MINGGU TRINITATIS
4 JUNI 2023
01. Marende BE No.569
: 1 – 2 “O Debata Tung Longang Do Rohangku”
02. Votum : A.XIV.A/D.XII.35
03. Epistle : 1 Musa 1 : 1 – 2, 26 – 28
04. Marende BE No.128
: 1 + 5 “Ditanda
Debatanta”
05. Jamita :Mateus 11 :
25 –
27
DEBATA SITOLUSADA PANOMPA SALUHUT NASA NA ADONG (ALLAH
TRITUNGGAL PENCIPTA SEGALA
SESUATU)
Huaso
ni Debata Ama tangkas do dipatorang panurat Mateus, di na nidok ni Jesus, “Hupuji Ho Amang, Tuhan na
manggomgom banua ginjang dohot tano on”.
Pandohan on pabotohon songon dia Jesus manjou Jahowa. Hata “Amang”
paboahon hadirion ni Jesus Anak ni Debata. Jesus di bagasan hadirionNa
Anak ni Debata, mangokuhon Debata Ama na marhuaso. Ndang tarsirang Jesus sian Debata. Hata “Tuhan na manggomgomi” (Ibr. Kurie) napatuduhon huaso dohot harajaonNa na mangatasi saluhut – langit
dohot tano. Ibana do nampuna siala sian Ibana
do haroroan ni saluhutna. Ayat 27 “Saluhutna
i nunga dipasahat Damang tu Ahu, asa
ndang adong na mananda Anak i dungkon
ni Ama i; Ama i pe ndang adong na
mananda i ia so holan Anak i”. Hadirion ni Ama nuaeng dipatangkas marhite
turpuk on. Jala laos patorangkhon hasadaon ni Ama dohot
Anak i.
Di
pamuhai ni turpuk on, tangkas do taida na
adong panulahion ni angka parise
dohot siboto surat taringot tu hadirion ni Jesus. Marragam halongangan dipatupa
isara pamalum na marsahit dohot pahehehon na mate. Jamita dohot pangajarion ni Jesus na gok huaso mambahen
torop jolma mangihuthon Ibana. Alani
i lam tubu ma sogo ni roha ni angka pangituai ni Jahudi. Jotjot ma ro sian horong Parise dohot siboto surat laho
mangunjuni Jesus. Alai ndang hea dapot nasida
hahurangan ni Jesus. Siala na masa i dietong nasida ma Jesus musu nasida jala didok, Jesus paimbarhon pangajarion ni ugamo Jahudi. Ditulak nasida do
pangajarion ni Jesus. Ndang dihaporseai nasida Jesus Anak ni Debata na
disuru laho paluahon portibi on sian gomgoman ni dosa.Maol
do tarjalo rohanasida hata ni Jesus i. Gabe diuduti ma angka hatorangan na mandok, ia pangantusion i dipapatar
do i tu angka siondihononhon. “Angka
siondihononhon” (Ibr. Nepiois – posoposo,
dakdanak na metmet) na marlapatan Debata papatarhon hataNa tu na so marsigantung tu dirina sandiri manang
pangantusionna sandiri, songon posoposo. Tondi
ni Debata mangula di jolma i, asa tarbahen jolma i mangantusi hadirion ni Debata
Ama dohot Anak i. I do ala na mamangke
hata “siondihononhon’, ima
Debata Ama dohot
Anak na mangondihon jolma i marhite TondiNa. Hata “Onding sian na pistar dohot na marroha” ndang martudutudu tu halak na bisuk jala parsingkola,
alai taringot tu halak na mangasahon dirina dohot parbinotoan na laho mangantusi ulaon ni Debata. Angka na
manjua Jesus na mamboan haluaon tu tonga-tonga
ni portibi on. Molo tapamanat ayat 25 – 26, ndang jolma na sai holan mangasahon parbinotoan manang utokutok na
dapotan parsaulian alai angka na mangalehon
rohana. Habuluson do na tinudu ni pandohan i. Ise na bulus roha manjangkon haroro ni Jesus i do na taruli las ni roha. Molo tapatudos
songon dakdanak na metmet, boi do mura
antusanta dia tinuju ni Jesus sian pandohan i.
Ndang haboion ni jolma na dihalomohon Debata songon angka na pistar dohot marroha, alai habuluson songon dakdanak.
“Saluhutna nunga dipasahat
Damang tu Ahu . . .”. dipaboa
Jesus do parsaoranNa dohot Ama i. Asa hombar tu
pandohan i boi dohononta manang ise na mananda
Jesus ditanda do Ama i. Ditanda ala naung adong parsaoranna dohot umboto na hinalomohon ni Ama i. Mananda
ala adong parsaoran na rosu. Debata Ama i do na
manompa saluhut nasa na adong rap dohot Anak i nang Tondi Parbadia (pat. Rom 8:3, Galatia
4, 1 Joh. 4:9). Dipasupasu Debata Ama dohot Anak dohot Tondi Parbadia ma hita asa tarbahen hita mangantusi hadirion ni Debata dohot hagogoonNa. Amen.
Sungkunsungkun :
1. Aha do na
tapatuduhon di ngolunta tanda na Debata
do sitompa nasa na
adong?
2. Boasa maol hita manjangkon Jesus i di ngolunta
si ganup ari?
06.
Marende BE No.116
: 1 + 4 “Ditompa
Ho Do Au”
07.
Tangiang Sian Na Ro
08.
Marende BE No.113 : 1 + 4
“Debata Sitolusada”
09.
Tangiang Sian Na Manjabui
10.
Marende BE No. 112 : 1... ”Haleluya Tapuji Ma”
11.
Tangiang Pelean(Agenda)
Pdt. Norima Nainggolan Pendeta HKBP Resort Sei Loba
Tidak ada komentar:
Posting Komentar