BAHAN SERMON
HKBP DISTRIK XIII ASAHAN LABUHAN BATU
TU MINGGU ADVENT II
==============================================================================
MARHABADIAON MANOMU ARI NI KRISTUS
EV. Pilippi 1:3-11
I.
Patujolo
Minggu Advent II marlapatan hasatiaon dohot holong (kesetiaan dan
cinta). Disungguli do hita asa tongtong paradehon dalan di haroro ni Tuhan i.
Alani ni, tarjou do hita paradehon rohanta dohot holong ni rohanta manomu ari
ni Kristus i. Di Minggu Advent II on asa tongtong hita marhabadiaon manomu ari
ni Kristus. Laos tuson do ditogihon Evangelium Minggu Advent II songon
parrohaon nang haporseaon Huria Pilippi. Mauliate do roha ni Apostel Paulus tu
Debata marningot saor nasida di barita nauli jala sai dibagasan las ni roha do
Ibadan manangianghon Huria Pilippi.
II.
Hatorangan ni Turpuk
Ayat 3-6, Songon pandohan nang pe dagingta padaodao alai tondinta
marsinggomgoman. Songon i do pangapoion surat ni Apostel Paulus tu huria
Pilippi, nang pe marsipadaoan nasida alai donok do nasida di roha ni Apostel i
laos jotjot mandok mauliate tu Debata. Dung dilele jala ditangkup i Ap. Paulus
di Pilippi ndang pola godang boi idaon Ap. Paulus taringot ngolu ni haporseaon
nasida. Alai gabe on do apoapo tu Huria Pilippi ai balga ni roha, pangapulion,
tumpal, dohot las ni roha do di ibana mangae dibagasan Kristus ala haporseaon
i. Laos songon i do parningotan ni Ap. Paulus di nasida hasasaor nasida di
barita na uli. Songon angka naung tubu di haimbaruon do nasida dung dijanghon
nasida barita na uli. Ala barita na uli on do tongtong nasida benget
marhadaulaton songon parsaoran angka na badia. Parsaoran ima mian dibagasan
haporseaon, panghirimon, dohot holong na badia sama angka na porsea. Parsaoran
na uli manghorhon do di nasida angka ulaon na denggan. Ulaon na denggan
niojahan do dibagasan Kristus Jesus. Dipajongjong do Huria i dibagasan batu mamak
na togu na so boi unsathon jala ndang be gomgoman ni hamatean nasida.
Manongtong do Huria i sahat ro di ari ni Kristus Jesus. Ndang lingkang nasida
di nasa partingkian, zaman, manang generasi alai manongtong do sahat ro di aru
ni Kristus Jesus.
Ayat 7-8, didok Ap. Paulus do Huria Pilippi dibagasan rohana nasida
ala parsidohot do nasida tongtong partohap di bagasan asi ni roha naung jinalo
nasida, nang pe di bagasan hurungan Apostel i jala di tingki pajongjong
(membela) barita na uli. Donok do Huria Pilippi tu Ap. Paulus di nasa sitaonon
na niadopanna jala parsidohot do nasida patariashon jala mangondolhon barita na
uli mangihuthon pambahen ni Ap. Paulus. Ai molo naung rimpas do nasida rap
dibagasan las ni roha dohot sitaonon ala barita na uli, gabe sada panghilalaan
ma nasida di haporseaon i. umbahen ido didok Ap. Paulus dibagasan rohangku
hamu. Didok ai Debata do saksingku, dipatuduhon Ap. Paulus do na mandok
dibagasan Debata do diboto jala diantusi ibana manatap nasida di haporseaon
nasida. Ndang boi be gabusan ni saluhut di nasa panatapan nihahomion
parsitutuon ni haporseaon nasida dibagasan Kristus. Ido balga ni sihol ni Ap.
Paulus di nasida.
Ayat 9-11, Sumurung holong ni rohamuna. Holong ni roha di Debata,
dongan jolma, dohot tu saluhut halak. Holong ima pangarimpunan Patik dohot
Barita na Uli dibagasan Kristus Jesus. Marurat di Parbinotoan, asa lam martamba
dibagasan parbinotoan na marojahan tu Hasintongan. Holong ni roha dibagasan
parbinotoan manghara tu ngolu na marhasintongan jala marhadaulaton (bnd. Rm.
10:2;Yoh. 16:2). Holong ni roha na mangolu dibagasan parbinotoan dohot
panimbangion partondion. Marhite on do laho manangkasi na rumingkot. Na
rumingkot ima patik dohot holong ni roha dibagasan Ktistus Jesus. Ro do hata on
sian “eis to dokimazein” yaitu supaya
kita dapat menguji hal-hal baik setelah mengujinya dengan cermat dan mengambil
nilai-nilai kebaikan dari setiap apa yang telah diuji. Saluhutna marpanatap
tu hapolinan jala so partuktuhan. On do harimpason dinasida sahat ro di ari ni
Kristus. Dipamanat do roha asa unang gabe sisurang diadopan ni Debata ala nasa
parange na so sintong na boi mambahen bongot tu nasa pangunjunan na parohon
rimas ni Debata. Mangolu sintong songon halak naung dipapita Debata (Ul. 23:1).
Diujungna asa ramos jala marparbue hatirgoran marhitehite Kristus Jesus. Ido na
hinirim di Debata di saluhutna. Asa marlapatan ngolunta tongtong diadopan ni
Debata dohot dongan jolma. Nasa parbue hatigoran bahen hasangapon jala
pujipujian di Debata.
III.
Sipahusorhusoron
Marhabadiaon do panjouon dingolu ni angka na porsea. Manjamothon ngolu
na badia do songon hasatiaon na porsea tarlumobi di minggu Adven II. Tongtong
do mangondolhon ngolu di bagasan holong ni Kristus na marurat di parbinotoan
dohot nasa panimbangon partondion. Holong ni Kristus do tongtong pabadiahon
angka na porsea i jala manongtong mian dibagasan holong ni roha sahat ro di ari
ni Kristus i. Gabe hatandian ni angka na porsea ma angka on di ngolunta asa
polin jala so partuktuhan. Umbahen i, dipaborhat do hita asa ramos marparbue
hatigoran marhitehita Jesus Kristus. Jala parbue hatigoran i sai manongtong do
di hita. Nang holan sahali manang dua hali marparbue alai ingkot jotjot di nasa
partingkian ingkon tarjou marparbue. Ido haririmpas di hita marhabadiaon manomu
ari ni Kristus i. Amen
Pdt.AJPP/Kis.Kot/Kis/XI/2022
Tidak ada komentar:
Posting Komentar