Malua sian 7 J

Malua sian 7 J

Dung marpungu angka situan na torop i, dipungka sahalak pande bisuk ma paingothon nasida " Adong 7 sipasidingonta, asa dame roha , ripe huria dohot masyarakat" ninna. Tarpaima do situan natorop umbege  aha do na 7 J na nidokna i. 

Parjolo , Jogal .

Ia halak na jogal, i ma na so siat hata , tung manang ise mandok hata dang ditangihon: hula-hula, pangituai, nang pangula ni huriape. Tarsongon jagal rupani, nunga 8 jom di lompa sai tong songon ban ni motor ndang tarharat.

Dua , Jugul 

Halak na jugul, ndang taroraan. Sai di tuntun lomona nang pe naeng tu hamagoan . Unang sai tuhori hamu togel i, parmaraan do sian i ningon, alai sai di datdati. Tu Gareja pe ibana marminggu sai tong tu togel rohana. Diida nomor ni ende godang nomor 2, anggo rohana mandok, "songon na godang angka 2 di ende on, kode alam do ra on" i do dohonon ni i.

Tolu, Jungkat. 

I ma halak na so las rohana marnida na denggan. Sai segaan ni i do i. Denggan bangku ni gareja dohot, dingding, sai di surati jala di gorgai ma i. Di ida suansuanan ni halak ramos marparbue, dangguranna ma.

Opat, Jumarojor.

Tung manang aha di jama, sega. Tolu piring di basu maropuk. Dipinjam sepeda motor , tingki di boan denggan dope, alai dung mulak di onjaronjar nama soboi be mangolu masinna. 

Lima, Jungking.

Na maol do panghulingan na singon on. " Horas amangboru" ningon rupani huhut tarserom iba la burju mamanghulingi ." Sian dia amangborumahu, ndang hea hualap namborum. " manigor songoni do dohonon ni i songon na bais panghulingna.

Onom, Jorngang

Ia na jorngang, sai holan hata baraksi do hata ni on. Maol do begeon hata na denggan sian i mamugka sian ari Senen tu ari Sabtu. Ari Minggu mansohot hajorngangonna, ndang ala na tu garejaibana, alai na modom do ibana sadarina i. Ra,nipi ni i pe tong do jorngang.

Pitu, Jengjeng.

On ma halak na sai lomo rohana manggorgori roha ni donganna. Sai manjungkiti ma hata ni i. Diida rupani mamolus motor bus ni par-Doloksanggul, "Ei, Siallang hoda," ninna i rupani. Di angka rapot pe sai songoni doi mamingkasi parsalisian. Molo dung muruk donganna mansai las rohana , ai dietong nunga marhasil ibana 

" Sada J pe sia na pituon masa di tonga ni jabu, punguan manang huria, nunga mansai borat panghorhon ni i, lamu boha ma molo marpungu na pitu i. Roma J napaualuhon , ima "JEA", ninna pande bisuki paingothon.

Sipahusoron 

Molo hita siihuthon Tuhanta, ia J na pamalum na 7 J i ima Jesus. Tangkas ma ta oloi nuaeng joujou ni Tuhanta tu hita na mandok, " Sai mian dibagasan Ahu ma hamu, songon Ahu mian di bagasan hamu! Songon rantingi na so tarbahen marparbue anggo sian dirina, anggo so mian di hau anggur i; laos songon i hamu, anggo so mian dibagasab Ahu hamu " ( Joh 15 : 4 )

Dugurithon : Pdt Victor Tinambunan, MST " ENGKEL SIPATURE NA SEGA" BarIta Sorminan tu Parngoluaon " Judul Asli Malua sian 7 J