Jamita: Jona 2: 1 – 10 MARTANGIANG MARDONGAN MAULIATE MINGGU ROGATE 14 MEI 2023

 

MINGGU ROGATE

14 MEI 2023

 

01.  Marende BE No.416: 1 + 3

02.  Votum: A.X/B.5 – D.VIII/29

03.  Manjaha Epistel: Pilipi 4:1- 7

04.  Marende BENo. 830: 1

05.  Jamita: Jona 2: 1 – 10

MARTANGIANG MARDONGAN MAULIATE (BERDOA DAN MENGUCAP SYUKUR)

Sian bagasan butuha ni dengke ihan raya do panurirang Jona joujou tu Debata di bagasan tangiangna. Boasa boi ibana bongot tu butuha ni ihan raya i? Disuru Debata do ibana tu huta Ninive laho maningtinghon uhum ni Debata mida huta i alani hajahaton na niula ni pangisi ni huta i, mambahen tarrimas Debata. Alai ndada borhat tu Ninive ianggo panurirang Jona, tu huta Tarsis do ibana maporus, didok rohana ndang adong lapatanna paingoton pangisi ni huta i, ulaon na marisuang do i, tumagon ma diuhum Debata nasida. Gabe borhat ma panurirang Jona marparau tu Tarsis, alai tompu so panagaman diparo Debata ma habahaba siapalutus tu laut i, gabe masa ma hagunturon bolon. Mabiar ma sude angka pangisi ni parau i, alai anggo si Jona modom do peak di kapal i. Pola muruk nampuna kapal i, “Aha di ho parpodom na redem ? Hehe ma ho manjou ma ho tu Debatam, anggiat tung marpangulahi roha ni Debata tu hita, asa unang harom hita.” (1:6). Alai ndang marna mansohot habahaba alogo siapalautus i, gabe marsipandohan ma nasida: “Tole marhopok ma hita (Marilah kita buang undi) asa itaboto manang ala ni ise umbahen na ro parmaraan on tu hita.” Jadi marhopuk ma nasida, gabe hona si Jona. Holan didihindat nasida si Jona jala direongkon ibana tu laut i, so ma laut i sian gunsangna. Diparo Debata ma sada ihan raya asa dibondut si Jona, ido umbahen na di bagasan butuha ni ihan raya si Jona jala di butuha ni ihan raya i ma ibana tolu ari tolu borngin, jala sian ima ibana joujou songon na didok di ayat 1 turpuk on.

Di bagasan inganan na holom (butuha ni parbeguon didok di ayat 3) diingot panurirang Jona martangiang tu Debata. Dirajumi rohana do molo na tongtong do parasiroha jala pardengganbasa Debata. Dirajumi rohana do molo Debata

sitangihon tangiang jala alusanNa do joujou nang anggukanggukna. Nang pe sian inganan na holom, holang sian angka dongan jala dao sian bagas joro ni Debata, alai dirajumi rohana do molo ndang gabe tarambat tangiangna nang soaraNa tu Debata. Ndang haambatan ni manang aha pe soara na joujou tu Debata, nang pe di inganan na soding manang na buni, alai tangihonon ni Debata do soara ni na joujou tu Ibana. Laos on ma nang na gabe sipaingot di hita, manang didia pe hita jala manang aha pe na masa di bagasan parngoluonta, na rade do Debata manangihon joujounta (tangiangta). Asa ndada holan di inganan na tertentu hita boi manjou Debata, manang didia pe hita, di huta nang di balian, di inganan na ribur nang di inganan na lungun, di bagasan roha na magopu nang roha na las, tongtong do tangi Debata di joujounta.

Taida nang sian tangiang ni panurirang Jona on, molo rimas ni Debata na pola mambahen panurirang Jona dibondut dengke, mambahen ibana marhamubaon ni roha. Hamaolon na diadopi ibana, gabe paubahon rohana na sanga mandao sian Debata, pola didok ibana di ayat 5 “Nunga bali ahu sian jolo ni mataM; alai tahe ulahanhu dope mamereng dompak joro habadiaonMi”. Ditanda ibana dirina naung mardosa di adopan ni Debata, jala dirajumi rohana do na so patut ibana manjalo asi ni roha ni Debata. Molo tung pe ingkon manaon ibana alani naung sumurut ibana sian adopan ni Debata, alai ndang gabe disalahon ibana Debata alai justru disolsoli ibana do rohana naung manulak panjouon dohot parsuruon ni Debata tu ibana. Asa molo tung pe sipata taadopi angka hamaolon di bagasan ngolu on amang, inang, unang pintor mura-mura hita mandele jala manudu Debata mambahen na so patut tu hita. Na boi do angka hamaolon i paingothon hita asa lam jumonok tu Debata, manait hita asa unang lam dao sian adopan ni Debata.

Mananda diri di angka hahurangan mansai ringkot do i di na ro hita mandapothon Debata pasahathon pangidoanta tu Ibana. Di na matangiang hita, ndada holan na pajojorhon angka sipangidoonta, alai taingot angka jolma pardosa do hita na patut sirimasan ni Debata. Holan alani asi ni roha ni Debata nama na mambahen hita mangolu sahat ro di tingki on. Nunga ingkon di bagasan butuha ni parbeguaon ala naung disampakkon hita hinorhon ni dosa na taula. Alai mauliate ma tadok tu Debata na paluahon hita sian nasa ragam ni angka parmaraan. Asa, molo martangiang pe hita tu Debata taingot huhut mandok mauliate, unang lupahon denggan ni basaNa sudena naung paluahon hosam sian hamagoan, naung

manarihon ngolum, ngolu partondion nang ngolu pardagingon, naung mangaramoti ho sian ragam ni angka parmaraan. Tadok ma songon na nidok ni panurirang Jona on di ayat 10 “Alai anggo ahu mardongan soara pujipujian ahu mamele Ho, gararonhu do na huparbagabaga. Jahowa do nampuna hatuaon”. Nang di rura hamateon di butuha ni ihan raya si Jona alai tongtong diingot mandok mauliate jala mamujimuji Debata. Boha do ia hita? Amen.

Sungkunsungkun :

1.      Molo masa angka hamaolon/sitaonon tu bagasan ngolunta aha do na pintor ro tu bagasan pingkiranta, jala aha ma tindakan na pintor taulahon !

2.      Di tingki sadihari do hita jotjot martangiang, aha do na gumodang tadok di bagasan tangiangta, mandok mauliate do manang angka pangidoan ?

06.  Marende BE No. 814: 1 + 3 “Sai Ajari Au Tuhanhu”

07.  Tangiang Sian Na Ro

08.  Marende BE No. 788: 1 + 3 “Las Ma Rohamu Manghirim”

09.  Tangiang Sian Na Manjabui

10.  Marende BE No. 115: 1... “Tuhan Debata” (P.Pelean)

11.  Tangiang Panutup (Agenda)

 

Pdt. Natalina Nababan, S. Si Pendeta HKBP Resort Kisaran II