Jamita : LUKAS 21 : 7 – 19 “NA RO MA ARI NI TUHAN I”

 

Minggu XXII DUNG TRINITATIS

13 NOVEMBER 2022

No	Partangiangan Keluarga	Partangiangan Sektor / Wijk / Lunggu
1	Marende BE. No. 14:1-2“PUJI HAMU JAHOWA TUTU”
2	Tangiang Pamuhai	Votum : A.XV.A.2 – D.XIII.57
3	Manjaha Turpuk : MALEAKHI 3 : 19 – 24
4	Marende BE. No. 28:1-2 “HATA NI JAHOWA”

Jamita : LUKAS 21 : 7 – 19       

“Na Ro ma Ari Ni Tuhan I”

Hamu angka dongan sahaporseaon!

Las ni roha ni jolma do mamboto saluhut angka  na naeng masa. Laos boi do dohonon ingkon luluan na do cara asa tarbahen ibana mamboto dinasaluhutnai.  Hape maol do ni boto ia giot ni parrohaon na songon on sipata mambahen jolma madabu tu bagasan persoalan nang pangunjunan na mambahen madabu nang tartuktuk ibana tu pangunjunan nang dosa.  Terkadang sifat dan tabiat ingin tahu manusia membuat manusia menjadi lupa diri dan batasan ketidakmampuannya yang membawa dirinya kepada kehancuran. Nang songon i do gombaran ni angka sisean ni Tuhan Jesus dung ditaringot Jesus taringot tu angka na masa na balga di Joro ni Debata.

Somal do panandaion ni angka sisean sian nasa hata na nidok ni Tuhan Jesus sai diparrohai angka sisean i marhite angka tanda songon hasintongan sian angka hata i. Alai ndang taringot tu angka tanda na di roha ni sisean i na naeng dohonon ni Tuhanta Jesus alai taringot tu pangaradeon diri dohot togu di haporseaon di hataNa nang di nasa parsuruon taringot Baritanauli di masa sogot. Memang sai na adong do pangantusion di nasida molo Ari Tuhan tu dos do i dohot hasesega ni Joro i suang songon i  haroro ni Mesias na padalanhon angka uhum na sian Debata dohot tingki di ari ni Tuhan i naro ma angka parjahat i paposhon angka partigor.

Taringot tu Ari ni Tuhan i, ingkon tumangkas do di nasa panjagaan diri nang roha. Ido na rumingkot. Tung mansai torop do na ro angka parpoda haliluon, bidat,  pangajar nalipe na mamboan goar ni Tuhan i asa mambahen roha ni jolma manimbil sian dalan hasintongan i. Tutu molo diramoti jala dijaga jolma do parrohaonna i ndada be hatahuton nang songgot ni roha mangarajai rohana. Ala angka na masa i, ingkon masa do i alai ndang na gabe pangarajaion ni roha jolma manontohon tung andigan do masa i. Molo angka na masa ingkon masa do i. Dipapatar Baritanauli Lukas do pitu tanda hamamasa ari ni Tuhan i.

Na ringkot pinarade di na manaringoti ari ni Tuhan i ima di ayat 12-17. Botoon ma na ingkon hinasogohon jala ditulak portibion do hita alani GoarNa. Manang aha nang ise pe i ndang be adong na tau haposan di na saluhutna alani GoarNa. Lapatan na disi, idaon ma  rumingkot na parjolo sahali binoto parsitutuon ni roha di bagasan GoarNa ndada jumolo angka tanda taringot tu Ari ni Tuhan i na masa di portibion. Ala jumolo do sahat angka tanda i di roha ni angka naporsea na ingkon dipusa jala dilele portibion do alani Goar ni Tuhan i. Dipatupa portibion do parmusuon nang hagunturon tu angka na porsea dibagasan GoarNa. Holan i, dipapos angka na porsea i do rohana nang panghirimonna alani Tuhan i. Jala didok  do “Ai Ahu mangalehon tu hamu soara dohot habisuhon, na so bolas aloon nang alusan ni angka musumuna” dohot “Jalana so tupa mago sada obuk sian ulumuna. Marhitehite benget ni roha do malua hosamuna.”

Huria ni Tuhanta, turpuk on manjou hita tu bagasan panghirimon dohot pos ni roha na manongtong dibagasan haporseaonta i marhitehite Tuhanta Jesus Kristus. Di roha ni angka naporsea ndang gabe parungkilon di nasida taringot tu Ari ni Tuhan i. Manang sadiharina pe masa i, ndang na gabe i na rumingkot di roha ni hita angka na porsea. Ido songon na nidok ni Apostel Paulus nang Surat Petrus na mandok  “na songon panangko borngin do haroro ni ari ni Tuhan i.” Holan i, tanda marhite hata ondeng paboahon tu hita asa paradehon, paturehon diri, patogu panghirimon, nang pahot haporseaon di angka na masa di na saluhutna. Sai unang gabe pargale hita ala ragam haporsuhon alani haporseaonta i. Ai  didok Apostel Paulus do “Alai lumobi sian i dope, ai itahalashon do nang angka haporsuhon, ala taboto, dihorhon haporsuhon i do habengeton ni roha. Jala dihorhon habengeton ni roha i do hatauon, jala hatauon i do mangkorhon pangkirimon. Alai ndang na murak hita bahenon ni pangkirimon i, ala nunga diusehon tubagasan rohanta holong ni roha ni Debata marhitehiteTondi Parbadia, naung ni lehonNa i tu hita.” (Rom 5:3-5).

Na ro ma ari ni Tuhan i, naung mangarade ma disi angka na porsea i manghatindanghon hasangapon nang harajaon ni Tuhantai. Ndang rumingkot panangkasion sian pingkiran ni hajolmaon manimbangi ari ni Tuhan i alai taringot ari ni Tuhan i ma sada kepastian di hamamasana songon na nidok ni Tuhan Jesus. Alani i do togihon do hita tu pos ni roha ai diramoti jala diparbisuhi Debata do hita manghatindanghon hasangapon dohot harajaonNa.  Unang ma ganggu rohanta disi. Amen!

Bahan Diskusi:

1.    Tung aha do ulahononta nuaeng dung dilumbahon hata ni Debata tu hita taringot tu na ro ma ari ni Tuhan i?

2.    Nang masa pe na nidok taringot tu Ari ni Tuhan i masa ma hasesega dohot hagunturon di portibion. Umbegesa, boha do pangaradeon ni rohanta taringot tusi asa manongtong hita manghatindanghon Tuhanta i?

5	Marende BE. No. 539:1 – 2  “Sai Hutagam Do Tuhanhu”
6	Tangiang Sian Natoras	Tangiang Sian Ruas Na Ro
7	Marende BE. No. 437:3 “Tung Na Muba Rohangku”
8	Tangiang Sian Anggota Keluarga		Tangiang Sian Na Manjabui
9	Marende BE. No. 476:1… “Asi Ni Roham Hupuji” (P.Pelean)
10	Panutup Tangiang Ale Amanami Amen (3x) HKBP	Panutup Tangiang Pelean – Tangiang Ale Amanami Pasupasu – Amen (3x) HKBP

Panurat : Pdt. Albert Pasaribu, S.Th

Pandita HKBP Kisaran Kota Resort Kisaran