Jamita Evangelium Markus 7:17-23 DIBOTO DEBATA DO NA DI ROHAM

DIBOTO DEBATA DO NA DI ROHAM

MARKUS 7:17-23

 

Huria ni Tuhanta na hinaholongan di bagasan Kristus Jesus, tutu ndang adong na buni jala holip di adopan ni Debata. Tangkas do jala patar do hita di Debata. Molo tung pea dong pandohan na mandok “birong ni obuk ni jolma, alai ndang adong na boi tung ise na mandodo roha ni jolma i” (Jeremia 17:9). Alai molo di Debata tung tangkas situtu do i botoon. Umbahen i, ndang adong na boi sigabusanta di Debata na dibagasan rohanta. Molo tung pe deba angka jolma boi dibahen ibana hata tundal ala ni roharohana alai tu Debata ndang boi saut ulahononna na songon i ala diboto Debata do na di rohanta.

Barita na uli Markus paboahan tu hita barita pangulahonon ni Tuhan Jesus na ditingki i ro manopot Ibana dohot siseanNa di Galilea. Tung mansai dao do angka Parise dohot deba sian angka siboto surat ro nasida dipardalananna manopot Tuhan Jesus tu Galilea. Molo dao ni pardalanan i hita 150 km do. Molo tutu di roha nasida naeng marsiajar jala masihol naeng pajumpang dohot Jesus, tung sipujion di angka sangkap ni roha nasida marnida dao ni pardalanan nasida. Alai molo ro nasida holan na mamatamatai dohot mangunjuni Tuhan Jesus pargasipan ma i di nasida. Haroro ni nasida tu Jesus tangkas diboto Jesus taringot parrohaon nasida ima na naeng patuduhon diri na tumimbo do nasida (songon rabi) sian angka rabi. Alani i jotjot do nasida patupahon perkunjungan jala marsuru inkuisitor (pemeriksa keabsahan suatu ajaran agama). Jala on do diulahon nasida tu Jesus dohot tu angka siseanNa umbahen dihatahon nasida taringot tu adat manang hasomalan di nasida na so diulahon angka siseanNa.

Dipasahat angka Parise dohot deba siboto surat i do hata songon paminsangon tu sisean ni Tuhan Jesus ala so diulahon nasida adat manang hasomalan di nasida songon halak Jahudi. Alai dipinsang Jesus do nasida di hata nasida i ala umringkot do nasida di nasa hasomalan di pangulahonon sian hasomalan siala patik ni Debata. Boi dohonon on ma kondisi na mandok “lupa na rumingkot binahen na ringkot”. Boi do gabe hombar tu roha nasida angka sibahenon na songon hasomalan ala ni patik i, hape na ingkon hombar tu lomo ni roha ni Debata do siulahonon nasa hasomalan na marojahan sian patik. Umbahen ido dipinsang Jesus nasida ala ni pandohan nasida i.

Turpuk on mamaritahon tu hita di nasa pangajarion Tuhan Jesus dohot SiseanNa ala ni sungkunsungkun nasida. Ndang mangarti jala ndang dapot roha nasida nasa hata na ruar sian Tuhan Jesus. Naeng dohonon disi, tung mansai leleng nasida naung rap dohot Tuhan Jesus alai ndang diboto nasida roha ni Tuhan Jesus marhite hata na ruar sian Ibana. Dung i dipatorang Tuhan Jesus taringot parohaon ni jolma i tu siseanNa. Molo angka hasomalan na pinatuduhon marhite na bongot tu pamatang, ndang mambahen ramun jolma i. Molo na bongot tu pamatang i (sipanganon) tu butuha do i laho, dung i bolong do i muse di inganan na soding, asa gabe ias do saluhutna sipanganon i. Alai na ruar sian jolma i, i do mangaramuni ibana.

Na ruar sian jolma i marharoroan sian rohana, ido na boi mambahen ramun jolma i. Sian roha i do parange dohot pangulahon ni jolma i. Adong pandohan na mandok “Pikiran memberikan suatu pertimbangan tetapi hati membuat suatu keputusan” lapatanna tung songon dia pe na dibagasan pikiran ni jolma i na boi do sundatanna i laho ulahononna ala sesuatu hal, alai molo roha i, ingkon ulahononna do songon na dirohana. Umbahen i do tarida do hadirion ni sasahalak sian rohana. Di paboa Tuhan Jesus do tu angka siseanNa 13 angka ulaon na jat di hadirion ni jolma na marharoroan sian angka roha ni jolma i. Roha sian hata kardia na marlapatan sentris manang pusat batin ni jolma. Jala ulaonna i hombar tu rohana ndang tartulaksa anggo i. Jala 13 ulaon na jat i ma na mambahen ramun jolma i.

Huria ni Tuhanta nahinaholongan di bagasan Kristus Jesus, diboto Debata do na di roham. Debata do na manompa angka jolma i umbahen tangkas do diboto panompa i rohanta (Rom. 8:27a). Dia ma roha na ingkon sipamanat angka na porsea i? Tung dipaholang angka na porsea i do angka pingkiran na jahat, parmainanon, panangkoon, pamunuon, pangalangkupon, pangahution, hajahaton, pangansion, pargadombuson, panorgangon, panginsahion, ginjang dohot neang ni roha (Mrk 7:21-22). Jala tangkas do diboto angka na porsea i parrohaon na hinalomohon ni Debata jala pasidinghon angka ulahon hajahaton, “Roha na patubutubu gasa; pat angka na bontis marlojong tu hajahaton (Ams 6:18).

Ndang adong na buni diadopan ni Debata. Didok do i di panindangion ni Ende ni Hurianta na mandok “Debata do umbotosa ro di angka bilanganna, ndang adong agia sada na buni di Debata” (BE. 780), nang pe au lao tu na buni, tong do diboto rohangki (BE. 495). Diboto Debata do na di roham. Jagahon ma roham di nasa ulaon na denggan dohot sangkapsangkap nauli hombar na hinalomohon ni Debata. Unang gabe targasip hita ala roharohanta, diboto Debata do saluhutna. “Jangan berdua wajah” patar ma idaon hatigoran di bagasan hadirion angka na porsea i songon halak na tau marroha hasintongan dohot hatigoran. Amen

 

Panurat Jamita

Pdt. Albert J. P. Pasaribu, STh

(Pendeta Fungsional HKBP Kisaran Kota)