Jamita : LUKAS 14 : 25 – 33 “NARADE SUMEAHON DIRI, I DO NAPATUT SISEAN NI JESUS”

 

Minggu XII DUNG TRINITATIS

04 SEPTEMBER 2022

No	Partangiangan Keluarga	Partangiangan Sektor / Wijk / Lunggu
1	Marende BE. No. 112 : 1 + 4 “Haleluya, Tapuji Ma”
2	Tangiang Pamuhai	Votum : A.XV.A.16 – D.XIII.47
3	Manjaha Turpuk : PSALMEN 139 : 1 – 6
4	Marende BE. No. 118 : 1 – 2 “Paian Ma Di Hami”

Jamita : LUKAS 14 : 25 – 33    

“NARADE SUMEAHON DIRI, I DO NAPATUT SISEAN NI JESUS”

Hamu angka dongan sahaporseaon!

Marragam taida na masa di torop halak, songon dia parjadina ibana boi manang gabe saut sahalak Pahalado “siseanni Jesus” manang si ihuthon Ibana. Adong do i na dielekelek alai sai manjua, adong do sahali dielek pintor mangoloi, adong do i manjukjukkhon dirina (pajolojolohon), adong muse do na dijujui keluarga manang sisolhot, ndada ala sian rohana. Jala dung saut nasida marhalado (partohonan) marragam ma nang na masa na taida di hadirion ni angka Parhalado i. Na masa diturpuk on na tongon torop do na sai paihutihut  Jesus (berduyun-duyun), jala nasida na sai paihutihut Jesus i hirim do roha nasida asa tarpillit nasida gabe siseanNa. Tangkas do dipaandar Jesus tu natorop i, songon dia do halak na patut (syarat) na gabe siihuthon Ibana, ai diboto Jesus do tung marasing situtu do parrohaon ni natorop i, sian angka halak na naeng gabe sisean (calon murid).

Alani i, adong ma tolu hatauon (syarat) na gabe sisean ni Jesus na dipaandar di turpuk on.

1.      Manghasogohon amana, inana, ………. Sasintongna,sai disosohon Jesus do tu angka napaihutihut Ibana songon i tu angka siseanNa asa manghaholongi angka dongan jolma songon i nang musu, alai tung andul do anggo diturpuk on, ai didok: nanaeng mangihuthon Ibana ingkon manghasogohon amana, inana, naniolina, anakhonna, hahaanggina dohot angka ibotona, ro di hosana sandiri, dungi manuhuk silang na tu ibana (Ay.26). Ai halak na naeng gabe sisean ni Jesus ingkon rade mangadopi ragam ni angka hamaolon. Ise ma, jala piga halak ma na rade mangihuthon Ibana sahat ro di ujung?. Aha do na naeng dohonon ni Jesus, molo didok manghasogohon Amana, Inana, anakhonna? I ma; asa rade rohanta patujolohon holong ni rohanta tu Jesus. Tama ma nian humolongan rohanta di Ibana asa sian angka sisolhotta. Ndang na mandok na gabe so haholonganta natorasta dohot angka sisolhotta, alai songon dia do sikapta molo disada partingkian alani angka na masa lumobi di angka ulaon na ingkon siulahononta dung gabe sisean manang siihuthon Jesus hita, ise do sipatujoloonta? Tontu halak naung rade gabe sisean ni Jesus ingkon gumodang ma holong ni rohana tu Jesus asa tu natorasna dohot tu angka sisolhotna. Sandok, unang ma adong na mangihoti ibana,  mangambati langkana laho mangihuthon Jesus.

2.      Na rade manuhuk silang dung i mangihuthon Jesus (Ay. 27). Adong tolu na naeng ondolhonon na marhite pandohan i. I ma: pamelehonon di diri, rade mangadopi ragam ni haporsuhon dohot rade sahat tu na agoan hosa. Ai ujung ni halak na rade manuhuk silangi ma hamatean di hau na pinarsilang i songon Jesus naung apala tangkas patulushonsa marhite ulaonNa i. Halak na mangihuthon Jesus, i ma halak na mardalan dipudi ni siihuthononna, i ma Jesus. Antong songon dia naung niadopan ni Jesus; reherehe, insakinsak, pastappastap, tijur, jala sahat tu na agoan hosa, i ma angka sitaonon naung di adopi Jesus di na pinelehonNa i diriNa, tama ma songon i, nang angka sihuthon ibana. Ima tanda ni sahalak sisean manang siihuthon Jesus na rade manuhuk silang laho mangihuthon Jesus. Ai boi do tangkas di pangongkuhononta (dipamangan), alai ndang tapatuduhon marhite ngolunta siganup ari (praktekna).

Alani i halak na naeng gabe sisean manang siihuthon Jesus, ringkot jolo marrujiruji. Songon sahalak na naeng pajongjong palaspalas ingkon jolo hundul ibana mangetongi sipalahoonna tusi, manang na boi laho patulushon (ay. 28). Unang jolo dipauli ojahanna (dipungka) hape ndang tuk maon gogona (ay.29). Gabe hona hata ibana sian torop halak. Songon raja na naeng borhat mandopang musu, ingkon jolo etongonna musuna, asa botoonna sadia godang boanonna paranganna laho mandopang musui (Ay. 31-32). Songoni ma nian sahalak na naeng mangihuthon Jesus, jolo di ida ma gogona jala dipatangkas haradeonna, ai molo nunga sapala ni undukhon jala jinalo ulaon (tohonan) i, ndang adong be manang aha sidalian laho mansohot siani molo tompu ma ingkon adopan angka na masa, hamaolon, nang sitaonon i, ai ingkon sahat do ulahonon Tohonan i, tung aha pe na naeng masa (pikir dulu matang-matang sebelum anda mengambil sautu keputusan dan bertindak). Tutu, taparhatopot do marhuaso do Debata mangalehon gogo laho patukhon gogonta laho mangula uloaonta,  alai na di igil sian hita sapala naung taundukhon jala tajalo ulaon i, dilehon ma roha dibagasan padan na hot. Asa aha pe namasa dung ta jalo jala taula ulaon dung gabe siseanNa hita, hot ma pos ni roha di huaso dohot gogo ni Debata, i ma sipargogo na naeng taripar tu hita manguduti ulaon i, unang be adong panolsolion manang gabe mansoadahon Jesus di ngoluna.

3.      Manadinghon nasa na di ibana (melepaskan segalanya, ay. 33): Godang do na gabe ambatambat di sasahalak laho mangihuthon Jesus. Aha ma na mangambat langkanta?: sangkap ni roha (citacita), Ulaon (Profesi dan Karier), dohot masa depan. Boi do tadinghononta luhutna i molo dung gabe sisean ni Jesus hita? Sotung do maon, dung ditonga dalan gabe angka i na mangambati langkanta laho mangulahon ulaonta hombar tu parsuruon ni Jesus dung gabe siseanNa hita.

Sambintas; boi do maralo pandohan i di rohanta songon halak na porsea hita,  ai tahaporseai basabasa ni Debata do saluhutna na ginoaran ondeng, hape didok manang ise nanaeng mangihuthon Jesus ingkon tadinghononta do angka i. Boa do tutu?  dia do sioloan? Molo tinadinghon angka i, sotung maon didokna so taargahon jala ndang taparhaseang pasupasu naung pinasahatNa i tu hita, hape molo so ta tadinghon,  ndang patut hita gabe siseanNa. On do na naeng dohononNa: molo tapangke angka pasupasuNa i gabe panumpahi (pendukung) laho patujolohon ulaon parsuruon ni Debata songon siseanNa hita, disi do tarida paboa tapatujolo uloan ni Debata. Alai unang ma gabe ambatambat angka basabasa i di angka langkanta laho mangulahon ulaon parsuruonNa i.

Pos ma rohanta di Ibana, marhuaso do Ibana pasingkophon nasa na ringkot di hita, mangalehon gogo mangadopi angka hamaolon na taadopi nang pe sahat tu naingkon agoan hosa hita, molo tapatujolo Ibana, gabe mararga ma hita di Ibana, nang pe sipata so mararga hita dietong portibi on holan laho patuduhon hadirionta songon siihuthon Kristus. Rade ma rohanta patujolohon Debata sian angka sisolhotta,  manuhuk silang laho mangihuthon Ibana jala manandinghon nasa na adong di hita laho patujolohon ulaon ni Debata. Martua ma halak na rade di jou laho mangihuthon Ibana. Oloi ma panjouon i, asa martua ho dohot pinomparmu sogot. Amen.

Bahan Diskusi:

1. Tapanghilalahon dope nuaeng diparngoluonta, naung piniliit ni Tuhan Debata marhite Tuhan Jesus Kristus hita gabe halak Kristen?

2. Aha do na tapatujolo di bagasan ngolunta songon sisean ni Jesus Kristus hita di portibion?

5	Marende BE. No. 716 : 1 + 3 “Di Na Mamolus Sandok Ngolu On”
6	Tangiang Sian Natoras	Tangiang Sian Ruas Na Ro
7	Marende BE. No. 720 : 1 – 2 “Naeng Marsinondang Ngolungku”
8	Tangiang Sian Anggota Keluarga		Tangiang Sian Na Manjabui
9	Marende BE. No. 727 : 1--- “Hupillit Asa Marparbue” (P.Pelean)
10	Panutup Tangiang Ale Amanami Amen (3x) HKBP	Panutup Tangiang Pelean – Tangiang Ale Amanami Pasupasu – Amen (3x) HKBP

Panurat : Pdt. Lamhot Simbolon, S.Th

Pandita HKBP Resort Teluk Pule Dalam