MINGGU MISERICORDIAS DOMINI 23 APRIL 2023 Jamita: Psalmen 116: 12 – 19,MANGULAHI TUBU DI BAGASAN HATA NI DEBATA

 

MINGGU MISERICORDIAS DOMINI 23 APRIL 2023

01.  Marende BE No. 565:2 + 4 “Las Rohangku Lao Mamuji”

02.  Votum: A.X/B.2 – D.VII/28

03.  Manjaha Epistel: 1 Petrus 1: 17 - 23

04.  Marende BE No.20: 2 + 5 “O Jesus Tuhannami”

05.  Jamita: Psalmen 116: 12 – 19

MANGULAHI TUBU DI BAGASAN HATA NI DEBATA (DILAHIRKAN KEMBALI OLEH FIRMAN ALLAH)

Hamuna dongan sahaporseaon na hinaholongan di bagasan Kristus!

Di pangaranapion ni parpsalmen taringot tu pambahenan ni Jahowa tu ibana, diakui parpsalmen on do molo: (1) ditangihon Jahowa do joujou dohot pangidoanna; dipaeleng Jahowa pinggolNa tumangihon joujouna; (2) dipalua Jahowa do tondina tingki dihaliangi rante ni hamatean, tingki dihagogotan ni banua toru ibana, jala tingki mardangol ibana; (3) dipatuduhon Jahowa tu ibana, na tung parasiroha do Jahowa; (4) diurupi Jahowa do ibana tingki tarjepol ibana siunjurroha; (5) denggan do uhum ni Jahowa tu ibana, jala gabe mulak tondina tu ruma; (6) dipalua Jahowa do tondina sian hamatean; (ay 7) diapus Jahowa iluilu sian mata ni ibana; (8) dipalua Jahowa do patna sian partuktukan. Diranap ibana do na tung konsisten Jahowa marasiroha tu ibana, nang pe naung dangol situtu ngoluna dihilala ibana. Aut unang pangurupion ni Jahowa nunga tung mago situtu ibana.

Songon sahalak na mananda pambahenan ni Jahowa tu ibana, ditompuk ibana andorana mandok: Tung beha ma pamaloshu tu Jahowa, ala saluhut denggan ni uhumna i tu ahu! Denggan do roha mauliate na sihol laho mamalos pambahenan ni Debata. Atik pe ndang tarbalos hita ganup na binahen ni Debata tu hita, alai ndang gabe so balosonta na boi tarbalos hita. Ai dohot do nang roha na ra mamalos i patuduhon balga ni las ni rohanta di angka naung tajalo sian Debata. Ndada holan angka naung patar jala na dapot taida i umbahen tubu las ni rohanta mamalos denggan basa ni Debata, alai dohot do nang denggan ni uhumNa, naung manubuhon hita mangulahi tu godang ni asinirohaNa. Tama do nang hita maniru parpsalmen on. Olo hita tangkas mananda angka dia naung dibahen Tuhan tu ganup dirinta, jala manukkun dirinta be aha bahenonta balos ni na denggan naung tajalo sian Ibana. Halak na so olo mangaranap dohot mangakui aha naung dibahen Tuhan tu ngoluna, ndang olo i mambahen balos ni na denggan na tu ibana. Hukum

kemanusiaan do na songon i. Molo tinanda aha na denggan na binahen ni natoras tu iba, lao do roha mambalos i tu natorasniba i. Molo tinanda aha na denggan na binahen ni dongan sahuta, manang tulang, dongan tubu, boru, tu diriniba, lao do roha mambalos angka na denggan i marhite angka na denggan. Somalna, na denggan do balos ni na denggan. Tabilangi ma jolo angka aha na denggan naung dibahen Jahowa tu hita ganup. Ra olo do ndang hajojoran i sude dison. Ganup do manjalo adong na khusus tu dirina be. Tugasta do manungguli rohanta, dohot roha ni donganta, asa mananda aha na denggan naung dibahen Jahowa tu ganup hita.

Sada pangalaho na jumpang sian par-Psalmen on laho mandok mauliate i ma marhite na mamelehon dirina (ay.13), songon Tuhanta Jesus na mambuat panginuman i, paingothon hita taringot tu haluaonta, haporseaonta tu Ibana, tanda ni pangoloionta tu Ibana, parsaoranta dohot Ibana. Asa molo tasungkun dia hadomuan ni pelean dohot panginuman, ala songon na tarida di 4 Musa 28:7, dipatuduhon gombaran ni panginuman i do las ni roha na suksuk na marlompitganda. Jala ndang di inganan na buni par-Psalmen on manggarar dengganbasa ni Debata, diadopan ni sandok bangso do (ay.14). Hasomalan di na robi, molo naeng marbagabaga ingkon di adopan ni loloan manang natorop do, diadopan ni angka sitindangi. Boasa, ala ditogu jala ditubuhon roha dohot bagabaga na songon i angka roha ni jolma natorop, parsidohot nang mandok mauliate, mamalos nasa dengganbasa ni Debata.

Sada denggan ni uhum ni Debata na dipanghilalahon par-Psalmen i ma tung mansai arga do di roha ni Jahowa hamamate ni angka na niasianNa (ay,15). Upa tinuhor ni dosa do hamatean. Konfessi HKBP 1996 bindu 3 mandok “ujung ni sude dosa manang beha pe rumangna marhapatean tu hamatean do”. Tung so adong do dalanna molo sian dirinta manang sian gogonta sandiri malua hita sian hamagoan dohot rante ni hamatean i. Holan ala asiniroha ni Tuhanta na manubuhon hita mangulahi sian hataNa i, i ma na tahaporseai dipatupa Debata marhite Tuhanta Jesus Kristus umbahen na malua hita. Jadi di hinadangol, panaonon dohot panghongkopon ni Tuhanta i do dapot hita hinaarga ni hamatean ni angka na niasianNa i. Antong songon halak naung ditubuhon hita mangulahi ndang mabiar be hita mida sorop ni hamatean, ndang pola mabiar be hita mate di adopanNa tung jonok pe angka tingki ni hamateanta. Ndada musibah manang kecelakaan bolon be molo di tingki na dipabongot Debata hita mamolus hamatean. Ala na mansai torop do hamagoan na boi mangago hita saleleng di portibion dope hita. Diramoti Debata ma hita jolma naniasianNa i sian adopan ni angka hajahaton na naeng ro. Dipalua hita sian angka pandokdohi ni pamatang, mansohot ma dosa dohot arsak sisalelenglelengna.

Digoari tubu mangulahi, ala sian halak pardosa hian ditubuhon mangulahi gabe naposo ni Debata, marhite na diharhar Debata rantena (ay.16). “Ale Jahowa nunga tung naposoM ahu”, manang aha pe jabatanta, manang sadia timbo pe pangkatta, manang boha pe godang ni artanta intap ni ‘naposo ni Debata do hita”. Marhite i dipaingot ma hita asa unang madabu hita tu ginjang ni roha dohot angka ragam ni pangunjunan. Laos on do tioponta uju mangadopi angka sitaonon na dokdok na ro manahopi hita.

Na parpudi, bagabaga ni parpsalmen on tu Jahowa i ma mamelehon pelean hamauliateon tu Jahowa apala di adopan ni sandok bangsoNa, di angka alaman ni Jahowa, di parsitongaan ni Jerusalem. Ndang dipaboa dison sadia godang ni pelean hamauliateon i. Alai rajuman do i, sampe boi mangalehon mangan sagat sude jolma na hadir di alaman ni Jahowa di bagasjoro i dohot di ruarna. Siat do disi marduaribu halak tingki i. Pelean hamauliateon i, marrumang sipanganon, jala dibagihon ma i panganon ni angka jolma na ro tu bagasjoro, asing ni naung dipasisi gabe balanjo ni angka malim. Pelean i ndang na laho patuduhon na boi sibahenon, ndang patuduhon ginjang ni roha, alai tung haserepon ni roha do i laho pasangap Jahowa, naung manumpakkon boi bahenon na songon i di adopan ni Jahowa laos di adopan ni bangso ni Jahowa. Naeng ma parsidohot hita songon parpsalmen on, di hata dohot di pambahenan. Amen

Sungkunsungkun :

1.    Sian dia do taida naung ditubuhon Tuhanta hita mangulahi (dilahirkan kembali)?

2.    Songon dia do hita marespon pasupasu ni Jahowa na tajalo di bagasan ngolunta?

 

06.  Marende BE No.697: 3 – 4 “Molo Ho Do Huihuthon”

07.  Tangiang Sian Na Ro

08.  Marende BE No.706: 3 “Godang Ni Pasupasu i”

09.  Tangiang Sian Na Manjabui

10.  Marende BE No.694: 1...”Jesus Ho Nampuna Au” (P. Pelean)

11.  Tangiang Panutup (Agenda)

 

Pdt. Noveria Hutapea, S.Th Pendeta HKBP Resort Silau Maraja