MARENDE MA HAMU DI JAHOWA ALE SANDOK TANO ON, Kolose 3:15-17, minggu Kantate 07 Mei 2023

 MINGGU KANTATE

07 MEI 2023

01.  Marende BE No. 587: 1 – 2 “Taendehon Las Ni Roha”

02.  Votum: A.X/B.4 - D.VII/27

03.  Manjaha Epistel: 1 Kronika 16: 23 - 28

04.  Marende BE No. 22: 1 – 2 “Nunga Ro Di Parguruan”

05.  Jamita: Kolosse 3: 15-17

 

MARENDE MA HAMU DI JAHOWA ALE SANDOK TANO ON (BERNYANYILAH BAGI TUHAN HAI SEGENAP BUMI)

A.     Patujolo

Buku Kolosse on disurathon Apostel Paulus hatiha dibagasan hurungan ala ni pamaritahonon di barita na uli (Kolosse 4:3, 10, 18). Sahat do barita tu Apostel Paulus taringot tu haporseaon nasida di Kristus Jesus suang songon i nang holong ni roha nasida mida angka nabadia. Barita las ni roha do on. Alai di sisi na asing, dihilala si Paulus do adong siparungkilhononna marpardomuan tu halak Kolosse i ma: haroro ni angka parbarita na asing (Kolosse 2 : 4) “Umbahen hudok songon i, asa unang dihatahatai deba hamu marhitehite malomalo ni panghuling”. Disurathon Apostel Paulus surat on, laho margogoihon dohot patoguhon haporseaon ni halak Kristen na di Kolosse mangadopi angka pangajarion sian panurirang pargapgap.

Deba sian pangajarion i, i ma: na patoruhon (meremehkan) hamonangan ni Kristus maradophon angka tradisi-tradisi naung leleng. Isarana taringot tu subang di sipanganon manang siinumon, manang siala ni pesta manang poltak bulan, manang ala ni ari Sabat pe (Kolosse 2:16, 20-23). Dipatuduhon Apostel Paulus do ulaon dohot hamonangan ni Kristus maradophon hasiangan on. Ibana naung monang i, i do na patut sisombaon, sioloan, jala ganup halak na porsea ingkon mangolu dibagasan ngolu na imbaru naung pinaimbaru ni Kristus.

B.      Hatorangan

Dipatuduhon Apostel Paulus do dasar ni sude sipaingotna on i ma: Dame ni Kristus (Ay. 15). Dame ni Kristus i ma silehonlehon na balga na pinasahatNa tu siseanNa na parjolo i, naung tu sude angka siihuthon Ibana. Dame on do manjou angka na porsea gabe sada daging, gabe marhahaanggi. Marhite dame i do dimungkinkan parsaoran/ persekutuan di angka na porsea. Hombar tu si ma, molo

maringan jala mangarajai dame on dibagasan roha ni jolma, di si ma talup jala margogo jolma i laho manghangoluhon ngolu na imbaru ma sian Kristus i. Di si do boi jolma patuduhon parasinirohaon, habasaron, haserepon, dohot sandok pangalaho na hinalomohon ni Debata. Manghalashon silehonlehon na balga on, disosohon si Paulus do marhhite na mandok “gabe parroha mauliate ma hamu”, asa saluhut halak naung dapotan asi ni roha dohot sibasabasa sian Debata umboto pasahathon hamauliateonna.

Tanda ni halak na mandok mauliate tarida do i marhite sikap na olo unduk manangihon jala rade mangulahon hata ni Kristus di pardalanan ni ngoluna. Na naeng dohonon ni si Paulus marhite on i ma asa marhite na manangihon hata ni Kristus jala paianhon hata i ditongatonga ni ngolu, naeng margogo ganup halak masiajaran jala masipaingotan. Hata masiajaran (ay.16) marlapatan mangurupi dongan mardalan di dalan na sintong. Masipaingotan (ay.16) marlapatan paholanghon dongan sian dalan na sala, suang songon i tarida do marroha hamauliateon nang marhitehite ende pujipujian pasangaphon Debata ditonga ni punguan. Jala dipangujungi ni turpuk on, disosohon si Paulus muse asa, molo tung diulahon angka na porsea i angka ruhutruhut ni ngolu na imbaru, naengma saluhutna marhitehite Goar ni Tuhan Jesus huhut dibagasan roha mauliate. Marhite on na sosoanna ganup hita, asa unang adong jolma i na patengahon diri, mangarajumi angka pambahenanna na denggan maradophon donganna jolma.

Hita angka naung pinillit ni Debata dibagasan haluaon naeng ma mangolu dibagasan haholongon. Ala haholongon i sian Debata do tu angka na pinillitNa asa dapotan haluaon. Jala haholongon i do hataridaan ni ngolu na imbaru. Dibagasan na manghaholongi dongan jolma ma tarida holong tu Debata, sabalikna ndang manghaholongi dongan jolma marlapatan ndang manghaholongi Debata (1 Johonnes 4:20). Naeng ma angka naung dihaholongi Debata saor tu angka dongan jolma, asa marhite parsaoran i dihilala nasida holong ni Debata; adong kepedulian, na rup manghilala di sitaonon nang las ni roha dongan jolma.

Halak naung mangolu dibagasan Jesus Kristus, dipatuduhon do semangat haimbaruon ni ngolu, jala ndang holan dirina na dibangun, manang dipauliuli. Alai adong do rohana laho pauliulihon donganna jolma nang humaliangna. Dipatuduhon ma i marhite na olo mangajari manang paingothon, ndang olo dipasombu dongan nang humaliangna dibagasan haotoon nang hapogoson. Adong

aksi nyata parbue na nihaporseaonna sian Kristus Jesus naung paluahon hita sian dosa nang hamatean i. Ganup ruas ni Tuhanta ingkon mangajari donganna na so umboto jala paingothon donganna na lilu. Nungga dibahen Apostel Paulus tiruan: ndang dirinta be naeng tapatujolo manang tapasangap marhitehite pambahenanta, ndang dirinta naeng pujion ni halak ala ni pangalahonta, alai Debata ma naeng marsangap. Nasa na taulahon di ngolunta ingkon rajumanta do songon hamauliaton ni rohanta tu Debata, ai saluhutna na adong di hita marharoroan sian Ibana. Ndada holan sinamot, manang ngolu portibi on na nilehon ni Debata tu hita, alai lumobi ma ngolu na imbaru marhitehite Jesus Kristus; na gok hasonangan; ima hangoluan na salelengnilelengna i. I do na tama di ngolu ni na porsea, ai marhite Ibana do adong gogo di hita laho mangulahon angka siulaonta ganup marsadasada. Ala ni i naeng rohanta nang ngolunta girgir mandok mauliate tu Debata. Amen.

 

Sungkunsungkun :

1.      Nunga dipasahat Debata tu hita ragam ni angka pasupasu, boha do hita mangalapati i?

2.      Aha do na boi tapatupa songon tanda ni holongta na marhuria?

06.  Marende BE No. 362: 1

07.  Tangiang Sian Na Ro

08.  Marende BE No. 568b: 1

09.  Tangiang Sian Na Manjabui

10.  Marende BE No. 724: 2... (P. Pelean)

11.  Tangiang Panutup (Agenda)

 

Pdt. Pancasona Simbolon, M. Div Pendeta HKBP Resort Mutiara