EV. Rom 1 : 1 – 7 “ Tomu Ma Ibana Na Pinarbagabaga Ni Jahowa” “Sambutlah Dia Yang Dijanjikan Allah ”

 

BAHAN SERMON DISTRIK XIII ASLAB

Miggu 18 Desember 2022 (ADVEN IV)

EV. Rom 1 : 1 – 7   

“ Tomu Ma Ibana Na Pinarbagabaga Ni Jahowa”

“Sambutlah Dia Yang Dijanjikan Allah ”

I.      Patujolo

Somalna molo naeng manongos surat ingkon jelas do patandahononna dirina ise na mambahen surat i, jala aha nanaeng dohotnon ni surat i. Laos ido naeng berengonta sian Apostel Paulus na manongos surat na on tu huria Rom, na so dung dope hea di topot ibana, jala di paboa masihol do ibana tu huria na adong di Rom. Ala ni ma tontu do ingkon  tangkas patandahononna hadirionna marhite suratna on, alai ndada holan patandahon hadirionna, dohot nang paboahon aha do isi ni surat na i, ima patandahon hadirion ni Tuhan Jesus songon si palua. Laos ido nanaeng tapaihutihut di bagasan turpuk on.  

II.    Hatorangan Ni Turpuk

Patandahon hadirionna songon naposo ni Debata (Ay.1)

Dipungka Apostel Paulus do suratna on, marhite na patandahon hadirionna. Pola do idok ibana, hadirionna ima songon naposo ni Jesus Kristus. Hata naposo ni Kristus, tangkas patuduhon Jesus Kristus do nampuna ibana, jala ndang ibana sandiri be nampuna ibana, alai nunga nampuna ni tuanna ima Kristus Tuhan i, naung tarjou jala di papulik tu ulaon mamaritahon Barita Nauli sian Debata. Tangkas do berengonta songon dia si Paulus patandahon hadirionna songon na poso ni Debata, naung dijou jala di pillit Debata laho mamaritahon Barita Nauli.

Kristus Jesus do Barita Nauli i naung di parbagabaga i (Ay.2-4)

Dung tangkas di patandahon Apostel Paulus hadirionna songon naposo ni Debata na tarjou jala di papulik mamaritahon Barita Nauli, diuduti ibana do muse patandahon Barita Nauli na pinasahat na i ima Jesus Kristus Tuhan i, naung di parbagabaga hian di angka surat nabadia marhitehite angka panurirangNa. Ima taringot tu Jesus Kristus sian pomparan ni si Daud do ia dagingNa. Di patandahon Apostel Paulus do Jesus Kristus songon pinompar ni si Daud naung tangkas di panandaon ni bangso Jahudi, asa tangkas sian i botoon nasida hasasaut ni bagabaga naung sinuriranghon ni angka panurirangNa na parjolo i, alai ndada holan i, di patandahon Apostel Paulus do ia Jesus ima anak ni Debata na gabe jolma na ro tu portibion, manaon naporsuk mate di hau pinarsilang, jala hehe sian na mate, manaek tu banua ginjang. Marhite haheheonNai, dipabangi Debata do Ibana gabe Raja, gabe Anak ni Debata na marhuaso di portibion.

Marhite Ibana do tajalo Asi ni Roha I (Ay.5-7)

Dung di patandahon ibana hadirion ni Tuhan Jesus, songon Anak ni Debata na gabe jolma na ro tu portibion, tung di haporseai Apostel Paulus do Jesus Kristus i do asi ni roha ni  Debata naung jinalona, na paluahon ibana sian dosa tu hangoluan, sian haholomon tu hatiuron. Jala ndada holan dirina sandiri alai tu ganup halak, bangso na olo porsea tu Jesus Kristus, jumpangan asi ni roha ni Debata ima haluaon i. Jala sahat do nang tu nasida na di huria Rom na porsea na dihaholongi jala diparbadiai Debata. Ido umbahen halak naung manjalo asi ni roha ni Debata marhite Jesus Kristus, ima halak na tangkas manghilalahon na dihaholongi jala di parbadiai Debata, na tontu si tutu ingkon pataridahonon ni na porsea i do di ngoluna marsitutu manjaga habadiaon ni ngoluna songon na porsea, ai di angka halak na sisongoni do na manghilalahon Asi ni roha ni Debata, dohot dame sian Debata Amanta nang sian Tuhan Jesus Kristus.    

III.  Sipahusorhusoron

Diarahon turpuk on do hita mananda jala manjanghon asi ni roha ni Debata marhite Jesus Kristus Tuhan i. Jala halak naung manjanghon Kristus i, ingkon rade mangoloi parsuruon ni Tuhan i, ima ulaon mamaritahon Barita Na Uli I. Aha do barita nauli si baritahononta i? Ima Tuhanta Jesus Kristus, Anak ni Debata na gabe jolma naung ro tu portibion, manaon naporsuk pola mate tarsilang, mulak mangolu, hehe manaek tu banua ginjang, laho humongkop jala paluahon hita jolma pardosa on. Alani asa saluhut do halak kristen naung manjalo barita na uli i, ima Kristus Tuhan i ima halak naung jinou jala di papulik mamaritahon barita na uli, marhite angka ulaon na denggan di portbion. Di minggu Advent IV on, asa di paingot ma hita paradehon dirinta manjanghon haroroNa i, ndada holan tu perayaan Natal ringkot pangaradeonta, alai dao umbalga dope pangaradeonta manjanghon haroroNa na paduahalion i, dibagasan haporseaon, habadiaon nang pangoloion mamaritahon Barita Nauli, ima Kristus Tuhan i Anak ni Debata na gabe jolma. Amen.           

Gr. Frindawes Tambunan