Jamita: 1 Samuel 10: 6 - 10 JANGKON MA TONDI PORBADIA MINGGU PENTAKOSTA I 28 MEI 2023

 

MINGGU PENTAKOSTA I

28 MEI 2023

01.  Marende BE No. 102: 1 + 3 “O Tondi Porbadia I Bongoti”

02.  Votum: A.XIII.A- D.XI.33

03.  Manjaha Epistel: Johannes 20: 19 - 23

04.  Marende BE No. 826: 1 – 2 “Gohi Au Tuhan”

05.  Jamita: 1 Samuel 10: 6 - 10

JANGKON MA TONDI PORBADIA (TERIMALAH ROH KUDUS)

Huria ni Tuhanta, Pesta na balga do Ari Parningotan Hasasaor ni Tondi Porbadia di hita halak Kristen, ido umbahen na pola dipestahon dua ari padodot. Didok pesta na balga, ala di rajumi Ari Hasasaor ni Tondi Porbadia do na gabe Ulang Tahun ni hurianta HKBP, jala ido songon mula ni parsaoran ni angka na porsea. Jala dung songgop pe Tondi Porbadia asa borhat angka sisean i mamaritahon barita nauli, hombar tu parenta ni Tuhan Jesus. Haradeon/habaranion nasida mangulahon tona ni Jesus, marsending ido tanda ni naung songgop Tondi Porbadia tu nasida.

Angka dongan na hinaholongan ni Tuhanta Jesus Kristus, hombar tusi, sude do nang halak Kristen dapotan parsuruan sian Tuhan i, hombar tu silehonlehon na jinalona be, jala sipertanggungjawabhononna tu Debata. Di na disuru Debata hita mangaradoti ulaonta i, dibagabagahon do tu hita pandonganionNa, dibohali jala dilehon gogo tu hita mangula ulaon na tajalo i. Gariada dilehon do Tondi Porbadia tu hita laho margogoihon hita mangulahon parsuruonNa i. Laos songoni do turpukta sadarion na patoranghon taringot si Saul na nimiahan ni Debatamarhite si Samuel. Si Saul pe dimulana i jolma na biasa do ibana songon hita, anakkon ni si Kish sian suku Benyamin. Poso do pe ibana hatiha i jala na borhat do laho mangalului halode ni natorasna na mago (10:14). Jala dang hea tarpikir ni si Saul dohot natorasna na gabe diangkat jala dipillit Debata ibana gabe sada raja, bahkan si Samuel sandiri dang diboto paboa si Saul na dipillit Debata gabe panggomgomi ni bangso Israel. Sifat ni si Saul dihatiha i holan bergantung tu natorasna do, adong do mandok ibana sahalak parila/pemalu (1 Sam 10:22, Saul bersembunyi), adong muse mandok ibana parbiar/penakut (9:5), alai dung dimiahi Debata ibana, saluhutna do gabe berubah. Tangkas didok di ay.6, muba gabe jolma na asing, lapatanna karakter, sifat, manang pangalaho ni ibana berubah drastic sian pangalahona hian andorang so dimiahi jala dipillit. Jala angka naung tumanda si Saul na sailaon pe (ay. 11) gabe heran do marnida perubahan i, siala gabe tudos tu

panurirang do pangalahona dung dimiahi. Jala ido na gabe tugas ni ibana dung dipillit gabe sahalak panurirang, ima menyuarahon suara ni Debata tu angka bangsoNa. Dihatiha i, Saul benar benar dipauba marhite huaso ni Tondi Porbadia, gabe mampu do ibana manurirangi, mansuarahon suara hapanurirangon, laos perubahan sisongon i do na pinangido ni turpuk on tu hita saluhutna. Songon na nidok ni hata ni Debata di Rom. 12:2, ima ‘asa unang sarombang hita dohot portibion, alai gabe imbaru ma hita, na tau manimbangi lomo ni roha ni Debata’. Siala uju tardidi hita ganup talapati do i nunga diurasi hita gabe jolma na imbaru laho mamboan haimbaruon, jala tarjou do hita manghangoluhon hamalimon na raja (1 Petrus 2: 9). Halak naung manjanghon Tondi Porbadia i do na margogo mangulahon parbue ni Tondi.

Angka dongan na hinaholongan, aha do naeng dohonon ni turpuk on tu hita? Sude do hita tarjou na gabe pemimpin, baik mai pemimpin di tonga-tonga ni keluarga, di tonga-tonga ni huria, di angka punguan/arisan, di kantor, di perusahaan, di masyarakat, nang panggomgomi di ulaon na marragam i. Sialani i mansai ringkot asa tajangkon Tondi i mangolu jala mangula di tonga-tonga ni parngoluon dohot kepemimpinanta. Siala ganup jolma na mangasahon Tondi i dingoluna dibohali, didongani jala dipargogoi Debata do ibana mangulahon saluhut ulaonna. Asa boi hita nang marsiajar sian kepemimpinan ni si Saul, dimulanai pemimpin na mangasahonTondi i do ibana, jala didongani, dibohali Debata do ibana. Alai diujung ni kepemimpinanna gagal do ibana songon sada raja ala dang unduk be tu Debata, gabe ditinggalhon Tondi ni Jahowa do si Saul, gabe dang waras be ibana marpingkir. Alani na ingkon Tondi niJahowa do na manogunogu nang angka kepemimpinanta ganup asa berhasil mangula angka ulaonta. Ala godang do angka pemimpin na gagal di tingki on ala holan mangasahon pingkiranna nang rohana sambing. Diujungna gabe mongkus di hepeng nang jabatan, na so satia, na so bertanggungjawab di ulaon, na otoriter, na so parduli di angka na niuluhononna dohot angka lan na asing.

Angka na manjangkon Tondi Porbadia i di ngoluna ido na gabe mamboan haimbaruon, manang na pauba roha, pingkiran nang parngoluonna. Siala Tondi i do na patauhon hita, memampuhon hita mangantusi dohot mangulahon angka na hombar tu lomo ni rohaNa. Tondi Porbadia do na patauhon hita unduk tu Debata di bagasan serep ni roha. Tondi Porbadia do na patubuhon habaranion di hita mangulahon hasintongan jala mangalo hajahaton. Tondi Porbadia do namanogunogu roha nang pingkiranta gabe margogo hita mangulahon angka na denggan na mampanghorhon pasupasu di ngolunta. Tondi porbadia do na patauhon hita mangulahon lobi sian na patut taula, lobi sian na tapingkiri dohot lobi sian kemampuanta. Tondi Porbadia do na patauhon hita pasahathon hata ni Debata

nang pe godang tantangan na taadopi. Alani tajangkon ma Tondi Porbadia i dingolunta asa Ibana margogoihon, mamasumasu, dohot mangarajai saluhut ngolunta dohot angka ulaonta. Amen.

Sungkunsungkun :

1.    Songon dia ma Pangalaho manang hataridaan ni jolma naung nigohan ni Tondi Porbadia?

2.    Songon dia do tandatanda ni jolma na ginohan ni Tondi Porbadia? Na ingkon boi do berbahasa Roh songon pandapot ni piga-piga halak na mandok, boasa di Huria X boi nasida berbahasa Roh jala idaon sai hira na ro do tu nasida songgop Tondi i dohot berbahasa asing, sedangkan di HKBP so adong hea masa sisongon i? Boha pangantusionta taringot tu pangantusion sisongon i?

6.  Marende BE No. 464: 2 – 3 “Huboan Ma Diringku”

7.  Tangiang Sian na Ro

8.  Marende BE No. 462: 1+ 3 “Ale Tondi Porbadia”

9.  Tangiang Sian na Manjabui

10.  Marende BE No.461: 1... “Songgop Tu Hami” (Papungu Pelean)

11.  Tangiang Panutup (Agenda)

 

Pdt. Marudur Nita Sirait, S.Th Pendeta HKBP Resort Sukarame