Jamita : 2 Samuel 11:1-15 MARHUASO DO JESUS MANARIHON NGOLUNTA

 

  

                                                   Jamita : 2 Samuel 11:1-15

 

MARHUASO DO JESUS MANARIHON NGOLUNTA

 

Adong pandohan Bahasa Indonesia na mandok Penyesalan selalu datang terlambat, tetapi lebih baik terlambat daripada tidak sama sekali. Sude jolma do hea mangulahon angka hasalaan jala ndang adong jolma na sempurna. Ido bangkona, molo so tartuktuk dope ndang diboto didia angka na hurang dibagasan ngoluna, molo nunga madabu lam manat ma hita asa unang tarrrobung paduahalihon. Songon i ma nang na masa di Raja David, ima sada hasalaan na so nihalomohon ni roha ni Debata, boi do lam rarat dosa i molo so pintor mananda hita di angka hasalaanta.

Huria ni Tuhanta…Di tingki parporangan maralo bangso Amon, disuru raja David ma si Joab dohot angka naposona bahen donganna ro di sandok Israel, asa disiaphon nasida halak Amon na di tungkan huta Rabba. Tinggal di Jerusalem do anggo raja David. Dung i marhira bodari, mardalandalan ibana di atas tarup ni bagas ni rajai, gabe diida ma sian atas tarup i sada parompuan na maridi, uli situtu do rupa ni parompuan i. Disuru si Raja David ma suruanna asa ditangkasi pangalaho ni parompuan i, gabe didok halak ma: Nda si Batseba do i, boru ni si Eliam, jolma ni si Uria, marga Het i? Disuru ibana ma suruanna mangalap si Betseba laos diangkupi. On ma sibonsiri ni raja David madabu tu dosa, dioloi ibana hagiot ni daging (Pat Gal. 5:19-21) mambuat si Batseba jolma ni si Uria gabe jolmana laos gabegabean. Songon na tarsurat di Jakobus 1:14-15, Alai ditaiti jala dipaelaela sangkapsangkap ni rohana sandiri do ganup, umbahen na tarunjun. Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean.

Huria ni Tuhanta…Laho manutupi hasalaan ni raja David, dipatupa ibana do angka cara, ima manjou si Uria mulak tu bagasna hape ndang di oloi si Uria (ay.8),

Dung i diontang Raja David ma ibana, asa mangan di adopanna jala minum, pola mabuk ibana dibahen (ay.11) hape tong ndang mulak ibana tu bagasna. Dung i jut ma roha ni raja David, manogotna i muse disurat raja David ma sada surat tu si Joab, jala si Uria panongosanna dibahen. Na mandok : Patongon hamu ma si Uria tungkan na sumobu marporang, jala lumindak hamu sian pudina, asa hona ibana laos mate, (ay.15) dibahen si Joab do songon tona ni Raja i, jala laos mate ma si Uria diparporangan i. Ala biar ni roha ni raja David taringot tu pangalangkupnonna tu si Batseba, gabe tubu ma sangkap ni rohana mamunu si Uria asa dibuat ibana si Batseba gabe jolmana. Dipinsang Debata raja David marhite umpama, disuru Debata ma si Natan laho paingothon raja David taringot tu angka hasalaanna (Pat. 2 Sam 12:1-31; Psalm 51:1-21), gabe manolsoli ma raja David tu Debata. Sian on boi idaonta sifat dohot karakter ni raja David na toruk marroha nang pe ibana sahalak raja alai olo do ibana dipasingot Debata marhite si Natan. Disolsoli ibana do angka hasalaanna, dipauba ibana do rohana jala mulak tu dalan ni Debata.

Huria ni Tuhanta…On ma jotjot masa dibagasan ngolunta, maol mangarajai diri/hagiotta. Jangan terlalu serakah, hamauliatehon ma luhut na adong di ho. Unang pangasahon nasa na adong di ho, jala roha marpanarihon maradophon dongan. Diangka hata sipaingot sian angka donganta dao ma angka muruk, pangarimason nang jut ni roha, alai tarimangi ma angka na taula asa lam mananda hita diangka hahuranganta jala olo hita ro tu Debata mangokuhon angka dosanta, songon na nidok ni Debata : … “tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana…” (Hesekiel 33:11).

Tarpatudos do ngolunta on songon sada parporangan, ganup ari do hita ingkon marporang mangalo hagiot ni dagingnta dohot sibolis, Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i (Epesus 6:12). Disiala ni i, unang marnaloja hita mangalo sibolis i, Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna (1 Pet. 5:8). Amen.

Bahan Diskusi:

1.      Songon dia do responta, molo adong donganta paingothon hita diangka hasalaanta?

2.      Molo naung mananda hita diangka hahuranganta, aha do na patut taula tanda naung tinobus ni Debata hita?

Pdt. Victor Arie Sitorus, S.Th. Pendeta HKBP Resort Simpang Empat

 

Jamita : Markus 6:30-34 JAHOWA MARMAHANI BANGSONA

 

                                                                                            Jamita : Markus 6:30-34

 

JAHOWA MARMAHANI BANGSONA

Di portibion sai adong do jumpang pangalaho na so parduli be tu angka dongan nang tu na humaliangna. Marlomolomo holan pasonangkon dirina sandiri, dang dietong be dosa molo gabe sioksiok (menderita) donganna alani parangena dohot pambahenanna na so ture maradophon halak na asing. Angka persoalan na songon i, didia do posisinta? Mambahen halak na asing do gabe sioksiok (menderita) manang hita do na dibaen halak na asing sioksiok (menderita). Naeng dohonon ni turpuk on, unang ma adong nian sian hita na sai olo mambahen donganta gabe korban holan alani na pasonangkon dirinta sandiri. Denggan na i, jala uli na i molo taronjar rohanta tongtong mangolu di bagasan holong ni roha, parasinirohaon maradophon saluhut na humaliang hita.

Gabe parmahan do hita marmahani donganta na dibagasan sitaonon, hasusaan unang tarunjun nasida tu hamagoan. Molo parduli hita di angka sitaonon ni dongan, hapogoson ni dongan nunga parsidohot hita disi palumbangkon/ paneangkon panghilalaan nasida. Ulaonta maradophon angka na humaliang hita unang ma nian manambai holso, sitaonon, hapogoson ni dongan alai gabe pangurupi ma hita laho palumbangkon panghilalaan ni na hansitan i ma nian. Tarsunggul ma rohanta di denggan basa ni Tuhanta naung tajalo dibagasan ngolunta na sai tongtong marholong ni roha jala marasi ni roha maradophon hita.

Tarpatupa Tuhanta i do sude na so tarpatupa jolma. Tung halongangan do sude angka pambahenan ni Jahowa. Di turpuk on molo tajaha sahat tu ayat 44 dapot hita ma nanaeng dohonon ni turpuk on, i ma panarihonon ni Jesus tu saluhut jolma. Disarihon Jesus do parngoluon ni natorop i ndada holan mangajarhon hata ni Debata, alai dohot do nang na ringkot di parngoluon si ganup ari. Di turpuk on boi taida dilehon Jesus lima ribu halak mangan marhite lima roti dohot dua dengke. Boi pe sasude masa, marhite huaso ni Debata do. Antong lam tahaporseai ma huaso ni Debata na tuk patupahon saluhutna di tano on nang maradophon dirinta ganup marsadasada.

Tung so hasuhatan do bagas ni pambahenan ni Debata di hasianganon, na so tuk hapingkiran ni jolma hape boi do dipamasa Tuhanta i. Dang dipasombu Jesus angka siseanNa so marparmahan. Nang hita pe diparmahani Tuhanta i do ganup ari. Alai angka na olo diparmahani Tuhanta i, ingkon tandaonta do soara ni Tuhanta i, jala ingkon oloanta dohot ulahononta do hata ni Debata. Ndang lomo roha ni Jahowa nanggo sada pe sian angka na pinarmahanNa i lilu, alai lomo ni rohaNa sude napinarmahanNa i mangolu dibagasan hatigoranNa. Umbahen i do di buku endenta tangkas dipatorang holong ni Tuhanta Jesus di angka na pinarmahanNa i, BE. No. 409:2 “Didok Jesus Parmahan bolon i: Siapulu sia ro. Tung so tuk holan i, na sasada i ingkon mulak ndang boi Au so. Dung i lao ma Ibana mardalan dao, dijou birubiru na tangkang na lao; dijou birubiru na tangkang na lao.”

Nang pe naung loja Jesus dohot angka siseanNa patupahon angka panghobasion marhite na mangajari angka natorop sian huta tu huta, pamalumhon angka na marsahit dohot lan angka na asing, diuduti ma muse marparau tu inganan na suhi asa disi Jesus dohot angka siseanNa mangulon(mangalap gogo). Alai dung sahat Jesus di inganan na suhi i, nunga torop halak paimahon haroro ni Jesus. Dung diida Jesus na masa i ungkap ma roha ni Jesus laho patupa ulaon parasinirohaon. Anggo dimulana i naeng mangulon do Jesus rap dohot angka siseanNa, alai dung diida na masa i ndang be na ringkot di diriNa dohot siseanNa dipatujolo alai dipatujolo do angka na ringkot di na torop i. Tung didodo Jesus do roha ni angka natorop i, ala diida sihol ni natorop i di asi ni roha ni Jesus, gabe diajari ma na torop i. Asi ni roha ni Jesus ndada holan di hata alai huhut do adong aksi (pambahenan/pangulaon). Sian on naeng gabe parsiajaran na arga ma di angka na porsea, paboa marasi ni roha ndang cukup holan di hata alai ingkon tarida do sian pambahenan.

Dang dipasombu Jesus angka na torop i so marparmahan, dibahen i do ungkap ma roha ni Jesus laho marmahani nasida. Ai dang lomo roha ni Jesus, gabe marserak na torop i manuntun lomona be. Didapothon Jesus ma natorop i, laos diajari ma nasida taringot tu harajaon ni Debata dohot mangadopi angka na masa di parngoluan on. Ndada holan natorop na digoari di turpuk on na pinarmahanan ni Jesus, alai dohot do nang hita pe diparmahani Tuhanta Jesus. Sude do angka na porsea manghatindangkon paboa Jesus i ma parmahan na denggan na mangalehon hosaNa humongkop na pinarmahanNa. Johannes 10: 11 “Parmahan na denggan do anggo Ahu. Diseahon parmahan na denggan i do hosana humophop angka birubiruna.”

Parsaoran na rosu tangkas do i tarida di ngolu parmahan dohot na pinarmahanNa. Asa gabe tangkas ma tandaon ni angka birubiru dalan hatigoran, hombar tu naniajarhon ni parmahanna. Parmahan na denggan manang tudia pe lao,

sai godang do na manghasiholi i asa boi pajumpang. Ndada holan naeng pajumpang, alai naeng ma diihuthon birubiru i parmahan i jala diulahon hatana.

 

Na boi taputihi jala na gabe sihangoluhononta marhite jamita on, i ma:

1.      Tuhan Jesus do marmahani ngolunta jala na olo sumeahon hosaNa humongkop hita pardosa, taihuthon jala taoloi ma hataNa.

2.      Diajarhon Jesus do marhite turpuk on, asa unang holan na mamingkirhon diri sandiri. Molo pe naung loja hita mangulaulaonta, alai molo adong na mangido pangurupionta tong ma taida nasida.

3.      Disarihon Jesus do angka na ringkot di saluhut na pinarmahanNa.

4.      Bereng ma arga do hita diadopan ni Tuhanta i, antong taargahon ma pambahenan ni Tuhanta i di ngolunta.

5.      Ungkap ma rohanta patupa angka na denggan maradophon na humaliang hita.

 

Bahan Diskusi :

1.      Dia ma rumang parmahanion ni Debata di ngolum?

2.      Di Psalmen 23:1 didok Jahowa do Siparmahan au ndang tagamon hurangan ahu. Mampu do hita manghatinghonsa?

Pdt. Agus Tampubolon, M.Div. Pendeta HKBP Ressort Labuhan Ruku

Jamita : Amos 7:1-6 HIRAS NI ROHA MANGHATAHON HASINTONGAN

 

Jamita : Amos 7:1-6

 

HIRAS NI ROHA MANGHATAHON HASINTONGAN

Panurirang Amos sahalak Parmahan do ibana sian huta Tekoa donokhon Jerusalem Kota Yehuda ibu kota Israel Selatan. Disuru ibana manurirangi tu Israel Utara kota Samaria, na tongon Yerobeam na gabe raja. Singa mengaum ido ciri panurirangon ni si Amos, ala mansai tajom panurirangonna i. Hira khusus tu kalangan istana, penguasa, para imam do ditujuhon panurirangonna i. Diida Debata do i, hinatajom ni parholongan ni ngolu antara kalangan atas dan bawah, ketidakadilan merajalela, hukum dang adong gunana ai berpihak tu kalangan atas do uhum na adong. Panurirangon dohot parhobas di bagas Joro ( para Imam ) nunga sauduran dohot penguasa na manghorhon penderitaan di tongatonga ni Masyarakat. Hape tong do ringgas (aktif) mangulahon angka rytus agama, ( Perayaan agama ). Perayaan, haringgason mandalanhon ritus agama dang sadalan tu uhum,hasintongan dohot holong ni roha. Sasintong na halak na ringgas beribadah, ringgas di kegiatan agama ingkon nasida do dijolo siulahon uhum dohot hatigoran dohot holong ni roha. Ternyata berbanding terbalik do na jumpang. Masyarakat lam marpogos golongan tertentu lam mamora. Didok Panurirang Amos: Dang lomo rohangKu di ari raya dohot angka peleanmuna, mingor pinggolhu manangihon angka endemuna i ( Amos 5:21 – 25 ). Tung so lomo roha ni Debata di angka ulaon hanya sebatas ritus, hasomalan, alai dang dapot holong ni roha. Dosa dang boi ditabunihon dengan cara apapun. Tung adong ma na buni di adopan ni Debata? Diboto Debata do sude na dibagasan roha, pingkiran. Dosa yang tersembunyi akan diungkap. Hukum akan tetap berjalan, alai laos taida ma dison gogo ni tangiang ( doa syafaat ) Amos manundati uhum na naeng sipamasaon ni Debata. Beha ulaning di angka dosa na niula ni jolma, molo dang masa uhuman i, gogo ni tangiang ni angka na porsea, angka naposo ni Debata dope i ulaning.

Dipaborhat Debata ma Panurirang Amos laho mangalumbahon uhuman marhite 3 pangungkapon na niida ni si Amos pamasaon ni Debata tu bangso Israel ( Samaria ). 1. Parohon sihapor laho manganhon sude angka suansuanan nasida. 2. Parohon api laho menghanguskan nasida. 3.Tali sifat, alat pengukur, tigor dope

manang nunga miring. Holan na dua uhuman do ditaringoti diturpuk on. Parohon sihapor melenyapkan sude angka suansuanan, dohot parohon api. Taida i, songon na niida ni si Amos on, tung so adong do na manahan molo dung tarrimas Debata. Songon orbuk sambing do jolma molo tarrimas Debata. Molo diboto jolma do i, unang be sai didatdati mangulahon dosa, lumobi ma manguji manutupisa, sai hira na jonok mar-Tuhan ,hape mansai holang do sian Tuhan i. Dosa i do na paholang hita sian Tuhan i. Alai taida ma rasa empati ni si Amos tu bangso i. Rasa empati ( belas kasihan ) dibagasan tangiang elekelekna. Didok di tangiangna di ay 2, Ale Tuhan Jahowa, sai marpamuati ma rohaM. Tung beha ma panahan ni Jakob ai na metmet do ibana? Songon i dohot uhum na paduahon na parohon api, membinasakan, didok di tangiangna i : Ale Tuhan Jahowa , ua pasadi ma . Tung beha ma panahan ni Jakob jongjong ai na maetmet do ibana. Metmet ( bukanlah dia begitu lemah ). Tung so adong do gogo ni jolma i di jolo ni Debata. Tung marhabiaran ma hita, jala mansohot ma hita mangulahon dosa. Tapuji ma Tuhanta di lambas ni rohaNa mida hita jolma pardosa. Ai nunga dipelehon Jesus Tuhanta i gabe pelean pardengganan asa unang taruhum be hita ala ni dosanta. Ro ma hita tu adopanNa siparholong i, jala hiras ma rohanta laho manghatahon na sintong do Debata, jala lambat tarrimas jala siparasiroha godang. Tahangoluhon ma hatigoran, hasintongan dohot holong ni roha ni Tuhanta i.

 

Bahan Diskusi :

1.      Tangiang ni si Amos mangelek Tuhanta asa unang saut uhuman ni Debata tu bangsoNa. Aha do na boi taantusi taringot tu si ?

2.      Songon si Amos na mangondihon bangso Israel di tangiangna, beha hita tu angka donganta tadok ma jo “na mardosa” na marsala tu hita, mampu do hita songon panurirang Amos on?

 

Pdt. Sumihar Sitohang, S.Th.. Pendeta HKBP Resort Tanjung Balai

 

Jamita Epistel : 2 Korint 12:2-10 DEBATA DO PARTANOBATOANTA

 

Jamita : 2 Korint 12:2-10

 

DEBATA DO PARTANOBATOANTA

 

Huria ni Tuhanta na hinaholongan dibagasan Kristus Jesus, turpuk partangiangan on ima Surat ni Apostel Paulus tu Huria Korint na mandok taringot tu pengalaman pribadina taringot tu pambahenan ni Debata nahinatindanghonna songon na mandok Debata do Partanobatoanta. Dibagasan panindangion ni Apostel Paulus didok do dibege do hata na so tarhatahon, na so jadi dohonon ni jolma. Apala dibagasan panindangion i do dohot diparungkilhon ibana do basirbasir di sibuk songon suruan ni sibolis na mamukpuhi asa unangan pinatimbo dirina. Alani situasi na niadopan ni Apostel Paulus i, pola do pinangidona tolu hali sian Tuhan i asa sumurut angkai sian hadirionna.

Molo tauji tu bagasan ngolunta, hira na jotjotan do hita songon panghilaan ni Apostel Paulus on. Ro do pangunjunan, parungkilon, haporsuhon dohot lan na asing na manguji hita dibagasan haporseaonta i jala alani on tapangido asa sipasidingon ni Debata sian ngolunta. Sipata tapanghilalahon do mangolu hita dihaporseaonta na sintong i, taongkuhon do parsitutuon ni partangianganta nasaleleng on, tahangoluhon roha na holong maradophon dongan alai sipata ingkon diuji do hita marhite ragam pangunjunan, parungkilon, haporsuhon i asa lam margogo hita di haporseaon dohot panghirimon maradophon Debata. Jala tadok ma Debata do Partanobatanta. Jala tadok ma :” Tuk ma asi ni rohangku di ho; ai di hagaleon do sun timbul hagogoon. Asa tagonan ma hupapujipuji diringku di bagasan angka hagaleonku, asa songgop tu ahu hagogoon ni Kristus.”

Huria ni Tuhanta, tapahusorhusor dibagasan rohanta, ndada dipamago Debata ragam angka hamaolon dingolunta alai asa idaonta jala tahatindanghon do Ibana do Debata na mangurupi hita disude hamaolon di ngolunta. Ibana do Debata Partanobatoanta diangka hamaolon na masa di ngolunta. Hatiha gabe pargale hita

alanii, Debata do gabe hagogoon di hita. Apostel Paulus tung mansai tandap do mangalapati na masa i di ngoluna dibagasan haporseaon na sintong. Didok do: “Asa tagonan ma hupapujipuji diringku di bagasan angka hagaleonku, asa songgop tu ahu hagogoon ni Kristus.” Marhite on taida ma panjouon tu hita ndada mangasahon gogonta sandiri alai paingothon hita asa marsigantung jala pos rohanta tu hagogoon ni Debata. Molo songon na gale jala talu hita maradophon hamaolon ni ngolu ala haporseaonta i, tapaloas ma gogo ni Debata mangarajai hita. Amen

 

Bahan Diskusi :

1.      Ringgas do hita di ngolu partangiangon dohot parsombaon tu Debata alai sai na ro do ragam hamaolon na ingkon taadopi. Boha do sikapta mangadopisa?

2.      Dipaloas Debata do hita asa marlas ni roha jala mamuji Ibana di nasa hagaleonta. Laos dibagasan ido margogo hita jala tahatindanghon Debata do partanobatoanta. Aha do na boi tarbahen hita manosoi donganta asa margogo songon hita?

Pdt. Winner Sitorus, M.Min. Praeses HKBP                                          Distrik XIII Asahan Labuhan Batu

 

Jamita : Pangungkapon 11:15-19 RO DI SALELENGNILELENGNA DO PAMARENTAON DOHOT HARAJAON NI DEBATA

 

 Jamita : Pangungkapon 11:15-19

 

RO DI SALELENGNILELENGNA DO PAMARENTAON DOHOT HARAJAON NI DEBATA

Huria ni Tuhanta !!! ia Pangungkapon 11 : 15-19 didok ma on surat apokaliptik. Na marlapatan panurirangion taringot tu panatapan di ari parpudi. Ditaringoti ma dison taringot tu ari parpudi ( Akhir Zaman ) Nang pe dang adong jolma na umboto manang andigan masa i. Alai marhite turpuk on dipabotohon ma haroro ni Raja sian saluhut na raja na mamboan keadilan tu sude jolma. Jala na ingkon monang do angka ulaon na denggan na ni ajarhon ni Debata sian angka ulaon Hajahaton na adong di portibion.

Angka panjaha surat pangungkapon mulamula ima angka halak kristen na godang manaon na posuk dohot parungkilon alani haporseaonna laho mangihuthon Jesus. Alai dipapos ma rohani angka naporsea i paboa Jesus do nampuna huaso sian saluhutna i, na mangalehon hagogoon dohot panghirimon tu angka jolma na dibagasan parungkilon i

Suang songoni do nang di parngolunta si nuaeng on , boi do godang angka na masa isarani angka pargutugutuon, parbolat bolatan dohot ragam ni angka bencana, ndang di halomohon jolma masa angka i, alani i holan tu Debata do hita pasahathon saluhutna Ala Ibana do nampuna huaso ro disalelengnilengna.

“Dipalu surusuruan na papituhon ma sarunena”. Pandohonan on manggombarhon huaso ni Debata na so hatudosan ima marhite Jesus Kristus naung dipabangkit gabe Raja laho mangarajai hasiangan on ro disalelengnilelengna . Ibana na manogu dohot mangajari hita. Ala Ibana do Raja ingkon olo ma hita uluhononna, tunduk tu huasoNa. Sintua na dua pulu opat i pe na manggombarhon duapulu opat huria pe dipatungkap nasida do bohi nasida marsomba tu Debata, Ai marhuaso do Debata laho patundukhon sude angka na tinompaNa

Ibana do panguhum na sintong, na manguhumi jolma na mangolu dohot na mate saguru tu angka na niulana be di portibion, Di angka panguhumionna i di pasahat Ibana do upa tu angka panurirangNa nang tu angka na badia na mabiar tu goarNa,  angka  halak  na  metmet  nang  na  balga  pe  diuhumi  do  marhite

hasintonganNa, so pola mardia imbar. Alani marhasintongan ma hita jala tongtong mangolu dibagasan hasintongan. Ibana do silehon hamonangan tu halak na sintong, di bagasan hamonangan i tarungkap ma joro ni Debata na di banua ginjang i.

Dungi Tarungkap ma joro ni Debata, gabe tarida ma poti parpadananNa na di joroNa i, Poti Parpadanan ima lambang kehadiran ni Debata, lapatanna nunga patar be hamuliaon ni Debata ro tu jolma i, sude angka pangarupaon ( Ketidak adilan ) na adong di portibion ingkon marujung. Alani taungkap ma rohanta sai ro tu Bagas joro ni Debata , marnida hamuliaon ni Debata di Bagas joro i. Taraahon ma nang angka donganta rap mamuji marsomba di Bagas joro ni Debata.

Memang Benar musuh dan penderitaan tidak usah kita cari. Namun, andai itu pun tidak terelakkan lagi bahwa kita harus menderita karena iman kita, maka ingatlah pada akhirnya Kristuslah yang menang atas kuasa-kuasa jahat itu. Taat dan setialah! Toho do tutu, musu dohot parungkilon dang pola luluanta, alai tung pe so tarjua hita tahop ro parungkilon i, jala hinorhonni i mandate haporseaonta, ingkon ingotonta do di ujungna Kristus do na monang maralohon angka huaso ni parjahat i, alani unduk jala satia ma, goar ni Minggunta di Goari do Ujung Taon Parhuriaon laos parningotan ni angka na monding marlapatan doi, na marujung do hape saluhut na portibion alai anggo holong ni Tuhani i dohot huaso ni Tuhan i hot do ro di saleleng ni lelengna, Parningotan ni angka na monding, hita pe marujung do muse, alani tajalahi ma hangoluan ni Tondita saleleng dilehon dope tingki parasian i, taingot ma Ende no 802 i na mandok Pangke tingkim saonari, dapothon ma Tuhani, unang godang sidalian ingot jempek ngolumi, nunga rade hasonangan di surgo i disurgo i, unang adong nanggo sada na so parjambar disi.

 

Bahan Diskusi

1.      Molo tahop ro angka parungkilon dohot hasusaani, tu ise do hita maporus?

2.      Gabe Parjambar ma hita di hatigoran dohot Pamarentaon nang Harajaon ni Debata sisaleleng ni leleng na, antong aha ma sieahan dohot siulahononta?

 

Pdt. Budianto Sianturi, SPAK Pendeta HKBP Resort Kisaran

Jamita Epistel : 1 Samuel 2:1-10 NAMANAHAN RO DI UJUNG, IDO PALUAONNA

 

     Jamita : 1 Samuel 2:1-10

 

NAMANAHAN RO DI UJUNG, IDO PALUAONNA

 

Huria ni Tuhanta...Turpuk on ima tangiang pujipujian ni si Hanna tu Jahowa. Di jolo ni turpuk on dipatorang do ia si Hanna ima jolmani si Elkana sian huta Ramataim-Sup dolok Efraim.Sada ina na hol do si Hanna, na marsitaonon do ibana ala pambahenan ni imbangna si Penina naung marianakhon. Lea ibana di ida si Penina imbangnai pola jotjot manghansiti dohot manggitihi roha ni si Hanna, gabe mansai lungun ma panghilalaanna jala jotjot tumatangis. Songon hasomalon siganup taon, disada tingki borhat do si Hanna dohot tunggane dolina si Elkana tu Silo. Di namartangiang i si Hanna dirimpu malim Eli do na mabuk si Hanna. Dipatorang si Hanna ma dang na mabuk ibana, alai “na mangusehon saluhut na di rohana” do tu jolo ni Jahowa. Dungi dialusi Jahowa do pinangido ni rohana, gabegabean sada dakdanak baoa, si Samuel goarna ( na pinangido sian Debata).

Di tingki martangiang si Hanna mangusehon saluhut na di rohana tu Jahowa, marbagabaga do ibana, molo dioloi Jahowa tangiangna i, pasahatonna ma tu Jahowa napelehononna dakdanak i. Diingot si Hanna do bagabagana i tu Jahowa, marolop olop do ibana pasahathon dakdanak i tu Jahowa. Gabe Nazir ( ditahbiskan sebagai seorang yang mengkhususkan diri bagi Tuhan) naposo ni Debata di inganan na badia do Samuel di adopan ni Debata Jahowa. Marolopolop si Hanna manggarari bagabagana tu Jahowa. Dibagasan las ni roha mardongan pujipujian si Hanna pasahathon “tampuk ni pusupusuna” tu Jahowa.

Huria ni Tuhanta...Marolopolop si Hanna tu Jahowa jala na marlas ni roha ala :

1.      Dihaporseai ibana do Jahowa Debata na badia jala partanobatoanna. Ndang tu huaso na asing ibana mangalualuhon sude partinaonanna. Jala diokui si Hanna

do na Debata “patimbul tandukna/ ditinggikan “. Dilehon Debata hagogoon, hirtap pamanganna maradophon angka musuna.

2.      Nunga dijalo ibana angka pambahenan na denggan sian Jahowa Debata ma gabe margogo ibana manghatindanghon naung dipatimbo Debata, ido asa didok ibana ditangiangna na dihonahon tu angka na so porsea; asa unang didatdati nasida manenganengahon haginjangon ni roha, unang ruar angka hata jungkat sian pamangan nasida be, ai Jahowa do nampuna saluhutna Parbinotoan, Jahowa do mandasing ( Menguji/manilai) angka pambahenan nasida. Ala ni i, angka na so porsea na mangalo Jahowa ingkon do marponggolan angka sior ni ulubalangna. Alai tu angka na porsea, tu angka na mandate dilehon do “ hohos hatogaron” asa boi mangalo angka musuna. Dihatindanghon si Hanna do muse ditangiang na i; Pargogo na so hatudosan ( Omnipotence) do Jahowa Debata, ai boi do angka na lobian na sai laon, gabe marharinggason mangalului sipanganon. Na rapar marlanggelangge hian gabe boi mangulon. Na hol na sai laon boi tumubuhon ianakhon, jala na marianakhon na godang hian, boi gabe merus/layu.

3.      Dipabotohon do muse hagogoon ni Jahowa na boi mamunu jala pangoluhon muse. Patuathon jala panangkokhon muse. Mambahen mamora dohot mamora. Paijurhon dohot patimbulhon muse. Pahehehon sian orbuk angka jolma na tarjepol hian dohot patimbulhon angka na pogos sian gambo laho pahundulhon tu lambung ni angka nasangap. Jahowa do nampuna ojahan ni hasiangan on. Ibana mangaramoti pat ni angka na niasianNa jala mangarendephon tu haholomon angka parjahat. Jahowa do patundukhon angka jolma na mangalo Ibana, laos Jahowa manguhum angka ujung ni tano on sogot dungi patimbulaonna TANDUK NI MESIASNA.

Huria ni Tuhanta...Haporseaon dohot panghirimon ni si Hanna di turpuk on mangalehon tiruan tu ngolu ni saluhut jolma dohot hita angka naporsea. Gabe angka na marolopolop do hita molo;

1.      Taharinggashon marsaor dohot Debata marhite tangiangta. Tung ringkot ma lam ringgas manghangoluhon parsaoran dohot Debata Sitolusadai marhite na manongtong martangiang, di tongani partingkian namambahen lam “sibukna” hombar tu angka ulaonta be. Unang alani ulaon gabe “lupa” marsaor dohot Tuhan i. Unang tahalupahon mandapothon Tuhan i, manang boha pe godang ni ulaonta dohot tanggungjawabta be. Taharinghothon ma marsaor dohot Tuhan i

naung umpasupasuhon ragam ni pasupasu pardagingon nang partondion tu hita ( Epesus 1:3). Sian nasa roha dohot ateate ma hita ro tu bagas joro ni Debata, ro tu adopanNa ( Mateus 22:37). Jala porsea ma hita na ditangihon Debata do tangiangta, ai pargogo na so hatudosan do Ibana ( Omnipotence) jala parbinoto ( omniscience) huhut Maha hadir (Omnipresence). Holan i ingkon sabar do hita paimahon, sadiharina alusan ni Debata tangiangtai.

2.      Tama pujipujionta Tuhanta i, marhite na manongtong porsea jala mambahen Ibana partanobatoanta, di tonga ni sitaonon di angka “lea ni roha” ni halak maradophon hita, songon lea ni roha ni si Penina marnida si Hanna. Tahatindanghon ma Ibana pargogo na so hatudosan, na manggohi las ni rohanta. Marolopolop ma nang hita huhut gabe jolma na manggarar angka bagabaganta tu Jahowa Debata. Tahatindanghon ma na so adong na boi mangalo Debata, jala ingkon tarida mai di panggulmiton ni ngolunta siganup ari. Ai tung dihalomohon Debata do angka na serep marroha (Poda 22:4).

Molo pe tung mangadopi parungkilon i hita, rajumanta mai “didikan” tu hita asa lam matoras haporseaonta manghamonanghon saluhutna, jala lam umpos rohanta tu Jahowa Debata, Amen.

 

Bahan Diskusi :

1.      Boha do panghilalaanta molo “lea” roha ni halak tu hita? Aha ma sikapta?

2.      Hea do hita marbagabaga tu Debata molo nunga dipalua / saut na dirohanta? Molo hea, aha ma i?

Pdt. Juwita Nababan, STh Pendeta HKBP Resort Exaudi