Jamita : Johannes 4 : 4-14 JAHOWA MANGALEHON AEK HANGOLUAN

 

MINGGU LETARE

Minggu, 30 Maret 2024

1.     Marende            BE. No. 257 : 1-2   Jonok Debatanta

2.     Votum : A.VI.B4 – D.V.21

3.     Epistel : 4 Musa 21 : 10-20

4.     Marende            BE. No. 29 : 2-3  Ima Tuingki Hasonangan

5.     Jamita : Johannes 4 : 4-14

 

koor : Ama Immanuel HKBP KISARAN KOTA 
JAHOWA MANGALEHON AEK HANGOLUAN

 

Hamu angka dongan sahaporseaon, sude do hita hea manghilalahon hauason. Mauas di holong, di hamoraon, di hagabeon, di hasangapon dohot lan angka na asing. Molo di bagasan hauason hita, tontu talului do dalan laho pasombu uasta. Jala molo manat tarimangi, dung jumpang pe sude na tahauashon i, alai tong dope sai mauas hita. Isarana, mauas hita di hasangapon marhite pangkat, dung i jumpang ma pangkat na taparsinta i. Alai marhite i, ndang haru sombu uasta, naeng do muse asa dapot pangkat na tumimbo. Songon i ma pardalanan ni ngolunta on, ndang hea haru sombu uasta di saluhut na adong di portibi on. 

Di parjumpangan ni Tuhan Jesus dohot sahalak parompuan Samaria, taida ma paboa adong dua ragam ni aek ima aek na sian sumur ni si Jakkob na so tuk laho pasombu uas dohot na tau laho pasombu uas ima aek hangoluan na sian Tuhan Jesus. Memang mansai ringkot do panghorhon ni aek di pamatangta. Didok angka ahli kesehatan, persentase ni aek di bagasan pamatang ni jolma ima, Bayi: 80, Orang Dewasa: 60-70, Lanjut Usia: 50, Pria: 50-65, Wanita: 45-60. Jala mansai balga do panghorhon ni aek di pamatangta asa marhahipason hita. Somalna, molo minum hita saonari, 1 manang 2 jom nai sai mangulahi mauas do hita. Ido umbahen disosoi hita asa minum air putih 8 gelas manang 2 Liter per hari asa boi mardalan dohot denggan metabolisme di pamatangta.

 

Didok Jesus tu boru Samaria na manahui aek sian sumur ni si Jakkob i: “Sai mangulahi mauas do nasa na minum sian aek on”. Dung i diuduti Jesus muse mandok: “Alai na manginum aek silehononKi, na so tupa mauas be i ro di salelenglelengna”. Naeng dohononna, aek na adong di portibion, ndang manontong i, parsatongkinan, ndang tuk laho pasombu uas. Tudos ma i songon ngolu ni jolma di portibi on, parsatongkinan, ndang manontong. Alai aek na marharoroan sian Tuhan Jesus i, manontong do i jala ro di salelenglelengna. Aek na sian Tuhan Jesus tuk mangalehon hangoluan na salelenglelengna.

 

Dihatindanghon Jesus do hadirionNa di Joh. 14:6 “Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu”. Lapatanna, Jesus do hangoluan laos Ibana do silehon ngolu, Sasada Ibana do Sipangolu. Ibana do pardomuan ni hita jolma dohot Debata. Marhite Ibana do jumpang hita hangoluan na salelenglelengna.

 

Ndang tuk hape portibi on laho pasombu uasta, sai mangulahi mauas do hita marhite na adong di portibi on. Isara ni songon kuburan, ndang hea mandok gok/ penuh kuburan i laho menampung angka na mate. Tidak pernah merasa cukup/ penuh, tetapi selalu merasa kehausan. Songon i ma pardalanan ni ngolunta di hasiangan on, sai na mauas do hita di nasa na adong di portibi on, ndang hea merasa cukup/ puas di sude na adong di hita ala saluhutna i parsatongkinan do. Alai marhite Tuhan Jesus Kristus, sai na jumpang do sombu ni uasta. Antong, tajangkon ma aek hangoluan na sian Tuhan Jesus asa digohi Tondi Parbadia hita jala dapotan hangoluan na salelenglelengna.  Didok pandohan ni halak Batak “Unang tading na rumingkot sian na ringkot”. Tutu ringkot do aek na marharoroan sian portibi on, alai dao rumingkot do aek na sian Tuhan Jesus.

 

Bahan Diskusi:

1)      Songon dia do hataridaan ni ngolu di naung manjangkon aek hangoluan na sian Tuhan Jesus i?

2)      Aha ma sipatupaonta asa parsidohot humaliangta manjangkon aek hangoluan na sian Tuhan Jesus?

 

6.     Marende            BE. No.  826 :1-2  Gohi Au Tuhan

7.     Tangiang Sian Na ro

8.     Marende            BE. No. 179 : 1-2  Adong Do Sada Mual

9.     Tangiang Sian Na Manjabui

10.P. Pelean huhut marende BE. No. 228 :1--- Jesus Haposanhu

11.Tangiang panutup