Jamita Partangiangan : Psalmen 37: 1 – 11 MANGHAHOLONGI MUSU

 

Minggu Sexagesima

23 Pebruari 2025

 

1.     Marende            BE. No. 3:1+3

2.     Votum     : AVA2 – DIV16

3.     Epistel    : Mateus 5:38:48

4.     Marende            BE. No. 212:1+4

5.     Jamita     : Psalmen 37: 1 – 11

 

MANGHAHOLONGI MUSU

Huria ni Tuhanta…

Sipata boi do tarunjun sasahalak mangulahon dosa marnida parngoluon ni na humaliangna, gabe lupa di denggan basa ni Debata naung dijalo di bagasan ngoluna. Dia ma rumang ni ngolu na tarunjun i, i ma pangiburuon. Jotjot do songgop pangiburuon tu ngolu ni sasahalak molo dihilala sai hira na dumenggan parngoluon ni halak na asing sian parngoluonna. Antong boha do caranta asa unang mangiburu hita marnida angka dongan na dapotan pansamotan/hamoraon portibi lobi sian na adong di hita? Alusna: unang gumodang maretongetong dohot paidaida angka na di halak na asing, alai hamauliatehon ma tu Debata angka naung pinasahat ni Debata di tonga ni ngolunta nang di tonga ni keluarganta.

Huria ni  Tuhanta, atik tompu mamora manang martamba angka arta ni dongan unang pintor marpingkiran na negatif, alai hasabamhon ma na adong di hita asa taboto mandok mauliate tu Tuhanta. Tahaporseai ma di bagasan ngolunta paboa tarpatupa Debata do lobi sian na tasangkapi, na tapingkiri di ngolu on. Molo lomo roha ni Tuhan i lehononNa do tu hita laho mandai angka hamoraon, hagabeon, hasangapon di ngolunta on. Antong unang ma mohop atetem marnida angka parjahat i, ai songon duhutduhut do i jala marmalosan songon tumbur ni duhutduhut. Lapatanna martingki do i, ndang manongtong salelengna, sai na salpu do i.

Molo sai hira na dipaloas Tuhanta i angka parjahat i dapotan huaso, hamoraon, jala boi hungkup hajahatonna marpulu taon sahat tu na matua sotung mangiburu hita marnida i. Jolma na dumangol do hita molo mangiburu tu hamoraon ni dongan ala ni hajahaton, ai tudos tu parjahat i do hita molo mangiburu tu nasida. Boha pe dibahen sasahalak manabunihon angka hajahatonna, dosana sian adopan ni Debata, diboto Debata do i. Ai dang adong na buni sian adopan ni Debata, na taula pe diboto Debata do, nang na di bagasan rohanta pe diboto Debata do. Di Heber 4: 13 didok do: “Jala ndang adong na tinompa na onding sian joloNa, tung saluhut do tedek, so adong na huphup diida mataNa. Tu Ibana do hita mardabudabu.”

Martua do angka na marhaposan tu Jahowa. Boasa martua? Ala, angka na marhaposan tu Jahowa sai haburjuhonon ni i do mangulahon angka ulaon na denggan na hinalomohon ni roha ni Debata Jahowa. Di angka na sai mangaradoti angka ulaon haburjuon di ngoluna tarida do i sian parngoluon na sai marpos ni roha di angka pambahenan ni Jahowa. Ndang sai jumolo dilele biar mangalapati angka na masa di pardalanan ni ngoluna. Molo ro pe angka sitaonon, masa parsahiton, masa hapogoson di ngolu ni angka marhaposan tu Jahowa ndang bobonosan jala ndang dietong paboa i nama ujungna. Alai dohononna do marhite haporseaonna paboa nunga diaturhon Tuhan i aha nanaeng sipamasonNa tu saluhut angka na tinompaNa.

Hamuna angka dongan…Manghalomohon Jahowa dohot pasahathon ngolunta tu Jahowa huhut manghaposi asi ni roha ni Jahowa, idaonta ma ture do sude bahenon ni Jahowa mangaramoti ngolunta. Ndang hasuhatan denggan basa ni Jahowa di angka na manghaposi huasoNa. Tuk do asi ni Jahowa manarihon, paturehon, mangaramoti ngolu ni saluhut angka na tinompaNa, diboto do angka na ringkot dohot na dumenggan di ngolu ni angka na tinompaNa. Dibahen i, saluhut ma hita manghalomohon Jahowa di bagasan ngolunta on. Pasahat ma dalanmu tu Jahowa jala haposi Ibana, asa Ibana paturehon, pandohan on laho manogihon hita asa unang mangasahon diri sandiri laho mangulahon angka ulaonta dohot mangadopi sude angka na masa di ngolunta.

Di angka naung manghaposi Jahowa di bagasan ngoluna tau do i mangotapi rimas sian dirina, ai nunga dijalo Jahowa mangula dibagasan dirina laho marnida angka hadoharon ni angka parjahat. Ndang jumpang be angka pangiburuon maradophon angka ulaon hajungkingon. Ai ndada dirina be dibahen suhatsuhat ni hasintongan, alai nunga tangkas diboto Hata ni Jahowa Debata do suhatsuhat ni hasintongan na polin. Angka na porsea di Huaso ni Tuhan i sai na margogo do i tung mangadopi manang aha pe i. Saluhutna do tarpatupa ahu marhitehite Ibana na margogoihon ahu (Pilippi 4:13). Ala nunga masuk hita tu minggu Sexagesima (60 ari andorang so Haheheon), taingot ma na pinatupa ni Tuhanta Jesus Kristus na manaon na bernit, diinsahi, ditijuri, dilinsingi, diparsilanghon, mate di hau pinarsilang. Marhite na tinaon ni Tuhanta Jesus Kristus lam botoonta ma balga ni holong ni roha ni Tuhanta i, paboa ndang lomo rohaNa adong nanggo sada pe na marjambar di hamagoan manang hamatean salelenglelengna. Dibahen i sai tongtong ma hita marhaposan tu Tuhanta i.

Alai na manahan ro di ujung, i do paluaonNa (Mateus 24:13), pandohanon on boi do tapatudos tu turpuk on di ayat 11 i : Alai sai na teanon ni angka parlambok i do sogot tano i, jala hahilashononna hinadeak ni hadameon. Nunga diparade Debata Jahowa angka sipasahatonna tu angka na satia manghalomohon Jahowa di bagasan ngoluna. Ai diboto Tuhan i do aha na ta ula, ndang adong na buni diadopan ni Tuhan i. Alani i, botoonta ma ndang marisuang hape halojaonta, parsitutuonta, parsihohotonta manghaposi Tuhan i saleleng mangolu hita.

Aha ma na boi taputihi sian turpuk jamita Psalmen 37 : 1 - 11 on, ima:

1.    Unang mangiburu tu angka siula hajahaton, atik pe mardohar nasida binahen ni hajahatonna.

2.    Ai martingki do huaso ni hajahaton i, jala salpu do i.

3.    Diboto Tuhan i do aha na ta ula, aha na di rohanta ndang adong na buni diadopanNa.

4.    Tapasahat ma ngolunta tu Jahowa asa margogo hita mangotapi rimas ni rohanta.

5.    Di minggu Sexagesima on, taingot ma pambahenan ni Tuhanta Jesus Kristus na manaon na bernit, mangadopi hamatean di hau pinarsilang laho humonghop hita pardosa, ala ni i hot ma hita mangulahon ulaon na hinalomohon ni Tuhan i. Amen.

Bahan Diskusi:

1)      Molo dumenggan perekonomian ni donganmu sian perekonomianmu Amang - Inang aha do didok ho di bagasan roham?

2)      Molo nunga taboto Amang – Inang ndang adong na onding (buni) di adopan ni Tuhanta i, sai datdatanta dope mangulahon hajahaton dohot mangulahon dosa?

 

6.     Marende            BE. No. 232:1+5

7.     Tangiang Sian Na ro

8.     Marende            BE. No. 697:2

9.     Tangiang Sian Na Manjabui

10.Papungu Pelean huhut Marende BE. No. 692:1…

11.Tangiang panutup

 

Pdt. Agus Tampubolon, M.Div

Pendeta HKBP Resort Labuhan Ruku