MINGGU PALMARUM
02 APRIL
2023
01. Marende BE No. 83:1 + 4
“Na Lao do Birubiru I”
02. Votum: A.VI./B.6 – D.V/24
03. Manjaha Epistel: Markus 11: 1 - 11
04. Marende BE No. 412: 2 – 3 “Ndi Di Dolok
Adui”
05. Jamita: Jesaya
50:4 -9a
PINUJI
MA NA RO DI BAGASAN TUHAN I (DIBERKATILAH YANG DATANG DALAM NAMA TUHAN)
1. Dipungka do turpuk
on marhite hata na mandok: Nunga dilehon tu ahu “dila sisean”. Boasa pola
ingkon dila sisean? Boasa ndang “dila guru”, na malo mangajari? Ai dila sisean do na rade jala
marsitutu laho marsijar, ringgas mulaulaon (kerjakeras), mangolu di bagasan aturan (disiplin),
jala sai dihasiholi ibana do mangalului
parbinotoan, ai sai marnahurang do di rohana
naung niantusan dohot
na binotona, asa marhatauon ibana
laho patupahon na dumenggan di angka ulaonna nang hatana
pe, laho pasabam rohani angka na
loja. Tinggil do nang sipareon ni sahalak sisean laho manangi angka na masa, asa botoonna
aha sipatupaonna, jala songon dia ibana laho mangulahonsa.
Nanidokna ndada holan na manangi songon i, alai adong “keperdulian” (care) tu angka na masa di humaliangna. Ndada paula so
diida, paula so diboto, paula so di bege. I ma tinggil
ni sipareonna na marpanumpak tu “dila
sisean” i.
2. Disurathon si Henri J. M. Nowen do sada legenda na marjudul “The Wounded
Healer (penyembuh yang terluka). Hea do ro si Joshua halak Levi tu si Elia, manungkun songon on: Andigan
do ro Mesias i? Alusni si Elia:” sukun
ma tu Ibana!, antong didia do Ibana?. Tongon hundul do nuaeng Ibana di harbangan ni huta on. Sian dia ma
tandaonku i?. Hundul do Ibana rap dohot
angka na dangol, halak na pinaduru ni halak, na marsitaonon jala na gale. Mesias na digombarhon di Buku na i, i ma
sahalak na manaon na porsuk (sedang
terluka) jalana mangadopi godang parungkilon, rap hundul dohot halak na pogos, na marsitaonon, alai
dibagasan parsitutuon mambaluti jala pamalumhon angka bungang na niaeNa, alai huhut rade do Ibana mangalehon tingkina
manang sadihari Ibana di jou manang ise na mangharinghothon Ibana. Diantusi Ibana
do angka na masa na niae ni torop halak,
ala Ibana pe nunga diae songon na niae ni torop halak (songon na ginombarhonna di legenda i). UlaonNa
do laho mangalehon haluaon dohot
hamalumon, huhut
mangalehon gogo tu halak na marsitaonon jala na gale songon i nang angka na pinasiding ni halak(termarjinalkan).
Diparhatopot Ibana, ingkon Ibana
sandiri do mangubati bugangna sandiri, laos ampe tu ibana do ulaon manang tanggungjawab laho pamalumhon bugang ni
torop halak. Ibana ma na di goar “pangubati
na mabugang” (Penyembuh yang terluka).
3. Songon dia do panandaonta tu Mesias na tapimaima i? Atik boha do panandaonta di Mesias i hira sahalak na
gogo na satongkin i (sekejap mata) boi
pasidunghon saluhut hamaolon na taadopi,
laos mago ma sude arsak nang iluilu?
Marhite turpuk jamita on diurupi
do hita mangantusi laos mangalusi
sukunsuku n i. Ai marhite
figur “hamba, naposo” na
pinatandahon ni si Jesaya pataridahon na masa na niadopanna sandiri.
Digoari do Bindu 50 on, “Ende ni naposo ni Debata”. Adong 5 turpuk di
buku Jesaya na targoar “Ende ni naposo ni Debata”, Bindu
42:1-4; 49:1-6, 50:4-9; 52:13-15;
53:4-7. Digoari turpuk na 5 i ala turpuk i manaringoti sitaonon ni naposo ni Debata
di na mamaritahon hata ni
Debata, na dos dohot sitaonon ni Jesus. Nang na denggan
do diula angka naposo manang sisean i, alai tong do ingkon mangadopi angka hamaolon, haleaon,
insakinsak, dln, hombar tu Hata na binaritahonna i.Parsorion ni naposo
ni Debata di turpuk on, dihatahon marhite marrumang
ende.
4. Diparhatopot panurat
ni turpuk on do paboa, manang songondia pe siatonon na niaena, parungkilon na manosak ngoluna, dihilala ibana sai na
di dongani jala diurupi Debata do
Ibana laho pararathon hatani Debata. Pos ni roha na tongtong di bagasan
roha ni siesan i na mandok: Tuhan Jahowa do mangurupi ahu.......gabe ndang tarurak
jala ndang gabe martabuni. Molo tung
pe ro angka panginsahi tu ibana gabe laos disi do ibana patuduhon diri songon halak na ingkon partudu
hasintogan asa dohot halak na asing i marsaulihon hasintongan i. Dipatuduhon jala dihatindanghon ibana na Debata mangurupi. Molo dung Debata gabe
pangurupina, tahitahi ni angka parjahat pe ndang tulus be tu ibana.
5. Molo pe ibana na
mandok songon halak sisean na sintong di adopan ni Debata, naeng do diboto halak na humaliangna na sintong ibana
marhitehon na benget ibana di bagasan
sitaonon songon si Job na patuduhon
diri sogon na so marsala. Jala molo
adong dituduhon halak tu ibana, ingkon sanggup do nasida patudu bukti na tangkas asa boi dapot botoon (terbukti)hasalaanni sisean i. Ndada pandohan na gabe sada haginjangon ni roha molo pe didok:
...di pajonok ma tu ahu... Alai pandohan i
songon sada sikap ni dirina do paboa
ibana ndang marlaok dosa.
6. Ndada gabe halak pangoloi
sambing molo digoar sisean ni Tuhan i di bagasan
sude situasi alai boi ibana gabe bersikap
oposisi tu na so manghalomohon pangajaran na sian Tuhan i.
I do hataridaan ni pandohan ndang olo sumurut tu pudi molo manghatahon na denggan
jala barani mangadopi angka na masa di portibi on. Lapatanna, sisean ni Debata ingkon barani do mandok; “Ndang” tu nasa na so
hinalomohon ni Debata nangpe ingkon
dipaulik ibana sian sada punguan manang organiassi pe i (berani berkata
tidak). Halak na gabe sisean i Debata ndada halak na sai manghaginjanghon diri alai dibagasan
haporseaonna songon naposo ni Debata ibana patuduhon sikap na denggan,
laos dihatiha i do ibana patudu haserepon dohot pangulaon na dihalomohon
Debata.
7. Pos ni roha ni halak
na porsea dipatuduhon do di ay. 9 na mandok: “sai urupan ni Tuhan Jahowa do ahu” dung i ro ma sungkunsungkun, ise do na
niurupanni Jahowa?
Tontu halak na tongtong mambahen
Debata haporusanna, jala ndada
holan di hata halak na marhaposan tu Debata ibana, alai tarida ma nang di bagasan ngolu siganup ari.
8. Adong ma padohan
na naeng pahebaonta marhite turpuk on:
- Ndang hutabunihon biohingku maradophon
haurahon ni tijur. Unang adong roha gabe sumurut
(kecut dan tawar hati) laho mangulahon na denggan lumobima mamaritahon hata ni
Debata molo pe ingkon adopanta angka
na masa hamaolon na parungkilon. Alai pos niroha ala ni Tuhan i do mandongani hita laho mardalan
jalamangula ganup ari, ndang mabiar, alai
unang gabe pajagojagohon.
- Tuhan Jahowa do mangurupi ahu. Dipartingkian on nunga godang halak na beralih mangido pangurupion ndada be tu
Debata alai nunga lao be tu angka na
gogo na di portibi on na dietong ibana boi magurpi ibana di ragam ni hamaolon i. Nunga lam sumurut be
haporseaon ni torop halak tu hagogoon dohot
huaso ni Debata. Alai anggo sisean manang naposo ni Debata ndada songon
i.
-
Jonok do ibana na mamintori ahu.
Tuhan i ndang dao, jala ala ndang dao ibana
sian hita tongtong ma tapahot haporseaonta. Dia tidak dibatasi oleh waktu dan
tempat. Dia ada di mana-mana dan
kapan saja. Amen.
Sungkunsungkun :
1. Jotjot do hita lupa dipangurupion ni Debata na tu hita. Aha do mambahen i?
2. Tahilala do na jonok Debata tu hita jala tangkas do tapanghilalahon denggan
ni basaNa jala boi dohonon
godang do alasan laho mamuji Debata. Angka dia ma i?
06. Marende BE No. 81: 2 – 3 “Jesus Mual Ni Ngolungku”
07. Tangiang Sian Na Ro
08. Marende BE No. 718: 1 – 2 “Hubege
Jesus Manjou”
09. Tangiang Sian Na Manjabui
10. Marende BE No. 471: 2.. “Hupillit Jesus Tuhanhi” (P.Pelean)
11. Tangiang Penutup (Agenda)
Pdt. Lamhot M.
Simbolon Pendeta HKBP Resort Teluk Pulai Dalam
Tidak ada komentar:
Posting Komentar