dipuji Rohangkon Do Ho

ü  Dipuji rohangkon do Ho, Jahowa Tuhanhi. Huhut hubaritahon do sude pambaenanMi.

 Tangiang Pujipujian + Panutup (Agenda).

 

 

IBADAH PANGUJUNGI

RAPOT HURIA HKBP KISARAN KOTA

Jumat  26 Februari 2021

---------------------------------------------------------------------------------------------------

Na Manguluhon/Jamita          : Biv : R Br Silalahi

Tangiang Pangondianon        : St T Lumban Gaol

1.Pangaradeon  Diri (Martangiang na hohom dibagasan roha)

2.Marende BE. No. 581 : 1 – 2                      Sangap do Jahowa

ü Sangap di Jahowa na sun timbul i. Balga ni holongNa ndang tarasam i.  Dilehon AnakNa na sasada i, manobus hita jolma pardosa i. Puji ma Debata ale manisia, las roham, las roham, somba ma Debata. Dapothon Jahowa na sun timbul i, marhite AnakNa Tuhan Jesus i.   (jongjong)

ü Tung so hasuhatan do basaNa i, marhite AnakNa ni lehonNa i. MudarNa durus do di hau silang i, rara pe dosanta ias di baen i. Puji ma…

 

3.Votum – Introitus – Tangiang

U: Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia, na tumompa langit dohot tano on.

H:  Amen

U: Parasi roha jala pardenggan basa do Jahowa, lambat tarrimas jala parasi roha godang.

H: Ndang tongtong Ibana manorui, jala ndang gotos rohana saleleng ni lelengna.

U: Ala ni unang ma hamu gabe sarombang dohot portibion; alai gabe imbaru ma hamu, ala i do na pinangido ni Debata.

H:  Paimbaru ma dirinami di bagasan TondiMi ale Tuhan, jala di bagasan hatigoran dohot hapolinonMi ma hami mangula ulaonMu.

U: Antong, masiapulan ma hamu marhite Hata ni Debata, ala tu habadiaon do dijou Debata hita. Haleluya, martangiang ma hita:  Ale Tuhan Debata parasiroha jala pardenggan basa, mauliate ma Tuhan ala nunga dipungka Ho ulaonnami di bagasan sadarion di bagasan holong ni rohaM jala marujung ma dibagasan tingki on. Ramoti jala pasupasu ma hami laho patulushon saluhutna i. Lehon ma roha biar mida Jahowa di hami asa marsitutu hami mamangke tingki na nilehonMi di hami. Urasi  ma rohanami marhite HataM na badia i, asa tama hami mamuji dohot pasangaphon goarMu. Di bagasan goar ni AnakMu Tuhan Jesus Kristus martangiang hami tu Ho. Amen.                                   (hundul)

 

4.Marende BE. No. 723 : 1                Tu joloM O Tuhan

ü Tu joloM o Tuhan sahat ma diringkon pangke ma au hombar tu lomoM. Molo ndang Ho Tuhan maringanan di au, diringkon ndang mararga be i. Tung pogos pe dison manang sonang tahe marsigantung tu Ho sasude. Holan Ho huihuthon ndang be diringkon togutogu ma tu na ture.

5.      Manjaha Johannes 15 : 10 – 17   (Taringot tu na masihaholongan)

U:    Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohana.

H:    Umbahen na huhatahon i tu hamu, asa di bagasan hamu halalas ni rohangki, jala asa gok halalas ni rohamuna.

U:    On ma patikku: Naeng ma masihaholongan hamu, songon Ahu na mangkaholongi hamu.

H:    Na sumeahon hosana humongkop angka alealena, i do parholong ni roha na so halompoan.

U:    Alealengku ma hamuna, molo diula hamu na hupatikkon i tu hamu.

H:    Ndang hugoar be hamu anak somang, ai ndang diboto anak somang na niula ni indukna; aleale do hamu hudok, ai nunga hupabotohon tu hamu saluhutna na hubege sian Damang.

U:    Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu.

H:    On ma hupatikkon tu hamu. Masihaholongan ma hamu!

U:    Ima sahatna, martua do angka na tumangihon hata ni Debata jala na umpeopsa. Amen.

6.Marende BE. No. 481 : 3                Godang Dope

ü Tatiru holong ni rohaNa i, pinatuduhon ni Tuhanta i. Tahaholongi ma donganta i, ai ruas ni Tuhanta do nang i. Mardame ma, masijalangan ma. Tatuju ma solhot tu Debata.

7.      MANUTUP RAPOT HURIA

Uluan Huria

Mulak ma hita dibagasan dame dohot las ni roha mamaritahon barita nauli i. Angka haputusan naung tatotophon dibagasan rapot on sai dipargogoi Tuhanta ma hita pasauthon i.

Peserta:

Taeahi ma na tau pauliulihon dohot pasadahon, tongtong ma tatiop hata ni Tuhanta na mandok: Gohi hamu ma halalas ni rohangkon, Sada ma parrohahon hamu, sada ma haholongan muna, saroha sapingkiran ma hamu.

Uluan:

Nuaeng pe tapaujung ma Rapot Huria on dibagasan las ni roha huhut mandok mauliate tu Debata. Dibagasan goar ni Debata Ama, AnakNa Tuhan Jesus Kristus dohot Tondi Parbadia. Amen.(Ketuk Palu 3x).  

8.Marende BE. No. 672 : 1                Tung Godang situtu

ü Tung godang situtu ulaonmu antong dipasahat Tuhanta tu ho. Ndang adong be tingkim marnalemba tahe, ngolumi bahen tiruan tongtong. Sai patupa mai alani Tuhan i, so mangkirim balosNa tu ho. Debata do marnida na ni ulami. Manang na adong parbue ni i.

9.              Tangiang Pangondianon

10.          Marende BE. No. 743 : 1                   O Tuhan Togutogu Ma

ü O Tuhan togutogu ma au, tu dalan lomo ni rohaMi. Raphon Ho sonang mardalan au, nang rahis maol sidalanki. TondiMi baen manggohi au on, margogoihon au naposomon. Pasangap Ho di ngolungkon, paima sahat tu surgo au on.

11.  Tangiang Panutup.

12.  Marende BE. 435 : 1..Marolopolop Tondingki

ü  Marolopolop tondingki ai  naung  di  tobus Jesus i. Hamu sude, bege ma i, sai las rohangku  mandok i. Sonang ni tingki i, dung jumpang Jesus Tuhanki !  Tondi Na mangajari au,  tarbaen marlas ni roha au.  Sonang ni tingki i, dung jumpang Jesus Tuhanki.

 

 

ARI UHUM SOGOT MATEUS 25:31-46

 

NAS                                        : MATEUS 25 : 31 - 46

TOPIK                                   : ARI UHUM SOGOT (Penghakiman Terakhir)

 

I.                    PATUJOLO

Turpuk on ima sabagian sian ragam ni pangajaran ni Jesus na boi peakhononhon songon bagian panimpuli na marhahonaan taringot tu angka na naeng masa di ari sogot. Laos jumpang do songon pangarimpunan manang impola ni nasa buhu ni pangajarionNa mangondolhon hinaringkot ni hataridaan ni parniula ni jolma i ma marhite haradeonna be mangeahi ngolu na patuduhon habuluson dohot haserepon ni na marroha, suang songon i ma nang na patuduhon parange dohot pambahenan na denggan. Hombar tu pangajarion ni Jesus na mandok “ Nasa na binahenmu tu sada anggiKu angka na metmet on, na tu Ahu do i dibahen hamu!.” Nang, tu angka na so olo mangulahon tu angka na metmet, “Dina so niantoanmuna sahalak sian angka na metmet on, sandok Ahu do na so niantoanmuna disi.” Alani i, turpuk on naing patuduhon aha ma sipatupaon ni Jesus tu angka na so mangulahon na nidokNai do digohi tingkina songon na hinatahon ni Jesus (16:27 “Ai na ro ma sogot Anak ni jolma i dibagasan hasangapon ni Amana rap dohot angka surusuruanna..”.

Jala on dipatolhas ma taringot tu ari paruhuman sogot na pinatupa ni Tuhan Jesus dung ro hasusuda ni portibion. Ndang adong na manontong diportibion, ia harajaon, hasangapon, hapistaran na adong di jolma i ingkon salpu do songon hasasalpu ni portibion. Sada sipaingot na naeng dohonon ni Jesus do on tu angka halak Jahudi, tarlumobi angka siboto surat na tongon manghaginjanghon parbinotoanna, jala na tau mandok paboa pinompar ni Israel do nasida halak Jahudi na tama manean harajaon banua ginjang i. Alani do, dipatorangma ise do ta na tau bongot tu harajaon ni Debata di ari paruhuman i? Ise ma jolma naung hea talehon mangan dohot minum, asing ni keluarganta? Hea do tajanghon jolma na buro? Hea do tasumbanghon pahaenta na uli jala bagak dope? Ringgas do hita madulo angka na marsahit? Hea do hita mandulo angka na di hurungan? Naonom, sungkun-sungkun on ma na gabe kriteria na dipangke di paruhuman di ari parpudi mangihuthon Matius 25 on.

II.                  HATORANGAN NI TURPUK

Ayat 31-32 : Tuhan Jesus Marhasangapon jala hundul di habangsaNa.

Haroro ni Anak ni jolma i dibagasan hamuliaonNa raphon surusuruanNa ditingkina, na digoari songon ari parousia (bnd. Mat.13:41 ; Sak. 14:1-21). Dia ma na hinangkam ni pandohan i, ima Ibana do panguhum banua ginjang, na naeng ro muse marhite ombun, Ibana do maniop huaso, jala panguhum na pinasahat ni Debata. Hundul Ibana di habangsa hasangaponNa manguhumi na mangolu dohot na mate. Lapatanna nasa pambahenanta ingkon tapertanggungjawabhon di paruhuman sogot, dang adong na boi malua sian ari paruhuman i. Ido umbahen di dok ay. 32 “ dung i marluhut ma tu jolona nasa bangso”. Hata “nasa bangso” dipatuduhon ma na sude jolma na di portibion, so mardia imbar, ingkon mangadop di ari paruhuman sogot. Ganup Minggu tahatindangkon do Hata Haporseaon, diponggol paduahon tahatindangkon do “Ahu porsea di Tuhan Jesus Kristus,,, disi ma Ibana paima mulak sogot tu tano on manguhumi halak na mangolu dohot na mate”. Jadi, tangkas do ta boto, taantusi, tahaporseai jala tahatindanghon paboa na ingkon ro do Tuhan Jesus di ari paruhuman sogot. Amen 

 

 

Ditatap Debata do ngolu ni na Porsea, Roma 4:13-25

 

Nas                  : Rom 4 : 13 - 25

Tema               : Ditatap Debata Do Ngolu Ni Halak Na Porsea (Allah Memperhitungkan Iman Orang Percaya)

I.                   PATUJOLO

Kitab Roma merupakan surat Paulus yang dituliskan secara kesustraan yang mangandung pengajaran dan nasihat untuk kehidupan baru. Surat Paulus ini ditujukan kepada jemaat yang ada di kota Roma (1:10-13;15:32), untuk melakukan pekabaran Injil. Ndang dung hea dope nian apostel Paulus ro manopot huta Rom, alai marsangkap do ibana laho maningkir huria i. Jala ojahan ni buku Rom na mansai tangkas ima taringot tu Barita Na Uli Ni Kristus (1:16-17). Alani i, Rom. 4:13-25 on, apostel Paulus paboahon ia halak pardosa pe, parsidohot do di harajaon dohot hamuliaon ni Debata, dung jolo pinintoran nasida sian dosana. Evanggelium Minggu on masuk ma tu horong na umbidang taringot di pamintorion (1:18-5:11) laos Rom 4:13-25 sandiri ma na gabe gombaran na marhadomuan tu Padan na Robi, dung jolo manaringoti hinauli ni pamintorion i nang nasa Patik pe (3:27-31). Di ujungna marparbue do pamintorion i, holan ala hatontuan dohot haluaon marhite haporseaon di bagasan Tuhan Jesus Kristus (Rm. 5:1-11). 

II.                HATORANGAN NI TURPUK

Parjolo : Dirajumi Debata Ho Gabe Hatigoran

Tubu do sungkunsungkun ni Apostel Paulus, aha do umbahen dirajumi Debata si Abraham gabe hatigoran? Molo di halak Jahudi pangulaon di Patik do na paluahon jolma dirajumi Debata na gabe hatigoran. Ditulak apostel Paulus do pingkiran ni halak Jahudi na sala i. Parjolo ala fakta sejarah na patuduhon, si Abraham ompu nasida na dirajumi Debata gabe hatigoran ndang ala na mangulahon Patik (ay. 13). Molo ala ni Patik do si Abraham marpinompar, marisuang do padan ni Debata tu ibana (ay. 14). Paduahon, ndang tarbahen jolma singkop mangulahon Patik, jala ingkon mate do angka na so mangulahon Patik. Lapatanna, ndang boi Patik gabe dalan tu haluaon, alai asi ni roha ni Debata marhite padan naung niuarihon-Na marhite Jesus Kristus. Aha do na umbahen gabe dirajumi Debata si Abraham gabe hatigoran? Haporseaonna tu Debata i do umbahen dirajumi ibana gabe hatigoran. Haporseaonna, ndang mangasahon gogona marhite pambahenan, alai haporseaon na manghirim jala satia di padan na niuarihon ni Debata tu ibana, nang pe secara fisik/umur Abraham dohot Sara naso mungkin be marpinompar. Alai ndada tergantung tu fisik haporseaonna, marsigantung tu haporseaonna di huaso ni Debata do ibana. Hot do ditiop ibana padan ni Debata tu ibana, alani do gabe dirajumi Debata haporseaonna gabe hatigoranna.

Hasisingkop padan ni Debata na ingkon gabe ama saluhut bangso, asa sude bangso di portibion parsidohot gabe pinomparna. Dipatorang apostel Paulus, marhite haporseaon ni si Abraham sude bangso gabe porsea di Jesus Kristus. Songon ni ma nang hita, naeng dirajumi Debata hita gabe hatigoran-Na songon pinompar ni si Abraham. Alai, ndang boi tapangasahon ulaon manang pambahenanta na denggan di adopan ni Debata, holan haporseaon di asi ni roha ni Debata na paluahon hita di bagasan Jesus Kristus.

Paduahon : Asi Ni Roha Marhite Haporseaon

            Haporseaon ni si Abraham mangalehon pangantusion tu hita aha do sasintongna haporseaon. Taboto do naung dibagabagahon Debata tu si Abraham, gabe ama ni saluhut bangso. Molo marnida fisik dang memungkinkan be Abraham dohot si Sara. Alai porsea ibana boi Debata patupahon bagabaga-Na nang pe ndang mungkin menurut logika ni jolma. Ndang keterbatasan fisik ni jolma na manontuhon huaso ni Debata, ala huaso ni Debata boi menembus keterbatasan fisik ni jolma. Haporseaon na sisongon i ma dirajumi Debata gabe hatigoran ni si Abraham, ndang ala na mangulahon sunat manang Patik umbahen na dipintori Debata ibana. Andorang so adong dope Patik dohot sunat, nunga dipintori Debata si Abraham alani haporseaonna. Padan naung pinahot ni Debata, ndang tarpasohot Patik i, laho manundati bagabaga-Na; ai opat ratus tolupulu (430) taon do i umpudi ro Patik (Gal. 3:17). Jala molo gabe Patik do dasar haluaon ni jolma, tontu hombar tu kemampuan ni jolma mangulahon Patik i do haluaon na jinalo ni jolma. Hape ndang adong jolma na tau mangulahon Patik ni Debata secara sempurna (singkop), asa malua jolma sian dosana. Antong ndang mungkin malua jolma sian dosana, ala dang adong jolma na boi singkop mangulahon Patik.

            Asi ni roha ni Debata do umbahen margogo hita mangulahon Patik ni Debata, dilehon tu hita hahipason mangulahon Patik ni Debata, dilehon tu hita hahipason semangat, panghirimon gabe boi taulahon Patik ni Debata. Nang pe dang singkop taulahon Patik-Na, alai diparhaseang jala dipasingkop do na taulahon i marhite asi ni roha-Na. Alani, naeng tarajumi, na so margogo hita mangulahon Patik asa tau hita di adopan ni Debata. Holan haporseaon tu Jesus Kristus do na margogoihon hita gabe boi pajumpang hita dohot Debata (ay.23-25). Ndang sahat hita tu haluaon (tu Debata) marhite na mangulahon Patik, alai holan marhite haporseaon di asi ni roha ni Debata do dibagasan Jesus Kristus.

On do pangajarion na mansai ringkot di hakristenon na ginoaran “dipintori Debata hita marhite haporseaon”. Ido umbahen asing pangajarion ni hakristenon taringot haluaon sian ugamo na asing. Holan Bibelta do na mandok “dipintori Debata alani haporseaon “ (Allah membenarkan karena iman). Songon si Abraham na dipintori Debata ala haporseaonna di padan  naung niuarihon ni Debata tu ibana.  

III.             PANIMPULI

Minggu Reminiscere na marlapatan “Sai ingot ma ale Jahowa denggan ni basaM” (Psalm. 25:6). Di Minggu Reminiscere on dipaingot hata ni Debata do hita asa tongtong tadok tu Debata “sai ingot ma denggan ni basaM tu ahu ale Tuhan”. Porlu taingot asi ni roha ni Debata naung jumolo di pasahat Debata tu hita. Dipasahat Ibana denggan basa-Na tu hita ndang ala na tajalo, alai ala denggan ni basa-Na sambing dipasahat i tu hita. Di dok mai “previent grace” (Anugerah yang mendahului). Ai andorang so taantusi ise do Jesus Kristus, nunga dipillit hita bahen anak-Na marhite na tardidi tu bagasan goar-Na. Tardidi na marlapatan dipadohot hita tu bagasan hamamate nang haheheon ni Kristus, asa sahat hita tu harajaon-Na na manongtong. Jala naing antusantama, ndang boi tatulak asi ni roha ni Debata na dipasahat tu hita ganup, ima na didok asi ni roha-Na naso tartulak hita sahat tu na mate hita. Didok mai “irristible grace” (anugerah yang tidak dapat ditolak). Asi ni roha marhite na dipasahat Debata do tu hita roha na imbaru laho mananda Ibana jala mangalusi Ibana huhut mangihuthon Ibana salelenglelengna (Jer. 24:7; Joh. 10:27). Ingkon antusanta ma ima asi ni roha ni Debata na pasingkophon sude na denggan na taula. Ndang singkop sada ulaon taula alani kemampuanta terbatas, alai gabe dipasingkop Debata, didok mai “suffcient grace” (anugerah yang mencukupkan). Marhuaso do Debata paluahon jala mangurupi ganup na ro tu Ibana mangido haluaon nang pangurupion. Nang pe ndang margogo pamatangta alani pardangingonta nang hagaleonta, alai denggan basa-Na manorangi roha nang pingkiranta gabe taantusi barita na uli marhite jamita, gabe dipauba Tondi Parbadia rohanta jala tubu hamubaon ni roha (pertobatan) di hita.  Na parpudi, jala ingkon antusanta do asi ni roha ni Debata ima anugerah tanpa syarat, ima pangaramotion-Na tu sude na tinompa-Na, tu sude halak ndang marnida bohi nang status sosial, tu sude bangso, suku nang parugamo na asing. Ima asi ni roha Debata na bersifat inklusif tu saluhut halak, bahkan tu halak parjahat pe asi do roha-Na, ai ndang lomo roha ni Debata mate parjahat i, alai hamumulak parjahat i do na nihalomohon Ibana.

             Songon i ma nang hita jolma na naung manjalo asi ni Debata dang boi holan na pasif (ndang mulaulaon), ingkon do adong tanggungjawab ni angka naung manjalo asi ni roha ni Debata, alani naing ma tarida sian parange, gabe parasi roha tu saluhut jolma. Marhite parangenta tarida ma, na mangolu do manang ndang haporseaonta (Jak. 2:17). Ai ido tandana angka na porsea sian sibolis, didok di hata ni Debata, ai sibolis pe porsea do adong Debata, alai ndang diulahon sibolis hata ni Debata (Jak. 2:19). Alani dang marguna haporseaonta molo so taulahon hata ni Debata. Alani, taargahon ma asi roha ni Debata marhite na mangulahon tanggungjawab gabe parasi roha tu sude halak (Jak. 2:20). Amen 

JESUS SIHORHON HALUAON Heber 5 : 5 – 10

 

JESUS SIHORHON HALUAON

Heber 5 : 5 – 10  

              Hasatiaon marlapatan doi  parsihohoton ni roha, haunduhon dohot pangoloion namarsitutu. Songon Anak ni Debata Jesus i, dipatuduhon Ibana do pangoloionna hasatiaonna tu Debata. Tarida do i sian parbue ni angka panghobasionNa: songon Raja, Malim, Panurirang, na gabe parhitean ni jolmai Ibana mangido hasesaan ni dosa maradophon Amai. Debata sandiri do mamillit Ibana gabe sintua ni malim na padomuhon jolmai tu Debata  “Anakhu do Ho sadarion do Ho hutubuhon”. Marhite pangoloion sisongoni ma gabe dibasabasahon Debata tu Ibana sada goar namansai umbuk sijaloonNa ; ima “Sintua ni malim” . Ia Sintua ni malim ima na mamboan nasa na porsea tu Amai laho manjalo haluaon dohot hangoluon na saleleng ni leleng na ( Johannes 14: 6 ) Mangihuthon tohonan hamalimon ni Israel adong do hahomion ni Debata di hamalimon i, na soboi antusan ni jolma ia so holan Debata sandiri namangalehon pangantusionna. Hahomion i do namambahen asa gabe  Sipadomu malim i tu Debata . Laos ala ni hahomion i do umbahen na boi ibana pasahathon pelean hasesaan ni dosa  pelean pardengganan ni jolma pardosa tu Debata. Ima na adong di diri ni Jesus i “Ahu do dalani dohot hasintongan dohot hangoluan. Ndang adong na sahat tu Amai ia so marhite sian Ahu

 

              Haunduhon nang pangoloion i do na gabe Anak Hinsu ni hangoluan na sian Debata, Marhite pangoloionNa tu Debata gabe boi Ibana manghamonanghon sude parungkilonna, jala dung di hamonanghon i sahat ma Ibana tu harimpason namanaluhon sumbia ni portibion gabe targoarma Ibana sipalua , namanghorhon haluaon ndanda holan tu dirina alai tu saluhutna hita jolma na do angka namangoloi Ibana.   Marhite Turpuk on di arahaon ma nang tu hita asa sai tongtong ma hita marsihohot marhaporseaon, Unang ma sumurut hita sian haporseaontai atik pe bahat angka sitaonon parungkilon, ndang tuk sitaonon nang parungkiloni mangintopi haporseaon ta . Nang pe ro angka parungkilon i alai manongtong ma hita martangiang dibagasan pos ni roha dibagasan haunduhon hasatiaon mangoloi Tuhan i.

 

              Asa dapot hita Haluaon i sonson ma nuang di jolonta angka ulaon songon malim ima na patubegehon hata ni Debata di tonga ni bagasta marhite namanghangoluhon hata ni Debata  MABIGA ; Manjaha Bibel Ganup Ari, manang BATAHI : Baca Firman Tiap Hari. Asa sai marsihohot ma hita marhaporseaon tu Jesus Kristus sihorhon haluaoni, tapatuduhon ma hasatiaon, haunduhon nang pangoloion mangulahon hataNa, Ai tongtong do di Luluhon hita jala dilehon hangoluon ta sai Tai jouhon ma Luluhon Ahu Ale Jahowa, Horhonon ni ma haluaon di hita salelengnilelengna . AMEN

JAMITA EPISTEL HESEKIEL 2:1-5

 

Minggu V Trinitatis

Hesekiel 2:1-5

Borhat Ma Ho Jala Baritahon Ma Hata Ni Tuhan I

 

Huria ni Tuhanta na hinaholongan di bagasan Kristus Jesus, sada ulaon ni panuriang ima pasahathon jala mamaritahon hata ni Debata tu bangso Israel. Panurirangon i somal na marisihon taringot tu lumbalumba jala hamubaon ni roha nang pangalaho. Umbahen i di “pandohan borhat ma ho” gabe sada tugas panggilan laho mangulahon parsuruon ni Debata asa pasauthon sangkapNa marhite lumbalumba. Jala boi do on gabe hatontuon di parsuruon ni Debata na so boi jua on. Rade manang so rade di parsuruon ni Debata hita alai ingkon do borhat jala unduk hita mangulahon parsuruon i. Hata “baritahon ma hata ni Tuhan i" gabe ulaon naung dipasahat Debata songon gabe panurirangion. Ndang hata ni panurirang i na naeng pasahatonna alai tung hata ni Tuhan i do.

Panjouan ni Debata taida do i gabe inisiatif ni Debata sandiri do. Hesekiel ima sahalak panurirang na dijou jala dipillit Debata hira marumur 30 taon ibana. Tarjou do ibana gabe panurirang dung 5 taon di habuangan Babel (Hes. 1:1). Tarjou do ibana gabe panurirang hatiha halak Israel dibagasan habuangan Babel alani dosa dohot hajahaton nasida di adopan ni Debata. Nang dibagasan kondisi di habuangan Babel bangso i, tongtong do di patuduhon Debata holong ni rohaNa di bangso i asa mangolu nasida di hamumuba ni parrohaon nang pangalaho nasida tu hasintongan i. Umbahen i dipabangkit Debata do panurirangNa si Hesekiel laho manurirangi bangso asa mangolu nasida ala hamumuba ni pangalaho nasida jala asa tongtong nasida marsomba tu Tuhan i.

Digoari Debata do si Hesekiel songon anak ni jolma. Paboahon dison hadirion nang hagaleonna songon panurirang ibana jala paingothon ibana tung holan marpangusandean to huaso ni Tondi i do ibana laho mangulahon panurangion i. Panggoari ni Debata tu si Hesekiel na mandok anak ni jolma taida do songon hahotan ni Debata tu ibana asa gabe panurirang ibana jala manurirangi ibana tu halak Israel jala paboahon na ingkon marhaunduhon do ibana tu Debata naung manodo jala na marsuru ibana (Hes. 2:3). Nang pe di panjouan ni Debata manggoari ibana anak ni jolma, naeng do pinatandap ni Debata ai dibagasan panggoari i do naeng patuduhon ni Debata ai di Ibana do hasangapon dohot hamuliaon, jala si Hesekiel songon anak ni jolma ingkon dipatuduhon ibana haunduhonna tu Debata na marsuru ibana. Alani i ma nasa ulaon nang pambahenan na naeng diulahon si Hesekiel ndada ro sian diri nang haboionna alai sian Debata sambing do haroro ni gogo ni pangulaonna i.

Debata sandiri do patotophon parsuruon i asa borhat jala mamaritahon hata ni Tuhan i. Dipatupa Debata do parjumpangan dohot si Hesekiel jala didok hataNa tu si Hesekiel paboa na disuru Debata ibana tu tongatonga halak Israel. Naeng ma asa lam togu hadirion ni si Hesekiel laho mangulahon parsuruon ni Debata di ibana na ingkon borhat ibana tu tongatonga halak Israel. Tung mansai dokdok do ulaon na pinasahat tu si Hesekiel mangida bangko (karakter) halak Israel (Hes. 2:3-5) alai tung neang do anggo i saluhutna ala dipajongjong do ibana asa mananginangi. Na marsuru do Debata tu si Hesekiel asa mulak roha halak Israel marhaunduhon tu Debata.

Borhat jala baritahon ma hata ni Tuhan i. Boi ma dohonon taringot pandohan on gabe parsuruon na mardongan huaso dohot otoritas ni Debata di bagasan si Hesekiel asa paingothon halak Israel asa marhamubaon. Di na borhat ibana laho mamaritahon hata ni Tuhan i, nirajaan ni Tondi i do ibana jala on ma gogo di ibana jala na patoguhon rohana laho mangulahon parsuruon i. Borhat jala mamaritahon hata ni Tuhan i gabe sada ketentuan do on paboa na holong do roha ni Debata di bangso i asa unang mago nasida ala ni dosa nasida alai tung asa malua jala mangolu ma bangso i ala adong sipaingot. Ndang dipasombu Debata sambing nasida marhamagoan ala ni dosa nasida alai dipabangkit do panurirang di tongatonga halak Israel asa tung ingot nasida di nahinalomohon ni Debata di nasida taringot tu hamubaon ni roha nasida i.

Huria ni Tuhanta na hinaholongan di bagasan Kristus Jesus, tangkas do dipatupa Debata holong ni rohaNa di hita. Nang pe di nasa hata, roha, pambahenanta sipata mandao sian Ibana. Di nasa hagaleonta manang haleaonta alani dosanta, alai umbalga do holong ni rohaNa di hita. Angkup nii do ndang lomo roha ni Debata sada sian hita marhamagoan ala ni dosa nang pambahenanta na hurang i diadopan ni Debata. Dipabangkit Debata do pangapoion na laho paingothon hita asa marhamubaon di roha manang di pambahenanta. Ima parbaritaan nauli angka hata na mangapoi, mamodai, paingothon, mangapuli, jala maminsang hombar tu angka na masa.

Dipabangkit Debata do pangapoion di hita marhite hataNa. Hata ni Tuhan Debata ma gogo ni angka na porsea. Didok Tuhan Jesus, tangihon ma hataNa jala ulahon sipatudoson ma ibana songon halak na marroha na paulihon bagasna di atas batu. Ima tangkas ni panandaionta tu Debata marhite hataNa di bagasan haporseaonta. Tatangihon ma Ibana na manghatai tu hita dibagasan hataNa i. Taulahon ma sangkap ni rohaNa di nasa naung pinasahatNa tu hita dibagasan hataNa. Ido na boi patambahon haporseaon jala patoguhon panghirimonta di Ibana.

Dipaborhat ma hita laho mamaritahon hataNa. Dijou do hita di bagasan haporseaon nang dipanindangionta laho mangulahon parsuruon i. Hata ondeng, nunga tangkas tajalo, taauhon parsuruon ni Debata di hita naung pinalumbahon Debata di bagasan hataNa. Ima na ingkon laho hita tu portibion laho mamaritahon hataNa. Molo tasulingkiti di bagasan hadirionta tung godang do na mambahen gale hita molo dipasahat parsuruon laho mamaritahon hataNa i tu tongatonga ni portibion. Sai olo do ra sipata tubu dibagasan rohanta, tung dibege jala ditangihon do tahe manang ndang? Tung dipauba do roha nasida manang ndang? Olo do ra tubu di bagasan roha nang pamingkirionta taringot tu na songon i. Alai, pangulaon ni parsuruon na songon on ma na nidok missi keluar. Ndada holan sipanangi hita di hata ni Tuhan Debata alai na ingkon do hita parsidohot borhat laho mamaritahon hata ni Tuhan Debata.

Borhat ma ho jala baritahon ma hata ni Tuhan i. Gabe sada komitmen ma on di hita songon angka na porsea asa berperan aktif jala bersikap proaktif laho mamaritahon hata ni Tuhan i. Dipasahat Debata do parsuruon i asa borhat hita mangulahon parsuruon mamaritahon hata ni Debata, songon tanda holong ni rohaNa do di hita dohot di angka donganta jolma. Ndang lomo roha ni Debata di hamagoan nasida ala so adong sipaingot di nasida. Taulahon parsuruon ni Debata asa borhat jala mamaritahon hata ni Tuhan gabe tanggungjawab di hita na marhaunduhon di nasa parsuruon ni Debata. Ndang na gabe haputusan ni rohanta sundat borhat laho mamaritahon hata ni Debata ala tapingkiri ndang ditangihon nasida hataNa alai na ingkon do sahat lumbalumba i di nasida jala Tondi Parbadia do na pubahon roha nasida. Ulaonta ima, borhat jala mamaritahon hata ni Tuhanta. Amen

 

Sungkunsungkun :

1)      Tatangihon do hataNa jala tapahusorhusor di bagasan rohanta. Manghatai do Debata tu hita marhite hataNa. Nunga dipasahat Debata marhite turpuk jamita asa borhat hita laho mamaritahon hataNa. Boha do haradeon ni rohanta laho mangulahon parsuruon ni Tuhan i?

2)      Tapasahat do tutu lumbalumba i tu saluhut angka dongan asa ingot nasida di Tuhan Debata, di haporseaonna, di ngolu partondionna, asa marhite i tung tongtong mardalan ibana di ngolu di dalan hatigoran ni Debata. Tung dia ma na boi ulahononta, ai disuru do hita tu tongatonga halak na pir rohana manjalo lumbalumba i?

ASI NI ROHA NI DEBATA NA PANGOLUHON EPESUS 2:1-10

 

ASI NI ROHA NI DEBATA NA PANGOLUHON

EPESUS 2:1-10

Huria Epesus ima sada huria na jongjong di huta ni angka na marsomba tu hasipelebeguon, tu ganaganaan, jala songon sada luat na ribur tontu marragam ma nang paradaton di luat i. Huria Epesus, ima sada huria na mansai dihaholongi apostel Paulus, Ditongos ibana surat on laho patoguhon asa hot haporseaon ni ruas ni huria , asa unang ganggu haporseaon nasida hinorhon ni panosak ni angka panurirang pargapgap. Dimulana i mansai togu do parsaoran na denggan, haholongan dohot haporseaon ni huria i, jala pola dipuji apostel Paulus dibagasan las ni roha. Alai sian naso panagaman ro ma tu huria Epesus angka panurirang pargapgap na mamodahon barita nauli asa mulak nasida tu hasomalan naung leleng. Poda na mangajarhon marhitehite na mangulahon patik boi dapot haluaon manang marhite na mangulahon patik do boi targoar nasida gabe anak ni Debata. Alani ni angka poda i gabe sisoada ma panghophopon ni Kristus i, gabe sisoada ma di ngoluon asi ni roha ni Debata na paluahon jolma sian hamatean na saleleng ni lelengna (Sola Gratia).

Sola Gratia na marlapatan holan asi ni roha. On ma sada pangajarion ni Martin Luther di tongatonga ni huria taringot tu haluaon ni angka na porsea. Holan marhite asi ni roha ni Debata do umbahen na sahat jolma i tu haluaon. Ndang adong na tama jolma i di adopan ni Debata, ala saluhutna nunga mardosa jala tama dapotan rimas sian Debata. Ndang adong na boi patupaon ni jolma asa malua ibana sian rimas ni Debata. Godang pangajarion na mandok do dapot hita do haluaon ,  ndang tuk i paluahon hita holan asi n iroha ni Debata do na tuk paluahon hita sian dosa .Naung mate do jolma i hinorhon ni angka dosana. tangkas do dipatorang, ala asi ni roha dohot holong ni roha ni Debata, nunga dipangolu jolma i. Raphon Kristus nunga dipangolu jala dipalua hita. Tuhan Jesus do parhitean manang dalanta tu haluaon dohot hangoluon naung pinarade ni Debata. Ndada ala na tau jala na tama hita manjalo i alai ala ni rohaNa do na patauhon hita gabe parjambar di habangsaNa. Ai sian asi ni rohaNa do umbahen na malua hita, ndada alani pambahenanta alai silehonlehon ni Debata do.

Tutu do ndang ala ni parulaonta umbahen na mangolu jala malua hita, tung ala asi ni roha ni Debata do. Alai ndang na marlapatan gabe ndang ringkot ulaon na denggan. Ala silehonlehon ni Debata do i, ndang na gabe so sambing hita so marniula. Alani ringkot situtu ta parsitutuon laho papatarhon haluaoni marhite parbue ni ngolu na imbaru

Marhite asinirohai tagkas hita dipadiri tu hangouan, nunga mate hita dibagasan hadosaon alai asi n iroha ni Debata pangoluhon hita dibagasan Kristus Jesus. Alani las ma rohanta songon goar ni minggunta sadarion ima Letare. Antong songon tanda las ni rohanta taargahon jala tahamauliatehon ma asi n iroha ni Tuhantai i, 1 Korint 6: 20 : “Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna; ai Debata do nampuna i.”Amen

 

JAMITA PARTANGIANGAN 2 RAJARAJA 2;1-2

 

NAPOSO NI DEBATA NA SATIA

2 RAJARAJA 2:1-12

PATUJOLO

Tandaon do hau sian parbuena, tarida do imbo sian soarana, sipata di patuduhon goar i do parngoluon nang ulaon.  Elia dohot Elisa, i ma panurirang ni Debata. Goar Elia lapatanna “Jahowa do Debata.” Elisa lapatanna “Debata do na mangurupi.” Na rap marsaor do Elia rap dohot Elisa dibagas joro i, songon guru dohot sisean , laos Panurirang Elisa ma muse na manorushon ulaon hapanurirangon ni panurirang Elia, dung dialap Debata ibana tu banua ginjang. Rosu do parsaoran nasida pola dipatudos  lobi songon sahalak ama dohot ianakhonna paralealeon dohot parsaorannasidai  Tongon ma turpuk on, di na dialap Debata panurirang Elia  laho manangkok tu banua ginjang

HATORANGAN

Manuk ni pealangge hotek hotek laho marpira, sirang maraleale lobian matean ina, Tontu borat do parsirangan. Songon i do nang nahinilala ni panurang i. Di bagasan panogunoguon marmahani, dipasahat panurirang Elia ma; “Ua tinggal dison ma ho” pola sampe tolu hali (ay. 2, 4 dohot 6). Alai alus na marsihohot disoarahon Elisa, do; Songon sintongna mangolu Jahowa, mangolu dohot hosam, na so tupa tadingkononku ho! Ndang lomo rohana marsirang sian tuan nai , sai hot ma ibana nian tongtong dilambungna. Pola do sampe opat hali nasida manghatai  di inganan na marasing. Di pardalanan nasida di inganan na opat na marasing i, dipapatar do sada unok ni hananangkok ni si Elia tu banua ginjang, marhite pandohan;  Naeng alapon ni Jahowa si Elia tu banua ginjang (ay. 1)  Ai nunga disuru Jahowa ahu laho tu Betel (ay. 2) Ai nunga disuru Jahowa ahu tu Jeriko (ay. 4) Ai nunga disuru Jahowa ahu tu Jordan (ay. 6 Dung i, na dua panurirang i pe jongjong do di topi ni Jordan (ay. 7) Pandohanon marlapatan naeng alapon ni Jahowa dohot ai nunga disuru Jahowa, mangondolhon; ia hananangkok ni si Elia tu banua ginjang (nang saluhut jolma pe) HOLAN ALA HUASO NI DEBATA DO. Dang adong huaso manang usaho sian jolma. Boasa tung opat hali?  Sada ujian haporseaon do i di panurirang Elia. Laos dipataridahon ibana do haunduhon ni rohana tu Debata, Hasatiaonna tu Debata ndang manjua ibana, dung pe i asa nangkok ibana tu banua ginjang.

Dipardalanan nasida i, sai jumpang do nasida dohot sisean ni panurirang i di Betel dohot di Jeriko. Manangkasi ma nasida; Atehe diboto ho do na naeng boanon ni Jahowa tuanmu sadarion sian lambungmu? Dung i ninna ibana ma: Ahu pe nunga huboto, sip ma hamu! Boasa ingkon sip nasida huroa? Alai secara sederhana, marlapatan do i; martiti do sude, adong do tingkina manghatai, alai adong muse tingki hohom (Parjamita. 3:7), Jala on ma tingkina hohom so pola bahat marhata

 Somal do molo laho marsirang manang berpisah dohot sada dongan sai adong do angka pangidoan  songoni do nang Elisa.  Dipangido ibana si Elisa ma asa duahali lompit sian tondi ni si Elia. Ro tu Ibana Di ayat 9; Dung i ninna si Elisa ma: Ingkon silompit dua nian sian tondim songgop tu ahu!.Silompit dua nian sian tondim songgop tu ahu! Pandohan on dang na mandok asa sumurung ibana sian si Elia manang humebat .  Alus ni panurirang Elia; Na dokdok situtu do nian pinangidomi; alai molo diida ho ahu tarboan sian lambungmu, sai na songgop do songon i tu ho; alai molo so idaonmu, ndang songgop. Alai dung diida si Elisa songon i, Laos dibuat ma ulosna jala diribahi bola dua. Laos i ma hataridaan ni husao na jinalona i, Dua hali lompit ro tondi i tu ibana . Boasa didok na dokdok situtu? Na marlapatan do i, na marhahonaan doi tu huaso ni Debata.Molo so huaso ni Debata do na pasahathon dang ro i tu si Elisa, alani I ndang boi jolma mamaksa alai lomo ni Tuhani do na saut.   Tabona i atehe angka pasu pasu di angka na satia tu Debata.Sai dilehon Debata angka pangidoan ni Naposo na satiai. Diparbaga Debata tu namarsaroha da pasupasu na godang ima roha na sonang ninna endentai

          Hananangkok ni panurirang Elia: ida ma, ro ma sada hureta api dohot angka hoda api manirang nasida na dua, manaek tu banua ginjang ma ia si Elia marhite sian habahaba. Laos dibuat ma ulosna jala diribahi bola dua.Dungi joujou ma ibana, O damang, damang! Hureta ni Israel dohot angka jolma parsihundulna do ho! Dung i ndang be diida ibana. Laos dibuat ma ulosna jala diribahi bola dua. Alai joujou ni si Elisa “Amang” marlapatan lobi songon  panghormation, ( Ido hape umbahen amang dohot inang di jouhon tu angka Parhalado atehe, ) dohot tu angka na tu mua . Hureta ni Israel dohot angka jolma parsihundulna, marlapatan do i, ia hureta i ma peralatan porang ni halak Israel na dumenggan, marhite i ma digombarhon nasida agoan sahalak uluan nabolon, hagogon di Israel ima si Elia, alai sai na suruon ni Debata do muse panggontina ima panurirang Elia marmahani bangsoi

SIPAHUSORON

Mata Guru roha sisean, di patuduhon turpukon do tu hita marhite Elia nang Elisa sada sitiruon ima roha na satia tu Debata nang tu indukna. Elia songon Guru gabe sitiruon ibana di pangajarion jala satia dohot unduk tu Debata. Elisa songon sisean na olo unduk di pangajarion jala satia tu Guruna. Songoni ma nang hita asa sai tongtong satia tu Tuhani jala unduk tu angka induk nang parmahan

 HOLAN ALA HUASO NI DEBATA DO, na manait jolma tu surgo hasonangan, i ma di angka na satia mangihuthon Jesus,

 Ndang jadi manjua, marungut ungut , holosoan hita mangihuthon Debata. Molo sai marsihohot hota di haporseaonta jala satia silompit dua do jaloonta angka pasupasu ni Debata . Songon sintongna mangolu Jahowa, mangolu dohot hosam, na so tupa tadingkononku ho! I ma panindangion Parsitutuon ni halak Kristen  Mangihuthon Jesus nang pe godang angka hamaolon, parungkilon Ingkon tongtong do hita SONGON NAPOSO NI DEBATA NA SATIA Dang golom riaria.

Di angka sundut naumposo sai ingkon tongtong do hita pasangaphon angka na tumua, Natua tua pangalapan hata nang pasu pasu, naposo pangalapan gogo, alani i ingkon sai tongtong do hormat angka sundut na umposo tu angka sundut na tumua asa sai tarpasu pasu ngolunta Di angka na satia mangihuthon Jesus, jaloonna hagogoon mandalani ngoluna, patulushon panjouon ni Debata di dirina, dungi parjambar ma di tohap surgo hasonangan i.

Girgir ma manangi nangi bangkol ma manghatahon   Di na mangihuthon Jesus; gumodang ma hohom, sian na manghatai. Di na gumodang hohom, gumodang ma tingki manangihon Jesus, dina gumodang manghatai, otik ma tingki manangihon Jesus. Nunga taboto panjouon ni Jesus tu hita  antong, IHUTHON MA JESUS! MARI BERKARYA NYATA BUKAN BERKARYA KATA   Amen