Jamita : 2 Samuel 11:1-15 MARHUASO DO JESUS MANARIHON NGOLUNTA

 

  

                                                   Jamita : 2 Samuel 11:1-15

 

MARHUASO DO JESUS MANARIHON NGOLUNTA

 

Adong pandohan Bahasa Indonesia na mandok Penyesalan selalu datang terlambat, tetapi lebih baik terlambat daripada tidak sama sekali. Sude jolma do hea mangulahon angka hasalaan jala ndang adong jolma na sempurna. Ido bangkona, molo so tartuktuk dope ndang diboto didia angka na hurang dibagasan ngoluna, molo nunga madabu lam manat ma hita asa unang tarrrobung paduahalihon. Songon i ma nang na masa di Raja David, ima sada hasalaan na so nihalomohon ni roha ni Debata, boi do lam rarat dosa i molo so pintor mananda hita di angka hasalaanta.

Huria ni Tuhanta…Di tingki parporangan maralo bangso Amon, disuru raja David ma si Joab dohot angka naposona bahen donganna ro di sandok Israel, asa disiaphon nasida halak Amon na di tungkan huta Rabba. Tinggal di Jerusalem do anggo raja David. Dung i marhira bodari, mardalandalan ibana di atas tarup ni bagas ni rajai, gabe diida ma sian atas tarup i sada parompuan na maridi, uli situtu do rupa ni parompuan i. Disuru si Raja David ma suruanna asa ditangkasi pangalaho ni parompuan i, gabe didok halak ma: Nda si Batseba do i, boru ni si Eliam, jolma ni si Uria, marga Het i? Disuru ibana ma suruanna mangalap si Betseba laos diangkupi. On ma sibonsiri ni raja David madabu tu dosa, dioloi ibana hagiot ni daging (Pat Gal. 5:19-21) mambuat si Batseba jolma ni si Uria gabe jolmana laos gabegabean. Songon na tarsurat di Jakobus 1:14-15, Alai ditaiti jala dipaelaela sangkapsangkap ni rohana sandiri do ganup, umbahen na tarunjun. Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean.

Huria ni Tuhanta…Laho manutupi hasalaan ni raja David, dipatupa ibana do angka cara, ima manjou si Uria mulak tu bagasna hape ndang di oloi si Uria (ay.8),

Dung i diontang Raja David ma ibana, asa mangan di adopanna jala minum, pola mabuk ibana dibahen (ay.11) hape tong ndang mulak ibana tu bagasna. Dung i jut ma roha ni raja David, manogotna i muse disurat raja David ma sada surat tu si Joab, jala si Uria panongosanna dibahen. Na mandok : Patongon hamu ma si Uria tungkan na sumobu marporang, jala lumindak hamu sian pudina, asa hona ibana laos mate, (ay.15) dibahen si Joab do songon tona ni Raja i, jala laos mate ma si Uria diparporangan i. Ala biar ni roha ni raja David taringot tu pangalangkupnonna tu si Batseba, gabe tubu ma sangkap ni rohana mamunu si Uria asa dibuat ibana si Batseba gabe jolmana. Dipinsang Debata raja David marhite umpama, disuru Debata ma si Natan laho paingothon raja David taringot tu angka hasalaanna (Pat. 2 Sam 12:1-31; Psalm 51:1-21), gabe manolsoli ma raja David tu Debata. Sian on boi idaonta sifat dohot karakter ni raja David na toruk marroha nang pe ibana sahalak raja alai olo do ibana dipasingot Debata marhite si Natan. Disolsoli ibana do angka hasalaanna, dipauba ibana do rohana jala mulak tu dalan ni Debata.

Huria ni Tuhanta…On ma jotjot masa dibagasan ngolunta, maol mangarajai diri/hagiotta. Jangan terlalu serakah, hamauliatehon ma luhut na adong di ho. Unang pangasahon nasa na adong di ho, jala roha marpanarihon maradophon dongan. Diangka hata sipaingot sian angka donganta dao ma angka muruk, pangarimason nang jut ni roha, alai tarimangi ma angka na taula asa lam mananda hita diangka hahuranganta jala olo hita ro tu Debata mangokuhon angka dosanta, songon na nidok ni Debata : … “tung na so lomo do rohangku mida hamatean ni halak parjahat i, so ingkon mida hamumulak ni parjahat i tumadingkon dalanna i nian, asa mangolu ibana…” (Hesekiel 33:11).

Tarpatudos do ngolunta on songon sada parporangan, ganup ari do hita ingkon marporang mangalo hagiot ni dagingnta dohot sibolis, Ai ndada marungkil hita mangalo mudar dohot sibuk, angka harajaon do, angka parhuaso, angka sigomgomi hasiangan haholomon on, angka tondi hajahaton na di ginjang i (Epesus 6:12). Disiala ni i, unang marnaloja hita mangalo sibolis i, Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna (1 Pet. 5:8). Amen.

Bahan Diskusi:

1.      Songon dia do responta, molo adong donganta paingothon hita diangka hasalaanta?

2.      Molo naung mananda hita diangka hahuranganta, aha do na patut taula tanda naung tinobus ni Debata hita?

Pdt. Victor Arie Sitorus, S.Th. Pendeta HKBP Resort Simpang Empat