Jamita Epistel tu Partangiangan Minggu Invocavit " Roma 5:12-17, 26 Februari 2023

 

MINGGU INVOCAVIT

26 Februari 2023

01.  Marende BE. No. 273:1-2 “Jesus Tuhanku raja I Ma Au”

02.  Tangiang Pamuhai

03.  Votum: A.VI/B1-DV/19

04.  Manjaha Turpuk : 2 Musa 33:15-23

05.  Marende BE. No. 129:1-2 “Huhalashon huringkoti”

06.  Jamita: Rom 5: 12 - 17

 

ASI NI ROHA NI DEBATA DI BAGASAN JESUS KRISTUS (KASIH KARUNIA ALLAH DI DALAM YESUS KRISTUS)

Huria ni Tuhanta Jesus Kristus!

Taboto do, parbue ni dosa do hamatean, jala parbue ni haporseaon do hatigoran, hasintongan dohot lan na uli. Molo dosa do na manggonggomi, mantat hamatean ma ngolunta, baliksa, molo asi ni roha do na manggonggomi ngolunta manghorhon hangoluan na saleleng ni lelengna ma.

Marhite Adam na parjolo i, bongot ma dosa tu portibi on, gabe dihorhon i do uhuman, gabe panean do hita dipangalaho dosa (kecenderungan berbuat dosa, tabiat berdosa), alai dung ro patik i lam hantus ma dingolunta, dia sipasidingon dia siulaon. Gabe sorminan ma patik i laho mamereng dia poda siihuthononhon. Patik na gabe sipatudu dalan hatigoran, asa unang surduk be iba tu dosa i. Sai maos ma iba mamereng patik i, mamereng sorminan i, asa unang madabu iba, alai asa hot iba mardalan dihatigoran. Alai, ingkon na parjolo do iba hape dihatigoran, i pe asa marlapatan patik i di iba.

Marhite Jesus, diasii Debata ngolunta na mardosa i, tuk ma hita bongot tu haluaon ala basabasaNa na pataluphon (dilayakkan, dibenarkan/Sola Gratia) hita diadopanNa. Marhite hamamateNi Jesus sahat tu haheheon nang hananaekNa tu banua ginjang, talu hamatean, talu sibolis. Laos ma na gabe panindangionta, mangolu hita dihasintonganNi holongNa, gabe sangkanbona hita dohot Jesus i. Parbue ni ngolu nanung sangkanbona dohot Jesus, i ma “habadiaon”. Tangkas ma taparrohaon, ndang sian parulanta “habadiaon” i, ndang prestasi ni jolma i, alai ala naung sangkanbona hita dohot Ibana, gabe partigor hita dirajumi, ala ni i do gabe ihut habadiaon i.

Marhite asi ni roha ni Jesus i, gabe dipauba ma sandok dirinta, gabe ditransformasi gabe tu habadiaon. Pembenaran Allah, menguduskan kita. Alani, ndang parulanni jolma i mambahen habadiaon, tung ala diparbadia i Debata do hita.

Adong ma sahalak parpahanpahanan ulok, na metmet nang nab alga dipahani ibana dijabuna. Di sada tingki tubu ma tu rohana manggadis jabu i, jala hatop do antong tarsar barita i, tongon muse ditopi dalan kudi (jalan raya) bagas i. Torop do na marsiadu manuhor jabui, dohot sada siarat, adong ma nian tong dipajongjong balebale na metmet dipudi jabu i ingananni angka ulaok na i. Targoar do torop na marhagiot manuhor jabui, alai sada pe ndang adong na olo manuhor jabu i ala ingkon sajabu dohot ragam ulok.

Tuhanta Jesus pe songon i do, ndang olo mian di angka parrohaon na sai girgir mangulahon dosa.

 

Sungkunsungkun :

1.    Marsala do hita mangihuthon si Adam na parjoloi, tarjalo rohanta do i?, hape nunga tibu masa pola marribu taon na salpu, adong dope hadomuanna tu jolma si nuaeng?

2.    Adam na parjolo i manghorhon tu uhuman, Jesus ro portibion paluahon sian uhuman, diama sipillitonMu?

07.  Marende BE. No. 715:1 “Balga Do Holongmi”

08.  Tangiang sian ruas na ro

09.  Marende BE.No. 678: 1+3 “Pauba Roham Tu Jahowa”

10.  Tangiang sian na manjabui

11.  Marende BE. No. 190: 1- “Las Rohangku Situtu” (P.Pelean)

12.  Tangiang Pelean-Ale Amanami-Pasupasu- Amen (3x) HKBP

 

 

Pdt. Rudi M. Simaremare, S. Th Pendeta HKBP Resort Aek Kanopan