Jamita : Psalmen 126 : 1 – 6 Nunga sesa angka dosami

 

Minggu JUDIKA

6 April  2025

 

1.   Marende            BE. No. 12:1-2  Dipuji Rohangko Do Ho

2.   Votum : A.VI.B5-D.VI.17

3.   Epistel : Lukas 7 : 41 - 50

4.   Marende            BE. No. 174:3-4  Torop Dope Na Siat i

5.   Jamita : Psalmen 126 : 1 – 6

 

Nunga sesa angka dosami

 

Holan sada do  keinginan ni angka na tarhurung, ima, asa hatop ibana malua sian hurungan. Sada pangidoan ni na marsahit, hatop malum sian sahitna. Sada pangidoan ni angka na tarbuang, molo mulak nasida sian habuanganna.   Molo saut do i masa, tontu marlas ni roha ma angka na malua sian anka parsorionna, parungkilonna, sianb sahit na adong di pamatangna, sian masalah na mambaen ibana  dang boi  mekkel, dang hea marlas ni roha, torus holan na susa.  Molo malua sian angka habuanganna, sian sahitna, sian na terjajah, sian na teraniaya, sian na manosak,  gabe  las ma rohana, mekkel ma ibana, ala nunga bebas sian angka sitaononna.

Dos tu si do las ni roha ni bangso na tarbuang  (Israel sian habuanganna), bangso na so memiliki harga diri, na terjajah, jala dang boi malua sian penjajahan molo sian dirina sandiri. Dung ruar sian habungan i, adong ma pengakuan, bahwa Debata do mangusung nasida mulak sian habungan.  Songon na marnipi ma nasida, ala dang mungkin nasida malua molo holan sian kekuatanna sandiri. Martarias ma nasida sama nasida, gok engkel ma pamanganna,  marolopolop dilana. Ruar ma pangidoan nasida , tangiang nasida mandok : Sai togihon ma mulak, ale Jahowa  angka na tarbuang sian hami (ay.4)

Kesadaran na songon on do na ingkon adong di hita angka jolma, khususna halak Kristen. Nunga torop angka na tarbuang sian hita, di partingkian nuaeng,  baik angka ama, ina, naposo, dakdanak sahat tu na matua. Tarbuang ala ni angka pangalaho na so tama, parange na maralo tu hata dohot tu patik ni Debata, tarbuang ala ni angka na tarlalap di hamajuon ni angka tehnologi, parbinotoan dohot angka arus jaman na hatop muba uba.   Torop angka na so boi malua  sian lingkaran i, molo sian gogo na sandiri. Bahkan adong dope na sai tarlalap, laos bonom di bagasanna.  Ingkon sude ma hita mandok : Ale Tuhan, sai togihon ma hami mulak sian habuangan nami.  Olo ma hita ditogihon haruar sian habungan i, marhite joujou ni Debata, marhite angka ende pajonokkon diri tu Debata nang marhite angka jamita na binoan ni parbarita nauli.  Alai angka naung ditogihon haruar sian habuangan i, unang be mulak muse tu habuanganna,  apalagi  secara sengaja mulak tu habunganan i.  Tar songon  panakko na so olo  muba, dang jora nang pe naung dipalua sian uhuman ala ni na manangko, manang parjujui so sai torus marjujui, parnarkoba, dohot angka sifat na so olo longkang sian diri ni sasahalak.

Godang ma tongon na binahen ni Jahowa tu hita, on ma sada pengakuan ni joma angka naung pinalua ni  Debata sian habuanganna,  jolma na marnida pambahenan ni Debata, jolma  na mananda denggan basa ni Debata di ngoluna. Panghorhon naung malua ibana sian habungan, adong sada perubahan, na so adong hian panghirimon, gabe mmarsihohot. Tarida do i sian pandohan : “mardalan, manabur boni, dungkon i, bahe marolopolop pausung usung tibalanna”.  Angka nuang dipalua, marpos ni roha ma ibana tu Debata, jala rade manaburhon boni na denggan, nang pe mariluilu, tumatangis. Ala diujungna marolopolop ma ibana lao manggotil angka nung sinaburhonna. 

Hamu damang dainang na hinaholongan di  bagasan goar ni Tuhanta Jesus Kristus, adong do pandohan ni halak Batak na mandok : Dang loja aek paihutihut rura.  Pandohan on martudutudu do i tu angka parrohaon ni jolma na so olo loja patupahon na denggan.  Songon na manaburhon angka na denggan, jotjot do godang angka tantangan, bahkan sahat tu na tariluilu. Alai molo angka jolma naung manjalo haluaon i, naung ditogihon haruar sian habuangan, pasti dang marnaloja mambahen angka na denggan. Marsihohot ma hita angka naung pinalua ni Debata marhite mudar ni Jesus Kristus, asa marlaba jala marlapatan haluaon na binoanNa i, jala parbuena,  rade jala marsihohot manaburhon boni na denggan nang pe sahat tu na tariluilu, huhut marpanghirimon, marolopolop do hita muse di tingkina molo so pargale hita nuaeng. 

Matahari tidak bersinar untuk dirinya sendiri, tetapi untuk dunia.  Pohon tidak berbuah untuk dirinya sendiri, tapi bagi orang lain.  Lapatanna, godang do angka na mambahen na denggan, alai dang holan tu dirina sandiri, alai molo tapatupa angka na denggan, boi do diida jala di dai angka jolma na torop, nang pe godang na so perduli manang dang hea marnida na denggan naung binahen ni jolma. Unang sumurut hita mambahen na denggan, manaburhon boni na denggan, ai jaloonta do muse upa ni i di tingkina.

Nang pe dang hea jolma mandok mauliate tu mataniari, alai tongtong do ibana marsinondang ganup ari.  Songon i ma nang hita na mangolu di portibi on, jotjot do hita mangholsohon, huhut mandok, sisogo do mandok na sintong, dang adong labana mambaen na denggan. Marhite turpuk on, naeng mangajak hita asa sude ma halak Kristen mangulahon na denggan, manaburhon boni ni angka hadengganon di ngoluna.  Nang pe godang na mangambati hita mambaen na denggan, unang pola sumurut hita sian i, ai na manggotil do hita di tingkina. Molo tung godang angka na maralo, menghalangi ho mambahen na denggan, unang sumurut roham mabahen na denggan. Ingatlah, buah yang manis yang dilempari oleh orang.  Jadi tetaplah berbuat baik, selagi masih ada waktu dan kesempatan, di mana saja dan kapan saja sesuai tu talentamu.

 

1.     Marende BE. No. 773 : 1  Tuhan Mataniaringku

2.     Tangiang Sian Na ro

3.     Marende            BE. No. 202 : 4-5  Huhaholongi Ho Gogongku

4.     Tangiang Sian Na Manjabui

5.     P. Pelean huhut marende BE. No. 374 : 1---- Jesus Manjou Ho 

6.     Tangiang panutup