Jamita : PSALMEN 145 : 17 – 21 “ MARSIHOHOT DIBAGASAN PODA NI JESUS KRISTUS”

 

Minggu XXI DUNG TRINITATIS

06 NOVEMBER 2022

No	Partangiangan Keluarga	Partangiangan Sektor / Wijk / Lunggu
1	Marende BE. No. 640 : 1 + 3 “Haholongon Sian Ginjang”
2	Tangiang Pamuhai	Votum : A.XV.A.1 – D.XIII.56
3	Manjaha Turpuk : 2 Tessalonik 2 : 13 – 17
4	Marende BE. No. 30 : 1 – 2 “Jesus Lehon Hatorangan”

Jamita : PSALMEN 145 : 17 – 21       

“ MARSIHOHOT DIBAGASAN PODA NI JESUS KRISTUS”

Hamu angka dongan sahaporseaon!

Boasa muramura jolma mananggalhon hoaporseaonna manang so pos rohana maradophon Tuhan Debata Jahowa. Jempek do bahenon anggo alus ni i, ima : ala hurang dipanghilalahon pangurupion ni Tuhan Debata dibagasan ngluna. Na so mangantusi angka ulaon na pinamasa ni Tuhan Debata dibagasan ngoluna. Na so satia di angka proses na binahen ni Tuhan Debata dingoluna. Marhite Turpuk naeng arahonon ni panurat buku Psalmen on ma hita asa lam umbagas manada ise do Debata na tasomba i. Tontu molo nunga bagas hita mananda Debata, diarahan panandaioni ma hita laho hot marhaporseaon tu Tuhan Debata jala tongtong marposniroha tu Debata manang aha na masa dibagasan ngolunta be. Laos ido naeng idaonta sian hadirion ni raja Daud na tarbarita na gabe panurat buku Psalmen on rap dohot angka donganna. Diparngoluonna songon sahalak raja, ndang gabe so dibolus ibana ragama ni na masa songon na tabolus, lobi sian na tabolus i nunga di bolus ibana dibagasan ngoluna. Alai idaonta ma hot ni haporseaonna maradophon Tuhan Debata, marsihohot do tongtong ibana mangulahon parenta ni Tuhan Debata Jahowa. Naeng tanampunahon ma nian pangalaho sisongoni dibagasan ngolunta. Alai boha do dibahen raja Daud; ima marhite Panandaionna na tangkas tu Tuhan Debata Jahowa na manompa langit dohot tano on.

Marhite panandaionna i ma jumpa pos ni roha  di ibana tu Tuhan Debata Jahowa, gabe sai girgir ma ibana mangulahon angka na patut ulahononna songon sahalak na porsea di Tuhan Debata. Ai dihatindanghon ibana do : Na bonar do Jahowa/ TUHAN itu adil (ay. 17); sian on idaonta ma habonaran (Keadilan) ni Tuhan Debata Jahowa na mambahen ngolu ni angka na porsea i tongtong marsihohot mangulahon angka na denggan dibagasan di ngoluna. Baloshonon ni Tuhan Debata do saluhut angka ulaonta i marhite habonaranNa. Diuduti ma muse marhite pandohan : Donok do Jahowa../ TUHAN dekat pada setiap orang..(ay.18). Ndang olo marsombusombu Tuhan Debata di angka na tahangaluthon di tonga ni portibion, tongtong jonok do Ibana di angka na manjou Ibana sian nasa haporseaon. Antong hita pe antong lam tapajonok ma tu Tuhan Debata Jahowa. Alani hajonohon ni Tuhan Debata tu hita gabe sai rade do ibana pasauthon angka na tapangido jala sai ditangihon do angka anggukta. Alani hajohononi gabe dihilala ibana do angka na tahilala, on ma na ginoaranna Debata na tasombai ima Debata na parsidhohot manaon angka na masa dibagasan ngolunta (Allah yang turu menderita), alai laos Ibana ma muse na mangapuli hita saluhutna asa tongtong margogo hita. Gabe malua ma angka na porseai sian angka na hinangaluthonna di portibion.

Sian sude naung binahen ni Tuhan Debata i, patut do antong parsidohot hita songon par-Psalmen i manghatindanghon, mamaritahon, mamuji, pasangaphon goar ni Tuhan Debata Jahowa. Asa tung mangolu ma hita saluhut di aturan naung binahen ni Tuhan Debata Jahowa dibagasan ngolunta songon sahalak na porsea di Ibana dibagasan goar ni Tuhan Jesus Kristus. Marsihohot dibagasan Poda ni Jesus Krsitus, ima dalanta manghatindanghon Tuhan Debata Jahowa dibagsan ngolunta ganup marsadasada. Cara yang terbaik untuk memuji Tuhan Allah adalah dengan melakukan segala peritnahNya yang telak Dia nyatakan dalam nama Tuhan Yesus Kristus. Gabe jolma na satia ma hita di tonga ni portibion mangulahon lomo ni rohaNa, ala Tuhan Debata na tahaposeai pe, Debata na satia do i mamasumasu ngolunta salelengna. Amen. 

Bahan Diskusi:

1. Boha do panandaionta di Tuhan Debata Jahowa?

2. Aha do naingkon siulahononta mangahatindanghon Tuhan Debata dibagasan ngolunta?

5	Marende BE. No. 765 : 1 “Tung Pe Munsat Angka Dolok”
6	Tangiang Sian Natoras	Tangiang Sian Ruas Na Ro
7	Marende BE. No. 769 : 1 “Tu Debata Panghirimon”
8	Tangiang Sian Anggota Keluarga		Tangiang Sian Na Manjabui
9	Marende BE. No. 753 : 1---“Di Pardalanan Jesus Di Ngolungku” (P.Pelean)
10	Panutup Tangiang Ale Amanami Amen (3x) HKBP	Panutup Tangiang Pelean – Tangiang Ale Amanami Pasupasu – Amen (3x) HKBP

Panurat : Pdt. Tulus H.P. Sianturi, S.Th

Pandita HKBP Resort Sukarame