Minggu UJUNG TAON PARHURIAON
20 NOVEMBER 2022
No |
Partangiangan Keluarga |
Partangiangan Sektor / Wijk / Lunggu |
1 |
Marende BE. No. 753 : 1 – 2
“Dipardalanan Jesus Dijolongku” |
|
2 |
Tangiang Pamuhai |
Votum : A.XX.A –
D.XIII.75 |
3 |
Manjaha Turpuk : 1 Korint 15 :
50 – 58 |
|
4 |
Marende BE. No. 787 : 1 + 7
“Ingkon Monang Hita” |
Jamita : PARJAMITA 8 : 9 – 17
“ DIPAMONANG DEBATA HITA MARHITE
JESUS KRISTUS”
Hamu
angka dongan sahaporseaon!
Ditongatonga ni parngoluan on,
godang do masa angka na maol antusan ni pingkiran. Torop do tabereng halak parjahat
na sai denggan jala sonang parngoluonna, hira soada hasusaan manang boban ni ngoluna.
Hape muba ma hita naung mansai loja manjalahi na hinirim ni rohanta sian dalan na
sintong, alai ndang ra dapot hita na tajalahi i.
Realita si songonon do tong na pinarrohahon
ni panurat ni buku Parjamita on. Olo do hira na denggan jala sonang ngolu ni angka
parjahati sahat tu ujung ni ngoluna, baliksa halak partigori hira na marhasusaan
torus sahat tu ujung ni ngoluna. Pola didok ibana di ayat 14, suhar do upa jinalo ni jolma i. Dijalo parjahat do na denggan
hira upa ni ngolu ni halak partigor, baliksa di jalo partigori do na roa hira upa
ni halak parjahat. Longang situtu ma tahe roha marnidasa, ndang dapot antusan.
Alai bagas do dirimangi Parjamita
on realitasi, ndada gabe mangapian manang mangiburu rohana mida halak parjahati,
jala ndada pesimis ibana di hinaringkot ni na mangulahon na tigor jala paholang
diri sian angka ulaon hajahaton. Sadalan ma i tu panatapan ni par-Psalmen
"sai unang ma mohop ateatem mida angka parjahati, jala unang mangiburu ho
mida angka siulahon hajungkingon (Psalmen 37:1)".
Boi do tutu hira na denggan jala sonang
ngolu ni parjahati idaonta sian duru, sasintongna ndang adong anggo hadameon dohot
hasonangan di ngoluni i. Dapotna pe ragam ni na hinirimna sian angka dalan na
so sintong, ndada tuk i mambaen sombu panghilalaanna, sai lalap hurang do
panghilalaanna. Ai songon halinu do sude na sa na ni dapotna i, habis di
tingkina. Loja do roha dohot pingkiranna ganup ari, ndang dapot paradianan ni tondina.
Unang mohop rohanta marnida nasida,
jala unang mangapian manang mangiburu. Pos ma rohanta, pintor do Debata,
patupaonNa do na patut patupaon tu nasida. Sada do na ingkon sijamothononta,
ima ngolunta asa sai tongtong manjalahi dalan hasintongan jala paholang diri sian
hajahaton. Tongtong ma hita marposniroha di pangaramotion ni Debata asa tung
boi tahalashon angka silehonlehon ni Debata di tongatonga ni ngolunta.
Molo tung pe maol antusanta ragam ni
na masa di parngoluon on, unang mansohot hita manghaposi Debata. Songon na tarsurat
di Roma 11:33 "Bagasnai antong hamoraon, hapistaran dohot parbinotoan ni Debata.
Na so hasigatan do angka uhumNa jala na so habogasan do angka dalanNa".
Tongtong ma hita marposniroha di Tuhanta tung godang na so tangkas taboto di
parngoluan on. HatigoranNa ma tajalahi ai i do hatuaonta. Amen!
Bahan Diskusi:
1.
Hea do hita mangapian jala
mangiburu rohanta mida las ni roha ni angka parjahat i?
2.
Songon dia do
pangarajumion mu di silehonlehon ni Debata na jinalom? Sotung sai lupa hita
mandok mauliate tu Debata ala sai lalap mangiburu tu angka parjahati.
5 |
Marende BE. No. 373 : 1
“Mangula Hita Jolma” |
||
6 |
Tangiang Sian
Natoras |
Tangiang Sian
Ruas Na Ro |
|
7 |
Marende BE. No. 838 : 1 “Unang
Sungkunbe” |
||
8 |
Tangiang Sian
Anggota Keluarga |
Tangiang Sian Na
Manjabui |
|
9 |
Marende BE. No. 834 : 1---“Na
Masihol Do Rohangku” (P.Pelean) |
||
10 |
Panutup Tangiang Ale Amanami Amen (3x) HKBP |
Panutup Tangiang Pelean – Tangiang Ale
Amanami Pasupasu – Amen (3x) HKBP |
|
Panurat
: Pdt. W. Sitorus, M.Min
Tidak ada komentar:
Posting Komentar