MINGGU II DUNG TRINITATIS
18 JUNI 2023
01. Marende BE No. 25: 1 - 2 “HataMi
Ale Tuhanhu”
02. Votum: A.XV.2 – D. XIII. 38
03. Manjaha Epistel: 2 Musa 19: 1 – 8
04. Marende BE No.
28: 1+ 4 “Hata Ni Jahowa”
05. Jamita: Jakobus 2: 14
- 17
MARSIHOHOT MANGULAHON HATA NI DEBATA
(SETIA MELAKUKAN FIRMAN
TUHAN)
Sada
hasadaon na so boi tarsirang do haporseaon dohot angka ulaon na denggan sian ngolu ni angka na porsea di
Tuhan Jesus. Haporseaon na holan di hata,
ndang adong pangulaonna, ima haporseaon na mate manang na so marguna. Pangulaon na so borhat sian haporseaon pe
boi do mambahen jolma madabu tu ginjang
ni roha manang na paburnang-burnang dirina. Asa, molo didok apostel Jakobus
di suratna tu huria na adong di parserahan di bagasan turpuk on Haporseaon na Marpangulaon, laho
mangondolhon paboa haporseaon i ingkon do boi
dipatuduhon marhite pangulaonna. Ndang na maralo tu na nidok ni apostel Paulus di Epesus 2: 8 - 9 molo haluaon i
sian asi ni roha dalan haporseaon, ndada alani parulan. Memang haporseaon i do na paluahon,
alai haporseaon na songon
dia do na nihirim ni Debata sian angka na porsea i. Ima haporseaon na
mangolu manang haporseaon na marparbue.
Aha
ma gunana ale angka donganhu ninna di
ayat 14 turpuk on, molo didok halak, di ibana do haporseaon alai ndang adong di ibana pangulaon ? Tarbahen
do haporseaon i paluahon ibana ? Sada sungkun-sungkun na menantang sian apostel Jakobus tu huria sampuludua
marga na adong di parserahan i. Unang dipangasahon
haporseaonna boi paluahon dirina sian
ari uhum sogot, molo holan di hata do ibana mandok na porsea. Boi do tabandingkon songon na nidok
ni Tuhan Jesus di jamita dolok
ima di Mateus 7: 21 ”Ndada saluhut
halak, na mandok Ahu Tuhanna bongot sogot tu
harajaon banua gnjang, holan angka na mangulahon
lomo ni roha ni Damang na di banua ginjang i do.” Laos dibahen apostel Jakobus do di ayat 15 dohot 16
sada ilustrasi laho mangondolhon
paboa na so tarsirang do haporseaon
i sian pangulaon. Molo adong dongan na marsaemara manang hurangan di sipanganon siap ari, hape ro ma hita mandok
laho ma hamu mardamedame, bosur ma
hamu alai ndang talehon na ringkot di ibana, aha ma gunana. Aha ma gunana angka dongan molo adong dongan marsaemara hape adong
do parabiton di hita alai ndang talehon parabiton ni donganta na marsaemara i? Aha ma gunana godang
sipanganon di hita alai tapasombu
donganta ndang
mangan ala hurang
sipanganon siap ari? Aha ma gunana tadok hita halak na porsea hape ndang tarpatuduhon hita angka ulaon na denggan
songon parbue ni haporseaonta?
Aha ma gunana tadok halak na porsea, haru sibolis pe porsea do adong Debata ? (bdk Jakobus 1: 19). Pangulaon di ngolu siganup ari marhite na marsihohot mangulahon lomo ni roha ni
Debata do parasingan ni sibolis dohot angka na porsea di Tuhan Jesus. Halak na porsea mangihuthon turpuk on ima angka halak na mangulahon ulaonna nionjar
ni panandaon na tangkas di Jesus Kristus.
Jala sian pangulaonna i do tandaon ni halak molo Kristus di bagasan ibana jala ibana di bagasan Kristus.
Haporseaon
na so adong pangulaonna ima haporseaon naung mate (ayat 17). Molo didok mate, tontu na marlapatan do i haporseaon na so
marguna ngoluna tu angka na
humaliang ibana, ala na so parduli tu angka donganna jolma, na so boi manghilala na nihilala ni donganna jolma,
na mate do hadirionna. Di parngoluon siganup
ari jotjot do jumpang hita na songon i, boi do
antong mangan ibana marlobi-lobi maradu
dipamasuk dope tu palastik, hape di lambungna adong na hurangan mangan. Naung mate do hadirion ni halak si songon i, jala ndang pangalaho ni halak na porsea na songon i. Unang pola tadok hita halak na porsea, ai ndang adong guna ni i molo holan di
hata do. Alai tapatuduhon ma molo na tutu do
hita angka halak na porsea di Jesus Kristus, marhite na tongtong marsihohot mangulahon hata ni Debata: manghaholongi
dongan songon Ibana naung jumolo manghaholongi
hita, manarihon dongan songon Ibana naung jumolo manarihon ngolunta, mangurupi dongan songon Ibana naung jumolo mangurupi hita, marasi ni roha mida dongan songon Ibana naung
jumolo marasi ni roha mida hita jolma. Sian
parbue ni haporseaon manang sian angka ulaon na denggan i ma nian tandaon ni halak, molo angka na porsea do hita.
Amen.
Sungkunsungkun :
1. Aha do haporseaon ? (Hombar tu pangantusionmu sandiri)
2. Haporseaon na songon dia do na niigil ni turpuk
on nuaeng sian hita, nunga boi tapatuduhon
molo angka na porsea do hita ?
06. Marende BE No.716:
1 “Di Na Mamolus
Sandok Ngolu On”
07. Tangiang Sian na ro
08. Marende BE No.672:
1 “Tung Godang Situtu”
09. Tangiang Sian Parjabu
10. Marende BE No.691:
1... “Hupasahat Ma Tu Jesus” (Papungu
Pelean)
11. Tangiang Panutup (Sian Agenda)
Pdt. Natalina
Nababan, S.Si Pendeta
HKBP Resort Kisaran
II
Tidak ada komentar:
Posting Komentar