NASA NA MARHOSA MEMUJI DEBATA Psalmen 150:1-6

 

NASA NA MARHOSA MEMUJI DEBATA

Psalmen 150:1-6

Hasomalan doi,  molo tapuji sasahalak jolma  ala taboto do sude angka pambahenanna  mansai uli. Tudos jala andul lumobi sian i do  do na mamuji Debata. Tapuji Ibana ala mansai uli jala denggan luhut na tinompaNa. Lomo roha marnida sude jadijadianNai. Ngolu ni halak Kristen Batak ima ngolu na marende. Ia Parendeoni  i  paulak hosa loja, patorang pingkiran, patamba bisuk laho mangantusi ragam ni angka na masa. Molo masa hasusaan pintor marende do. Songon i nang molo masa las ni roha pintor marende do . Ingkon songoni do ngolu ni Halak Kristen i Mamuji jala mangendehon denggan basa ni Debata, ia pamujioni  ndada holan di hata alai ingkon sian nasa roha do. Alani mamuji Debata dipatuduhonido hadomuanta dohot Ibana. 

Psalmen 150 on ima jou jou mamuji Tuhan i. Disungguli par-Psalmen on do hita laho mamuji Tuhan i di inganan habadiaonna i dohot di sude inganan nang partingkian. Mamuji Debata di bagasan habadiaonNa (kados-sanctuary-kudus). Na badia do Debata, patut ingkon di bagasan habadiaon angka na mamuji Ibana (pat. 3 Musa 19:2). Ndang tarbahen jolma i mamuji Debata sian hadirionna. Ai ndang dihalomohon Debata angka na mamuji Ibana, angka na mangolu di bagasan haramunon, angka na mangulahon hajahaton, na mambuat pangomoan na so turut, na  manindos halak na metmet. Mamuji Debata di hajanghajang ni hagogoonNa (firmament of his power-cakrawala yang kuat), na manggombarhon hagogoonNa na so tarasam i, na so tarrumpakhon hagogoon ni portibion. Psalmen on paingothon hita, ia ngolu on i ma ombas laho mamuji Tuhan i. Soara, panghataion, ulaon dohot sude panggulmiton ni ngolunta pangkeonta mai laho mamuji Tuhan i.  Mamuji Tuhan i, i ma parbue ni panandaon ni Jolmai tu Debata paboa Debata do silehon ngolu, Debata do mangaramoti, Debata do mangurupi hita di sude panggulmiton ni ngolunta

Songon dia do hita mamuji Debata? Mamuji Debata ndada holan marhite soara alai dohot do angka uninguningan rap mangendehon habalgaon ni Debata. Dia ma goar ni uninguningan i? Sarune, arbab, hasapi, sordam, tali sajak, ogung panggora, ogung panonggahi. I ma na somal dipangke mangendehon hasangapon ni Debata. Tapuji Ibana ala pambahenanNa na manarihon dohot mangaramoti ngolunta. Marhite i diigil do sian tongatonga ni huria mamuji Debata mamangke nasa uninguningan (alat musik) laho mamuji goarNa. Ai sian Ibana do haroroan ni saluhutna i laho pasangaphon goarNa .Uninguningan ni halak Batak mansai ringkot do i pangkeon di tongatonga ni huria i laho mamuji dohot pasangaphon Debata. Na ringkot asal ma unang mardongan hasipelebeguon. Alat na pinangke ni jolma i laho pasonang jolma i, laos ido alat pangkeon ni jolma i laho pasangap Tuhan i. Ingkon patuduhononta  do parsitutuonta mamuji Jahowa. Didok pujionku ma Jahowa sian nasa roha, Pandohan on patuduhon asa sian nasa roha hita mamuji Ibana, Asa ingkon saurdot do pamujion na ruar sian pamangan dohot pambahenan manang parniulaan siganup ari. Ndada sae holan di hata alai ingkon unduk marsomba dohot mangoloi parenta na sian Tuhan i. Pamujiaon na marsitutu jala na haruar sian ungkap ni roha.

Hata “haleluya” marharoroan sian dua hata Heber ima: Hallelu-yah, hallel namarlapatan pujima, jala “yah” ima hapendehan ni sian hata Yahwe, jadi halleluyah namarlapatan pujima Jahowa. Pamujion tu Debata ala ni habadiaonNa, hasangaponNa dohot hagogoonNa. On do alasan na pinasahat ni parpsalmen tu saluhut namarhosa na adong di portibion. Molo tarajumi jala tarimangido do habadiaon dahot hagogoon ni Tuhan i, tontu sahali patut ma hita mamuji  jala marsomba pasangap goarna nabadia i.

Pamujion tu Tuhan i ndang diolati holan di sada ruangan manang holan dibagasan parpunguan, alai ingkon disaluhut gulmit ni parngoluan ni nasa na marhosa ingkon mamuji pasangap Tuhan i. ima dalanta marnida habalgaon dohot hagogoon ni Debata,. Tangkas ingkon ingotonta do, ia ende pamujion i, ima; ungkapan pengakuan ni haporseaonta di Tuhan i. Dibahen i marhite sosososo ni hata ni Tuhanta di turpuk on manangkas ma pamujionta mangadop holan tu adopan ni Tuhan i,  unang tagulut jambar ni Tuhan i, ai holan ibana do na patut pujion ni nasa na marhosa diportibion.  Ende pamujion i ima na marharoroan sian panandaion di sude pambahenan ni Debata dao roha nang pingkiran nanaeng pasangap hadirion ni hajolmaon alai holan pasangap Debata ma  “Nasa namarhosa mamuji Debata” namarlapatan sude angka namarhosa dohot sude na tinompa ni Debata jala  saleleng hita marhosa manang mangolu ingkon pujionta do Debata

Di Minggu Kantate on dipaingot do hurianta asa tangkas nasa na marhosa mamuji Debata; ndada holan asal marende, markoor, mamuji Debata, alai ingkon dohot do paubahon roha, ima ende naimbaru , alai tung mansai na ringkot situtu do hatauon dohot pahehe ngolu parendeon i di tongatonga ni hurianta. Alani i  dipangido Debata do sian hita asa mamuji Ibana di bagasan habadiaonNa i, huria na maratur jala marruhut na denggan laho manogunogu ruas ni huria asa mangolu di bagasan habadiaon na sintong. Alani ringkot huria pataridahon parsitutuonna laho pauliulihon parendeon di tongatonga ni huria asa hombar tu lomo ni roha ni Debata. Kantate Endehon hamu ma di Jahowa Ende na imbaru  Amen.      

 

 

Pdt Budianto Sianturi

 

Pdt HKBP Resort Kisaran