SERMON JAMITA TGL 24 DESEMBER 2022
TOPIK: NUNGA TUBU RAJA NI HADAMEON I (MIKA 5:1-4)
I.Patujolo
Huta na metmet alai gabe huta natarbarita sahat tu nuaeng. Ndada alani
hametmetonna umbahen tarbarita, alai peristiwa nabalga do nanaeng dohononna
masa di huta i napinamasa ni Debata. Huta Betlehem gabe huta hasosorang ni Tuhan Jesus anak ni
Debata na gabe jolma laho paluahon hita. Hasosorang ni Tuhan Jesus di Betlehem,
huta na metmet i ingkon gabe barita lasniroha di sandok portibion. Ido umbahen
tahalashon marhite pesta parningotan ni hatutubu ni Mesias i. laos parningotan
do i di hita halak Kristen. Panghorhon ni barita hatutubu ni Jesus i ingkon tongtong gabe barita naimbaru dingolu
hakristenonta. Ndada holan sejarah sambaing,nataingot alai panghorhon ni
sejarah ima nuaeng mamboan las niroha tu hita. Alani ingkon tangkas do
paradeonta rohanta tusi, ala raja ni hadameon do natubu i.
II.Hatorangan
Hatutubu ni Jesus i patuduhon holong ni Debata namanongtong dibagasan
ngolu ni angka naporsea i. Ndang dipasombu Debata hita dipardangolanta, di angka parungkilon
natabolus, alai tongtong do Debata manangihon angka alualunta siganup ari.
Dipataru do hita sahat tu angka natarpasinta ni rohanta. Songon ngolu ni bangso
ni Debata namamolus dibagasan ragam ni partingkian. Namambahen nasida sipata
marsak jala mandele. Alai tangkas do holong ni roha ni Debata dingolu ni bangso
i. songoni do nang ngolu ni parhuriaonta, ndang diloas Debata huriaNa i gaor.
Dijaga do tongtong asa gabe hasahatan ni pasupasu sian Ibana, pataruhon hita tu
hangoluan sisalelenglelengna na pinarade ni Debata tu hita. Ido nanidokna di
ayat 2 i; pasahatonna ma nasida sahat ro di tingki pangintubuan ni namanubuhon.
Parningotan hatutubu ni Jesus paingothon hita paboa marhite hatutubu
ni Jesus i gabe taruli do hita parmahan dibagasan ngolu salelenglelengna. Adong
do hita parmahan na denggan ima Jesus Kristus i. Jesus ido parmahan dihita.
Gabe diparmahani do ngolunta tu lomo ni roha ni Debata. Ndang diloas Debata
angka nahinaholonganNa i so diparmahani. Alai Ibana do parmahan di hita. Ido
nanidok Jesus di Johanes 10:11 i, parmahan na denggan do anggo Ahu. Diseahon
parmahan na denggan i do hosanna humonghop angka birubiruna. Ala ni pos ma
rohanta, na tongtong do Jesus marmahani hita ganup ari. Ido panindangion ni
angka naporsea i dibagasan pardalananna siganup ari. Songon panindangion ni
Raja David di Psalmen 23:1: Jahowa do siparmahan ahu ndang tagamon hurangan
ahu. Alai ingkon olo do hita diparmahan Tuhan i, unang hita manuntun lomonta,
onma nanidok ni hata ni Debata marhite panurirang Mika di ayat 3 i “ Alai
jongjong anggo ibana, marmahan mangasahon gogo ni Jahowa.
Parningotan dihatutubu ni Jesus mamboan dame dohot hasonangan di hita.
Di ayat 4, didok, jala Ibana gabe hadameon, molo naeng ro Assur tu tanonta.
Bangso ni Debata na dibagasan pangaleleon na margantisoring, alai di ujungna
ingkon monang do nasida jala dapotan dame. Songon namasa di angka parporangan
nasida na sai laon. Hita pe diportibion namarporang do mangalo sibolis dohot
hajahaton, musu dohot haotoon. Alani mardonganhon Jesus i monang do hita. Alani
Jesus naung sorang i gabe hadameon di hita. Ondo pamujion ni surusuruan ni
Tuhan i di hatutubu ni Jesus i. “Hasangapon ma di Debata na diginjang, dame ma
ditano on, di angka jolma halomoan i(Lukas 14). Molo jumpang dame dingolunta
las do rohanta. Unang be nian tubu angka hosom marhite hasosorang Jesus i. Tutu
dame do huriaNa marhite naung sorang Jesus i tu portibion. Ido nadihatindanghon
ni angka Apostel di turpuk Epistel i sian padan na robi nunga marganti soring
angka raja napinillit ni bangso i dohot na pinillit Debata sian tongatonga ni
bangso i. alai sude na i parsatongkinan do nasisa, alai adong do Raja
namanongtong ro di salelengni lelengna, ima Jesus Kristus Tuhanta i. Ibana do
Raja ni angka Raja, jala harajaonNa ndang sian portibion alai sian Debata
sandiri do.
III.Sipahusorhusoron
ü Mandok mauliate jala las ma nang rohanta
mamestahon hatutubu ni Tuhanta Jesus. Tutu maruli hagogoon dohot panghirimon di
pandonganion ni Debata ma hita ganup ari.
ü Haroro ni Jesus sian Betlehem ndada huta
I be nuaeng nanaeng idaonta, alai haroro ni Jesus i sian Betlehem tumopot hita
angka pardosaon. Ido mambahen las rohanta, marolopolop jala nunga sesa dosanta.
ü Taparade ma rohanta dohot bagasta gabe
inganan hasorangan ni Jesus i. Sorang nang dibagasan ulaonta siganup ari.
Bagasta dohot ngolunta gabe gok “Hadameon”.
ü Tongtongma hita mangendehon dohot mamuji
Debata ala naung sorang Jesus Raja Sipardame i songon nahinatindanghon ni
surusuruan ni Debata. “Hasangaponma di Debata di ginjang, dame ma di tano on,
di angka jolma halomoan i(Luk.2:14). Amen.
Bvr Ida Mayanti Manik
Tidak ada komentar:
Posting Komentar