MINGGU QUASIMODOGENTI
16 APRIL 2023
01. Marende BE No. 2
: 1 – 2 “Naeng Pujionhu Ho Jahowa”
02. Votum: A.X/B.1- D.VII/27
03. Manjaha Epistel: Hesekiel
36:22 - 27
04. Marende BE No. 827: 1
– 2 “Marbungaran Hata I”
05. Jamita: Pangungkapon 21: 5 – 7
MARPARANGE HOMBAR TU HATA NI DEBATA (DIPERBAHARUI UNTUK HIDUP MENURUT
KETETAPAN ALLAH)
Huria ni Tuhanta
Aha
do na imbaru na nidokna di bagasan turpuk on? Di ayat 1 tangkas didok na dibereng si Johannes, ima panurat
ni buku on do di parnidaanna banua ginjang
na imbaru dohot tano na imbaru. Molo adong banua ginjang na imbaru dohot tano na imbaru, antong tudia nama
banua ginjang dohot tano sisaonari? Ai didok
di ayat 1 salpu ma banua ginjang dohot tano na taingani sinuaeng. Sian i naeng taantusi, ndang manongtong hape tano
na taingani on. Salpu do hape sude. Antong molo laho salpu do hape sude, boasa olo hita loja mangalului na di portibion? Ai sipata molo taida ndang diboto sasahalak
i be samban holan mangalului na di portibion. Suda ariarina,
suda gogona holan pasarisari na ringkot di
portibi on. Adong na deba sipata ndang sanga be menikmati ngoluna holan pasarisari na di portibion. Nian ndang
sala mangalului arta na godang, mangalului pangkat
na timbo, molo sian dalan na tingkos jala boi ma nian dinikmati ngolu na di portibion.
Huria ni Tuhanta.
Angka dia do haroa sijaloonta di banua ginjang na imbaru dohot di tano
na imbaru? Ayat 2 didok adong ma disi huta na badia, ima Jerusalem na imbaru jala di ayat 3 didok: mian ma Joro ni Debata di tongatonga ni angka
jolma. Dung i di ayat 4 dipatorang ma
muse songon dia situasi manang kedaaan na masa di banua ginjang na imbaru i dohot di tano na imbaru i ima: Debata na
mangapusi iluilu, lapatanna ndang adong disi hamatean, arsak, angguhangguk, na hansit; holan hadameon, las ni roha dohot olopolop nama jumpang disi.
Ima
na hinangkam ni ayat 5 di jamita on marhite pandohan: saluhutna do hupaimbaru. Portibi na gok dosa dohot
haberniton ingkon salpuhonon ni Debata. Andigan
ma i masa? Ima di ari parpudi, ari paruhuman ni Debata. Alani i molo pe marsitaonon angka huria na parjolo i ima hasahatan ni buku on dimulanai ima
alani
haporseaonnasida di Jesus Kristus, dipaingot ma nasida paboa na laho salpu do sitaonon nasida i. Molo pe hansit,
mangangguhi nasida alani pangaleleon sian panggomgomi Rom hatiha i, salpuhonon ni Debata do i di ari na parpudii. Lapatanna ndang hot pardangolan na
niaenasida i ala mangula do Debata jala maringan
di tongatonganasida.
Huria ni Tuhanta, ndada holan halak Kristen panuratan
ni Buku Pangungkapon on na manaon na porsuk alai hita pe di
partingkianta sinuaeng tongtong do
mangadopi na porsuk manang hamaolon, nang pe mungkin marasing angka haporsuhon na taadopi. Sahat tu
saonari adong do donganta sahaporseaon na marungkil
ala ndang dipaloas pajongjong Gereja, ndang diloas beribadah. Adong do mungkin sian hita naung tingkina naik
pangkat alai gabe tu na asing dilehon ala halak
Kristen hita. Adong do ra sian hita na gabe sisogo ala sidok na tingkos, gabe dipasiding hita, dohot lan angka na asing.
Molo masa angka i, gabe mandele do hita? Gabe mandao
do sian Tuhan i?
Alani i, songon siihuthon Tuhan i hita, dipasunggulhon ma muse tu hita
asa Manahan jala hot dihaporseaon. Ido didok ayat 7: teanon ni na monang ma saluhutna.
Jala ingkon taingot do di banuaginjang na imbaru dohot tano na imbaru, holan inganan ni angka na monang do
disi. Alani i unang tagadis haporseaonta marhite na mangulahon na maralo tu Hata ni Debata holan alani jabatan,
hamoraon, hagabeon, rongkap
dohot lan angka na asing. Hata ni Debata na mandok
di Pangungkapon 2:10a: Sai burju ma ho rasirasa mate; dung i lehononKu ma tu ho tumpal hangoluan i. Jambarta do
hangoluan na salelenglelengna asal ma hot hita sahat tu ujungna.
Huria ni Tuhanta…
Di
Ayat 6 didok….LehononHu ma tu na mauas sian mual aek hangoluan i, so pola tuhoron. Tontu pandohan on nunga
tajalo jala nunga be tadai. Jesus do aek hangoluan
i jala nunga tahaporseai. Alani i nunga sahat be tu hita ayat 6 on. Lapatanna, dibagasan Jesus dapotan aek
hangoluan do angka na porsea i, alai dipasingkop
ma i di ari parpudi. Molo mauas hita di aek hangoluan i ro ma hita tu Jesus. Mateus11 : 28 didok: Ro ma hamu tu
Ahu, hamu angka na loja jala na sorat….Aek Hangoluan
i nunga tajalo i marhite
pasupasuNa, marhite pandonganionNa, jala uju marsak apulanNa
do hita. Ndang dipasombu Debata hita di
tano na taingani nuaeng, jala didok so pola martuhor lehononNa tu hita. Alani i sotung adong halak Kristen na merasa
“Kesepian”, na merasa ndang adong na mandongani, merasa ndang adong na manarihon. Antong, mangasahon Jesus silehon aek hangoluan i gabe angka na monang ma hita asa parsidohot hita di
banua ginjang na imbaru dohot
di tano na imbaru i, jala marparange ma hita
hombar tu hata ni Debata
songon topic ni partangiangan on: Marparange hombar
tu Hata ni Debata.
Sungkunsungkun :
1. Aha do sipatupaonta asa parsidohot hita di banuaginjang dohot langit na imbaru
na pinarade ni Debata?
2.
Aha do na mambahen ndang marparange hombar tu hata ni Debata?
06. Marende BE No.9: 3 + 6 “Hupuji Holong Ni RohaMu”
07. Tangiang Sian Na Ro
08. Marende BE No.501:
2 “Sai Ditogutogu Jesus”
09. Tangiang Sian Na Manjabui
10. Marende BE No. 248:1... “Saleleng Ho Di Tano on” (Papungu Pelean)
11. Tangiang Panutup (Agenda)
Pdt. Frizon Saragih, S.Th
Pendeta HKBP Resort
Air Batu
Tidak ada komentar:
Posting Komentar