Jamita Eoistel : Jesaya 55:1-9 Pauba roha asa Unang Mago

 

Minggu  OKULI

23 Maret 2025

 

1.     Marende            BE. No. 15:1-2  Aut Na Saribu Hali Ganda

2.     Votum : A.VI.B3 – D.V.20

3.     Epistel : Lukas 13:1-5

4.     Marende            BE. No. 680:1-2  Sai Togihon Au Mulak

5.     Jamita : Jesaya 55:1-9

 

Pauba roha asa Unang Mago

 

Kebakaran hutan yang sudah terjadi di Los Angeles  menjadi peristiwa kebakaran paling mematikan dalam sepanjang sejarah Amerika Serikat yang terjadi di awal tahun 2025(07-01-2025). AP News mengabarkan kebakaran hutan mematikan itu memaksa evakuasi besar-besaran, tercatat lebih dari 179.000 warga LA harus mengungsi, kebakaran ini menyebabkan lebih dari 9.000 bangunan hancur; Puluhan Ribu Lahan hangus terbakar dan sedikitnya 24 orang tewas. Akibat peristiwa ini, diperkirakan kerugiannya mencapai 150 miliar dollar AS dan menjadi peristiwa kebakaran paling mengerikan dalam sejarah AS.

 

Dari peristiwa awal tahun ini, Sebagian orang dengan cepat berpendapat bahwa bencana seperti ini merupakan akibat dari penghakiman Allah. Daripada memandang penghakiman Allah sebagai tragedi, mari kita memandangnya sebagai panggilan untuk pertobatan. Malapetaka itu sendiri memang bukan hal yang baik, tetapi dapat dipakai untuk menggenapi rencana Allah dengan menyadarkan orang percaya dan membawa orang yang belum percaya untuk bertobat serta beriman kepada Yesus. Janganlah kita bertanya, “Siapa yang patut disalahkan dalam bencana ini?”, tetapi bertanyalah: “Tuhan, apa yang ingin Engkau katakan kepada saya melalui kejadian ini?”.

 

Songoni ma na dipasingot panurirang Jesaya bangsona Jahudi tongon dibagasan habuangan, asa Pauba Rohana na manimbil sian dalan ni Jahowa. Habuangan digombarhon doi songon uhum na jorbut, marhite habuangan i tung dao ma nasida sian luat nasida, mian di luat na berbeda bahasa dohot adat kebiasaan jala tung mansai jotjot do angka paisolat (orang yang terbuang) ndang adong jaminan perhatian dohot perlindungan sian panggomgomi, bahkan jotjot gabe sasaran ni pangalaho na hurang sintong (na so adil), Ima na diadopi bangso i uju di habuangan.

 

Marhamubaon ni Roha ma Bangso i, Mulak ma tu Jahowa ai ido na hinalomohonNa.Tu namarhamubaon dibagabagahon do, Parjolo : Panarihonon-Na,  ido na dibagabagahon tu bangso i asa marpanghirimon (1-2).  Angka ugasan na nigoaranna  di bagasan ayat on, isarani aek, gandum, susu dohot anggur ima realitas ni kebutuhan pokok ni hajolmaon. I do na parjolo sahali dibagabagahon na lehonon ni Jahowa tu angka na muas, na pogos, dohot angka na asing na manghaporluhonsa. Boi do bandinghononta on tu janji ni Jahowa uju di tano Misir dope bangso i, ima bagabaga mangalehon tano na gok susu dohot situak ni loba (2 Musa 3:17,  5 Musa 8:7-10, dna). Paduahon: Haluaon na sian Jahowa . Bagabaga haluaon (3-5),  Bagabaga ni Jahowa taringot tu pasupasu na naeng basabasahonon ni Jahowa, ndada holan angka na mardomu tu pardagingon ni hajolmaon. Alai andul umbalga jala tumimbo sian i ima na mardomu tu pasupasu/ haluaon ni partondion. Hombar tusi disosoi do nasida asa pamanathon sangkap na naeng patupaon ni Jahowa, ima sangkap haluaon marhitehite Mesias na dibagabagahon i. Tangkas do pangantusion ni panurirang taringot tu haluaon i ndang be terbatas holan di pemahaman keselamatan nasionalis sambing. Haluaon i ndada be holan sebatas haluaon ni bangso Israel sian tangan ni angka penjajah jala pemulihan nasida songon sada harajaon manang bangso, alai andul umbagas sian i, dohot do haluaon i manghangham angka bangso di luar ni bangso i. Patoluhon: Mangharinghothon mangalului Jahowa jala Mangantusi dalan ni Jahowa . Joujou mangalului Jahowa (6-9).  Tung maol jala sai suhar do dalan dohot pambahenan ni Jahowa, diondolhon Jesaya do i tu bangsoi taringot tu huaso nang dalan ni Jahowa anggiat siat tu roha nasida jala marsitutu ma bangsoi laho mangoloi Jahowa. Ndang hapingkiran jala tung maol siat dipangantusion, tung dao tumimbo dalan nang sangkap pambahenan ni Jahowa, dengan tujuan asa tung dihaposi bangsoi jala marpos ni roha manghaporseai Jahowa naung mamillit nasida gabe bangsoNa.

 

Pauba Roha ma, unang be dihajugulhon be angka Pangalaho na so denggan; unang be didatdati diangka Pangalaho na so nihalomohon ni Debata; unang be dipangasahon godo nang hamaloon/ angkal ni hajolmaon i. Nunga tung godang angka singot-singot ni Debata paingothon hajolmaon i asa mulak ma tu dalan lomo ni RohaNa, ai ido dihalomohon RohaNa (“Nunga dapot tingkina; nunga songgop harajaon ni Debata. Pauba hamu ma rohamuna, jala haporseai hamu ma barita na uli i”- Markus 1:15; “Songon sintongna mangolu ahu, ninna Tuhan Jahowa, tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana. Antong sai mulak ma hamu tumadingkon dalanmuna angka na jahat i! Boasa tung tagonan mate hamu, ala pinompar ni Israel”- Hes33:11). Amin…

 

Bahan Diskusi:

1.      Ragam nuaeng angka na Masa di portibion, angka bencana, angka parporangan nang angka na asing. Tahaporseai do i angka na Masa i, songon na manungguli hita..! Alai boasa ma marmaol hajolmaon i manghaposi Jahowa?

2.      Dihalomohon Jahowa do Hamubaon ni Roha unang Mago, diama na Ingkon si hangoluhononta tanda ni naung Muba hita?

 

6.     Marende            BE. No. 403:1-2  Pos Rohangku Di Tuhanku

7.     Tangiang Sian Na ro

8.     Marende            BE. No. 399:1   Unang Tarlalap Di Hata

9.     Tangiang Sian Na Manjabui

10.P. Pelean huhut marende BE. No. 385:1--- Di Jouhon Jesus Ro Hamu

11.Tangiang panutup

 

 

Pdt. Ramli S. Sihombing, M.Pd

                                                                HKBP Ressort Pulo Raja

 

 

 

Jamita EPISTEL : PILIPI 3:17- 4:1 PAIDAIDA HINADENGGAN NI TUHAN I

 MINGGU REMINISCERE

Minggu, 16 Maret 2025

 

1.     Marende            Be. No. 467:1+4   Asi ni rohaM Hupuji

2.     Votum : A.VI.B2 – D.V.19

3.     Epistel : Psalmen 27:1-6 

4.     Marende : 30:1-2  Jesus Lehon Hatorangan

5.     Jamita : PILIPI 3:17- 4:1

 

PAIDAIDA HINADENGGAN NI TUHAN I

Hamu angka dongan sahaporseaon, Huria Pilipi ima sada huria na pinajongjong ni  Paulus, alai di tongatonga ni perkembangan ni Baritanauli naung pinasahat ni Paulus laos adong do muse tantangan na diperhadapkan tu nasida. Diadopi huria nametmeton do angka halak na manghasogohon keberadaan nasida jala laos adong do muse angka namanggoari dirina parbarita na uli alai namaralo tu poda naniajarhon ni Paulus i sandiri. Isarana, adong do halak namangondolhon ia halak naporsea ima angka halak naung dipalua Kristus tondina, jala ndang adong hubungan ni partondion na be tu pardagingon, lapatanna:boi do dinasida mangulahon angka hagiot ni dagingna alai anggo tondina ndang mardosa (malua) ima nadigoari dohot paham Libertinisme. Adong do muse halak na gabe mangondolhon pemusatan perhatianna tu namangorom diri marhite na laho mamulik (bersemedi/meditasi/ beraskese). Olo do nasida marpuasa, ndang pola mangan dohot mangharingkothon naasing,  asing  holan na sai martangiangi manang meditasi, on ma na digoari paham Asketis. Jadi di situasi ni nasongononma asa gabe didok si Paulus turpuktaon:

1.    Rap sitiru ahu ma hamu Diragam ni angka ajaran manang paham na adong berkembang hatihai, dipaingot si Paulus do nasida asa naeng nian gabe ibana tiruan dinasida. Pinomat adong dua hal ingkon tiruan nasida sian Paulus: 1) Sude do umbotosa paboa na sangap do Paulus  jala parhuaso, alai diarjumi ibana orbukorbuk dosaluhutnai, pangalelei do ibana najolo musu ni siihuthon Kristus, alai saluhutnai didok ibana: Huhalupahon na di pudingku, hueaki angka na di jolo. Dompak pandang i do hupuspus, dompak upa hamonangan na sian panjouon ni Debata sian ginjang, di bagasan Kristus Jesus i.(Pil 3:14). 2) Ragam do sitaoon ni Paulus mamaritahon Baritanauli, pola do sahat tu natrahurung, alai ndang sumurut ibana mamaritahon Baritanauli i. Tu na songoni ma ditogihon Paulus huria i asa maniru ibana.  Tiruan dalam arti pangalaho ni si Paulus ma nian naeng berengon ni nasida manang na boha.  Alana molo pangalaho ni si Paulus ndang na laho manghaginjangkon dirina manang ndang na laho patigor diri, alai tangkas do dipataridahon si Paulus anggo angka parniulaonna bertujuan tu angka na uli do (uli tu halak jala marpanghorhon hadameon). Jadi ndang adong ditaringoti si Paulus taringot tu angka ruhutruhut ni hadirion ni jolma, songon nanidok ni paham Asketisi (berusaha supaya sempurna marhite na mengasingkan diri/mamulik sian masyarakat). Dohot hata naasing, anggo barita na uli nabinoan ni si Paulus ima boha do hita jolmaon boi hidup berdampingan dohot halak naasing dibagasan dame dohot holong. Jadi on do anggo penekanan ni si Paulus ditongatonga ni parngoluon ni siihuthon Kristus naeng parrohahonon (ay.17: Pamanat hamu ma angka na marparange songon hami…, ninna,. Jadi diajak angka natorop asa naeng mamereng tu pangalaho  (cara hidup) ni si Paulus,  ndang gabe maniru songon angka pangalaho ni kelompok Libertin dohot Asketis na tadok i.

2.    Mardongan ilu. Marhite pandohan on naeng paingoton ni si Paulus nasida paboa  tung marsitutu do ibana diangka hatanai. Mardongan ilu, ima gambaran ni kesungguhan dohot pergumulan ni si Paulus diulaonna dohot dipanghophoponnai tu huria Pilipi i sandiri. Jala laos diigil  si Paulus do marhite pandohannai muse asa naeng nian angka nasida be manat, unang nian gabe laos marisuang saluhut angka naung pinungka ni si Paulus i. Jala laos naeng do muse sadar nasida paboa, anggo ditongatonga ni parngoluon nasida nunga tung godang halak na targoar musu ni silang ni Kristus.

3.    Hamagoan do ujungnasida. Dipaingot si Paulus do marhite pandohan on asa ujung ni ngolu ni angka jolma na mangulahon songon na tadok nangking (ima angka –paham Libertin, Asketis, dll na berkembang saat i) marhaujungan tu hamagoan, tarlumobi ma muse didok Si Paulus: Butuhanasida do dipardebata, ninna. Lapatanna;adong do memang sadasada faham/ajaran ditongatonga ni parngoluontaon na idaon songon na mangulahon lomo ni roha ni Debata, hape anggo pada dasarna penipuan do sude naniulana, bahkan motivasi nasida mangulahon i holan naeng manggulut aha na adong diportibion do, tu si do diparrohahon nasida. Alai ujung ni angka na songon i, ima hamagoan, molo boi idaon hira na jagar nuaeng alai diujungna tu hamagoan saluhutnai.

4.    Banua ginjang do sambulonta. Ia angka na mangulahon lomo ni roha ni Debata manang angka namangihuthon Barita na uli na pinasahat ni si Paulus, ndang berorientasi tu portibi alai justru dipaingot do asa gabe tartuju rohanasida tu banua ginjang (ai di banua ginjang do sambulonta),jala na sian i do ro Kristus na laho paluahon hita. PaubaonNa ma dagingta na lea on gabe doshon dagingNa na sangap i. Lehonon ni Debata ma perobahan na tangkas dingolu ni angka na porsea, molo marhansit ibana di portibion alai molo hot do ibana manghaporseai Jesus (maniru Paulus) rade ma di ibana hasonangan na so ada tudosanna di portibion. Tusi ma hita maporus, ido umbahen mansai elek do Paulus  mandok : donganku, nahinaholongan, hinasiholan, tumpalhu asa marsihohot dibagasan Tuhan i.

Hamu angka dongan nahinaholongan di bagasan Kristus, ragam do memang ditongatonga ni parngoluontaon na boi mangelaela hita asa unang mangihuthon Tuhan i. Jala ndada holan dielaela boti hita, alai laos dipatuduhon do tu hita angka na menarik na tau manait rohanta. Sai godang do na boi dibahen angka pangelaela na di portibion angka cara cara na menarik na boi mambahen jolma gabe terikutikut manang terpengaruh. Sarupa do ra molo tadok angka reklame reklame na sai paboahon angka halobian ni produkna. Nasadaan mandok :produknami do na un jago jala laos dipaboa adong halobianna, songon ido nang produk na asing, didok do buatan nasida na dumenggan jala laos dibuktihon halobianna,ujungna gabe godang halak na gabe bingung jala mubauba (satongkin tu san satongkin nai muba muse dompak nasadaan), alai anggo halak siihuthon Kristus dipaingot asa unang nian mura mura terpengaruh tu angka aha na adong ditongatonga ni parngoluonnai. Songon Tema  ni Tahun Transpormasi HKBP 2025: “Gabe imbaru ma hamu dung muba pingkiranmuna” tontu na parjolo nanaeng dohononna ima asa unang sarombang hita dohot portibion, alai tapatuduhon ma dirinta angka naung pinaimbaru ni Tondi Parbadia i, mamungka sian hadirion parbagasan na dipatarida di parngoluon siganup ari, jala angka na songon i ma na tangkas paidaida hinadenggan ni Jahowa, songon topik Minggunta i. Amen.

 

Bahan Diskusi :

1)      Angka dia ma nuaeng pangalaho di zaman on na nangetnanget nunga mamboan hita lam mandao sian Tuhan i?

2)      Aha ma na boi tapatupa di Tahun Transpormasi on, songon hataridaan ni naung dipaimbaru hita jala naung muba pingkiranta?

 

5.     Marende            BE. No.  221:1+4   Saleleng Jesushi

6.     Tangiang Sian Na ro

7.     Marende            BE. No. 695:1  Jesus Tuhanhu di Ho ma au on

8.     Tangiang Sian Na Manjabui

9.     P. Pelean huhut marende BE. No. 741:1  Nang ro pe Habahaba

10.Tangiang panutup

Pdt Janti D Nababan

HKBP Resort Desagajah

Jamita : ESTER 5:1-8 SIAN NA TUMANGIHON DO RO HAPORSEAON

 

Minggu INVOCAVIT

Minggu, 9 Maret 2025

 

1.      Marende BE No. 565:1-2  Las Rohangku Lao Mamuji

2.      Votum            : A.VI/B1 – D.V/18

3.      Epistel             : ROM 10:16-21

4.      Marende BE. No. 25:1-2  HataMi Ale Tuhanku

5.      Jamita             : ESTER 5:1-8

 

SIAN NA TUMANGIHON DO RO HAPORSEAON

 

Torop do pardalanan ni angka na porsea di portibi on, ndang muramura. Sipata ingkon hira na mandalani dalan na marbatubatu do, jala mamolus dalan na tung maol. Sipata ingkon masa do angka hamaolon na so tarjalo roha, jala na boi tarbege do angka hata na suga tu sipareon. Boha ma sahalak siihuthon Debata hundul manang jongjong di situasi dohot kondisi na songon on? Molo pinasip, hira satolop di angka pangalaho dohot na masa i. Molo pintor tinudu jala niuhuman angka na masa dohot pangalaho na humurang i, na boi hatop do manghorhon mara tu diriniba nang tu na humaliang. Di son ma ringkot situtu haporseaon, lumobi bisuk na sian Debata, alani do lam arga hilalaon panogunoguni turpukon aithononta tu ngolunta, sian na tumangihon do ro haporseaon. 

 

Panghilalaan songon na di ginjang ondeng ma masa tu si Ester (goar Parsi, alai dihajahudionna margoar Hadasa). Ester, i ma boruni si Abigail, amangtua ni Mordahai halak Jahudi, na jumpangan asi ni roha dohot talup ni roha di jolo ni raja Ahasweros (Serses/Artahasasta) na mangarajai di Parsi (Persia) olat ni India sahat ro di Kus (127 luat). Magodang do si Ester dijoloni si Mordahai dung mate na toras na. Dipodai si Mordahai do ibana asa unang dipaboaboa na halak Jahudi ibana, ai songon bangso na maisolat nasida di tano Parsi godang do sijagaonnasida sian angka bangso na adong di tongatonga nasida. Dipabangkit raja Ahasweros do si Ester gabe raja (ratu) di harajaonna, laos dipabangkit rajai do na gabe induk ni naposona (setara Perdana Menteri )na margoar si Haman.

 

Songon dalan laho mambuat hasangaponna, dipatikhon si Haman ma marhite sahap ni raja i na ingkon sude jolma di harajaon ni si Ahasweros marsomba pola marsinggang di jolona (3:2). Hape ia si Mordahai (sisolhot ni si Ester) sahalak pinompar na sian Jahudi na dohot marulaon di bagas (Istana) ni raja Ahasweros, ndang olo marsomba tu si Haman. Gabe ditahi rohani si Haman ma mamunu si Mordahai ro di sude halak Jahudi digonggomanni harajaon Parsi hatihai (3:6).

 

 

Haman, i ma Sada halak na pinahundul ni raja Ahasweros (Serses), sumurung huasona sian angka induk na asing i ma, diharajaon Parsi. Haman, halak naung gabe sisombaon, jala i do tona ni raja i maradophon ibana. Alai  anggo si Mordahai ndang olo marsinggang manang marsomba tu ibana (3:2). Siala ni i ma tarrimas raja i, gabe dipangido ibana ma tu raja Ahasweros asa bunuon, ripashononna sude (dibunuh secara massal, genosida) halak Jahudi sian na bajar ro di na matua, sian posoposo dohot parompuan dibagasan sadari naung dibuhul, jala nunga dipabotohon tu sude  sangkap i marhite surat (3:13).

 

Siala ni i, di saluhut luat hasahatan ni hata dohot parenta i, masa do angguk badar, parpuasaon, partangisan dohot andung ni bangso Jahudi (4:3), jala torop marpahean di sirabun marulos tangka. Songon i ma parungkilon ni bangso Jahudi di hatiha i, jala dipajonok dirina tu jolo pintu jabu ni raja i. Dung i tarboto ma na masai tu pardihuta ni rajai, i ma si Ester (4:4-8), jala siala ni i asa tung dipangido asi ni roha ni rajai, mangondihon bangso Jahudi sian hamaolon dohot parungkilon bolon i. Ester, sahalak parompuan Jahudi na sai satia di ton ani ibotona Mordahai, jala parsiranggutonni haporseaonna tu Tuhan i dung jumolo marpuasa dohot tangiang pangondionna (4:16), tarjou sumarihon, humolongan tu donganna sahaporseaon, sabangso asa tu dirina sandiri.

 

Dung diboto si Ester na naeng masa hamagoan bolon tu bangsona Israel, disangkapi rohana do mambahen dalan asa malua bangsona Israel sian mara na balga i. Alani tung dihabaranihon ibana do ro mangadop raja i dijabuna nang so pola dijou raja i ibana. Sada ulaon na dokdok, jala so tung hona patik (undang-undang) ala beresiko tinggi do ulaon nanaeng dalanhononnai, ala boi do ditulak raja i haroroni manang ise pe molo so lomo rohana (4:11), molo di tulak, marlapatan talpe tu hamatean ma ngoluna. Disangkapi si Ester do patupahon sada panggalangon (jamuan makan) jala dipangido si Ester ma asa ro nian raja i tu panggalangon nanaeng patupaonna dijabuna. Hape tung ungkap do roha ni raja i manjalo haroroni si Ester dohot mangoloi pangidoanna huhut di dok: “Aha do na hurang di ho, ale Ester, jolma ni raja, jala aha do na pinangido ni roham? Sahat ro di satonga ni harajaon i ingkon lehononku do i tu ho” (5:3). Sada alus na lambok jala bagas panghorhonna, ai pola ro di satonga di harajaon i olo do rajai mangalehon tu si Ester. Satonga ni hadirionna, ai ala na adong do hinarajaanna umbahen na targoar sasahalak gabe gabe raja na sangap (pat Mark 6:23).

 

Di ari panggalangan na pinatupa ni si Ester, ndang pintor di dok si Ester aha na solot di rohana, gariada tahe dipangido ibana do tu rajai asa ro muse rap dohot si Haman marsogotnai tu panggalangon na naeng patupaonna. Nang pangidoan na paduahon ipe tongtong do dioloi rajai jala diulahi rajai mandok muse tu si Ester:” Aha do na pinangido ni roham, ingkon lehonon do i tu ho, jala aha do sihol ni roham ro di satonga ni harajaon i, ingkon pasauton do” (ay.6). Molo tapamanat di pandohan di ari parjolo diondolhon “ingkon lehonon”, hape diari paduahon nunga di dok disi lam di papos roha ni si Ester jolmanai paboa aha na naeng sipangidoon ni si Ester dang adong be pangambati gabe so saut oloan ni raja i.

 

Patar ma hilalaonta hadirionni si Ester, humolongan do ibana tu bangsona (Nasionalis) asa tu dirina. Tung pe pardihuta ni raja (ratu) ibana, sangap/respect, jala unduk/attitude do ibana tu tunggane dolina i ma raja Ahasweros. Ndada holan rupa ni Ester na uli tus, dohot do donda ni rohana, alani dibagasan hasabaron, habisuhon do ibana pasahathon pangidoanna dipanghilalaanna naung marsigorgor maradophon tahi ni Haman i. Aut sura marroha (marhadirion) portibi ibana, nda boi do guru lomona mangondolhon (memperdaya, ambil alih, take over) di tunggane dolina i, isarani tading mamarenta, mamaksa lumobi molo apala ringkot situtu tu dirina, horongna. Alai ndada pardihuta sisongoni si Ester, nang pe pola dua hali dilean Ahasweros peluang (3:3,6).

 

Mansai dok do do tutu manuhuk ulaon pajongjong hatigoran i manang manghatahon hatigoran i nang pe i ditongatonga ni rumatangga isarani antara suami dan istri, tarlumobi ma i molo marpardomuan tu jabatan manang panghobasion na berhubungan tu luar ni ruma tangga i sandiri. Alai dung tangkas panggalangon na pinatupani si Ester, jala rajai pe sai manulikiti na di rohani si Ester parnijabuna i; dihabaranihon si Ester ma pasahat na marsigorgor na dirohana i alai dohot roha na serep (7:3), pabotohon sangkap na jorbut sian si Haman, induk ni napaoso (Perdana Menteri) na i, nanaeng maniaphon, mamunu jala mangagohot (7:3) bangso Jahudi sian saluhut harajaon Parsi. Tarrimas ma raja i umbege, pola sanga ditadinghon inganan panggalangan i laho tu porlak (taman), dung mijur rajai muse, diparentahon ma si Harbona, manguhum Haman, induk ni naposo i gantungon di tiang arga 50 asta timbona na binahenni si Haman sandiri tu si Mordahai hape gabe tu dirina sandiri (7:7-10). Sai ditahi parjahat i do mangago hosani partigor, alai diparengkeli Jahowa do tahina i, ujungna mangago hosana sandiri (Psalm 37:12-13). Tangkas do uhumni Jahowa tu parjahat, jala halalasniroha tu na daulat (Psalm 53:6-7).

 

Laos dipasuang raja i ma hadirionni bangso Jahudi maringan disaluhut gonggomanni parsi marhite manongos bisoloit. Las ni roha ni Bangso Jahudi dipanogunoguonni Tuhan (Providenta dei) marhite Ester dohot Mordahai, dihalashon marhite ari rea Purim dihalashon marhite las ni roha, panggalangon pola marsipiringan na maraleale marningot pambahenanni Jahowa na so hasuhatan (9:19) siingoton sian sundut tu sundut. Tangkas do jumpa di ngoluni Mordahai lumobi si Ester, hatanI Tuhan:”Ai na marhamaolhon ngoluna, ngolu ni I do na mago sogot; alai na sumeahon ngoluna ala ni Ahu, I do jumpangan ngolu sogot” (Mateus 10:39). “Ai sipaoruon do ganup na patimbo dirina, alai sipatimboon do na paoru dirina” (Mateus 23:12). Amen.

 

Bahan Diskusi:

1)      Ahado na boi sitiruon sian si Ester songon sahalak: a) Parompuan (anakboru/gadis) b). Pardihuta (wanita/istri pejabat)  c). Parbangsoon (Warga Negara)

2)      Sasada ni si Haman, alai tuk do ibana naeng mangago sada bangso (genosida), boi do tarbayanghon hita pangontakna, holan 1% pe sian penduduk ni Indonesa on marbangko Haman? Adong do rumangni genosida (Kejahatan sengaja dan sistematis membantai secara massal) na taboto nuaeng di humaliangta? Molo adong aha ma rumangna, jala aha do lombulombu sipareahanta?

 

 

6.      Marende BE No. 724:1   Tuhan Baen ma Ngolungkon

7.      Tangiang sian na ro

8.      Marende BE No. 207:1  Sai Tiop Ma Tanganku

9.      Tangiang sian na manjabui

10.  P.Pelean huhut marende BE No. 697:1----  Molo Ho Do Huihuthon

11.  Tangiang panutup

 

Pdt Rudi Mardimpos Simaremare

Pdt HKBP Resort Aek Kanopan

 

Jamita Partangiangan : 2 Korint 3 : 12 - 4 : 2 PAPATARHON SONDANG HAMULIAON NI JAHOWA

 

Minggu Estomihi

02 Maret 2025

 

1.      Marende sian BE. No. 4:1-2  Sai Puji Debata

2.      Votum :  A.VI/6 - D.V/17

3.      Epistel : 2 Musa 34 : 29 - 35

4.      Marende sian BE. No. 28:1+3  Hata ni Jahowa

5.      Jamita : 2 Korint 3 : 12 - 4 : 2

 

PAPATARHON SONDANG HAMULIAON NI JAHOWA

 

Ise do na tuk papatarhon sondang hamuliaon ni Jahowa? Ima halak naung marnida jala manjanghon sondang hamuliaon i. Dihatindanghon Ap. Paulus dirina dohot angka donganna parhobas di Padaan na Imbaru naung tangkas manjalo sondang i marhite na manjanghon jala porsea di Tuhan Jesus Kristus. Laos angka na porsea i do na tuk papatarhon sondang hamuliaon Jahowa tu liat portibi on. Lapatanna gabe sitindangi taringot tu haluaon naung binoan ni Kristus i ( gabe surat ni Kristus). Ai marhite Kristus do diungkap panghuphupi ni parnidaan ni ganup jolma, asa tangkas idaon nasida sondang hamuliaon ni Jahowa, huhut papatarhon i tu portibi on.

 

Marasing sian i do na masa di Padan na Robi (pat. Tu Epistel)  na dihuphupi si Musa do bohina sian bangso Israel. Mabiar do bangso i jumonok ala ni bohi ni si Musa na marsinondang sian hamuliaon ni Jahowa marhite parjumpaanna di Dolok Sinai. Dihuphupi si Musa bohina sahat ro di na mago sinondang ni bohina i. Diida si Paulus do sikap ni si Musa i songon sada makna paboa na dihuphupi dope sian nasida hasintongan paboa Padan na Robi i ingkon marujung do i marhite haroro ni Kristus (Rom 10:4, Gal 3:24), ai Kristus do ujung ni patik i laho mamintori nasa na porsea. Panghuphupi ni bohi ni si Musa ima songon gombaran na huphup pangantusion dohot pingkiran ni halak Jahudi sahat tu tingki on laho manjalo hasintongan na imbaru, ima paboa holan di bagasan Kristus do diungkap panghuphupi ni parnidaan  na mambahen maoto taringot tu maksud ni Debata pasahathon patik i. Dipatudos Ap. Paulus ma i tu peristiwa pertobatanna, paboa andorang so dijalo ibana Kristus i rumar do pangantusionna taringot tu haluaon dohot pangulaon ni Debata. Alani ima didok molo marbalik muse jolma  tu Debata, ungkaponNa do panghuphupi i sian bohina, ungkaponna rohana mangantusi lapatan ni patik dohot haroro ni Kristus naung manggohi patik i. Angka na so manghuphupi bohina marnida hamuliaon ni Debata gabe dipauba tudos tu rupaNa. Sada transformasi na luar biasa sian Tuhuanta, dipauba jolma pardosa gabe tudos tu rupaNa na marhamuliaon, ima hamuliaon ni Kristus na ro di saleleng ni lelengna na so ra marujung.

 

Marhite huaso ni Tuhan i na dibagasan Tondi, torus do masa proses perubahan i, siala ni i sian keterbatasan dohot ketidaksempurnaan ni ganup na porsea i tong do tau gabe sitindangi ni Tuhan i, na gabe sorminan laho “memancarkan” hamuliaon ni Tuhan na marsinondang i.

Hita pe nunga tapanghilalahon pangasi i ni Tuhan i di ngolunta, dohot ma hita so marnaloja songon binahen ni Ap. Paulus di panghobasionna, diondolhon do disi asa marparange na sintong, nang di na buni pe dang diula hailaan. Nilai kejujuran dohot transparansi ingkon tangkas jala patar sinondangan ni Debata Jahowa. Nang pe maol do i ulahonon, godang tantangan, godang dang manghalomohon, alai tongtong ma tajalo gogo sian Jahowa, tapasahat ngolunta tu asi ni roha ni Debata, ai Ibana do dolok batu partanobatoanta, songon goar ni Minggunta Estomihi (Psalmen 31 : 3b) mambahen margogo hita papatarhon sondang hamuliaon ni Jahowa. Amen.

 

Bahan Diskusi :

1)      Angka dia do panghuphupi nuaeng di halak Kristen na mambahen holip sinondang hamuliaon ni Jahowa sian hita.

2)      Angka aha ma sibahenonta papatarhon sinondang hamuliaon i, songon surat ni Kristus hita.

6.      Marende sian BE. No. 228:2-3  Jesus Haposanhu

7.      Tangiang sian na ro

8.      Marende sian BE. No. 482:1 Asa On Ma Na Sintong

9.      Tangiang sian na manjabu i

10.  P. Pelean huhut Marende sian BE. No. 485:1…Dongan Au Tuhan

11.  Tangiang panutup

Pdt. Glory S.P. Simamora, S.Pd.K, M.Div

Pendeta HKBP Resort Padang Mahondang