PARTANGIANGAN PARHALADO PARTOHONAN DOHOT KELUARGA HKBP KISARAN KOTA Jumat, 09 September 2022

 

Partangiangan

Parhalado Partohonan Dohot Keluarga

HKBP Kisaran Kota

Jumat, 09 September 2022

=========================================================

1.      Marende BE. No. 10:1-2 “HUPUJI HUPASANGAP HO”

Ø  Hupuji hupasangap Ho Amang pardenggan basa. Ai jadijadianMu do sude angka na masa. Ditompa Ho do sasude Dagingku ro di tondi pe Pinuji ma goarMu

Ø  Saluhut na tinompaMi Naeng sonang di rohaMu. Arian dohot borngin pe Disarihon rohaMu. Nang uhum di gomgomanMi Na tigor na sintong do i Pinuji ma goarMu

2.      Votum

U    :  Marhitehite Goar ni Debata Ama dohot Goar ni AnakNa Tuhan Jesus Kristus dohot Goar ni Tondi Parbadia na tumompa langit dohot tano on. Amen. Pos situtu do rohangku, manang hamatean, manang hangoluan, manang angka surusuruan ni Debata, manang harajaon, manang hagogoon, manang angka na masa nuaeng,

H    : manang angka na ro sogot, ndang tarbahen manirangi hita sian haholongan ni roha ni Debata, na marhitehite Kristus Jesus Tuhanta i.

U    :  Anak ni Debata do hita nuaeng, jala ndang dope dipapatar, manang na gabe aha hita sogot.

H    : Alai taboto do: Anggo dung patar Ibana, gabe suman ma hita tu Ibana, ai idaonta do rupana sandiri.

U    :  Alai sian Ibana do umbahen na di bagasan Kristus Jesus hita, ai Ibana do gabe habisuhon di hita sian Debata dohot hatigoran dohot habadiaon dohot haluaon. Haleluya. Martangiang ma hita : Ale Tuhan Debata, Pargogo na so hatudosan jala Parasiroha! Hupaserep hami rohanami di joloM jala hupangido hami tu Ho, sai lehon asi ni rohaM manggohi rohanami, jala sondangi rohanami marhitehite TondiM, asa lam hutinggalhon hami nasa dosanami, jala hutangihon hami HataM na badia i. Sai paian ma HataM di bagasanan rohanami, asa marparbue na denggan hami. Hupangido hami saluhutna i marhitehite Tuhan Jesus Kristus Tuhannami. Amen.

 

3.      Manjaha Turpuk

U    :  Manjaha turpuk sian Psalmen 113:1-9. Halleluya! Mamuji ma hamu, ale angka naposo ni Jahowa, puji hamu ma goar ni Jahowa!

H    : Pinuji ma goar ni Jahowa olat ni on ro di salelenglelengna.

U    :  Sian habinsaran ni mata ni ari ro di hasundutanna do sipujion goar ni Jahowa.

H    : Tumimbul do Jahowa sian luhut angka bangso, diginjang ni angka langit do hamuliaonna i.

U    :  Tung ise ma songon Jahowa, Debatanta i? Timbo Ibana marhabangsa.

H    : Hape dipaserep dirina manatap na di angka banua ginjang dohot na di tano on.

U    :  Ibana pahehehon na metmet sian orbuk, dipatimbul do na pogos i sian gambo.

H    : Laho pahundulhon ibana top dohot angka raja ni bangsona.

U    :  Ibana paian parompuan na hol di jabu, gabe ina na las roha mida angka anakna. Halleluya! Ido sahatna. Martua do na tumangihon hata ni Debata na umpeopsa. Amen.

4.      Marende BE. No. 650:2 “DIPASADA HOLONGNA I”

Ø  Sada do panghirimon i, dibagasan panjouon i,

Taradoti hasadaon ni Tondi i, pinadomu ni dame i.

5.      Sipahusorhusoron di Tohonan

U    :  Dibagasan parsuruon ni Debata, tangkas di peoponta di poda i na mandok : Ramoti hamu ma saluhut pangisi ni Huria i, angka na mabalu, angka ama, ina, dolidoli dohot anakboru, maniru pambahenan ni Apostel Paulus. Sai ture ma parangemuna, asa tau tiruan hamu di angka na pinarmahanmuna i, tiruan di hata, di pangalaho, di haporseaon dohot di holong ni roha.

H    : Asi ma rohaM di hami ale Tuhan, saut di Ho ma saluhutna.

U    :  Taingot ma na nidok ni Hata ni Debata: Ingkon unang marhaurahon Sintua i, harajaan ni sada boruboru, unang parmabuk, na marroha, na ture marparange, na las roha di tamue, pangajari, unang sisobur tuak, unang pangalinsingi, unang parpangomoan na so tama, alai ingkon partalup ni roha do, na so parbada, na so impolan di perak, na denggan mengarajai donganna sabagas, parianakhon sioloi ajar di bagasan nasa hatomanon. Ai molo adong manang ise, na so malo manggomgomi isi ni bagasana tung beha ma tarpaturesa Huria ni Debata.

H    : Asi ma rohaM di hami ale Tuhan, saut di Ho ma saluhutna.

U    :  Jamitahon ma Hata hangoluan na tarsurat di Padan na Robi dohot di Padan na Imbaru di tongatonga ni Huria naung pinasahatNa tu hita songon parmahan ni birubiru ni Tuhanta, i ma angka ruas ni Huria na balga nang na metmet, na poso dohot na matua, na marsahit, dohot na hisar, na jengkel dohot na burju. Apulon do angka na marsak, tungkolan ma angka na mabalu dohot angka na tading maetek.

H    : Asi ma rohaM di hami ale Tuhan, saut di Ho ma saluhutna.

U    :  Pangula ni Huria do hita mangaradoti angka ulaon parasinirohaon di tongatonga ni Huria dohot di masyarakat, pangapulion di sitaonon, panungkolan di pandelean, panogunoguon di panjagaan hahipason ni pamatang, hobas patupa pangurupion.

H    : Asi ma rohaM di hami ale Tuhan, saut di Ho ma saluhutna.

U    :  Dasdasi ma dongan tu parmingguon, mamatamatahon di bagasan paminsangon di nasa parange na hurang ture, maningkir angka na marsahit, mangapuli angka na marsak, paturehon angka na pogos dohot na dangol, mangurupi paturehon angka guguan dohot ulaon na ringkot tu Harajaon ni Debata.

H    : Asi ma rohaM di hami ale Tuhan, saut di Ho ma saluhutna. Tung saluhutna hupatupa jala huulahon hami dibagasan gogo nang panghaholongiM, Tuhan.

U+H : Amen

6.      Marende BE. No. 28:1+6 “HATA NI JAHOWA”

Ø  Hata ni Jahowa sipadame jolma hangoluan i

Halalas ni roha siapuli roha ni na marsak i

Gogo ni Debatangki paluahon na porsea sian nasa jea.

Ø  I do haojahan na tongtong manahan salelengna

I hajongjonganhu i do haposanhu hangoluanhi

Gogongki tongtong ma i mangihuthon tu hataMa, lao mambaen lomoNa.

 

7.      Jamita : Lukas 16:1-13

8.      Marende BE. No. 476:2-3 “NDADA AU GURU DI AU”

Ø  Ndang di au, di Tuhan Jesus, daging dohot rohangki. Saluhutna hupasahat tu Ho Jesus Tuhanki. Ndang be au guru di au, Jesus na humophop au, nampuna au. Tung saleleng au mangolu, Jesus do nampuna au.

9.      Tangiang sian na manghasuhuthon

10.  Marende BE. No. 492:1 “NA MORA TUTU”

Ø  Na mora tutu, sangap damang i, Ibana nampuna sude arta i. Nang sere, nang perak, nang hepeng sude. Tapuji Ibana, unduk hita be. AnakhonNa do au, anakhonNa do au, dibaen Tuhan Jesus, anakhonNa do au.

11.  Tangiang sian na ro

12.  Marende BE. No. 467:1… “ASI NI ROHAM HUPUJI”

(Papungu Pelean)

Ø  Asi ni rohaM hupuji ala Ho manobus au. Dipaias Ho rohangku, gabe soranganMu au. IngananMu rohanami, TondiMi manggohi i. Pangke dohot ngolunami gabe ulaulaMi

Ø  Sai ramoti ma rohangku, asa boi gohanMu au. Sai mabaor ma pasupasu, nang marhite sian au. IngananMu rohanami, TondiMi manggohi i. Pangke dohot ngolunami gabe ulaulaMi.

Ø  Naeng huhatindangkon hami, hagogoonMi tongtong. Paluahon na mardosa, nang parjahat na bolong. IngananMu rohanami, TondiMi manggohi i. Pangke dohot ngolunami gabe ulaulaMi.

13.  Tangiang Panutup