MINGGU EXAUDI
21 Mei 2023
01. Marende BENo. 3: 1 + 3 “Puji
Jahowa Ale Tondingku”
02. Votum: A.XII.A – D.VII.32
03. Manjaha Epistel: 2 Samuel 22: 1 - 7
04. Marende BE No. 30: 1 – 2 “Jesus Lehon Hatorangan”
05. Jamita: 1 Petrus
5: 6 – 19
DITANGIHON JAHOWA DO SOARA NI BANGSONA (TUHAN
MENDENGAR SERUAN UMATNYA)
Huria ni Tuhanta na nihaholongan di bagasan Kristus
Jesus,,,
Bagas jala borat
do tantangan dohot hamaolon na niadopan ni hakristenon alani haporsean tu Kristus Jesus,
mamungka sian huria na parjolo i sahat tu tingki on. Marungkil do huria na parjolo i, ala ndang dihalomohon
natorop nasida. Tung apala tandi do
parasingan ni cara hidup huria i sian nahumaliangna. Digoari ma nasida kelompok exclusivisme, ala ndang olo nasida marsaor
tu natorop na mangolu
di hasipelebeguon, harorangon, hahisapon dohot parmabuhon ( 1 Pet 4 : 3).
Di
bona ni surat 1 Petrus on, didok apostel Petrus do, ia na tinuju ni surat on ima angka
paisolat, naung tarpillit jala namarserak (1:1-2). Alai dihatindanghon apostel i do pangaramotion ni Debata tu
huria na parjolo i mambahen margogo, manahan
jala marhiras ni roha nasida ala ni haporseaon tu Kristus Jesus, asa gabe sahat tu haluaon.
Laos sahat tu tingki on sai tong do mangadopi hamaolon sian duru ni angka na porsea tu Kristus i,
isarani pelarangan peribadahan, diskriminasi,
dohot angka na marpardomuan
tu parkarejoan, dohot na dirajumi
gabe angka paisolat na minoritas na tumoru hak na. Alai adong muse do
hamaolon sian bagasan diri ni angka
ruas ni huria i, ima na sai mangasahon hagogoonna dohot pingkiranna.
Huria ni Tuhanta na nihaholongan dibagasan Kristus Jesus,,,
Di turpuk on dipatorang do dalan laho mangadopi angka hamaolon di parngoluan on.
- Patutoru diri tu toru ni
tangan ni Debata. Jotjot do tapangasahon
pingkiranta dohot haadongonta, sai
taetong do tolap gogonta dohot pingkiranta mangadopi hamaolon dohot angka sitaonon i, hape so ada na boi
tapangasahon. Dungi hasomalon
marungutungut, na mambahen ngolunta tu pandelean huhut dang porsea tu pangantoion ni Debata di ngolunta. Sai taetong do sude ala ni gogo
dohot malonta, gabe
madabu ma tu ginjang ni roha, hape dialo Debata do angka na ginjang roha, alai dilhon do asi asi tu angka na serep marroha. Alani
i molo tapatutoru dirinta tu toru ni tangan ni Debata, marlapatan do i;
tapaloas Debata mangurupi dohot
margogoihon hita di sude hamaolon di
ngolunta jala marsigantung holan huaso dohot hagogoon ni Debata.
-
Unang holsoan. Roha na holsoan tubu sian
godang ni angka na ta pingkiri dohot
angka na tasangkapi tu tingki nanaeng ro. Isarana ; bohado parngoluon on muse, boha do ngoluni iananghon, boha
do parkarejoanna dohot angka na asing. Sai boha bohaon ma rohanta,
ndang be boi takendalihon rohanta
diangka kehawatiran tu tingki nanang ro. Gabe olo ma madabu tu
pandelean. Ido asa didok di turpuk
on, “Tingganghon” manang tompashon. Tingganghon (Tompashon) lapatanna ndang adong tersisa boban i. Asa sian nasa
roha ma tatingganghon sude nasa boban
tu Debata, unang mardeba-deba, ai so adong gogonta
manghunti/manaon i. Ido asa didok Tuhanta Jesus asa unang holsoan hita ( Pat. Mat 6 : 25-33).
-
Torang ma rohamuna
jala dungo. Ayat 8, “sai maotaot
do sibolis i mangalului
sibondutonna”. Diboto sibolis i do hagaleonta, tingki sadiharina hita marhagaleon dohot holsoan. laos
ditingki i ma musunta ima sibolis i mangela
dohot mempengaruhi pingkiranta laho patulus angka tahina. Ai dang ro sibolis i ditingki “dungo” hita. Da boi
do songon na golap pingkiranta dohot rohanta
uju jumpang soncon angka sipingkiran dohot sisarihonon? Laos di situasi na songon ima, sigop sibolisi
mnguasai dohot mngendalihon hita. Ala ni,
ingkon torang rohanta jala dungo, asa unang gabe dipolgak sibolis i hita. Taingotma, mansai sabar situtu do sibolis
i paintehon/menunggu dohot mangintip
sadiharina gale jolma i. Torang ni roha dohot ngolu na “dungo” lumobi haporseaon nang pangoloion tu huaso ni Debata, ido gogonta mangalo dohot manaluhon sibolis i dohot sangkap-sangkapna. Ndada marhite gogonta dohot pingkiranta, alai marhite
hagogoon na sian Debata (
Pat. 2 Tim 1 : 7).
-
Gomos marhaporseaon tu Debata. Ndang tarbahen so songgop
angka haporsuhon tu ngolu ni angka na porsea, alai didok di ayat 10 i, “ Satongkin do haporsuhon i” ndada manongtong i. Asa
molo satongkin do, tagamon ma pola
marhamonangan haporsuhon i di roha dohot ngoluni na porsa? Baliksa hamonanghonon ni naporsea do ganup
haporsuhon i marhite haporsaon dohot Tondi
na sian Debata, songon na nidok ni BE No 707 : 1-3. Marsorin do las ni roha dohot arsak ni roha diloas Debata
asa lam tau naporseai di pangaramotion ni
Debata n manongtong marhuaso dohot marhagogoon. Ala ni, gomosma marhaporseaon, ndang mura-mura hallus,
manang harhar. Gomos,
unang
golom
ria ria; nitiop so nitiop, nipalua so pinalua. Alai sian nasa roha maniop jala hot haporsaon i.
Huriani Tuhanta
na nihaholongan dibagasan
Kristus Jesus...
Di naung lam borat jala lam komplit angka hamaolon dohot haporsuhon na niadopan ni angka na porsa di Kristus i di
partingkian saonari, boi do tubu angka sikap
na apatis, mago panghirimon jala na sahat tu pandelean. Umpara sian i tahe gabe madabu tu na meragukan huaso ni
Debata laos dipangasahon ma gogo nang pingkiranna
di ngoluna. Hata ni Debata marhite Turpuk on, mandasdas roha dohot ngoluni angka naporsea di Debata nampuna
saluhut asi ni roha i, asa manongtong pasahat dalanna
dohot ngoluna tu Debata, manongtong jala gomos di haporseaonna
asa marhamonangan manaluhon huaso ni sibolis. Ai dilehon Debata do jaminan hasangapon na manongtong i di angka naung jinouNa
laho pauliulionNa, pahotonNa
huhut patoguonNa dung jolo manaon
satongkin hamaolon dohot
haporsuhon i. Alani ima, sian nasa roha, pingkiran dohot ngoluna ma na porsea i pasangaphon Debata, marhite
pasahathon dirina hibul tu toru ni huaso
ni Debata na marhagogoon i huhut manongtong joujou tu Debata songon goar ni
minggu Exaudi, ai tangihononNa do joujou ni angka
na joujou. Amen.
Sungkunsungkun :
1. Molo
ro angka hamaolon dohot haporsuhon, huaso dohot hagogoon dia do na tapatujolo?
2. Boha,
taparhatopot dope na marhamonangan do angka na porsea maralohon huaso ni
sibolis na sai maotaot mangalului sipolgahonna?
06. Marende BE No. 769:
1- 2 “Tu Debata Do Panghirimon”
07. Tangiang Sian Na Ro
08. Marende BENo. 279: 1- 2 “O Jesus
Tuhanhi”
09. Tangiang Sian Na Manjabui
10. Marende BENo.723: 1...”Tu
JoloM O Tuhan” (P. Pelean)
11. Tangiang Panutup (Agenda)
Pdt Juwita Nababan, S.Th
Pendeta HKBP Resort Exaudi
Tidak ada komentar:
Posting Komentar