Ulaon Apostel 6:1-7 "Jamita Epistel tu Partangiangan Minggu Judika 26 Maret 2023

 MINGGU JUDIKA

26 MARET 2023

 

01.    Marende BE No. 11: 1 + 4 “Aha Ma Endehononhu”

02.    Votum: A.V/B.5 – D.V/23

03.      Manjaha Epistel: Hesekiel 45: 9 – 17

04.      Marende BE No. 485: 1 – 2 “Dongani Au Tuhan”

05.    Jamita: Ulaon ni Apostel 6: 1 – 7

ULAHON UHUM DOHOT HATIGORAN (LAKUKANLAH KEADILAN DAN KEBENARAN)

Dongan sahaporseaon na hinaholongan dibagasan Jesus Kristus, Tuhantai,

Didok di sada pepatah: “TAK ADA GADING YANG TAK RETAK”, lapatanna: dang adong na sempurna di portibi on. Saluhutna hita adong be do hahuranganna, hagaleonna. Tung so boi do saluhutna singkop taulahon. Samalomalo ni sada halak, tontu adong do na so binotona. Sagogogogo ni sada halak, tontu adong do hagaleonna. Diboto jala dipaloas Tuhanta i do jolma na tinompaNa i adong hahuranganna alai laos adong do tong halobianna.

Molo manjalo halobian ni sada halak tung las do rohanta, baliksa molo manjalo hahurangan ni sada halak tung borat do tarjalo ni halak. Alai, na boi do hahurangan ni sada halak i na gabe halobianna, jala halobian ni sada halak boi do gabe hahuranganna. Isarana: Alani na hurang do ibana di parhepengon (tadok ma na pogos) gabe ringgas ibana mulamulaon jala diboto marpangontik gabe tubu roha na serep. On ma na nidokna: hahurangan na gabe halobianna. Alai, ala halobian ni sada halak (tadok ma na mora di arta), gabe marlembalemba, tubu ginjang ni roha jala dang diboto mamangke artana i, gabe holan na dipansuasaehon angka arta i. On ma na nidok: halobian na gabe hahurangan.

Jala di sada ende di buku endenta i na mandok: “        So ho, ungutungut

mi paso, so ho ungutungutmi paso. Hohom ma ho, paso saritami” (BE. 503 “Na loja ho, o donganki”). Diajarhon ende i do tu hita ima laho pasohon ungutungut dibagasan parngoluonta siganup ari. Ingkon jumpang do roha na manghamauliatehon saluhut angka pasupasu na sian Debata. Nang pe loja do pamatang on mangulahon angka siulaon di portibi on, alai ingkon tongtong do ingkon paholangon ungutungut sian rohanta.

Barita partangianganta di borngin on manaringoti pamilliton ni angka parhobas di huria na parjolo i na hinobasan angka Apostel i. Ala lam tu hembangna panghobasion i jala lam tamba bilangan ni angka na porsea i, tung

ringkot do manambai angka parhobas di Huria i asa unang adong na tading panghobasion ni Huria i. Nang pe dipungka do barita on marhite na jumpang do sada partingkian di na marungutungut halak Gorik dompak halak Heber, ala tartading angka parompuan na mabalu sian nasida di pangurupion ariari. (ay. 1) Marmungutmungut nasida ala tading panghobasion di pangurupion ariari tu angka parompuan na pogos na mabalu, gabe holan panghobasion tu angka parompuan na mabalu sian Heber do na dipatujolo nasida. Adong do hape alasan na kuat, boasa marmungutmungut angka parompuan na mabalu sian halak Gorik i:

•          Molo angka parompuan na mabalu sian halak Heber,   adong   dope angka pinomparna na mangurupi nasida, ala kewajiban do di keluarga ni halak Heber mangurupi in ana mabalu sian keluarga nasida (jaha: Jesaya 1:17; Lukas 18:3; 1Tim. 5:3-4)

•          Alai angka parompuan na mabalu sian halak Gorik, sian angka keluarga na pogos mansai godang na terlantar jala sengsara ngolu nasida (ala ndang adong keluarga nasida na boi mangurupi). Marasing molo pinahombar tu angka parompuan na mabalu sian halak Heber ala adong pinomparna (keluarga) na mangurupi nasida. Jala pengurus diakonia di huria na parjolo hatiha i, marpingkir ala gumodang do bantuan na ro tu huria sian halak Heber gabe gumodang ma pangurupion dipasahat nasida tu angka parompuan na mabalu sian halak Gorik.

Marhite situasi na masa i gabe dipatupa ma sada rapot laho mamillit angka parhobas na ringkot tu ulaon i. Dilului ma pitu (7) halak na denggan baritana, angka na gok Tondi jala na pantas marroha, na laho sipabangkiton. (ay. 3)

Dapot ma si pitu (7) halak i dibagasan dos ni roha na sahuria i, dipillit ma si Stepanus, si Pilippus, si Prokorus, si Nikanor, si Timon, si Parmenas, dohot si Nikolaus. (ay. 5). Sian dalan pamilliton on taida do dalan na pinangke apostel i, ima mamangke dalan na demokrasi/musyawarah dang marhite lomolomo nasida sandiri.

Molo taida pamilliton Parhalado ditongatonga ni Hurianta, jotjot do diulahon di sada huria laho mamillit Calon Sintua marhite marnida pangalaho ni sasahalak. Ditimbangi do marhite haringgason ni Calon Sintua i na marhuria i. Songon i muse molo adong angka talenta manang halobian nasida na boi mangurupi huria i, isarana: markoor jala marmusik. Dung i dipasahat ma tu Rapot Parhalado laho manimbangi hatauon ni angka Calon Sintua i asa ditingtinghon ditongatonga ni Huria. Alai adong do tong na mamillit justru dang marnida angka haringgasonna. Sian halosohonna i ma diida asa muba pangalahona dung dipillit gabe parhalado. Sian dalan na dua on, boi do tong gabe saut na pinarsinta ni roha

i.   Naung ringgas jala parroha huria hian di mulana i dung gabe Calon Sintua hot

do ibana jala lam tu ringgasna muse manghobasi huria i. Na losok hian di mulana i boi do tong gabe denggan parhuriaonna dung dipillit gabe Calon Sintua.

Antong, dalan do na binahen alai anggo hasasautna tontu Tuhanta i do pasauthon. Dung i dipabangkit ma nasida gabe dongan ni Apostel i laho manghobasi Huria i marhite na dipajongjong nasida tu joloni angka Apostel i, jala martangiang huhut mangampehon tangan tu nasida. (ay. 6)

Laos diuduti do muse barita pangulaon na pitu (7) halak naung tarpillit i di ay. 7 na pabotohon na lam rarat do hata ni Debata, lam ganda situtu torop ni angka sisean di Jerusalem; laos angka malim pe torop do mangoloi porsea.

Alani, ingkon jumpang do kerjasama ni Parhalado dohot ruas ni huria di angka panghobasion ni huria. Mansai ringkot dukungan sian ruas ni huria di angka ulaon na pinatupan ni huria i. Jotjot masa hamaolon di huria, ala ndang olo ruas mendukung angka ulaon na pinatupa ni huria. Ujungna, gabe ndang jumpang hamajuon di huria i, ala mangalo jala marjogal angka ruas i. Songoni nang angka parhalado pe, olo do dang saihot tu Uluan ni Huria mangulahon angka na denggan laho pamajuhon huria i. Antong, naeng ma sude ruas ni huria boi rap masiutupan jala masitumpahan di angka siulaon ditongatonga ni huria i, asa lam tu ulina jala tu hembangna huria ni Tuhanta laos gabe pasupasu huria i tu na humaliangna.

 

Sungkunsungkun:

1.    Aha do na mambahen jotjotan ruas ni huria i dibagasan parungutunguton?

2.    Songon dia do na hinirim ruas ni huria i taringot tu panghobasion ni Huria sian  angka parhaladona?

 

06.  Marende BE No. 133: 2 + 6 “O Tondi Na Manggohi Roha”

07.  Tangiang Sian Na Ro

08.  Marende BE No. 136: 2 – 3 “Bidang Dope Na Holom I”

09.  Tangiang Sian Na Manjabui Partangiangan

10.  Marende BE No. 691: 1...”Hupasahat Ma Tu Jesus” (P.Pelean)

11.  Tangiang Panutup (Agenda)

 

Pdt. Nevri Sandonal Pasaribu Pendeta HKBP Resort Padomuan Nauli