Jamita : Joel 3:1-5 ULAON NI TONDI PARBADIA DI NGOLU NI NA PORSEA

 

MINGGU PENTAKOSTA

8 JUNI 2025

1.     Marende BE No. 102:1-2

2.     Votum A.XIII.A – D.XII.33

3.     Epistel : Johannes 14: 15-26

4.     Marende BE No. 105:1-2

5.     Jamita            : Joel 3:1-5

 

ULAON NI TONDI PARBADIA DI NGOLU NI NA PORSEA

                       

            Disurirangkon si Joel do sada ari na margoar Ari ni Jahowa. Molo diusehon Debata TondiNa tu "manang ise na manjou goar ni Jahowa".  Dung i masa ma haimbaruon, pemulihan bahkan halongangan. Adong do silehonlehon tu angka doli doli, borua, natoras, na poso nang angka natuatua pe. Dipatupa Debata do tanda halongangan di banua ginjang dohot di tano on marhite ragam ni angka na masa di alam: adong mudar dohot api dohot timus na marsigorgor. Muba ma mata ni ari gabe holom jala bulan gabe mudar.

            Ari ni Jahowa di panurirangon ni si Joel martudutudu tu ari di na “campur tangan” Debata di ngolu ni bangso i, laho patuduhon balga ni huasoNa. Ditingki bangso Israel lam tangkang, tangkang jala mangalo Debata, Debata “campur tangan” marhite na patupahon uhuman, sada tanda alam na luar biasa na marujung tu pemulihan dohot haimbaruon laho mamboan bangso i mulak tu Debata.

            Molo dung diusehon Tondi Parbadia, ganup jolma ndang mardia imbar umur (na matua manang na poso), jenis kelamin (baoa manang borua), status sosial (tuan manang naposo) manghilalahon hagogok ni Tondi i jala mangulahon lomo ni roha ni Debata. Sude do jolma boi marsaor langsung dohot Debata. Dibagasan Tondi ni Debata, manang ise na manjou Debata dapotan haluaon. Joujou tu Debata marlapatan adong ibadah na sintong, adong joujou sian roha, adong hamubaon ni roha. Gabe mara manang pasupasu do Ari ni Tuhan i? Tergantung do i tu responta tu campur tangan ni Debata. Angka na manjou Debata dapotan haluaon. Alai angka na lam koras tanggurungna, hamagoan do dapot nasida.

            Digohi do panurirangon ni panurirang Joel i di peristiwa Pentakosta di Jerusalem (Ulaon 2), sampulu ari dung manaek Kristus tu Banua Ginjang. Diusehon do Tondi Parbadia tu angka sisean dohot tu angka na porsea. Tondi Parbadia do na memperlengkapi Huria i papatarhon sangkap ni Debata tu portibi on. Ditogihon Tondi Porbadia do hita mangulahon lomo ni roha ni Debata. Ngolu parsaoranta gabe dinamis ala adong Tondi ni Debata.

            Nunga diusehon Tondi Parbadia asa ganup hita manghilalahon hamalumon. Nang pe masa angka ragam ni mara, bencana bahkan krisis na mangonai tu portibi on, jolma na manjou goar ni Debata pasti do manghilalahon haluaon di hangoluan nang di hamatean. Molo ditogihon Tondi Parbadia do ngolunta, tubu ma hatauon na imbaru marsomba dibagasan Tondi dohot hasintongan, adong huaso gabe sitindangi ni Debata jala adong huaso manghaholongi dohot manghobasi dongan jolma.

            Tondi Parbadia naung diusehon i do na memperlengkapi hita asa porsea jala gabe sitindangi ni Kristus. Huaso ni Tondi Porbadia i do na patauhon hita manaluhon biar, holso dohot pandelean. Hagogoon ni Tondi Parbadia i do na mambahen hita tongtong marpanghirimon tu Debata. Huaso ni Tondi Parbadia i do na manogunogu hita manghatai dohot marpangalaho hombar tu parbue ni Tondi i. Hagogoon ni Tondi Porbadia i do na patauhon hita torus mangula hombar tu silehonlehon na pinasahat tu ganup jolma, na matua manang na poso, na balga manang na metmet, manang ise pe. Di tongatonga ni ragam ni situasi dohot di ragam ni parasingan i, dipasada Tondi Parbadia do hita asa rap mardalan, rap marporang, rap mangula bahkan rap mangulahon diakonia/holong. Ala ni i, ingkon torus do hita masitungkol-tungkolan, masitangiangan, masipahembangan (saling membangun), saling memperlengkapi, jala laos masihaholongan.

            Diganup situasi na masa, sai taungkap ma rohanta asa mangula Tondi Parbadia asa adong hamubaon ni roha dohot haimbaruon sian Debata. Na pasti jala na jorbut do ari ni Tuhan i. Molo ari ni Tuhan i di bagabaga ni Tondi Parbadia nunga saut, ba lehon ma ngolum asa ditogihon Tondi i huhut paimahon ari ni Tuhan i di ari sogot, di na patupaon ni Debata haimbaruon dohot pemulihan na sun denggan marhite langit dohot tano na imbaru. Hangoluhon ma ngolu on hombar tu lomo ni roha ni Debata, asa molo dung jumpang tingkiNa tarmasuk ma hita tu angka na tarjou manghilalahon haluaon i jala unang tardapot hita songon angka na mangalami hamagoan saleleng ni lelengna. Amen.

 

Bahan Diskusi

1)      Aha do parbue na boi tapatuduhon naung digohi tondi Porbadia hita?

 

6.     Marende            BE. No. 680:1

7.     Tangiang Sian Na ro

8.     Marende            BE. No. 641b:1-2

9.     Tangiang Sian Na Manjabui

10.Papungu Pelean huhut marende BE. No. 461:1-2

11.Tangiang panutup

 

Pdt. Pancasona Simbolon, M.Div., M.Pd.K

Pendeta HKBP Ressort MUTIARA

 

 

 

Jamita : Pangungkapon 22 : 12 – 21 Jahowa Do Raja

                                                                     

                                                             MINGGU  EXAUDI

01 Juni 2025

1.      Marende BE No. 15:4+5

2.      Votum :   A.XII.B – D.X.32

3.      Epistel :   Psalmen 97 : 1 – 12

4.      Marende BE. No. 9:3

5.      Jamita :   Pangungkapon 22 : 12 – 21

 

Jahowa Do Raja

 

Godang do ruas ni huria na so apala olo manjaha buku Pangungkapon on, adong ma i alani maol antusan ala mamakke angka simbol-simbol, nomor, jala dietong do molo dijaha buku Pangungkapon on mamintor hatop nama ujung ni ngolu ni jolma dohot portibi on. Hape, buku Pangungkapon on parnidaan ni si Johannes do uju tarbuang di pulo Patmos, ima mangungkap angka na naeng masa sogot do, ima panguhuman ni Debata tu angka siulahon hajahaton jala hamomonang ni Kristus dohot bangsoNa.

Ido umbahen asa ganup angka na porsea ingkon manongtong mangulahon hata ni Debata, nang pe martimburak angka parjahat di portibi on, ingkon pos do rohanta, hamonangan do ujungna pasahaton ni Debata tu hita.

Dibagasan turpuk on dilumbahon do tu hita asa dungo managam haroror ni Tuhan i, ima haroroNa paduahalihon ala dang adong na umbotosa manang sadihari tingki haroroNa ai guru di Ibana do saluhutna. Jala dijouhon do tu hita asa marsihohot manghaporseai Ibana ditingki las ni roha nang manang ditingki arsak ni roha nang mamolus angka sitaonon parungkilon tahe (BE No. 149 : 1,3). Si Paulus pe ido didok ibana tu angka na porsea i : “Marlas ni roha ma di haporsuhon! Jugulhon hamu ma tangiang” (Rom 12:12).

Jesus pe nunga dilumbahon Ibana taringot tu haroroNa di Mateus 25 : 31-46, paboa na ro do Ibana pasahathon hatuaon tu angka na porsea (ay.14). Ima angka na marsihohot manghaporseai Ibana agan pe manaon na hansit dohot na porsuk. Molo tajaha di 2 Korint 5 : 10 didok  ditingki haroro ni Tuhan i tarbagi dua do hajolmaon i sogot. Na satia dapotan tua sian Debata, jala na so satia hona uhum do. Alani i do tarjou do huria i asa paubahon roha jala marsihohot hombar tu hata ni Debata nang pe mangadopi angka sitaonon, ai di angka sisongoni do hatuaon sogot sihirimon i. On do nang sosososo tu na pitu huria (Epesus, Smirna, Pergamus, Tiatira, Sardes, Philadelpia, Laodokia) na di buku Pangungkapon on, asa manongtong manangihon hata ni Debata. Molo tajaha sude buku Pangungkapon on, ido umbahen sai diujungi hata tu ganup huria na pitu i : “Ditangihon na marpinggol ma na nidok ni Tondi i tu angka huria”. Ingkon sada do ganup roha ni sandok huria i laho manangihon hata ni Debata di ngoluna be (Rom 10:17, Luk 11:28), molo mauas di haluaon na naeng patupaon ni Tuhan i. Ganup na masihol di haluaon dipaloas Jesus do ro tu Ibana, ai Ibana do hangoluan i, holan haporseaon tu Jesus dohot mangolu dirajai Tondi i, ido dipangido sian hita asa dapot hita silehonlehon i. Ima patuduhon habalgaon ni holong ni Debata tu hita jolma.

Jesus do na manguhumi portibi on, alai laos Ibana na paluahonsa, marhuaso do Ibana disaluhutna. Songon panguhum, na ro ma Jesus i padirihon hasintongan huhut pajongjong uhum na tigor. Alai songon Sipalua, dilehon Jesus do dalan asa malua sian uhuman i marhite asi ni rohaNa. Dibahen i, nag pe mardosa jolma i jala ingkon hona uhum, dibasabasahon do hasesaan ni dosa dohot haluaon tu angka na porsea di Ibana. Dibahen i tu angka na sai mian dibagasan dosa, panguhumon do dapotsa di na ro Jesus i. Alai na olo paubahon roha jala manjanghon asi ni rohaNa, dapotan haluaon ma nasida.

Minggutta ima minggu Exaudi ima minggu panongai di ari hananaek Jesus dohot hasasaor ni Tondi Parbadia. Hata Exaudi marastuan ma i “sai tangihon ma” (Psalmen 27:7). Songon angka sisean na maimaimahon hasasaor ni Tondi Parbadia dung manaek Tuhan Jesus, songon i ma nian nang hita angka na porsea maimaimahon haroro ni Jesus paduahalihon di minggu on. Godang angka arsak, sitaonon, parungkilon nang hajahaton masa ditongatonga ni ngolunta, alani tapangidohon ma tu Debata: “sai tangihon ma soarangku ale Jahowa”, alusan ni Debata ma hita “Olo, na ro ma Ahu”. Marlas ni roha ma hita paimahon haroro ni Jesus, taulahon ma hata ni Debata, jala tapasiding ma hajahaton. Amen

 

Bahan Diskusi :

1)      Somalna bosan do hita ditingki na paimahon. Aha do umbahen na mura hita bosan di na paimahon?.

2)      Menurut hita, aha do umbahen maol hita mangulahon hata ni Debata dohot marhamubaon sian hajahaton?.

 

6.      Marende BE No. 185:5

7.      Tangiang Sian Na Ro

8.      Marende BE No. 736:2

9.      Tangian Sian Namanjabui

10.  Papungu Pelean huhut marende BE No. 573:1+3

Tangiang panutup

Jamita : Ulaon ni Apostel 16 : 19 - 34 MANANGIANGHON HASONANGAN NI HUTA

 

minggu rogate

25 mei 2025

1.      Marende BE. No. 22:1+5

2.      Votum : A.X.B5 – D.VIII.29

3.      Epistel : Jeremia 29 : 7 - 14

4.      Marende BE. No. 696:1-2

5.      Jamita : Ulaon ni Apostel 16 : 19 - 34

 

MANANGIANGHON HASONANGAN NI HUTA

 

Huria ni Tuhanta, di pardalanan ni ngolu on, jotjot do taadopi ragam ni tantangan dohot hamaolon. Sipata punjung do hita, lungun, manang songon na so parduli Debata tu hita. Alai, marhite pandohan ni Debata sadari on, idaonta ma na so hea Debata manadinghon hita, nang pe di tongatonga ni hamaolon. Di Ulaon ni Apostel 16:19-34, boi idaonta taringot tu hasatiaon, tangiang dohot huaso ni Debata na mangula di ngolunta, nang pe sipata dibagasan situasi na mansai borat hita.

I. Tarhurung si Paulus dohot si Silas (Ul.Ap.16:19-24)

Di bona ni turpuk jamita on, taida do songon dia si Paulus dohot si Silas mangadopi sitaonon na dokdok. Sahat ma nasida tu huta Pilippi, pajumpang ma nasida dohot sada parompuan na sinonggopan ni tondi na hodar, na malo manungguli nasib. Dung diusir tondi i, muruk ma nampunasa boruboru i, ala ndang adong be sumber penghasilan nasida. Dung i, diboan nasida ma si Paulus dohot si Silas tu pengadilan, jala ditudu nasida manegai kota jala mangajarhon angka na so hombar tu uhum ni Rom. Dilinsingi ma si Paulus dohot si Silas, dung i dipenjarahon ma nasida tu penjara na mansai ketat. Suang songon i do nang di parngoluonta olo do sipata hita mangadopi ketidak-adilan. Olo do tahilala tertindas manang diuhum nang pe ndang marsala hita. Alai, songon si Paulus dohot si Silas, ingkon porsea do hita, adong do rencana ni Debata na umbalga jala na dumenggan tu ngolunta, nang pe di bagasan sitaonon. Didok do di 1 Korint 10 : 13 : “Holan pangunjunan na patut di jolma do naung mangonai tu hamu. Haposan do Debata, ndang loasonna hamu unjunan lobi sian gogomuna”.

II. Paulus dohot si Silas martangiang jala marende pujipujian (Ul. 16:25)

Di keadaan na gok sitaonon dohot ketidakadilan, ndang muruk si Paulus dohot si Silas tu Debata manang marungutungut. Gariada, martangiang do nasida jala marende mamuji Debata di tonga borngin i. Tong do dipangasahon nasida Debata di sude situasi, nang pe manaon na hansit jala dibagasan hurungan nasida.

Sude do hita hea mangadopi hamaolon di bagasan ngolunta. Sipata punjung do hita, loja jala ndang marpanghirimon. Alai, songon si Paulus dohot si Silas, ditogihon do hita asa tongtong martangiang jala mamuji Debata disude situasi  nang pe hurang denggan keadaanta (1 Tes 5 : 17 – 18: Unang mansadi hamu martangiang! Mandok mauliate ma hamu siala saluhutna! Ai i do dipangido Debata sian hamu marhitehite Kristus Jesus). Pamujionta tu Debata ndada holan laho paubahon keadaan, alai dohot do songon rumang ni haporseaonta dohot panandaonta na umbalga do Debata sian sude parungkilon na taadopi.

III. Masa ma Lalo bolon (Ul. 16:26)

Ditangihon Debata do tangiang dohot pujipujian ni si Paulus dohot si Silas. Tompu ma masa lalo na mansai gogo, gabe bungka ma sude pintu ni penjara jala madabu ma rante na mangihoti pat ni nasida i. On ma tanda na nyata na marhuaso Debata manguba situasi na so mungkin gabe situasi na mungkin. Alai, nang pe mungkap pintu ni hurungan i ndang dohot ianggo si Paulus dohot si Silas ruar sian i. Tinggal do nasida di ingananna, patuduhon tu hita, sipata, nang pe dilehon kesempatan tu hita laho ruar sian hasusaan, dipangido Debata do asa tinggal hita laho manghatindanghon ulaonNa na umbalga i. Hamu angka dongan, di ngolu on, jotjot do dibungka Debata dalan di hita, alai ingkon marbisuk do hita mambuat haputusan. Unang lari sian angka parungkilon, alai taadopi ma i marhite haporseaon. Boi do dipangke Debata ganup situasi, nang pe na maol, tu angka ulaon na denggan.

IV. Hamubaon ni sijaga hurungan (Ul. 16:27-34)

Dung diida sijaga hurungan mungkap pintu ni hurungan i, tung mabiar situtu do dihilala ibana, ai molo adong tahanan na malua, ingkon hona uhum mate do ibana. Ia hendak membunuh dirinya sendiri, tetapi Paulus segera menghentikannya dan berkata, “Jangan bunuh dirimu, kami masih di sini.” Dung i disungkun sijaga hurungan i ma, “Aha ma bahenonhu asa malua ahu?” Dialusi si Paulus ma, “Haporseai ma Tuhan Jesus, asa malua ho dohot isi ni bagasmi.” Dung i, ditogihon sijaga hurungan i ma si Paulus dohot si Silas tu jabuna, jala dididi ma sijaga hurungan i dohot sude keluargana. Marhite peristiwa on, taida ndang holan mangula Debata laho paluahon si Paulus dohot si Silas, alai dohot do mamboan penjaga hurungan i dohot keluargana tu haluaon. Hasatiaon dohot tangiang ni si Paulus dohot si Silas mamboan hatiuron dohot haluaon tu angka dongan.

V. Panimpuli: Dipangke Debata do angka na masa i laho patuduhon HasangaponNa .

Huria ni Tuhanta, sian turpuk jamita on taboto do, ndang hea ditadinghon Debata bangsoNa, nang pe di situasi na mansai borat. Ndang dibahen si Paulus dohot si Silas sitaonon i mangambati nasida marpangunsandean tu Debata. Torus do nasida martangiang, mamuji Debata, ujungna disaksihon nasida ma huaso ni Debata na so hatudosan i (2 Korint 12:10 “Dibahen i, sonang do huhilala di bagasan angka hagaleon, pangaleaion, hasosahan, pangaleleon dohot hagogotan ala ni Kristus; ai jumpa gale ahu, disi do ahu margogo.”). Boi do dipangke Debata ganup sitaonon na taadopi tu angka sangkap ni rohaNa na umbalga. Olo do suhar dirohanta boasa ingkon bolusonta angka na borat i, alai pos ma rohanta sai didongani Debata do hita, jala marhite sude situasi, papataronNa do hamuliaonNa (Mat. 28 : 20b “... Ai ida ma, sai na dongananku do hamu ganup ari, rasirasa ro ajal ni hasiangan on!”). Sai Tagogohon ma tangiangnta tu Tuhanta Jesus Kristus asa tongtong satia jala marhaposan tu Debata, nang pe dibagasan hamaolon. Unang mandele hita molo tung taadopi angka hamaolon i, ai ndang hea ditadinghon Debata hita, asalma tahaporseai Tuhan Jesus asa malua hita dohot isi ni bagasta. Amen.

 

Bahan Diskusi :

1)      Marhite partangiangan di bornginon, angka dia ma tanda halongangan ni Debata naung masa di bagasan ngolunta!

2)      Luhut do hita hea mangadopi angka hamaolon, songon dia ma sikapta laho mangadopi i?

 

6.     Marende BE. No. 31:4

7.     Tangiang Sian Na ro

8.     Marende BE. No. 830:1

9.     Tangiang Sian Na Manjabui

10.Papungu Pelean huhut marende BE. No. 788:1…

11.Tangiang panutup

 

Jamita: Panguhum 5 : 1 – 12 DILEHON DEBATA HAMUBAON NI ROHA

 

Minggu Kantate

18 Mei 2025

1. Marende BE. No. 13:1+9

2. Votum : A.X.B4 – D.VII.28

3. Manjaha Epistel: Ulaon ni Apostel 11 : 1 - 18

4. Marende BE. No. 363:1+7

5. Jamita: Panguhum 5 : 1 – 12

 

DILEHON DEBATA HAMUBAON NI ROHA

 

Si Debora, ima sahalak parompuan, na pinillit ni Debata gabe panguhum, laho paluahon bangso Israel. Dungkon mate si Josua, ndang adong dope Raja ni Israel. Digoari do on “zaman Israel tanpa raja” Angka panguhum do diangkat Debata laho patuduhon, ia raja nasida, holan Debata do. Adong do manang piga tugas ni Hakim/Panguhum. Parjolo, Fungsi Imam- nasida do manguluhon bangso Israel asa burju bangso i marsomba tu Debata. Paduahon, Fungsi kepemimpinan-songon tangan ni Debata mamarenta Israel, nang pe tutu ndang sude dope, jotjot holan di sada manang beberapa suku ni Israel dope. Patoluhon: Fungsi Pengadilan, martugas songon hakim pasidunghon angka persoalan/parsalisian di tongatonga ni Israel. Paopathon, Fungsi Keamanan, martugas paluahon Israel molo diadopi nasida ancaman manang penindasan sian bangso na asing.

Molo tapamanat buku Panguhum on, boi idaonta sada pola: Molo burju bangso Israel mangoloi, marsomba, mamelehon ngoluna laho pasangaphon Debata, demak do parngoluan nasida jala tarpasupasu. Alai molo langgus do roha nasida maradophon Debata ro do uhum sian Debata, sipata diloas nasida diparhatoban bangso na asing. Dungi, magangguhi ma nasida tu Debata. Dung i, disuru Debata ma Hakim/ Panguhum gabe alat ni Debata paluahon nasida.

Di turpuk on digombarhon do hagogo on ni Jahowa na tuk mangondihon jala margogoihon bangsoNa sian penindasan ni si Eglon raja ni moab, “Ale Jahowa, uju na ruar i Ho sian Seir, uju mamolus Ho sian luat Edom, humuntal angka tano i, manetehi huhut angka langit dohot angka ombun manetekhon aek. (ay. 4)”. Turpuk on patuduhon gombaran ni huaso ni Jahowa tung margogo paluahon bangsoNa i sian musu. Ndang na holan hata i dipasahat Jahowa alai dipatuduhon ibana na jongjong ibana ditongatonga ni parmusuan i jala manaluhon musu ni bangsoNa. Jala dipatunduk Jahowa do angka na jinadihon na marhuaso; humuntal pe angka tano, manetehi huhut angka langit angka ombun manetekhon aek. Laho pataridahon huaso ni Jahowa. Udan na por mambahen hureta ni Sisera jala mijur ibana sian i. On laho patuduhon ndang alani gogo ni jolma, alai sude nai na sian gogo dohot huaso na sian Debata boi gabe monang bangso i sian partontangan i.

Molo nungga Debata mangalehon gogo dohot paluahon hita sian hamaolon, aha do alusta di Ibana? Di ayat 2, dipataridahon si Debora do pamujion na di Jahowa ala tunduk do bangso Israel di parsuruon ni Jahowa di bangso i; “Pinuji ma Jahowa, Ala girgir roha ni bangso i sumeahon dirina. (ay. 2)” Dipatangkas si Debora do hamonangan nai ndada holan alani hagogoonna, alai alana dioloi bangso i do parsuruan ni Jahowa. Si Barak pe, nang pe sipata ganggu hadirionna, alai ujungna gabe parsidohot do ibana manguluhon bangso i magadopi angka musu dunghon diajari si Debora. Ai haporseaon ido na margogoihon hita umbahen boi hita mangadopi angka namasa i dibagasan ngolunta.

Marende si Debora mamuji pambahenan ni Jahowa na paluahon nasida sian halak Kanaan. Disungguli ende ni si Debora on do hita pasangaphon, mamuji dohot patimbulhon Debata ala pandonganionNa di hita manghamonanghon angka parungkilonta. Molo marhasil, monang hita di parungkilon, Debata do sipujion disi. Unang lupa hita marhatopothon, pangurupion ni Debata do keberhasilanta i. Pujipujianta, endenta i do papatarhon tu portibi on, na tapasangap, na tapatimbul Debata na margogogoihon hita manghamonanghon nasa na taula dohot na taparungkilhon. Hasomalan ni huria, Batak do marende. Marende ima pasangaphon, mamuji dohot manghatindanghon habalgaon ni Tuhan i. Alani sipadaoonta do sian parendeon ni huria na mamangke parendeon dohot paduan suara laho patuduhon haboionta. Sai tapadao ma sian parendeonta motivasi patuduhon hadirionta, haboionta. Sai tapadao ma neang niroha sian parendeonta. Neang niroha do molo asal marende hita, isarana di gareja, pesta pernikahan, ndang marsitutu hita paradehon endenta i, asa manungguli roha ni na umbegesa manghamauliatehon basabasa ni Tuhan i. Marende hita ndada na patuduhon dirinta, manang penampilan, na mamuji Tuhan i do. Marhite endenta i tahatindanghon na Jesus do mual ni pasupasu di ngolunta, Jesus do na mangalehon na ringkot di ngolunta. Tahatindanghon tu portibi on ngolunta on, keberhasilanta, prestasi natajalo, ingkon tahatindanghon Jesus do mangalehon i.

Dibagasan parngoluonta on, di jou do hita laho parsidohot, Jala hehe mamuji Tuhan i, jala marsidohot di na laho manghobasi ulaonNa, jala na gabe panindangi dipambahenan ni Debata. Di patuduhon Debata do huasoNa marhite sian pardalanan ni bangso Israel namalua sian musu, jala diramoti ibana do bangsoNai, tahaposi ma Jahowa ai Ibana do na paluahon hita sian hagunturan dohot parsalisian na ta adopi. Dung dihilala si Debora dohot si Barak nang sude bangso Israel pangaramotion nang pangurupion ni Debata na manjaga nang marmudumudu nasida sian angka musuna gabe lam tau ma nasida ingkon mamuji Debata marhite ende pujipujianna, ndada ala na dipalua sian ragam ni hasosahanna sambing alai dao dumasip na manghirim do nasida muse asa manongtong Debata mamasumasu nasida songon bangsoNa, “Singkat ni soara ni angka na pagulut di lambung partuaehan, diendehon boruboru nuaeng disi angka denggan basa ni Jahowa, denggan basa ni partogi di Isreal, uju na tuat laho muli tu bahalna be bangso ni Jahowa marsonangsonang” ay. 11. Ndang jadi mabiar, ndang jadi tahutan, mandele jala mandate ngoluna, ndang jadi marpengpeng haporseaonna tu Debata ala di lambung nasida do Debata, jala Debata do manjaga nasida, ido alana ingkon pujion nasida Debata di ngoluna siala saluhut pangaramotionNa tu bangsoNa. Songon i ma tong hita angka naporsea di partingkian nuaeng, asa sai manongtong mamuji Debata di saluhutna pambahenanNa di ngolunta ganup marsadasada, marhite namangulahon jala manghangoluhon hataNa di ngolunta siganup ari. Tuhan Debata Jahowa ma na mangaramoti jala mamasumasu hita Saluhutna.

Bahan diskusi:

1)      Ende dia do gumodang ta endehon di ngolunta siganup ari?

2)      Boasa boi hita gomodang mangendehon lagu Pop, Jala bangkol mangendehon pambahenan ni Jahowa, Atik na maol do hita mamparhatopothon pasupasu ni Debata di ngolunta siganup ari?

 

1.     Marende BE. No. 573:1

2.     Tangiang Sian Na ro

3.     Marende BE. No. 565:4

4.     Tangiang Sian Na Manjabui

5.     Papungu Pelean huhut marende BE. No. 716:1+3

6.     Tangiang panutup

 

 

Jamita : PANGUNGKAPON 7 : 9 - 17 JAHOWA MARMAHAN BANGSONA

 

MINGGU JUBILATE

11 MEI 2025

 

1.     Marende            BE. No. 562:1-2

2.     Votum : A.X.B3 – D.VII.27

3.     Epistel : Hesekiel 34 : 11 - 16

4.     Marende            BE. No. 139:1-2

5.     Jamita     :  PANGUNGKAPON 7 : 9 - 17

 

JAHOWA MARMAHAN BANGSONA

 

Ia buku Pangungkapon on marrumang sada panatapan sian haporseaon ni sahalak naposo ni Debata na  margoar si Johannes, tu na masa sogot. Digoari do buku on di hata Gorik “Apokalipsis”, na marlapatan Pangungkapon manang Wahyu sian Jesus Kristus tu si Johannes taringot tu na masa di balik ni sejarah (partingkian sisaonnari), diujung ni angka tingki dohot di angka banuaginjang i.

Si Johannes songon uluan di huria di Efesus hatiha i, dihurungkon ma di sada pulo na metmet, i ma pulo Patmos. Alai disi ma ro pangungkapon tu ibana di ari hatutuana i na disurathon muse jala ditongos tu angka huria dohot halak Kristen na tangkas manaon na porsuk siala ni pangaleleon na mansai jorbut hatiha i, asa unang sumurut nasida sian haporseaonna, alai asa tongtong marsihohot dibagasan panghirimon di ngolu sogot, ai teanon ni angka na monang i ma disi hangoluan na salelengnilelengna, alai hona uhum ma angka siihuthon parhuaso manang na gogo ni portibi on na marinduk tu sibolis.

Ayat 9-11 : “Adong ma hubereng….”. Dilehon Debata alus tu isi ni parungkilon na diadopi apostel i, i ma inganan dohot na masa (situasi) las ni roha naung diparade Debata tu angka na burju mangihuthon Ibana sahat tu ujung ni ngoluna, i ma surgo na so boi idaon ni jolma di portibi on. “Mansai torop na so dapot bilangan ni jolma”; manggombarhon balga dohot lambas ni inganan di harajaon ni Debata, i ma huria naung marhamonangan (triumphant), huria naung ni urupan ni Debata

dibagasan parnidaan na parjolo na berjuang dope di portibi on (crusis), i ma punguan ni jolma na marharoroan sian angka torop bangso na so marbolat ala ni hata, houm, parbangsoon, alai gabe sada bangso ni Debata. “Marabit na saksak”; manggombarhon pangalaho, hadirion na polin, saksak, pita jala torang, tiur songon panondang, pataridahon hamuliaon ni angka naung hehe tu hangoluan. Ala naung dipaias jala diburi mudar ni birubiru ni Debata sian nasa hajahaton/haramunon gabe ias nasida. Didok “Maniop maremare”; molo ditaringoti maremare na naeng marningot pangalaho ni na masa di pesta las ni roha , mamestahon ari raya parlapelapean marningot pandonganion ni Debata tu halak Israel na mamolus parhorsihan, i ma dung malua nasida sian angka pardalanan na borat sian Misir tu tano Kanaan. Molo di tingki pesta on na jongjong do halak Israel di jolo ni bagasjoro maniop maremare hombar tu 3 Musa 23:40-43; ptds. Zakaria 14:16. Di pesta i huhut nasida mamujimuji Jahowa jala manjouhon Hosianna, Hosianna. Zakharia manggombarhon pesta parlapelapean i tu pesta na ro sogot. Hira tindakan na sarupa ma na masa di banuaginjang dibagasan diri ni angka naung marhamonangan dohot las ni roha di parporangan ni ngoluna maralohon panurirang pargapgap, nang pe dipasiaksiak nasida sahat ro di na mate, na so olo diparhatoban ala naung sumeahon dohot mamelehon sandok ngoluna, hosana tu Debata marhite parsihohoton nasida manghaporseaon di Jesus Kristus. Songon panomunomuon ni panglima perang na manghamonanghon parporanganna, manang songon panomunomuon di sada raja na marmulia, patudos tu panomunomuon ni na torop di Jesus na mamasuhi Jerusalem.

Ayat 12 ; Pasahathon pujipujian. Dipasahat do pujipujian laho pasangaphon Debata mangolophon asi ni roha naung dijalo nasida sian Debata. Sian Ibana jala ala Ibana do umbahen adong haheheon i (Harajaon ni Debata). Angka nasida i ma na ro sian haporsuhon godang naung mamuri abit nasida jala dipasaksak mudar ni Jesus Kristus, na hum jongjong humaliang habangsa ni Jesus Kristus dohot humaliang angka sintua dohot parngolu na Opat i. Dung i manungkap ma nasida dijolo ni habangsa i huhut marsomba tu Debata dohot marlas ni roha arian dohot borngin. Sintua na di jolo habangsa ni Debata dohot Kristus, i ma na mewakili Huria ni Jesus Kristus sepanjang zaman di surgo i, songon gombaran ni Hamalimon di Israel Nasional ( 2 Musa 19: 6; 3 Musa 19: 2; Mat.5:48; 1 Ptr.2:9; Pangk.1:6; 4:4; 5:10). Angka soara ni ende dohot panindangion nasida dung masuk tu parsaoran na sun badia jala na songkal dohot na marnalanala i, i ma:

Ø Pujipujian : na patuduhon na sun songkal do Debata Jahowa dibagasan Jesus Kristus i, nasa sangkapNa ingkon tulus do sude (Jes.55:11)

Ø Hasangapon: Na sun Badia do Jahowa dibagasan Jesus Kristus, nasa hataNa ingkon saut do (Psalm.33:9; 119:90-91; 145:5)

Ø Hapistaran: Na sun hinabisuk do Jahowa dibagasan Jesus Kristus, na so hadodoan do pingkiranNa jala na so habogasan do angka dalanNa (Jes.55:8-9; Rom.11:33)

Ø Hamauliateon: Parasiroha jala pardengganbasa do Jahowa dibagasan Jesus Kristus. Ndang olo mansadi holong dohot asi ni rohaNa tu ganup jolma na satia tu IbaNa (Psalm.100:5; Jer.33:11)

Ø Hagogoon: Na sun hinagogo do Jahowa dibagasan Jesus Kristus, ai nasa na tinahiNa ingkon tulus do, ndang haambatan manang aha (Psalm.24:1-2; 136:6-8)

Ø Hatoguon: Na sun manongtong do Jahowa dibagasan Jesus Kristus, na marmulia do IbaNa jala ndang marujung saleleng ni lelengna (Jes. 44:6; 1 Kor.3:11; Heb.13:8; Pangk.1:8)

Nasa na di Debata dibagasan Jesus Kristus hot so mubamuba saleleng ni lelengna, songon Debata hot ro di saleleng ni lelengna.

Ayat 13 – 17: Upa sijaloon jala sidaion ni angka naung manaon ragam ni haporsuhon dohot ragam ni angka pangunjunan (marsiak, marpogos, marlea). Ala satia sahat ro di ujung ni ngoluna mangoloi dohot manghatindanghon Debata, i ma: dijolo ni habangsa ni Jesus Kristus i do nasida mangoloi Ibana arian-borngin di JoroNa. Marsaor dibagasan holong ni roha na rimpas, gok las ni roha dohot dame na rimpas, dibagasan hasonangan dohot hamuliaon naung rimpas (sempurna) saleleng nilelengna. Ala ndang adong be anggukangguk, hamatean, na hona bura, nang arsak, manang aha na hansit, iluilu dohot parmusuon, tung tarapul tahe roha ni na rap dohot birubiru paskah i, i ma Kristus Tuhan i. Birubiru i do mangaramoti nasida na manghaholongi nasida, na marasi ni roha mida nasida (Ptds. Jes.49:10; 29:8). Kristus mangalehon aek tu angka na mauas, ai Ibana do aek na mangolu (Joh. 7:38; ptds. Joh.6:48) Ibana do na mangalehon mangan angka na male, ai Ibana do roti hangoluan i.

Sipahusorhusoronta, tahaporseai do naung partohap hita di parsaoranta dohot Debata marhite haporseaonta di Tuhan Jesus Kristus dung tardidi, manghatindanghon haporseaon dohot nang parpadanan na badia i. Alai ndang na rimpas dope parsaoranta dohot saluhut na badia i di jolo ni habangsa ni Debata dohot Jesus Kristus saleleng di portibi on dope hita. Jala tangkas do didok hata ni Debata, ingkon mamolus lan haporsuhon, pambebeon dohot hamatean dope hita saluhut laho mamongoti habangsa ni Debata. Ai ndang tarbahen so hona lele nasa na naeng marparange na daulat marhite Kristus Jesus saleleng di portibi on, dalan papitahon dohot pasaksak haporseaon dohot holong ni rohanta dohot panghirimonta tu ngolu na marlas ni roha di parsaoran dohot Debata raphon Jesus Kristus di habangsaNa na di banuaginjang sisalelengnilelengna i. Sian zaman tu zaman hasusaan bolon i sai tongtong do ingkon alamanna i. Alai di saluhut na masa i, marhamonangan do halak Kristen i, ai ujung ni ngoluna ndada portibi on. Ndada sitaonon hata parpudi di angka na porsea, alai ngolu na di banuaginjang i do. Panghirimon na songon on ma margogoihon Huria, angka na porsea di portibi on, ai marpungu do muse hita na porsea, maruloshon abit na bontar. Naeng ma hita saluhut na porsea di Jesus Kristus parade ngolunta, gogonta, hosanta laho mamongoti parsaoranta dohot Debata di tingki naung binuhulNa i. Ai tangkas do didok Debata dohot Kristus : “Martua ma na mate dibagasan Tuhan i, olat ni on. Tutu didok Tondi i, mansohot ma nasida sian parungkilon nasida, ai na mangihut ma tu nasida na niulanasida i”.

Bahan Diskusi :

1)      Ragam do na masa na taadopi laho mangelaela haporseaonta, Di saluhut angka na masa i, aha ma sitioponta asa boi hita hot di haporseaon i ?

2)      Boasa marsihohot angka na badia mangulahon na denggan nang pe sai dipaporsukporsuk jala disosak portibi on nasida ?

 

6.     Marende            BE. No. 689:1-2

7.     Tangiang Sian Na ro

8.     Marende            BE. No. 502:1+3

9.     Tangiang Sian Na Manjabui

10.Papungu Pelean huhut marende BE. No. 323:1…

11.Tangiang panutup