Jamita : AMOS 3 : 1 - 8 DIJOU GABE SIJALA JOLMA

 

Minggu V DUNG EPHIPANIAS

09 Februari 2025

 

1.     Marende            BE. No. 574 : 1 - 2

2.     Votum     : A.IV.A6 – D.IV.15

3.     Epistel    : Lukas 5 : 1 - 11

4.     Marende            BE. No. 252 : 1 + 3

5.     Jamita     : AMOS 3 : 1 - 8

 

DIJOU GABE SIJALA JOLMA

Huria ni Tuhanta,  panuriang Amos ima sahalak na pasahathon saluhut parngoluanna laho manghobasi Debata, jala dipataridahon doi marhite pambahenanna siganup ari. Ndang Ianakhon ni salak malim ibana, alai sahalak parmahan biru biru do ibana. Alai, nang pe songoni dipasahat Debata do tu si Amos sada halobian ima na boi “melihat masa depan” jala disuru Debata ma ibana pasahathon hata dohot uhum ni Debata tu bangso Israel. Dipinsang si Amos ma saluhut parange ni bangso israel na jotjot menindas angka na pogos, huhut dipinsang sistim pengadilan na marlaok sisip (korupsi), na so manghajongjonghon uhum hatigoran, na manuhor uhum dohot hatigoran. Jala disungguli bangso i gabe ula ula mamaritahon Jahowa.

Bangso israel ima bangso na pinilit ni Debata, jala nunga tangkas ditanda Debata nasida. Dipalua sian habuangan, diuluhon, disarihon nasida mardalan di halongonan saleleng 40 taon, jala dipabangkit anak nasida gabe panurirang dohot doli doli nasida gabe anak na pinapulik. Panurirang Amos ma gabe singkat ni Debata  na paingothon bangso israel, ai Debata na manjou nasida, na paluahon nasida sian parhatobanan Misir, jala nunga tarpilit bangsoi gabe bangso na hinaholongan ni Debata. Di ay 2 didok “holan hamu do nian na Hutanda sian nasa bangso di tano on.”. Hata “hutanda” patuduhon sada keistimewaan di bangso israel, ima bangso hasianNa, bangso haholonganNa. Alai, laos disiasiahon bangso ima hasurungannai, ai tong dope nasida mangolu dibagasan hagiot ni dagingna na sai manomba debata sileban huhut mangulahon na maralo tu patik ni Debata. Hape sasintongna, ingkon gabe parsidohot do nasida papatarhon joujou ni Debata mangulahon sada tanggung jawab gabe sijala jolma, nang songon i asa tongtong mangolu hombar tu nasa patik ni Debata, asa unang di uhum Debata bangso i, alai manghorhon hamubaon ni roha satia tu Debata.

Huria ni Tuhanta, nang songon ido tu hita saluhut halak kristen, disungguli turpuk on do hita, songon dia balga ni  holong ni rohaNa marhite Jesus Kristus AnakNa i na maneahon diriNa pola tung mate jala tarsilang humonghop hita. Ditobus do hita saluhutna asa mulak gabe anak ni Debata, gabe sisean ni Kristus laho mangahatindangkon dohot mangarahon portibion asa manjalo Kristus gabe sipalua.

Dongan sahaporseaon, paminsangon dohot uhum ni Debata na naeng pasahaton ni si Amos tu bangso Israel, sasintongna gabe sada tanda na patuduhon, ia Debatanta i ima Debata na lambas roha jala parasi roha, ido umbahen na sihol dope rohaNa manjalo hamubaon ni roha ni bangso na hinaholonganNai. Alai, ala jogal ni roha dohot na so olo bangso i manjalo paminsangon ni Debata jala marhamubaon ni roha, gabe dipasahat ma tu bangso i uhum ni Debata. Hape dihaholongi Debata do ganup halak na olo paubahon roha jala na olo ro tu Ibana. Alai ndang gabe sumurut panurirang Amos pasahathon hata ni Debata tu bangso i, tongtong do hot jala togu rohana pasahathon hata ni Debata, ala Debata do na marsuru ibana. Laos marhite turpuk on ma di paandar panurirang Amos marhite sungkunsungkun na marrumang retorika, didok “Tung... tagamon ma..?” sasintongna nunga tung mansai tangkas alus ni sude sungkunsungkun i na mandok “ndang, ndang tagamon”. Tung na so tagamon bangso Israel rap sapardalanan dohot Tuhan i, molo ndang dos rohana, ai diparsoada nasida do parpadanan alani pambahenan na marbalik sian patik ni Debata jala mardua roha dohot debata sileban. Ndang tagamon masa parmaraan di bagasan sada huta, ianggo so binahen ni Jahowa asa dipamasa. Huria ni Tuhanta, marhite sungkunsungkun ima lam tangkas jala tota songon dia uhum na naeng sipamasaon ni Debata tu bangso na jogal roha i, jala nunga dipasahat tu nasida marhite naposoNa panurirang Amos, alai tong dope marjogal ni roha nasida dang olo mulak tu Jahowa.

Hamu angka dongan, sahat ma hata ni Debata on nang tu hita saluhutna dipartingkian nuaeng on. Tarjou do hita saluhutna gabe singkat ni Debata di portibion asa ta pasahat hata ni Debata na marisihon angka poda, aturan dohot uhumNa tu saluhut halak na di humaliangta. Asa hita ma na manogunogu halak na mangolu dibagasan hagiot ni dagingna jala mandao sian Debata, gabe mulak rohana pasahathon dirina tu Debata mangolu di bagasan hatigoran. Jala songon bangso ni Debata hita, na tarjou do hita asa tongtong manghajongjonghon hatigoran ni Debata di tongatonga ni halumlamon ni portibi on, asa patar ma holong ni Debata marhite parange dohot parngoluan siganup ari. Margogo ma hita manundalhon hagiot ni portibion jala di bagasan bulus dohot lambas ni roha ma hita mangulahon hata ni Debata gabe Sijala jolma ma hita mangarahon tu Tuhanta i. Amen.

Bahan Diskusi :

1)      Nunga piga naung ta jala jala ta arahon angka donganta laho manjalo Kristus Sipaluai ? Ai dijou do hita na gabe si jala jolma.

2)      Hea do hita mardua roha laho mangihuthon dohot manghatindanghon hata ni Debata?

 

6.     Marende BE. No. 758:3

7.     Tangiang Sian Na ro

8.     Marende BE. No. 475:1

9.     Tangiang Sian Na Manjabui

10.Papungu Pelean huhut Marende BE. No. 714:1…

11.Tangiang panutup

 

 

Pdt Budianto Sianturi, S. PAK

Pendeta HKBP Resort Kisaran