JAMITA EVANGELIUM LUKAS 24:44-53 GABE SINTINDANGI NI KRISTUS

 

GABE SITINDANGI NI KRISTUS

Luk.24:44- 53

Hananaek ni Tuhan Jesus mangondolhon dua hal na ingkon taauhon jala tahangoluhon dipardalanan ni ngolunta songon siihuthon Kristus hita , ima, parjolo: hehe do Ibana sian hamatean jala manaek tu surgo napaduahon : Gabe sitindangi ni Kristus ma hita. Dung hehe Tuhan Jesus, pola dope 40 ari Ibana di hasiangan on pataridahon diriNa tu angka siseanNa (Ul. 1:3) dohot pataridahon diriNa tu lobi 500 halak angka na torop (1 Kor 15:6 ), holan 10 hali nari nama rap Ibana dohot angka siseanNa i. Jala ari hahihinsatNa on ma parpudi rap Jesus dohot nasida. hamamate dohot haheheonNa i; na patulushon sangkap hatuaon ni Debata na taringot tu haluaon ni hajolmaon. Dung i  di hananaekNa i dihatindanghon ma tu hita, na laos Ibana naung ro jala manaon i, na mate jala na hehe i do na manaek i.

Maol do siat tu roha ni jolma Hamamate, dohot haheheon nang hahihinsat ni Jesus i tu banua ginjang Tagan so hamamasana, nunga jotjot dipaboa Jesus na ingkon manaon do ibana jala mate, dung i mulak mangolu di ari patoluhon. Dipatorang do huhut, na hombar do i tu tahi ni Debata, songon naung binagabagahonNa hian. Alai ndang tarjalo sisean i noni ndang dihaporseai. Dung pe masa asa dihaporseai. Di turpuk on, ditaiti Tuhan i ma rohanasida tu naung hinatahonNa tagan so hamamateNa dope, didok: “On ma hatangKu na Huhatahon tu hamu uju rap dope Ahu dohot hamu.” Marhite i hira na naeng dohononNa do tu siseanNa i: “Hamamate dohot haheheonHu naung niidamuna, hasasaut ni boaboangKu na tu hamu i do i tagan so mate dope Ahu.” Ia dihatai Jesus pe hamamate dohot haheheonNa andorang di ngoluna, ndada na sian roharohaNa i, alai na sian tahi ni Debata do i songon na naung binagabagahonNa hian di Surat ni panurirang i nang di buku psalmen Dibuhai Jesus ma roha ni siseanNa i mangantusi na tarsurat i, didok: “Songon i do tarsurat hian, manaon na porsuk do Kristus i jala hehe sian na mate di ari patoluhon.” Hombar tusi, dison, dipabangkit Jesus ma sisean i gabe sitindangiNa, didok: “Hamu do manghatindanghonsa.”

 Gabe Sitindangi ni Kristus  Jesus Kristus do pamusatan ni Barita na Uli i. Ibana do sihatindanghononhon. Manang ise na porsea di Ibana na marhataridaan di hamubaon ni rohana, jumpangan ma i di hasesaan ni dosa dohot haluaon. Ulaon panindangion i ingkon pungkaon nasida ma i sian Jerusalem, dung i tu Judea, tu Samaria dohot tu ujung ni tano on (pat.Ul.1:8b). Bahen hasasaut ni sangkap parsuruon i didok Jesus tu sisean i: “SuruonHu ma songgop tu hamu na pinarbagabaga ni Damang.” Tondi Porbadia i do na nidokNa disi. Taringot tu haroro ni Tondi Porbadia i pe naung diparbagabaga Debata hian do i di Padan na Robi. “SuruonHu,” ninna. Marhite pandohan i dipungka Jesus paradehon sisean i tu parsirangan na naeng masa satongkin nari. Manaek ma Ibana tu banua ginjang, tu inganan ni Debata, jala sian i ma Ibana marsuru Tondi Porbadia, hagogoon na sian ginjang i. Na gabe gogo do Tondi Porbadia i di sisean i laho manghatindanghon Barita na Uli i. Marhite Tondi Porbadi i, lam togu ma nasida marhaporseaon, lam tomos rohana gabe ndang mabiar manghatindanghon Barita na Uli i. So marhite Tondi Porbadia i ndang margogo nasida. Jamitanasida pe songon i, so marhite Tondi Porbadia i ndang tagamon margogo. Ala ni i ingkon mian nasida di Jerusalem, ndang jadi morot sian huta i, lapatanna ndang jadi pungkaonna manindangi so jolo dijalo hagogoon na sian ginjang i. Sian i, ditogihon Tuhan i nasida ruar jala mardalan dompak Betania Dung i, di sada inganan di dalan i, dipaherbang ma tanganNa mamasumasu sisean i. Jala di tingki na mamasumasu i sirang ma Ibana sian nasida jala tarhindat tu ginjang. Diantusi sisean i do na so tu dia Tuhan i, ndang na mago, alai na manaek tu banua ginjang do, tu ingananNa marhabangsa, marhasangapon dohot Debata AmaNa. Ala ni i, disomba nasida ma Ibana. Dung i mulak ma nasida tu Jerusalem. Ndang marsak nasida ala ni parsirangan i, gabe marlas ni roha situtu ma nasida. Dung i tongtong ma nasida di joro i mamujimuji Debata.

Manaek do Ibana sian adopan ni sisean i, manaek tu surgo, tu inganan ni Debata. Na marlapatan ma i, ulaon haluaon na pinatupaNa i di tano on ndang marujung di portibi on. Aut holan ro Ibana, manaon jala mate dung i hehe alai ndang manaek tu surgo, gantung do haluaonta i, ndang sahat tu hasahatanna. Disi, marlaku ma hata ni si Paulus na mandok: “Anggo holan di tano on hita manghirim di Kristus i, jolma na dumangol do hita sian saluhutna” (1 Kor.15:19).

Songon halak angka na manghirim jala na maimaima disi, ndang boi hita holan na so huhut manatapi dompak langit, adong do na ingkon patupaonta. Marojahan di turpuk di pestanta ari on, adong do manang na piga tona ni hananaek i na ingkon parateatehonon jala ulahononta, i ma:

Parjolo, marsomba tu Jesus naung manaek i

Paduahon, marlas ni roha ala ni Jesus na manaek i.

Patoluhon, pasangaphon Debata. Sahat di Jerusalem

Paopathon, manghatindanghon goarNa, Marbarita na uli

Palimahon Mamuhai roha nang pingkiranta, Manjangkon Tondi Parbadia

Paonomhon, Marhamubaon ni roha jala tajangkon ma pasu pasuNai

 

Jamita on manogihon hita do tu panogunoguon ni Tuhan Jesus di tanggungjawab hakristenon. Marhite i lam tangkas ma botoon ia haheheon dohot hananaek ni Tuhan Jesus i ima patuduhon hamonanganNa maralohon sumbia ni hamatean i. Hamonangan ni Jesus i do hamonangan ni angka na porsea. Jala holan dibagasan panjaloonta di Tondi Porbadia do boi tangkas botoonta jala tandaonta hamonangan ni Jesus i gabe hamonanganta. Halak naung manjalo Tondi Porbadia i do na gabe sitindangi ni Kristus. Na tarjou do hita gabe sitindangiNa, Marlas ni roha ma hita manghatindangkon Barita na Uli ni Kristus i, ala naung tajalo pasupasu ni Tuhanta i. Amen.

Pdt Budianto Sianturi

Pandita HKBP Resort Kisaran