Jamita Partangiangan : 2 Korint 3 : 12 - 4 : 2 PAPATARHON SONDANG HAMULIAON NI JAHOWA

 

Minggu Estomihi

02 Maret 2025

 

1.      Marende sian BE. No. 4:1-2  Sai Puji Debata

2.      Votum :  A.VI/6 - D.V/17

3.      Epistel : 2 Musa 34 : 29 - 35

4.      Marende sian BE. No. 28:1+3  Hata ni Jahowa

5.      Jamita : 2 Korint 3 : 12 - 4 : 2

 

PAPATARHON SONDANG HAMULIAON NI JAHOWA

 

Ise do na tuk papatarhon sondang hamuliaon ni Jahowa? Ima halak naung marnida jala manjanghon sondang hamuliaon i. Dihatindanghon Ap. Paulus dirina dohot angka donganna parhobas di Padaan na Imbaru naung tangkas manjalo sondang i marhite na manjanghon jala porsea di Tuhan Jesus Kristus. Laos angka na porsea i do na tuk papatarhon sondang hamuliaon Jahowa tu liat portibi on. Lapatanna gabe sitindangi taringot tu haluaon naung binoan ni Kristus i ( gabe surat ni Kristus). Ai marhite Kristus do diungkap panghuphupi ni parnidaan ni ganup jolma, asa tangkas idaon nasida sondang hamuliaon ni Jahowa, huhut papatarhon i tu portibi on.

 

Marasing sian i do na masa di Padan na Robi (pat. Tu Epistel)  na dihuphupi si Musa do bohina sian bangso Israel. Mabiar do bangso i jumonok ala ni bohi ni si Musa na marsinondang sian hamuliaon ni Jahowa marhite parjumpaanna di Dolok Sinai. Dihuphupi si Musa bohina sahat ro di na mago sinondang ni bohina i. Diida si Paulus do sikap ni si Musa i songon sada makna paboa na dihuphupi dope sian nasida hasintongan paboa Padan na Robi i ingkon marujung do i marhite haroro ni Kristus (Rom 10:4, Gal 3:24), ai Kristus do ujung ni patik i laho mamintori nasa na porsea. Panghuphupi ni bohi ni si Musa ima songon gombaran na huphup pangantusion dohot pingkiran ni halak Jahudi sahat tu tingki on laho manjalo hasintongan na imbaru, ima paboa holan di bagasan Kristus do diungkap panghuphupi ni parnidaan  na mambahen maoto taringot tu maksud ni Debata pasahathon patik i. Dipatudos Ap. Paulus ma i tu peristiwa pertobatanna, paboa andorang so dijalo ibana Kristus i rumar do pangantusionna taringot tu haluaon dohot pangulaon ni Debata. Alani ima didok molo marbalik muse jolma  tu Debata, ungkaponNa do panghuphupi i sian bohina, ungkaponna rohana mangantusi lapatan ni patik dohot haroro ni Kristus naung manggohi patik i. Angka na so manghuphupi bohina marnida hamuliaon ni Debata gabe dipauba tudos tu rupaNa. Sada transformasi na luar biasa sian Tuhuanta, dipauba jolma pardosa gabe tudos tu rupaNa na marhamuliaon, ima hamuliaon ni Kristus na ro di saleleng ni lelengna na so ra marujung.

 

Marhite huaso ni Tuhan i na dibagasan Tondi, torus do masa proses perubahan i, siala ni i sian keterbatasan dohot ketidaksempurnaan ni ganup na porsea i tong do tau gabe sitindangi ni Tuhan i, na gabe sorminan laho “memancarkan” hamuliaon ni Tuhan na marsinondang i.

Hita pe nunga tapanghilalahon pangasi i ni Tuhan i di ngolunta, dohot ma hita so marnaloja songon binahen ni Ap. Paulus di panghobasionna, diondolhon do disi asa marparange na sintong, nang di na buni pe dang diula hailaan. Nilai kejujuran dohot transparansi ingkon tangkas jala patar sinondangan ni Debata Jahowa. Nang pe maol do i ulahonon, godang tantangan, godang dang manghalomohon, alai tongtong ma tajalo gogo sian Jahowa, tapasahat ngolunta tu asi ni roha ni Debata, ai Ibana do dolok batu partanobatoanta, songon goar ni Minggunta Estomihi (Psalmen 31 : 3b) mambahen margogo hita papatarhon sondang hamuliaon ni Jahowa. Amen.

 

Bahan Diskusi :

1)      Angka dia do panghuphupi nuaeng di halak Kristen na mambahen holip sinondang hamuliaon ni Jahowa sian hita.

2)      Angka aha ma sibahenonta papatarhon sinondang hamuliaon i, songon surat ni Kristus hita.

6.      Marende sian BE. No. 228:2-3  Jesus Haposanhu

7.      Tangiang sian na ro

8.      Marende sian BE. No. 482:1 Asa On Ma Na Sintong

9.      Tangiang sian na manjabu i

10.  P. Pelean huhut Marende sian BE. No. 485:1…Dongan Au Tuhan

11.  Tangiang panutup

Pdt. Glory S.P. Simamora, S.Pd.K, M.Div

Pendeta HKBP Resort Padang Mahondang