Jamita Partangiangan : KOLOSSE 1 : 24 – 29 JAHOWA DO PANGHIRIMONTA

 

                                            MINGGU  SEPTUAGESIMA

                                                        16 PEBRUARI 2025

 

1.     Marende            BE. No. 565 : 1 - 2

2.     Votum     : A.V.A1 – D.IV.15

3.     Epistel    : Jeremia 17 : 12 - 18

4.     Marende            BE. No. 769 : 1 - 2

5.     Jamita     :  KOLOSSE 1 : 24 – 29

 

JAHOWA DO PANGHIRIMONTA

 

Huria ni Tuhanta dibagasan Kristus Jesus. Boasa rade loja, marungkil angka naposo ni Debata, angka na porsea, angka parbarita na uli songon Apostel Paulus na manghatahon parungkilonna dohot halojaonna di na marbarita na uli i?. Hea do hita marungkil, manghalojahaon ulaon ni Tuhan i ? Tontu angka Parhalado dohot angka ruas ni huria naung tangkas manghangoluhon haporseaon dohot na gomos di panghirimonna, nunga dihilala, dibolus jala dihalojahon di na mangula angka sihobasan ditongatonga ni ragam ni panghobasion i. Songon Apostel Paulus naung manghalojahon sahat tu na marungkil di ulaonna ala nunga gabe parhalado  naung ditodo Debata dibagasan Kristus ibana. Haradeon mangadopi saluhutna angka parungkilon di ulaon songon naung ditodo Debata ndang tarsirang sian diri ni naung mangolu manang dihangoluhon holong ni Debata na manghophop, dipadame, dipasintong jala naung dipalua Debata sian hamatean i. Hinorhonni i ma gabe boi ma nian dos pandohanta songon pandohan ni Apostel Paulus: Las do rohangku nuaeng di angka haporsuhon na manghophop hamu, jala sian dagingku hugohi na hurang dope di angka na tinaon ni Kristus … ( 24 ). Lapatanna angka naung mangolu dibagasan panghophopon ni Kristus gabe rade marungkil ala barita na uli . Boasa rade ? asa dapotan ganup di barita na uli. Ido las ni roha songon na hinatahon ni Apostel Paulus di jamita on, sahat tu na singkop di haroro ni Kristus na paduahalihon. HaroroNa na paduahalihon ido hinasingkop ni las ni roha di sihirimon i. Las ni roha disihirimon ido asa rade manaon dohot marungkil ala ni barita na uli i. Hinorhon ni haradeon na marungkil ido asa taruli torop jolma, songon i hita gabe taruli di barit na uli i. Aut so rade angka parbarita na uli, dang sahat tu hita sihirimon di ari sogot i. Nuaeng nunga digohi hata ni Debata hita, halak Batak dohot saluhut angka na porsea ala asi  ni roha ni Debata do i di hita.

Huria ni Tuhanta, nunga torang be tahangoluhon naung di hita haluaon i marhite naung digohi hata ni Debata hita dibagasan Kristus Jesus. Hata i naung adong sian na jolo, na buni hian, nuaeng nunga patar ( dinyatakan dibagasan hadirion ni Kristus. Dibagasan hadirion ni Kristus naung patar i do hita ditobus, dipadame, dipalua,jala dipauliuli marhite Huria i, sahat tu haroroNa na paduahalihon. Huria i manang angka na porsea i  ma hapataran ni pamatang ni Kristus di portibion. Huria i ma na papatarhon habalgaon, hasongkalon, holong ni roha ni Debata ditongatonga ni portibion marhite ngolu na marparsaoran ( Koinonia ), Marpanindangion ( Marturia ), Manghobasi ( Diakonia ). Dibagasan ulaon panjouon on ma lam matoras di haporseaon laho pauliulihon, pahothon dohot patoguhon haporseaon dohot panghirimonta.

Huria ni Tuhanta, Songon Ruas ni huria hita lam tang ma nian di haporseaon, jala lam tu gomosna di sihirimon di ari sogot i. Gabe lam hobas hita di angka sihobasan, haradeon di na manghobasi ido hataridaan ni naung digohi barita na uli i hita. Rade mangalehon tingki, gogo, pingkiran laho patulushon ulaon ni Tuhan i. Haradeon na songoni, dang sai jumpang be ungutungut, alai gabe sipaso ungutungut do angka naung manghangoluhon barita na uli. Tahalashon ma nasa ulaon panghobasion na tajalo, nang pe sipata adong na maol. Di na maol ido tarida nilai ni panghophopon i songon angka huria, dohot angka Apostel na parjolo i. Nilai panghophopon i jumpang di hita, ala: Jahowa do Panghirimonta ( Tuhan Pengharapan kita ).

Bahan Diskusi :

1)      Aha do lapatan ni pandohan ni apostel Paulus: Dihalashon ibana haporsuhon ala ni hamu, beha ia hita nuaeng , tarjalo hita do pandohan i?

2)      Tangkas do dihirim apostel Paulus ari sogot I, ala ni do asa las Rohana di haporsuhon ? Beha ia hita tangkas do tahirim?

 

6.     Marende BE. No.

7.     Tangiang Sian Na ro

8.     Marende       BE. No.

9.     Tangiang Sian Na Manjabui

10.Papungu Pelean huhut Marende BE. No.

11.Tangiang panutup

Pdt. Sumihar Sitohang, S. Th

Pendeta HKBP Resort Tanjung Balai