MINGGU I DUNG TRINITATIS 1
1 JUNI 2023
01. Marende BE No. 384: 1 – 2 “Ro Ma Hamu Rade Do
Sasude”
02. Votum: A.XV.A.1 - D.XIII.36
03. Manjaha Epistel: Mateus
9: 18 – 26
04. Marende BE No. 666: 1 – 2 “Ingkon Do Boanonta Barita”
05. Jamita: Hosea 5: 15 – 6: 6
HAPORSEAONMI DO NA PALUAHON HO (IMANMU
TELAH MENYELAMATKAN ENGKAU)
1.
DIBOTO ALAI MAOTO :
Saurdot jala ndang tarsirang sian ngolu pangalaho na
mangantusi dohot na mangulahon, ai
telpang do pardalanan ni ngolu molo holan na mangantusi alai ndang tubu roha laho mangulahon. Tudos do
i tu sahalak na manuhor mobil; molo dituhor
mobil tontu na ingkon dipadalan do i asa denggan oli ni mobil mamiahi nasa alat ni masin parbagasan dohot angka
parputaran ni ban dohot angka remna dohot
angka paralatan ni mobil i saluhutna. Molo holan dipangolu sambing do ganup ari alai ndang hea mardalan mobil i,
tagamon ragam ma ro angka panahit ni mobil
i. Ingkon taantusi do, ia dibaen pe mobil asa dipangolu jala dipadalan do, ndang singkop anggo holan mangolu
sambing. Songoni do nang pardalan
ni ngolunta; taantusi
jala tahaporseai do ia ngoluon
ima pasupasu ni Debata na ingkon mardalan, mangula jala haporseaon ipe
ingkon do ditambortambori asa marurat jala marparbue. Songon siihuthon jala sitanda Kristus,
ingkon tandi ma tapatuduhon
pangalaho, haporseaon dohot parsitutuon mangulahon lomo ni roha ni Kristus Jesus dingolunta, ndada holan
hata na marpanindangion paboa ianakhon ni Kristus
hita, alai panindangion i ingkon pataru jala paborhat hita
mangulahon lomo ni rohaNa, ala ido ulaon na patut sihobasanta di dirinta songon halak na tarjou
jala tarpillit hita gabe sisean ni Tuhan i. Apostel Jakobus mandok : Antong, na
umboto mambahen na denggan, gabe ndang diulahon, na mardosa ma ibana disi. (Jakobus 4 : 17) Asa
denggan jala pasupasu ngolu dohot haporseaonta
tu angka donganta
na humaliang, ingkon hobasanta do dirinta mangulahon parsuruon dohot pangajarion ni Tuhan i, molo holan na so sambing
ndang adong pangulaonna, tagamon
ragam ma ro angka panahit
na manegai haporseaonta i
marhite
angka sumbia api ni dosa i; molo holan mamboto sambing do alai ndang adong usaha laho mangulahon tudutudu jolma
na maoto do i na pinaotooto ni portibion.
2. HATA MARHAMUBAON ROHA MANGARUNTA :
Ndang hagabusan ni jolma Debata,
ai tangkas do ditanda jala diboto Debata aha na manghuling di bagasan roha, tangkas do i dihatahon
di Jeremia 17:
10 “Ahu Jahowa do Sidodo
roha, siuji piapia jala mangalehon tu ganup jolma hombar tu dalanna, hombar tu parbue
ni pambahenanna.” Sude do angka na porsea umboto i, alai nang pe sude umboto, olo do laos pulut muse roha ni deba
jolma manggabusi Debata, marhite na marasing do na dihatahonna tu na niulahonna. Pangalaho ima na pinatuduhon ni bangso ni Debata, na marsipaula do panolsolion nasida diadopan ni Debata, ido umbahen didok di
ayat 15 i “Laho ma Ahu tu ingananKu, paima diundukhon nasida dosa nasida, jala
dilului nasida bohingKu” Ndada na
tubu satongkin panandaon ni bangso i tu Debata, ai tangkas do jumpang ditongatonga ni bangso Israel mamungka sian
pardalanan di halongonan uju
dipaluhut si Musa ompu nasida namardalan laho tu tano Kanaan jala dipadanhon tu bangso i sada hasomalan
na gabe teanteanan sian sundut tu sundut
lao mangajarhon panandaon tu Debata namangolu i dohot mangulahon tona dohot uhumNa. (5 Musa 6 : 1 - 9)
Panandaon i tangkas tarida di Hosea 6 : 1 - 3, ai jojor do dihatahon bangso i paboa Debata Parasiroha do Ibana mida bangsoNa, jala na tarrimas do Debata mida bangsoNa
molo so unduk tu uhumNa. Diboto nasida
do naung tarrimas Debata mida pangalaho nasida, jala tangkas do diboto holan sada do dalan asa jumpang muse
haluaon dohot pangurupion sian Debata, ima molo mulak bangso i tu dalan hasintongan ni Debata. Masibetabetaan do nasida asa marringgas ni roha mangeahi
parbinotoan di Jahowa, jala sude nasida marhaposan jala manghaposi paboa Debata do habaoran ni nasa ragam ni pasupasu
na mamornohi tano na mahiang
asa sun denggan muse tano i mangalehon silasniroha dohot hangoluan, alai saluhutna i holan di pamangan sambing do ndada anggo na mangula jala
nionjar ni roha na marhamubaon. Sada na tangkas tarida di ngolu ni bangso i
ima: Rupa manang bohi sitanda uhum ni Debata
alai anggo roha sioloi jala hatoban ni sorop hamagoan. Oh .. tahe, tudos ma bangso
i
songon sada punguan ni situan natorop
na mardalan manuju
tu sada luat na dao na manumpang
di sada kapal na segasega
mangadopi alogo dohot galumbang
na gogo ditonga laut, adong ma i namarsipaula songon halak na
tenang, jala na sai mangondolhon
ngolu partangiangon dohot panghaposion tu hagogoon ni Debata, alai anggo pingkiranna tung dihuasoi parbinotoan
dohot hamaloonna sambing, ndada anggo
tung sian nasa roha marpangunsandean tu Debata, “ Sega kapal na gabe hitehite manuju tu labuan hape laos
sega muse roha ni jolma na diboan; sega roha ni partogi
ni bangso i, marsahit baro sirarat muse ma angka natinogihonna:
Tudos ma songon hau na bonana hau sotul, dangkana hau ardom, rantingna mar bulung ni demban tung so tagamon jumpang
parbue na tonggi” Songon
siihuthon Kristus hita, naeng ma dao sian ngolunta pangalaho na songoni, ingkon tangkas do pangantusion di
ngolunta : Natarrimas do Ibana molo marsipaulaula
hita songon halak na porsea.
3. NAMANONGTONG DIA DO NA JINALAHANMU ?
Adong 2 dalan na jinalahan ni
jolma na di portibion, na parjolo jala na somal
sai tahatahon ima: Ngolu na manongtong,
alai sada na i hira jarang do tahatahon
parhataanna nang pe nian molo di angka panorangion sai tahatahon, dia ma i ima : Panolsolion na manongtong. Jotjot
do jolma i ndang manghilalahon pardalanan ni ngoluna
naung manirpang tu hamagoan, isara ni sahalak namarbaju na sai marnida rupa ni
donganna na marbaju angka na uli, gabe sai
tubu ma rohana naeng uli songon na nidana i. Dipangke ma ragam ni angka sipauli bohi isara ni massam ni angka
badak na marmiak dohot na marsinar idaon, hape
diujungna gabe tubu ma angka peta ni ragam ni pulo di bohina na uli i hian, isara ni pulo sumatera, pulo sibandang
manang bandar pulo, dalan risirisi dilogo ni
ari gok abu, di rondo ni ari mamirsahan angka gambo. Nang pe naung hona
gorga bohina ndada na gabe mulak
ibana baliksa lam dijalahi muse ma angka dalan na asing, ujungna gabe jumpang ma dingoluna Panolsolion na manongtong. Di gombarhon
panurirang Hosea do diturpukon dalan naung ni dalanan ni bangso Juda i, na paimahon uhum nama sian Debata
siala pangalaho nasida. Tudoshon ombun
manogot do hadaulaton nasida, jala tudoshon nambur manogot na mura habang, songoni ma ngolu parugamaon
nasida, na so jumpang hatauon dohot parsitutuon laho manghehei ngoluna asa
tangkas gabe ianakhon ni Debata. Ndada pelean
na gabe sintuhu, manang unok ni sude ngolu parugamaon, alai pangalaho do na manghamham saluhut panandaon tu
Debata, ima ngolu na masihaholongan, parasirohaon, manang
dihata na jumompok
na gabe pamusatanna ima
manghaholongi
Debata sian nasa roha jala manghaholongi dongan jolma songon dirina sandiri. (Mateus 22: 37-39)
Pangantusion dohot pangulahonon di parange namanghaholongi,
ido naung mago sian ngolu ni bangso i, jala panghorhonna nunga talpe ngolu nasida naeng manjalo uhum sian Debata.
Dipaingot Debata do bangso i marhite panurirangNa si Hosea, laos songoni do nang hita pe sai tongtong do dipaingot Debata marhite hataNa,
antong sian nasa roha ma hita dibornginon mandok : Jahowa Debatanta
i do naeng oloannami, jala soaraNa i naeng tangihononnami. (Josua 24 : 24)
4. HATA SIPATUDU PABORHAT
TU PANIMPUL
Haporseaonmi do paluahon ho, ido na gabe ondolan ni turpuk jamita on. Didok Tuhan Jesus di Mateus 9 : 29 “Marguru
tu haporseaonmuna ma jumpang hamu” dungi buha ma mata ni na mapitung i. Haporseaonta i do na gabe pamusatan
ni ngolu partondionta, jala haporseaon na marpangulaon do, (Jakobus 2
:
17) Ndada haporseaon na holan
hatorangan di surat sipatanda hadirion sambing
na ringkot diparngoluonta, alai aha ma na patut siulaonta asa gabe
barita nauli haporseaonta i tu
tongatonga ni portibion, ido na ringkot sijalahanta. Molo tajaha Mateus 9 : 18-26, tung tangkas ma dihehei
rohanta mangantusi paboa haporseaon ido
na pangoluhon, haporseaon ido nang na mangubati sahit na di ngolunta on. Antong asa jumpang hita hangoluan na
manongtong, mangula ma hita hombar tu haporseaonta
ai ido pelean na hushus
diadopan ni Tuhan Jesus
Sungkunsungkun :
1. Molo diparhataan adat sai tarbege
hita do hata na mandok : Dia ma langkatna
dia ma unok na, dia ma hatana, aha ma na nidokna tangkas ma hatahon
hamuna. Hata pamuhai
on mangidohon sitangkas
ni ulaon na pinatupa
nasida sadarinai asa unang sala mangulahon. Molo tagombarhon i di ngolu hakristenonta, dohononta ma: Dia
ma langkatna, dia ma unokna dohot pangibulan
ni ngolu haporseaonta, antong tangkas ma tahatai dibornginon laho paborhat hita hibul mangolu
dibagasan uhum hasintongan ni Tuhanta hombar tu turpuk
jamita di borngin on.
2. Aha
ma na tau mamornohi, manambori dohot na paudanhon rohanta, asa boi dengan
partubu ni haporseaon i jala marparbue
di ngolunta ?
06. Marende BE No. 173: 1 + 4 “Sai Mulak Sai Mulak”
07. Tangiang Sian Na Ro
08. Marende BE No. 443:1 + 3 “Dung Tuhan Jesus”
09. Tangiang Sian Na Manjabui
10. Marende BE No. 190: 1...”Las
Rohangku Situtu” (P.Pelean)
11. Tangiang Panutup (Agenda)
Gr. Ramses Manurung
Guru Huria HKBP Aekkanopan
Tidak ada komentar:
Posting Komentar